مشكلتي اعتقد بعد بحث و قراءة وتجربة مش عارف اوصل لحل و اللي وصلتله اني مريض ادمان و اها الادمان مرض و ابحاث بتقول انه وراثي كمان , مرض مش مفهوم و للاسف انه مرض مخزي و الاسواء انك في المجتمع تقريبا عار اكثر من الامراض الجنسية .
مرض الادمان بنسبة كبيرة بيكون بسبب تكدسات نفسية و يمكن بنسبة 100% كمان ,و الادمان دلوقتي مش بس بيتقال ع المخدرات او الخمور , فيه ادمان العاب و شراء و اكل و اباحيات و سوشيال ميديا و كلهم زي بعض و دة مش كلامي دة كلام متخصصين جدا .
زمان مكنتش فاهم اللي بيحصلي يعني بشرب حشيش للمزاج بمزاجي ايه المشكلة يعني طيش شباب او صياعة شوية و الموضوع اخره ايه يعني وقت لما احب ابطل هبطل (ودي اوسخ لعبة دماغنا كمدمنين بتلعبها )
طب الموضوع زاد شوية دخلت في البرشام و حشيش لا كدة لازم تدخل بقى دكاترة نفسيين اه برشام نبطل هنعمل كذا و كذا و نبطل و اها بطلت برشام و كنت فاكرني بطل لكن طلعت معملتش حاجة انا لسة مريض .
كانت كل مشاعري تقريبا بتترجم للحشيش الفرح الحزن الضغط الخوف كل حاجة تقريبا . هي دي اللغة اللي بتكلم بيها و بعبر عن مشاعري ,لغة خاصة بيا انا بس و كأن بقى السجاير و التدخين كلامي الغير منطوق و الحشيش يتواجد للتعبير عن الغضب و الصراخ , و بقى في علاقة حب بيني و بين الحشيش ماهو اللي هيشيلك في امتحاناتك و في وقت زعلك و فرحك وفي جوازك و في وقت سفرك مش هينفع متحبوش دة انت تبقى ندل بقى .و للاسف مع استمرار من الضغوط كان التدرج الطبيعي للادمان اللي طالما انكرته(الادمان ) و هو البودرة او الهروين اللي طالما استحقرتها و نبذتها و متعاطيها كمان , بس للاسف ادمان المخدرات غالبا درجات طالما استمريت لازم يكون فيه نهاية . و بدأنا في رحلة العلاج الوهمي اللي هو الامتناع عن المخدر و طبعا انتكاس امتناع انتكاس و دي دورة لازم تكتمل
و اخيرا فهمت ان مزيد من التبطيل يعني مزيد من الانتكاس و ان التبطيل مش هو الحل...هو نصف الحل.(طبعا اللي هيقرا هيقول يا نهار اسود امال عايز تفضل مدمن )
اكتشفت ان نص الحل هو في اكتشاف (تحويل المسار النفسي) اللي أرتكب في حق صدماتي زمان لتتحول نحو سلوك قهري اسعى من خلاله تخدير اوجاعي ,و التعبير بلغتي اللي اتقنتها .
السؤال بقى و يفضل الرد يكون من حد متخصص او عنده خبرة عن التعافي انا حاليا مبطل بقالي 6 شهور و للاسف انتكست مرتين (ضربت مرتين) .و كأن شيء ما جوايا بيتعمد اني مستمرش ,وكاني محكوم بقانون نفسي خفي اني محققش حاجة و افضل في نفس المكان اتحسر على الفرص و الطاقة الضائعة .و اها ان شاء الله انا ممتنع و مستمر بس انا حاليا بقيت كتير مش عارف انا مين و ازاي و المفروض اعمل ايه و ابدأ ازاي و اصلح علاقتي بمراتي ازاي اصلح حياتي ازاي و اعيش طبيعي ازاي و للاسف ملقتش دكتور نفسي يستحق اللقب اصلا اسف .انا ممتنع بقالي 6 شهور عن هيروين بس بشرب حشيش . ف المفروض اعمل ايه عشان اقدر اكون شخص طبيعي شخص عادي بيزعل و بيفرح من غير تدخلات خارجية و بالنسبة للرجوع للاساس ف الرجوع للاساس دة اللي هو ازاي ؟ او مثلا الحياة ما قبل الكارثة دة يبقى ازاي مع حد حياته كلها كارثة :)
انا فخورة بيك والله وبرحلتك إلى ماشى فيها عشان تبطل وتكون انسان افضل كل الكلام الى قلته سليم جدا عن الادمان وده بيخلينا ندور فعلا عن الأسباب والمعتقدات الرئيسية حواليه إلى بتوصلك ليه فى كتاب اسمه إرادة الإنسان فى علاج الادمان ممكن يفيدك شوية وفى منظمات خاصة بالتعافى من الادمان .. فى زمالة المدمنين المجهولين NA ودى بتشتغل على خطوات التعافى ال ١٢ فى مجموعات بتتقابل بشكل دورى مهم جدا انك تتابع مع حد مش مهم الحد مين سواء كانت مجموعة أو طبيب أو معالج (مع أن فى الغالب المجموعات بتجيب نتائج أفضل) بس المهم انك متزهقش وتكمل رحلتك واكيد هتوصل للى محتاجه
تم النشر السبت، ٣٠ مارس ٢٠٢٤
انا عندي الحل عشان عندي نفس مشكلتك
تم النشر الخميس، ١٦ مايو ٢٠٢٤
جرب تروح زماله المدمنين المجهولين
تم النشر السبت، ٣٠ مارس ٢٠٢٤
لعرض السؤال في فدني اضغط هنا