انا عندي ١٨ سنه اتشخصت قريب باضطراب شخصيه حديه ، المشكله اني ثانويه عامه وطول الوقت مزاجي بايظ لا عارفه انزل دروسي ولا اقعد ساعه ع بعض اركز ف مذاكره ولا بكمل مع مدرس وعلطول دماغي مسوحاني اعمل مليون حاجه غلط ، اهلي بيعانو معايا جدا وطبعا هما مش عارفين اني رحت لدكتور ولا اتشخصت
هما شايفين اني مهمله بس ، بس طبعا مؤخرا بدأو يتعاطفو معايا عشان نفسيتي بقت تحت الارض تقريبا وعشان (ثانويه عامه ) ، ازاي افاتح أهلي ف موضوع اني عايزه ابدأ رحله علاج لاني مش هقدر ع التكاليف لوحدي ف لازم يعرفو ، وكمان متأخره جدا ف المنهج عن صحابي زمش عارفه هخش الامتحانات ازاي الي قدامها كام شهر دي (علطول ف دماغي أجل السنه بس هما مش موافقين) ،
عايزه حد مختص يرد عليا يقولي اتعامل ازاي مع ال borderline لاني عايشه مع كل اعراضه حاليا
قبل ما اقولك علاج او غيره مين شخصك؟ لو التشخيص سليم فكملي علاجك، انت لسة صغيرة والعلاج في وقت بدري مهم جدا وأفضل بكتير من انك تأخريه، لأن الأعراض بتزيد سوء . .
تم النشر الأربعاء، ١٢ فبراير ٢٠٢٥
عزيزتي، أقدر مشاعرك وتحدياتك التي تواجهينها. اضطراب الشخصية الحدي (Borderline Personality Disorder) يمكن أن يكون تحديًا كبيرًا، ولكنه ليس نهاية العالم. من المهم التذكير بأن العلاج يمكن أن يساهم بشكل كبير في تحسين جودة حياتك. بالنسبة لموضوع العلاج، من المهم أن تتحدثي مع أهلك بوضوح وصراحة. يمكنك البدء بقول إنك تشعرين بالضغوط الناتجة عن الوضع الحالي وأيضًا عن تحديات الدراسة. اشرحي لهم أنك شعرت بالاحتياج لمساعدة مختص يمكن أن يقدم لك الدعم الذي تحتاجينه. يمكنك أيضًا توضيح أن هذا ليس مجرد اعتلال عابر، بل يحتاج إلى تدخل علاجي ليتسنى لك التحسن والنجاح في دراستك. تذكري أن العلاج قد يكون لمدة قصيرة أو طويلة، ولكنه يمكن أن يساعدك على التعامل مع مشاعرك وأفكارك بشكل أفضل، مما سيمكنك من التركيز على دراستك وأمورك اليومية. أما بالنسبة لدراستك والامتحانات، فحاولي تقسيم المنهج إلى أجزاء صغيرة وتحديد أوقات محددة للدراسة. يمكنك أيضًا طلب الدعم من مدرسين أو أصدقاء، فهم قد يساعدوك في فهم المواد الدراسية ومساعدتك على التقدم. لا تترددي في الانطلاق في رحلة العلاج؛ فهي خطوة شجاعة ومهمة. تذكري، أن تحتفظي بالأمل وأن تعملي نحو التغيير. يمكنك دائمًا التواصل مع معالج نفسي ليقدم لك الدعم اللازم في هذه الفترة الانتقالية. وفقك الله وأتمنى لك النجاح في كل ما تسعين إليه.
تم النشر الثلاثاء، ١١ فبراير ٢٠٢٥
موضوع اللامبالاه ده حله الوحيد الشغل هقولك انا حاجه بسيطه ما تفكريش في الكم فكري في انك طول ما انتي ماشية يوميا فأنتي بتنزلي الحمل يعني الحمل بيخف كأنك ماشية بمنحنى من السالب للموجب حرفيا كل يوم هتزيدي عمرك ما هتشتغلي وتخرجي صفر وزي ما بيقولوا خد من التل يختل
تم النشر الأربعاء، ١٢ فبراير ٢٠٢٥
اختي انا دفعة 24... اللي بتوصفي ده مر بيا وحابب اطمنك فكرة الكمال دي مش موجوده اطلاقا حرفيا هيحصل معاك معجزات لو عملت اللي تقدري عليه وتوكلت على ربنا بس الفكره ما تضيعي وقت يعني خلصي منهجك وحلي شوامل وربنا هيوفقك وركزي انك تحلي كتير للاحياء والمواد العلمية في الشوامل
تم النشر الأربعاء، ١٢ فبراير ٢٠٢٥
اعرضي عليها تروح معاكي للطبيب وتسمع منه
تم النشر الأربعاء، ١٢ فبراير ٢٠٢٥
انا شايف أن الموضوع بسيط جدا المرض النفسي كلنا معرضين ليه ومش عيب ابدا انك تروحي لدكتور يساعدك وقولي لامك بس وهي هتساعدك اكيد والثانوية العامه بتبهدل نفسيه اي حد ومرحله صعبه انا لغايه دلوقتي ماثره فيا جدا وكلميها عادي وهي هتقدر موقفك وهتخاف عليكي اكتر من نفسك انا مثلا لما بكون متوتر ونفسيتي بتكون محطمه بتصرف بشخصيه مختلفه تماما ولما بهدى يرجع لشخصيتي العاديه المتزنه ممكن انتي كمان تكون كده في مرحله الثانويه العامه شيء وبعد ما تنتهي المرحله الصعبه ترجعي بطبيعتك تاني الضغوط بتأثر في شخصيتنا
تم النشر الأربعاء، ١٢ فبراير ٢٠٢٥
نصيحة اخيره نزلي تطبيق flipهيساعدك
تم النشر الأربعاء، ١٢ فبراير ٢٠٢٥
يارب قدرني 😭، دعواتكم ليا بالله
تم النشر الأربعاء، ١٢ فبراير ٢٠٢٥
انا بحاول مفكرش ف التأجيل فعلا وان شاء الله هاجي على نفسي واعدي السنه دي ، بس الي بيخليني بفكر اني مخشش امتحانات جزئيه ي ابيض ي اسود الي مشيا بيها دي، فكره اني هخش الامتحان مش مذاكره وحلا ع الماده ومقفلاها بنسبه ميه ف الميه مموتاني رعب ف بفكر مدخلش خالص ، بس تقريبا دي خدعه من دماغي مش حقيقيه يعني وهتغلب عليها وان شاء ألحق اخلص مذاكرتهم كلهم قبل الامتحان
تم النشر الأربعاء، ١٢ فبراير ٢٠٢٥
اتفق بصراحه لاني برضو زيك بس احنا ڪـ "مجتمع عربي " مفهوم انك مريضه نفسيا أو محتاجه دكتور نفسي مفهوم غير شائع وأغلب أهلنا وأغلبية الناس ڪذلك مش بيستلطفوا ومش مقتنعين بحاجه زي ڪده، ف نصيحه من أختك ف ثانويه عامه برضو، سيبك من كل ده عارفه انو مش سهل بس حاولي، لان المزاج ده هيجبنا ورا، يفرحتي بمزاجي اللي بيتعدل مره ف السنه، معدش فاضل غير ٤ شهور يحبيبي سيبك م المزاج والكلام ده، لو نفسيتك تعبانه دلوقتي (وانت مش لوحدك) فكري بعد النتيجه لو لا قدر الله مجبتيش حاجه كويسه نفسيتك هتبقي عامله ازاى، سبيها علي الله ومتفكريش ف حاجه، وخلي ده دافع ليكي، اه انا هذاكر عشان اجيب مجموع كويس عشان اشتغل واصرف علي نفسي واروح لدكتور نفسي، اقعدي اكتبي انتِ عايزه اي ومحتاجه اي واربطيه بالمذاكره، لو عايزه نتواصل ندعم بعض معنديش مشكله وبالتوفيق.
تم النشر الأربعاء، ١٢ فبراير ٢٠٢٥
بصي أولا ربنا يكون في عونك في علاجك.... بس نصيحتي ليك أنت خمس مواد لو فاهمه المنهج بس متأخره مش مشكله الغالبيه بتقع منها حاجات فلو كنت كدا اياك تأجلي بجد الموضوع مرهق نفسيا في السنه اللي بعدها والله.... وانا حاسس بكم الضغط اللي انتي في لان كنت زيك بس والله لو هتتجاهلي احساس المرض هتلاقي نفسك بتتقدمي في المذاكره وهتلحقي بإذن الله
تم النشر الأربعاء، ١٢ فبراير ٢٠٢٥
كلامك حتى الثانوية العامة كله بيوصفني
تم النشر الأربعاء، ١٢ فبراير ٢٠٢٥
هذا المرض صعب انك تتحمليه لوحدك و تشيلي عبئه اتواصلي مع اهلك للمساعده قوليلهم عندك اعراض ولازم ياخدوا موضوعك بجديه إن شاء يوافقوا و اذا موافقوش ابحثي في اليوتيوب عن ناس عندها نفس المرض و كيف هم اتعاملوا معه و ابدئي انتي طريقك للعلاج لحد ما الله ييسرهالك
تم النشر الأربعاء، ١٢ فبراير ٢٠٢٥
انا رأيي و الله أعلم انك تصارحيهم بالفكرتين انك ناويه تأجلي الامتحانات حتي تنتهي رحلة العلاج لأن الواقع المفروض هو شئ خارج عن ارادتك و ان شاء الله يحدث الأفضل لك ف يجب عليك فتح موضوع رحلة العلاج و فكري كيف تبدأي شرح الموضوع لهم بكل اريحية
تم النشر الأربعاء، ١٢ فبراير ٢٠٢٥
تمام هعمل كدا متشكره ليك
تم النشر الأربعاء، ١٢ فبراير ٢٠٢٥
بس بجد اوقات فكره اني اقوم من سريري دي بتبقا اصعب ما يمكننن ،مبقدرش اروح دروسي ب الايام ولا اذاكر وببقا فاقده الامل ، ويوم الي بعده اصحا انزل وارجع اذاكر وتلت اربع ايام نايمههه بجدد الموضوع مرهق
تم النشر الأربعاء، ١٢ فبراير ٢٠٢٥
انا بلغت امي بالموضوع وتقريبا ف البيت مش مقتنعين ولا هيساعدوني بيحاولو يقولولي اني كويسه بالغصب وانسانه طبيعيه ، وف ايدي اتحكم ف تصرفاتي كلها وقربي من ربنا وكل الكلام دا، انا الحقيقه معنديش طاقه اقنعهم تاني ولا معايا فلوس اروح اتعالج لوحدي ف خلاص هسيبها وزي متمشي تمشي إن شاء الله اسقط ومخشش الامتحانات
تم النشر الأربعاء، ١٢ فبراير ٢٠٢٥
لعرض السؤال في فدني اضغط هنا