أنا عندي مشكله مستوايه في الدراسه متوسط و انا حلمي اني اكون طبيبة نفسيه و الطريق اللي يوصلني للحلم دا هو اني ادخل علمي و انا جبت الدراجات في المواد العلمي مش كويسه و امامي ترم تاني ممكن اعوض فيه بس اللي حواليا حكمين عليا اني ماينفعش ادخل علمي و انا خايفه دلوقتي و محتاره اختار ايه خايفه اندم في الاخر و موصلش لحلمي زي ما بيقولوا و لا أحاول تاني..... هو فعلا الطريق لحلمي صعب و في نسبة كبيره اني موصلش له بس انا مش عايزه استسلم للأمر الواقع و أحاول تاني حتى لو صعب لأن حقيقي حلمي دا بالنسبه لي حاجه كبيره اوي و مش قادره اتخيل مستقبلي بدونه ف أحاول و اكمل في امل اني اوصل؟ ولا امشي في الطريق اللي المفروض اسهل عليا بس مش هيوصلني لحلمي و هكون كدا خسرت حلمي للابد
طالما انتي عندك حلم خليكي مؤمنه بيه وواثقه من نفسك ممكن السنين الي فاتت درجاتك مش عاليا قوي بس تقدري تشتغلي ع نفسك وتثبتي لنفسك وليهم انك تقدري والمجال الي انتي مختاراه حلو جدا وبعدين خلي معاكي دايما خطه تانيه يعني ممكن تدخلي علمي علوم فعلا وتشدي حيلك لقدر الله لو مجموعك خانك تقدري تدخلي كليه اداب قسم علم نفس وتكوني اخصائيه نفسيه وتشتغلي ع نفسك فيها وتكوني معالجه نفسيه والطبيب النفسي والاخصائي مبينفصلوش عن بعض بيكملوا بعض دايما ف مش هتخسري حاجه لو دخلتي علمي علوم وشديتي حيلك فيها وهتحققي حلمك ان شاءالله
تم النشر الخميس، ١٦ فبراير ٢٠٢٣
بلاش الاول نرسم خطة واحدة وكأنها العالم وما فيها، انتي فيه كلمات انتي قولتيها .. كلمات صعبة جدا كأنها خلاص ديه النهاية ( مش قادة تتخيلي مستقبلك من دونه - خسرتي حلمك للابد). الجمل ديه كفيلة لوحدها انها تضعك في جوانب هتتعبك بعدين. جميل اوي ان يكون ليكي حلم وتسعي انه يكون موجود في حياتك، ده شئ عظيم .. بس مع الحلم ده يكون فيه خطط بديلة. لان اي حاجة الواحد بيسعى اليها وارد جدا انها متحصلش .. وده لاي سبب كان بقى .. بس وارد ان كل حاجة متحصلش .. ولكن ما على الانسن انه يسعى. انا لما كنت في ثانوية عامة ... طبعا كان عندي حلم لكلية معينة .. ولكن مكانتش الوحيدة كان فيه كذا كلية تحتها (خطط بديلة) علشان والله ديه مجاتش فيه غيرها. اكمل حياتي .. موقفش على حاجة واقول خلاص حلمي راح ومجاش ... لأ اكمل واشوف غيره وانجح وافشل وهكذا ... دلوقت ندخل في صلب الموضوع هسالك سؤال .. انتي شايفة انك كويسة جدا في المواد العلمية ولا لأ؟ انتي شايفة ايه؟ شايفة نفسك كويسة فيهم ادخلي علمي وتوكلي على الله، شايفة انه لأ .. في مشاكل معينة حاولي تشوفي ايه المشاكل ديه، وهل المشاكل ديه هينفع تتحل ولا لأ؟ الموضوع منفعش خالص .. تشوفي بدائل ... ايه هي البدائل عن طريق اداب علم نفس تقدري تدخلي المجال ده وفي الاخر هتبقى اخصائية نفسية، ولو كملتي دراسات عليا تبقى في درجة معالج بعد اخذ الدورات اللازمة والمحددة والتدريبات في المستشفى واخذ رخصة من وزارة الصحة وتقدري عادي تفتحي عيادة. الفرق ما بين بقى خريج كلية طب قسم صحة نفسية، وخريج اداب علم نفس ( ان الطبيب يقدر يكتب على ادوية، الاخصائي لأ) فيه طريق ثالث وهو الكوتشنج ممكن بعد شوية دورات تتخصي في حاجة معينة وتقدري تشتغلي فيها مع الناس ( الكوتشنج هو اللي بيساعدك او بيحطك على اول الطريق وبيحاول يفتح ليكي شوية مدارك) شوفي انتي عندك كذا طريق تقدري تدخلي منه ... لحاجات مقاربة لبعض ومع ذلك هقولك دوري على حاجات تانية برده غير دول .. هقولك على حاجة كمان وهي الاهم بقى شوفي ال 20 سنة الجاية ايه اهم الوظائف اللي هتختفي واللي هتبقى موجودة .. واقري وشوفي العالم ممكن يتغير ازاي .. وانتي هيكون ايه دورك في التغيير ده ؟ في حاجات كتير جدا هتبقى مش موجودة وهيستغنى عنها، وحاجات هتحل محلها .. حاولي تشوفي حاجاة تقدري فعلا تستفيدي منها فيما بعد. اتمنى اكون افادتك بشئ .. وبالتوفيق
تم النشر الخميس، ١٦ فبراير ٢٠٢٣
لعرض السؤال في فدني اضغط هنا