هو الحقيقة كل اللي انتي محتاجاه إنك تفوقي لنفسك. اخرجي من الوهم اللي انتِ فيه وانتبهي لحياتك... مفيش حد متضرر من كل ده غيرك أنتِ. أولًا، ابن عمتك، مش فاهمة إزاي كان في ثانوي وانتي في 6 ابتدائي وبتقولي كان فيه نظرات إعجاب من ناحيته؟ احتمال كبير إنك كنتِ بتتوهمي ومشاعرك اللي طبيعي بتتأثر في فترة المراهقة أوحت لك إنه بيبادلك نفس الإعجاب. ثانيًا، هو أحب في الجامعة، معنى كده هو بالفعل مكنش منتبه لك... راح وأحب وعاش حياته. ثالثًا، خليني أقول لك انتِ غلطت لما سمعتِ لتلميحات جارتك والكلام جه على هواكِ مش أكتر... كون بقى إنه بدأ يتغير في معاملته... ده ممكن برضه كان توهم منك أو هو كان بيحاول ينسى البنت دي عن طريقك بس في الآخر رجعوا لبعض زي ما انتِ شايفة وراح خطبها. عشان كده بقولك فوقي لنفسك وبلاش تضيعي مشاعرك وتفكيرك على شخص مش شايفك وانتي مخلياه محور الكون مخلياه محور الكون لدرجة إنك بتحاولي تقنعي نفسك إن مشكلة تحصل في علاقته هو وخطيبته إنها إشارة من ربنا. طلعي ربنا من الموضوع وبلاش تعتمدي على صدف وتعتبريها إشارات وغلط إنك تصلي قيام الليل مخصوص عشان شخص بيحب واحدة تانية. قيام الليل دي عبادة لربنا بنصليها عشان نزداد قرب منه ونرتقي بعبادتنا وعلاقتنا به... مش هكون مش بصلي قيام الليل عشان ربنا وبعدين أروح أصليها عشان شخص معين. ربنا بيقضي الحوائج فعلًا لكن احنا بنصلي وهدفنا رضا ربنا وأي مكسب تاني ده رزق من ربنا هو اللي بيمتن به علينا مش عشان مقابل. هل لو ربنا مستجابش وأعطاكِ الشخص ده أو الحاجة اللي انتي عاوزاها هتوقفي الصلاة؟ هرجع وأقول لك، نصيحة من أخت أكبر منك... عززي نفسك وخلي كرامتك رقم واحد... شخص مش شايفك وفضل بنت تانية عليكِ ويمكن لما قرب لك كان بيحاول ينساها، شخص زي ده أقف مع نفسي وقفة وأسألها هل صح اللي بعمله؟ هل يستحق أضيع عليه أحلى سنين عمري والوقت اللي المفروض أكون بهتم فيه بنفسي وهو مش شايفني أصلا؟ بعتذر لو كان كلامي قاسي زيادة بس لأنه يعز عليّ أي بنت بتذل مشاعرها ونفسها بالطريقة دي عشان أي رجل وخصوصا لو هي مش في دماغه أصلا. ربنا يوفقك للخير.
تم النشر السبت، ١٤ سبتمبر ٢٠٢٤
0 تعليق
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك