اتعامل ازاي مع خوفي من الارتباط مبدئيا انا 26 سنة كنت خاطب و فشكلت قبل الجواز ب شهرين وخايف اخش ف علاقة تانية عشان بقا قدامي ناس و بنات كتير دخلت علاقات او مشيت ف سكك مش كويسة وبقيت خايف اخش علاقة جديدة
طيب هل انت اكتشفت دلوقت ان فيه ناس دخلت علاقات كتير او حتى مشيت في سكك مش كويسة! ولا انت بتبرر موقف ليك، او حيلة دفاعية ما، علشان خايف من الموضوع نفسه احسن يكون زي المرة الاولى؟ ولكن خليني في الافتراض بتاعك الاول .. فيه كام حاجة دلوقت حولينا الناس بتستخدمها غلط، فيه كتير غير الجواز بشكل خاص يعني! هل لو هندخل في اي حاجه عموما في حياتنا او هنبدأ شئ جديد لو فكرنا بالطريقة ديه .. وقد ايه الموضوع حواليه ناس كتير وحشة، احنا مش هنعمل حاجه ... مش هنعمل اي حاجه خالص! هنفضل خايفين .. وبنتفرج علينا وكل شوية خوفنا هيكبر وكل ما يكبر السور اللي احنا بنناه لنفسنا بيكبر معاه وبيعلى. ف زي ما فيه ناس كويسة فيه ناس وحشة .. وفي كل حاجه مش في الجواز بس .. انت بس عليك تختار صح .. اختار صح ومتخافش .. اما بقى لو كانت حيلة علشان خايف الموضوع يتكرر زي المرة اللي فاتت .. ف مش ضروري اللي حصل قبل كده يحصل تاني.. اعتبرها تجربة وعدت واتعلم منها ومن اللي حصل فيها. وعايزة اقولك ان اللي حصل كان لازم يحصل .. اي حاجه حصلت كانت لازم تحصل .. لانها مقدرة لينا بهذا الشكل .. واحنا ما علينا الا نعرف الحكمة من كل اللي حصل .. وحتى لو معرفتش ما عليك غير انك تعرف الدروس المستفادة من اللي حصلك. لان الطبيعي ان يحصلنا حاجات وحشة في حياتنا وحاجات حلوة .. مش لازم ننجح من اول مرة ولا تاني مرة حتى! خلى نفسك طويل
تم النشر السبت، ٢٠ مايو ٢٠٢٣
الخوف ده سلسله بتربطك ......مفيش حد بيحب يكون مربوط ..اتخلقنا عشان نكون احرار ومعانا عقلنا نشغله ونحكمه ومعانا رب الكون كله نتوكل عليه وهو ييسرلنا اللى فيه الخير لينا . التجارب يا اما تاخد منها معلومه تفيدك فى تفكيىرك واختياراتك الجاية يا اما هتبقي حلقة جديدة فى السلسلة اللى رابطاك. اختار انت بقي ...السلسله ولا الحرية.
تم النشر السبت، ٢٠ مايو ٢٠٢٣
بص هو زي ما اخويا عمر قالك انك تركز علي نفسك لو انت حاسس انك لسه مش جاهز ماديا لكن من اللي انا شايفه انت جاهز ماديا لكن مش جاهز نفسيا .. في حاجات لازم نآمن انها بتيجي كده من عند ربنا و رزق زي الشغل مثلا ده بتاع ربنا في حد ممكن يوصل في سن صغير و ياخد وقت طويل عشان يبقي اللي هو عايزه و في حد ممكن يبدأ بعده بسنتين لكن يوصل اسرع لهدفه كلها بتاعت ربنا و كلها بالتوفيق لانك ممكن تجرب شغل و التاني و التالت و ماترتاحش عادي لحد لما تلاقي اللي هترتاح فيه .. ده شئ مسلم بيه و علي نفس النمط الارتباط و الجواز يأتي بعده .. لازم هتعدي بعلاقه هادمه وبعدها علاقه عاديه ماحركتكش و بعدها علاقه حركتك لكن محصلش نصيب بشكل ما وبعدها ممكن واحده تاني ماتحرككش وهكذا لحد لما تيجي اللي ربنا كتبهالك و هتعكمل معاك للنهايه .. وعلي فكره زي ما سهم الشغل و الطاقه بتاعتك مش ديما ف الطالع يعني ممكن يوم طالع يومين نازل اربعه طالع اسبوع نازل العلاقات كده برضه .. اهدي بس و حط ديما احتمال لكل حاجه و الاهم انك تبقي عارف ان كل حاجه بتحصل ربنا هو اللي عايزها و مكتوبالك من قبل ماتتولد .. ماتخافش و اتحرك في حياتك وربنا هيرشدك للخير ليك
تم النشر السبت، ٢٠ مايو ٢٠٢٣
وعليكم السلام هو ليه حضرتك استغفر الله العظيم مهمش ربنا من المعادلة.....خلى بالك ربنا قال ايه الطيبون للطيبات والخبيثون للخبيثات ....وموضع اخر قال تعال وعلى نياتكم ترزقون .... فيا اخى العزيز ليه بس تقفل الدنيا ع فكرة زى ما فى بنات والعياذ بالله ربنا لم يأذن لها بالهداية بعد ونسأل الله ان يرزقها العافية والعفو والهداية فى بنات كويسة جدا وفى بنات وقعت مع شباب مش احسن حاجة وربنا نجدها برضو فى اولاد سيئة الغاية والنية والوسيلة جدا فلو هانمشي من منطلق انا خايف يبقى محدش هايتمم زواجه ....ولكن لك من الامر انك تدعو ربنا وتستغفر كثيرا وتلح فى طلب غايتك انى ربنا يرزق بفتاة طيبة مثلك انشاء الله ماتقولش انا خايف ولا متعقد لانى دا فى سوء ظن بالله عز وجل...وربنا عند حسن ظنك بيه ...ظنيت انه هايكرمك واحد فى المية من الامر هايرزقك بالف فى المية من هذا الامر والعياذ بالله لو ظنيت انه ربنا تركك فى هذا لامر سيتركك فى هذا الامر فاهمنى......الزواج ليس له اى صلة بعمر على فكرة زمان كان بيتزوج الرجل والمرأة ع سن الثمانية عشر فمتسمعش كلام حد يقولك مستعجل ع ايه يا عم والدنيا مولعة والدهب والشقة لا انت مؤمن قوى يبقى تعقد عزمك وتنوى خير وربنا بييسر الرزق للبينوى الخير ع فكرة ....ولو على تجربتك اللى قبل كدا فربنا بعدك عنها لانها ليست بخيرا لك ...مش عشان تقول خايف ....ماتخفش وخد وقتك للتأقلم وتقيم انت اتعلمت ايه من تجربتك وهتلاقى بإذن الله بنوتة زى القمر وطيبة الاصل والخلق بإذن الله ظهرت قدامك ومن نصيبك ....ربنا يكرمك ويجبر خاطرك
تم النشر السبت، ٢٠ مايو ٢٠٢٣
انا دايما كان ف تفكيري زي ما بتقولي الطيبون للطيبات او ان ربنا هيبعتلنا حد شبهنا و دا حصل معايا ف تجربتي الاولي بس بالشكل الوحش و دا ليه بقا عشان ربنا بعتلي حد الي حد ما شبهي ف الوحش اللي فيا و دا اللي خوفني ان ربنا ممكن يبعتلي حد زيي و دي حاجه مخوفاني من اني اخش واكرر الخطوة تاني ،دا غير ان مع كبر العمر مبيبقاش قدامي غير الجواز التقليدي و دا زي البطيخة انت وحظك او بمعني انك بتاخد حد مش عارفه والخطوبة مهما كانت مش هتبينه
تم النشر الأحد، ٢١ مايو ٢٠٢٣
هو اولردى كان مقبل ع الزواج ...هو بيحكى فى الناحية النفسية مش اكتر
تم النشر السبت، ٢٠ مايو ٢٠٢٣
لا احنا مش شيلين ربنا خالص احنا عارفين ان كل حلجه بأيد ربنا وان ده قدرو احنا بنتكلم علي ان هو لو مش حابب يتجوز دلوقتي او مش مستقر يبقي ميخدش الهطوه دي علشان هو الهيضايق في الاخر لو اختار واحده عن حب او صالونات وفي الاخر لقدر لله ميقدرش يصرف عليها وفي الاخر الموضوع ممكن يخلص بديون ومشاكل احنا في غنا عنها وحضرتك اكيد شايف الدنيا عامله ازاي من التضخم البيحصل فأنا كان رائي ان هو لو مش مستعد فمش لازم دلوقتي لسه بدري الجواز مش هيخلص ولا البنات هتموت فيقدر يستني عادي
تم النشر السبت، ٢٠ مايو ٢٠٢٣
وبعدين جواز التقليدى مش زى ما انت متخيل ....على فكرة حتى لو فى تعامل مابين الطرفين قبل كدا برضو بعد الجواز بيبقى فيه تصادمات كتيرة ....فانا معرفش مين اللى قال جواز الصالونات دا مش عارفة ايه .... على فكرة جواز التقليدى العريس بيجى هو وأهله واهل العروسة بيقابله احسن مقابله ويبقى كرم الضيافة احسن حاجة...فعلى فكرة بقا بما انه كدا كدا بعد الجواز الناس بتتصادم وفى اللى بيكمل وفى اللى بينفصل يبقى خليك فى الجواز اللى يحفظ حقك وحقها بكل اصووول وكرم ...انت بس روق دماغك وقيم تحربتك ورتب اولوياتك وعلى الله كل الامر
تم النشر الاثنين، ٢٢ مايو ٢٠٢٣
بص افهمك على حاجة على فكرة انا ستة وعشرين برضو وكانت فكرة السن دى مجننانى ...بس لسة بدرى وعلى فكرة احيانا بتعتقد انه خلاص والوقت هايفوت وبتاع وتلاقى ربنا بكره تانى يوم مسهلك الحوار ...فحوار السن دا شيله من دماغك كلا فى وقته ....تانى حاجة حتة الطيبون للطيبات على فكرة يقصد بها انه الشريكين يبقوا طيبين المعشر مع بعض بمعنى انه كل واحد متفاهم ومتقبل عيوب الاخر وبالتالى حتة ان ربنا فى تجربتك الاولى عطاك واخدة زيك فى عيوبك دى مخك ضحك عليك فيها ....لو هى كانت طيبة لك كانت هاتبلع عيوبك كلها ....ولكن هذا ليس مقدر لك معها ...متقلقش خليها ع الله وربنا رب قلوب
تم النشر الاثنين، ٢٢ مايو ٢٠٢٣
انا مستقر بشكل كويس و الجواز هو الخطوة الجاية بالنسبالي
تم النشر السبت، ٢٠ مايو ٢٠٢٣
ممكن تكون لسه مقبلتش حد كويس او يستاهل تكون معاه والحجات دي قسمه ونصيب وقدر مكتوبلك هيجيلك في اي وقت بس انت مستعجل علي الجواز ليه انا الصراحه شايف انو ملوش لزمه دلوقتي في ظل الظروف الدوله فيها والمش هتساعدك خالص بسبب الدهب وختي لو عتجيب الحجات التهمك بس زي الاكل واللبس وغيرو فهو كل حاجه غاليه انت عيش حياتك اتبسط وكون نفسك من شقه وعربيه من غير متخش علاقات ولما تخلص ابقي دور علي الجواز
تم النشر السبت، ٢٠ مايو ٢٠٢٣
لعرض السؤال في فدني اضغط هنا