ازاي اركز واذاكر صح بذاكر اوقات كتيره وفي الاخر بلاقي المحصله صفر بجد زهقت اوي وكل امتحان بقيت بطلع مصدومه عن الي قبله اعمل اي
غالبا انتِ ف الجامعة .. لأن بنسبة كبيرة دي المرحلة اللي بنكتشف بيها اننا بنذاكر غلط أو مبنعرفش نذاكر ٱصلا.. المذاكرة ليها طرق كتير ممكن لو جربتي الطريقة دي ومنفعتش معاكي تقوليلي ونجرب طريقة تانيه .. مبدأياً مش كل المواد بتتذاكر بنفس الطريقة .. يعني مثلاً في ماده امتحانها مقالي بنص الكتاب .. ف دي بنبقى محتاجين نفهم المادة دي بتقول ايه ونقرأ المنهج كله قراية سريعة كده بفهم وبعدين نبتدي نقسم المنهج ونبدأ نحفظ بالتكرار وبعدين كتابة وبعد كام يوم نكرر تاني ونكتب تاني.. في مادة مقالي اه بس بأسلوبك .. دي هنقرأ المنهج كله ونفهم ايه بيربط المواضيع ببعضها وبعد كده ناخد كل جزء نفصصه كده وتثبتي المعلومات الأساسية وتقسمي الموضوع لنقاط تقدري تكتبي تحت كل نقطه وتتكلمي فيها .. واعتبري كإنك عندك بريزنتيشن عن الموضوع ده ف بتفهميه من جميع الجوانب عشان تقدري تكتبي فيه .. وكل موضوع تعملي بروفه كده كتابيه وتشوفي انتي كده تمام ولا محتاجه تكرري الموضوع شويه بحيث تثبتيه أكتر. في ماده امتحانها بيكون mcq ودي بنقرأ المنهج أول مره بفهم وتركيز .. بعدين نقرأه تاني واحنا بنفكر ايه الاسئلة اللي ممكن تيجي في كل فقرة وهيساعدك في ده الامتحانات السابقة. مهم قبل كده تعرفي الكام حاجه دول.. 1- حضورك المحاضرة بيفرق كتير جداً في فهمك للمادة وفهمك للدكتور وامتحانه. 2- اسألي كل دكتور عن ازاي تذاكري مادته وتجيبي فيها تقدير حلو .. واكيد انتي عارفه مين الدكاترة اللي ينفع تسأليهم ومين لأ تسألي بنات الدفعة الأكبر منك. 3- الامتحانات السابقة مهمه جداً وكل دكتور بيبقى في حاجات معينه مهمه بالنسباله اعرفيها منه أو من البنات الأكبر. 4- لما تيجي تذاكري ابعدي تماما عن أي حاجه تشتتك .. وخلي جنبك ورقة عشان اي حاجه تيجي ف دماغك عايزه تعمليها سواء في المذاكرة أو بره المذاكره تكتبيها. 5- شغّلي أكبر قدر من حواسك وانتي بتذاكري. 6- من وجهة نظري بلاش طريقة المذاكرة انك تذاكره 25 دقيقة وتاخدي بريك 10 دقايق. 7- الافضل تحددي موضوع معين وتمسكي الكتاب تذاكريه ولما تخلصيه خدي بريك أو لما دماغك تفصل. 8- البريك مش موبايل خاالص .. البريك ممكن يبقى تقومي تحضري سناك / تتحركي شويه ف الشقة/ تعملي تمارين للضهر والرقبة عشان اغلبنا بيقعد غلط/ تتكلمي مع حد ف البيت في حاجه/ تقفي في البلكونه شويه/ وهكذا. 9- الموبايل لما تخلصي خالص مذاكرة .. طالما لسه هتكملي يبقى بلاش موبايل خالص. 10- مش مهم تقعدي على مكتب وتفردي ضهرك وما إلى ذلك.. ده الصح والأفضل أكيد بس متهتميش بده على حساب تركيزك وراحتك .. اقعدي قاعده مريحه في مكان هادي ومتسمعيش حاجة وانتي بتذاكري .. ركزي في حاجه واحدة بس. 11- لاحظي نفسك واعرفي اكتر انتي بترتاحي ازاي وبتركزي امتى وانهي وقتك مناسب ليكي تذاكري فيه .. جربي كذا وقت بعد الفجر مباشرة/ بعد الشمس ما تطلع على 8 مثلا/ بعد الضهر أو العصر/ بعد العشاء لحد الفجر.. اختاري الوقت الاريح ليكي واللي بتبقى مركزه فيه أكتر. 12- لو عندك مشكلة في التركيز اكشفي .. لو عندك أنيميا اكشفي وواظبي على الدوا. 13- وأهم حاجه تعينك وتوفقك قبل المذاكرة اقرأي ورد القران بتاعك .. ومتنسيش دعاء قبل المذاكرة وبعد المذاكرة. 14- ادعي دايما لنفسك ولصحابك وللمسلمين جميعاً بالفهم والتركيز والتوفيق. ربنا يوفقك ويرزقك الفهم والحفظ والحكمة ويعينك على المذاكرة ويقويك على أي عقبات تقابلك.
تم النشر الخميس، ١٥ ديسمبر ٢٠٢٢
فمثلا لديكي ١٢٠ صفحة و عدد ايام السنة الدراسية ١٨٠ يوم اجعلي ١٢٠ يوم للمذاكرة و ٦٠ يوم للمراجعة الكلية . بحيث كل يوم صفحة واحدة و في نهاية كل ٥ ايام مراجعة اسبوعية لما سبق و كل ٣٠ يوم مراجعة شهرية لما سبق
تم النشر الجمعة، ١٦ ديسمبر ٢٠٢٢
اذاكر صح عشان اتأكد ان المذاكرة دى صح لازم تكون هتحققلى النتيجة فى الاخر وتخلبنى احل الامتحان اللى هدخلة. دلوقتى لو الامتحان عملى وانا بذاكر نظرى ...ده اللى هيصدمنى ف الاخر انى هلاقى نفسي كأنى مذاكرتش. يبقي قبل ما نذاكر نشوف المادة دى هدفها ايه ...هدفها انى اعرف اكتب مقالات ...يبقي ادرب نفسي على كتابة مقال سليم بكل اجزائة. المادة هدفها انى اعرف اجاوب على اسئلة فيها نوع من الحل او توضيح الاسباب ...يبقي دى عاوزة فهم وتدريب على اشكال كتير من المسائل وحلها. الماده هدفها شغل عملى ادرب نفسي على الحلجة العملية بايدى مش مجرد قراءة انتى واضح ان مشكلتك مش مجهود المذاكرة ولكن الاسلوب بس كمان كل ما تربطى اللى بتذاكريه بمواضيع فى الحياة الواقعيه كل ما هيبقي الموضوع افضل. ان شاء الله مجهودك يحققلك النجاح
تم النشر الخميس، ١٥ ديسمبر ٢٠٢٢
بنيتي جربي أم تستخدمي طرق علم النفس أكيد ستفيدك
تم النشر الخميس، ١٥ ديسمبر ٢٠٢٢
خرائط ذهنية كروت ذكية كلمات سر
تم النشر الجمعة، ١٦ ديسمبر ٢٠٢٢
الي فات مات عالجي أسباب الشتات
تم النشر الجمعة، ١٦ ديسمبر ٢٠٢٢
استخدمي تقسيم المذاكرة في الفهرس بحيث تقسيم عدد صفحات المنهج المقرر في كل مادة على ثلثين السنة الدراسية و اتركي الثلث الأخير للمراجعة النهائية على سبيل التذكير فقط بحل الأسئلة المحتمل تخطيطها للاختبار مع الأخذ بالتوالي المراجعة الجزئية
تم النشر الجمعة، ١٦ ديسمبر ٢٠٢٢
لعرض السؤال في فدني اضغط هنا