السلام عليكم
انا واحد عنده 15 سنة حاليا في اولي ثانوي، اتعرفت علي بنت في اوائل دخولي لتالته اعدادي بس مش بطريقه مباشرة أنا كان عندي حساب على التيك توك وكنا في فترة ترند اللي بتحط عليه علم مصر كاصورة بروفايل و بعدين كل اللي بيعمل كده بيتابع التاني
انا لما عملت كدة حسابي وصل من 40 متابع لحد 1500 المهم اني عرفت ان الحاجه دي مبتعملهاش غير البنات انا مكنتش اعرف كده في الاول، اللي خلاني اعرف كده لقيت ان البنات بس اللي بتابعني وهما اللي عاملين كده وبعدها اتعرفت على بنت على أساس اني بنت وقعدنا فترة نتكلم لحد ما قالت لي انها هتمسح حساب التيك توك فا احنا هنتكلم على الانستا
وانا الفترة دي ماكنش عندي انستا، نزلت البرنامج وعملت حساب باسم البنت الوهميه اللي المفروض انها بتكلم البنت اللي اتعرفت عليها بعد فترة أخدت رقمها وبقينا نتكلم واتس
الصراحه انا حبيت البنت دي جدا وكانت اغلي حاجه في حياتي ولما كانت بتحكي لي عن ولد هي حبيته كنت بضايق جدا بس بحاول مابينش علشان هي عارفه شخصيه البنت
بعد فترة قررت اني اقولها الحقيقه واني ولد وعرفتها اني بحبها ومش عايز اخسرك وده اللي كان مخليني خايف اقولك من الاول، اتأسفت لها وسامحتني و وعدتها اني هروح اتقدم لها بعد اما اخلص ثانوي بعد شويه بس من بعدها كل حاجه اتغيرت
بعد ما كنا بنقعد مع بعض بالساعات ونقعد نضحك مع بعض كل حاجه اتغيرت ولا بقينا نضحك ولا بقى في اي حاجه حسيت انها اتغيرت او مش متقبلاني من الاخر فقررت اني امسح الحساب اللي كان السبب اننا نتعرف ومش عارف اذا كان اخر قرار ده صح ولا غلط
السلام عليكم، قرارك تقفل الحساب قرار صح جدًا والأفضل إنك تنسى الموضوع كله. تصرفك معها كان غلط للأسف وأعتقد لو وضعت نفسك مكانها هتحس بمشاعرها وقد إيه اللي حصل صعب. فكرة إن بنت تكلم حد على أساس إنه بنت زيها وتصاحبها وتحكي لها كل أسرارها وممكن حاجات مش بتحكي لها لأمها وأختها وتآمن لها وفي الآخر تكتشف إنها ولد فكرة صعبة قوي ومعتقدش فيه بنت ممكن تتجاوزها بسهولة. فأنت اعتذر لها مرة أخيرة واقفل الحساب وانسى الموضوع تمامًا. وكمان استغفر ربنا ومتكررش اللي حصل واعتبره درس اتعلمت منه. ** ممكن الموضوع يبقى صعب بالنسبة لك دلوقتي لكن مع الوقت مشاعرك وأفكارك بتنضج فركز دلوقتي على دراستك وتطوير شخصيتك ونفسك. ابعد نفسك عن العلاقات مع البنات والصحوبية والجو ده لأنه مش صح خالص واستنزاف مشاعر على الفاضي ولازم حد بيطلع خسران في الآخر البنت أو الولد. حياتك قُدامك ركز على إنك تشوف هدفك إيه وأنت عايش ليه وتبعد عن أي حاجة تافهة لأنك هتتسأل عن عمرك في الآخرة فبلاش يضيع في تفاهات. كبّر نفسك ولما يجي الوقت المناسب عشان تختار شريكة حياتك وقتها هتعرف تختار صح. بالتوفيق.
تم النشر الخميس، ١٣ مارس ٢٠٢٥
شكرا لحضرتك جدا ❤️
تم النشر السبت، ١٥ مارس ٢٠٢٥
والله كلامك منطقي و فرحني جدا بس اتمني انها تسامحني ومش تكون حبت حد تاني
تم النشر السبت، ١٥ مارس ٢٠٢٥
يجدع اظبط دنيتك وأمن نفسك ومستقبلك واخرتك وبعد ما تحس انك وصللت لي انت عايزه وخلصت كل أحلامك ساعته فكر في الجواز مش الصحوبيه لأن مفيش وقت للكلام ده اولوي قاعده🚸 (انا اهم من كل شيء)⚠️
تم النشر السبت، ١٥ مارس ٢٠٢٥
العفو بس دي الحقيقه مينفعش تعلق نفسك بحاجه في احتمال ١ في الميه متكونش ليك المنطق بيقول لو انت حبيت الأولى انك تحب نفسك الأول واكتر لان لان لو محبتش نفسك حبك لأي حد هيكون كدب
تم النشر الخميس، ٢٧ مارس ٢٠٢٥
يمكن انتِ عندك حق
تم النشر السبت، ١٥ مارس ٢٠٢٥
كلامك صحيح تماما بس بس انا حبيتها جدا و انا شايف ان ماكنش في اي عقبة في حياتي علشان تمنع اني اتقدملها انا واحد بصرف على نفسي و بجيب دخل كويس فا حتي لو اهلي رفضو ماكنتش ههتم وبعدين دنا قعدت حوالي سنة ونص بحبها من غير ما تعرف بس من الواضح ان مش كل حاجه بنحبها ينفع تبقي معانا
تم النشر السبت، ١٥ مارس ٢٠٢٥
لعرض السؤال في فدني اضغط هنا