السلام عليكم بعد نتيجة الثانوية العامة حقيقي اتكسرت بس قررت اقوم وأفضل اذاكر ومستسلمش علشان اهلي لسه حاطين امل وعلشان نفسي كمان دخلت تربيه طفوله مبكره قسم انجليزي بحاول علي قد ما اقدر اجتهد رغم ظروف السكن وحالتي النفسية بس بقي عندي شعور ملازمني يكاد يكون بقي مرض هوه اني بخاف بخاف افشل تاني بخاف منجحهش بخاف احط امل أو حلم وموصلش له نفسي اجيب تقدير كويس واكون حاجه في الكليه حاسه اني مش قدها واني مهما عملت مجهودي قليل حاسه بخوف وقلق طيب بقول يمكن ربنا يعوضني ويجبر خاطري المره دي طيب ورينا عارف اني بتعب وبحاول اعمل اللي عليا وشايف نيتي بس بقول يمكن مجهودي قليل علي اللي عايزاه يمكن اتعشم وافشل تاني بقيت بتعب أوي اما محققش الحاجه اللي عايزها واكون في حاله وحشه لو احس اني قصرت حقيقي تعبت نفسي استريح بقي وقلبي وعقلي يهدوا يا تري هقدر أحقق حاجه طيب ربنا هيقف جنبي ولا هيحصل اي تعبت اني اكون مش مميزه رغم المحاولات اكون حد عادي
انا فاهمه خوفك جدا ومحاولتك لتوقع حدوث كل شىء حلو انى افكر فى كل الاحتمالات ( الممكنه والغير ممكنه) بس الممكن ده متوقف اصلا علي ايه؟ على مجهودى وعلى الظروف المحيطة وعلى اهم حاجة بقي ( قدرة ربنا وتدبيره للامور ) انا عاوزاكى تركزى فى انك تعملى مجهودك وتسعى عشان تحققى افضل شىء والباقى سيبيه على ربنا اتفرجى ع الفيديو ده اتمنى يوصلك الفكرة كمان https://fb.watch/hO8yIWaG9M/
تم النشر الاثنين، ٢ يناير ٢٠٢٣
الخوف مشاعر طبيعية .. ولكن هي ممكن متبقاش طبيعية ؟ اه ممكن .. لما يبقى الخوف يمثل لي عائق يمنعني عن اداء المهام، ويمنعني كمان من اني ابقى في حالة طبيعية .. يعني مثلا انتي دلوقت عندك امتحان في قلق يخليكي تقومي تذاكري علشان تنجحي. في مستوى قلق ممكن يخليكي متعمليش اي حاجة .. لانك مش قادرة تعملي حاجة فعلا .. تعب جسدي ونفسي طول الوقت يمنعك انك تعملي اي حاجة. الواحد ما عليه انه يسعى فقط .. والنتيجة ديه بتاعة ربنا .. وطبيعي جدا اننا نفشل هل كل الناس اللي ناجحة دلوقت .. عمرهم ما فشلوا في حياتهم؟ اكيد لأ فشلوا مرة واتنين وعشرة كمان. انتي مش هتعرفي الصح ده .. صح ولا غلط من غير ما تفشلي. تعاملي مع الفشل على انه تجربة والتجارب هي ل اما تثبت نظرية معينة او لا. مينفعش الواحد يفضل ناجح علطول، ومينفعش الواحد يعمل الحاجة من اول مرة صح. لان مفيش حد كده اصلا، احنا كده ضد الطبيعة البشرية. مش هنبقى بشر بالشكل ده. ف طمني نفسك .. واعرفي ان النتيجة ديه مش بتاعتك .. طيب ولو فشلتي ؟ عادي شوفي حلم غيره .. مش اي حاجة في الحياة نهاية الدنيا. نهاية اي واحد في الحياة لما ربنا يريد. ضاع حلم شوفي غيره .. طالما لسه عايشة وقلبك بينبض .. يبقى لسه كل حاجة في ايدك.
تم النشر السبت، ٣١ ديسمبر ٢٠٢٢
المشكلة عندك والحل عندك، التفكير بالشكل ده بيقلب بمرض غالبا، كل المطلوب منك انك تحطي قاعدة لحياتك إسمها " انا هعمل اقصى ما عندي، واللي ربنا كاتبه هيحصل" القاعدة دي اسمها التوكل على الله.
تم النشر السبت، ٣١ ديسمبر ٢٠٢٢
لعرض السؤال في فدني اضغط هنا