بدون اساءة او تجريح بالله عليكم انا والدي متوفي من 7 سنين ووالدتي افضل ست في الدنيا ربتني انا واختي احسن تربيه وعمر مانقصنا حاجه الحمدلله انا وختي في كلية الطب وعلي قدر من التدين بفضل الله بس من ساعة مادخلت طب وفي شخص من عيلة والدي بدأ يتقربلنا هو في مقام عمي بس مم بعيد اوي المهم هو كان بييجي البيت الاول كزياره عاديه وبنقعد معاه وهو دايما عاوز يساعدنا ماديا في حين انه احنا مرتاحين فبنرفض تماما مره جاب مراته تتعرف علينا فالموضوع كان عادي لكن مؤخرا حاسه بتصرفات غريبه يعني ساعات التليفون يرن علي والدتي فتقوم من جنبنا ودي مش عادتها فلما اجي اشوف مين كلمها الاقيه هو ومره كان النور قاطع وتليفونها رن وهي قامت من جنبي ترد وبعدها سمعت صوته قدام لاب بيتنا لما دخلت بقولها هو جاي لي قالتلي مين ومحدش جيه وكأني اتجننت وقالتلي ازاي هقبل ييجي والنور قاطع في حين اقسم بالله انه كان رانن عليها قبل ماييجي انا شوفت المكالمه وبعدين بقولها ماهو مكلمك فااتلي لا وفعلا كانت حذفت المكالمه ومره تانيه يرن عليها ترد اكنه صاحبتها اقسم بالله انا متأكده انه هو وتقولي مافيش حاجه دي صاحبتي امسك تليفونها الاقي المكالمه الليفي الوفت ده محذوفه انا تعبت وماليش حد اخد رأيه ومستحيل احكي لحد اصلا علي امي انا هي كل حاجه في حياتنا خايفه اكون ظالماها بس هي ردودها بتكون بارده معايا لما اسألها يعني حتيمش بتدافع عن نغسها او تريح بالي من التفكير انا هتجنن ومش متخيله القرف ده ومش عارفه اعاماها طبيعي
إتكلمي معاها بصفتك بنتها وصديقتها وإسأليها عنه وهل هو مجرد قريبكم ولا في حاجه هي عايزه تحكيهالك .. ممكن وقتها تقولك انه عايز يتزوجها مثلا على سنة الله ورسوله أو تأكدلك ان هي مكالمات عادية من الوارد إنه بيتكلم معاها بشكل عادي أو في أمر تاني هي مش قايله ليكم عنه وإنتِ فاهمه غلط .. ممكن تكوني ظالماها وحتى لو فعلا على علاقة بيه ممكن تكون بنية الزواج منه والأمر متوقف على معرفتكم بالأمر أو هي بتفكر تعرفكم إزاي
تم النشر الثلاثاء، ٢ أبريل ٢٠٢٤
ربنا يبارك فى والدتك وعمرها ويرحم والدك طبعا المدة 7 سنين وبعد ما انتوا كبرتوا الحمدلله ..فوالدتك وارد انها تكون انتبهت اكتر لاحتياجها العاطفى ..ووارد ان يكون ده الرجل الوحيد اللى حسسها بمشاعر امان ( وده اكبر احتياج عاطفى عند الست ) ووارد يكون الراجل بس بيساعد امكم ماديا وماما مش حابه تعرفكم عشان متحسوش باحراج مثلا فى الحالتين جربى تتكلمى مع ماما بصيغة هزار او دردشة خفيفة ( احنا نجوزك بقى يا ماما عشان متبقيش لوحدك وانتى حلوه وصغيره لسه ..ايه رأيك يا ست الكل ؟ ) وشوفى رد فعلها واتناقشوا فى الموضوع لو حصل يعنى ايه المشكلة ومدى قبولها او رفضها ومدى قبولكم انتوا او رفضكم بردوا ده اللى ممكن يحددلك الامور اكتر بدون شكوك لا داعى منها وارجوكى لو بتفتشى فى تليفون ماما من وراها ..بلاااش ..لان ده تجسس وربنا امرنا ( لا تجسسوا ) وملهاش استثناءات
تم النشر الثلاثاء، ٢ أبريل ٢٠٢٤
لا حول و لا قوة إلا بالله انتي ممكن تواجهيها بالموضوع المفروض ان والدك توفي و حالتكم مرتاحه الصح ان لا يجوز ان الراجل دا ييجي عندكم أصلا خصوصا ان كلكم نساء في البيت اقنعيها ان سمعتكم ك بنات و مستقبلكم من سمعة والدتكم لأنها ربتكم و هتأثر علي مستقبلكم بأفعالها لأن لو كان عاوز خير كان دخل من الباب مش اتكلم التليفون ، و انه. لا يليق بمرأة مسلمة لها بنتين في طب و متربيين انها تدمرهم بالطريقه دي و ادعيلها الكلام دا كله في حالة لو متأكدة.
تم النشر الأربعاء، ٣ أبريل ٢٠٢٤
اتكلمي مع ماما بكل ود ولين وتجنبي اسلوب الاتهام والعتاب وربنا يبعد عنكم كل شر ويصلح حالكم لكل خير يارب
تم النشر الثلاثاء، ٢ أبريل ٢٠٢٤
بصي في حالة ان اختك كبيره فلازم انتم الاتنين تقعدوا معاها وتكلموها ملهاش حل غير كده لازم من المواجهه عاجل او أجل انا قولت ملهاش حل غير كده لانك لو فكرتي هتلاقي ان كل الطرق هتوديكي لطريق نهايته مش لطيفه سواء انك كلمتي خالتك او خالك او غيرهم فانتم واجهوها من غير احراج يماما انا لاحظت كذا وكذا وكذا واحنا مش صغيرين احنا كبرنا والموضوع ده تاعبنا نفسيا وحاولي تفكريها بوالدك
تم النشر الأربعاء، ٣ أبريل ٢٠٢٤
اطلبي مساعدة من حد من عيلتك وقوليله أن الشخص ده بيدايقكوا
تم النشر الأربعاء، ٣ أبريل ٢٠٢٤
لعرض السؤال في فدني اضغط هنا