السلام عليكم
نا عندي مشكله تعباني اوي و24 ساعه بفكر فيها وبفكر احلها ازاي فبليز لو حد يقدر يساعدني عشان تعبانه اوي ومش عارفه اخد قرار صح
ناا كنت مرتبطه بابن خالي بنتكلم من حوالي سنه وشويه ومن كام شهر بدات علاقتناا تبقا اقوي ونحب بعض جامد لدرجه ان مستحيل نتخلي عن بعض ولو لحظه بنتكلم كل ساعه شات مكناش بنتكلم فون الا مره او مرتين ف الشهر ياعني كل كلامنا كان شات وريكات وكدا المهم العيله كلها عارفه ان احنا بنحب بعض اهلي واهلوا وكمان هو عمل حدثه قبل كدا جامده وساعتهاا نا تعبت وعيطت كتير عشانوا ورحتلوا المستشفي من ورا اهلي بس خالي ومراتوا واخواتوا شفوني هناك وكان حوار عادي وهما موافقين وعارفين ان احنا بنحب بعض وبنتكلم وكدا المهم اهلي اكتشفوا ساعتها اني بحبوا ونا اعترفت لماما بكدا وهيا سمعتني واتفهمت الموقف بس قالتلي مينفعش عشان مشاكل قرايب وان هو لسه مش مناسب ومعندوش امكانيات يتحوز دلوقتي وناا عندي 19 وهو 23 المهم بسبب الحادثه بتعتوا دي كل حاجه ادمرت لان رجلوا فيها كسر كبير وبقالوا اكتر من 6 شهور بيتعالج ومش بيشتغل ولسه معندوش شقه فالمهم اهلي رافضين خالص وخالي جه اتكلم مع ماما ومراتوا كمان كذا مرا والموضوع من نحيه اهلي مرفوض تماما عدي شهر ع الرفض داا والموضوع اتقفل بس نا وهو فضلنا نتكلم وكلامنا بقا اوفر وبنتلكم في حجات خارجه وكلام مينفعش نتكلم فيه وكان بير منوا هوا ويقولي ابعتي صور وكلام من دا بس نا كنت برفض واحيانا يضغط عليا ويقولي هزعل وكدا ويفضل يتكلم معايا علي شكل جسمي ياعني بحسوا بيحبني لشكلي مش لشخصيتي احيانا بس ف نفس الوقت بحسوا بيحبني جامد وممكن يغمل اي حاجه عشاني وعرف اهلي واهلوا جه اتقدموا ياعني مش بيتسلي بياا خالص المهم بقالنا تلت اسابيع علاقتنا مش احسن حاجه نتخاصم بالاسبوع مثلا ونا الي ادخل اكلموا ع مرتين الي اتخاصمنا فيهم حاليا بقالنا ست ايام متخانقين مع العلم عمرنا ماكنا بنتخانق ولا نبعد عن بعض ولو حصل كان هو عمروا ماسبني زعلانه بس الفتره دي معرفش مالوا بس اخر خناقه كانت بسببي عشان قولتلوا نفسي احسك راجل عشان مكنتش حابه تصرفاتوا لمااقولوا نا خارجه بليل يقولي ماشي ياعني مثلا لا الوقت اتاخر متخرجيش طب هتلبسي اي كلام دا مكنش بيسال خالص لو قولتلوا هكلم ولاد عليك يقولي مش مشكله المهم انك معايا لماسالتوا ع تصرفاتوا دي قالي مبحبش ازعلك ودا هزار ونا واثق فيكي بس نا كنت بدايق المهم ياعني بعد الخناقه الاخيره دي قالي نا الي دلعتك ع اخر وخليتك تتكلمي معايا بالشكل دا واتخصامنا بقالنا 6 ايام مبنتكلمش ونا م عارفه ابطل تفكير فيه وبعيط وهموت واكلموا بس م عايزه عشان ميقولش اني معنديش كرامه واني ميته عليه وكل مرا نتخانق انا ادخلوا بس بجد مش قادره اعيش من غيروا
اعمل اي اكمل وادخل اكلموا ولا فعلا اسمع كلام اهلي وابعد وخلاص واستني نصيبي ف حلال وابعد عنوا واشوف حياتي اصل هو كدا كدا لسه معندوش اي حاجه عشان يخطبني ونا اهلي بكتير سنه واحده وهيخطبوني لاني داخله تالته جامعه وهو لا معاه فلوس وعندوا اخ اكبر منوا واخت ف اولي جامعه وهو م شغاال ولا عندوا شقه ولا اي مميزات تخلي اهلي يوافقوا اعمل اي حتي لو دخل كلمني اكلموا ونرجع ولا اسيبوا واقولوا مش هقدر اكمل معاك ويمكن ربنا يعوضني بالاحسن بس نا تعبانه اوي مش عارفه اخد قرار وهل الحب كفايه ان خو يعيشناا هو بيحبني اوي واثبتلي كذا مرا بكدا والكل عارف ان هو بيموت فيا وعيط كتير عشاني لمااترفض اول مرا ونا بحبوا بس الظروف صعبه اوي ان احنا نبقا لبعض
طولت بس بالله عليكوا ساعدوني اخد قرار صح 💔
لو سؤالك هل الحب كافي؟ ف لأ الحب غير كافي بتاتا في نجاح أي علاقة ده عموما مش في حالتك انتي بس. طيب ليه؟ لأن اساس اي علاقة حاجات كتير تقدر انها تقوم بيها من غير الحب اصلا، يعني اساسا لو الحب مش موجود في العلاقة في الاول وفيه مقومات نجاح العلاقة فينفع انها تكمل. طيب هي ايه مقومات نجاح العلاقة؟ المودة، والرحم، والتقدير، والاحترام، والاخلاق وصفاته اللي انتي متقبلاها في شريك حياتك، والحاجات المتشابهة اللي بتبقى ما بينكم او المشتركة، انه يبقى شخص مسؤول، يعتمد عليه، بيتقي الله، بيخاف ربنا، بيحافظ عليكي، انه يبقى راجل مش مجرد ذكر فقط. وفي الحقيقة انتي في حاجات لازم تحطي عليها مليون خط احمر في العلاقة ديه، هل فيه حد محترم يقولك كلام خارج، هل فيه راجل لما تقولي له انا هكلم ولاد عليك يقولك وايه يعني؟ ولا يقولك خدي انتي لابسة ايه؟ ولا ايه اللي منزلك متأخر ولا اي حاجة من ديه؟ وكل ده تمام وعادي ومفيش اي مشاكل؟ ردي انتي فين النخوة والرجولة؟ هل ده شخص انتي تأمني على نفسك معاه اساسا؟ هتبقى مطمنة؟ هل هو ده اللي انتي اساسا عايزاه لاولادك؟ يعني هل ده أب كويس ينفع يكون لاولادك بعد كده؟ انتي لما تيجي تختاري شريك لحياتك، المفروض متختاريش حد بتحبيه، لأ المفروض تختاري فعلا انسا كويس في كل المقاومات اللي قولنا عليها سابقا، وطبعا في حاجات تانية ولكنها ثانوية ترجع لكل شخص. وبالغعل كلام اهلك صح، هو حاليا هيتجوزك ازاي اساسا؟ ومنين ولا اهلوا هما اللي هيصرفوا عليكوا؟ انتي هتعرفي عادي تعيشي من غيره، انتي بس متعلقة بيه، ومتخيلة انك مش هتعرفي لانك مجربتيش احساس الفقدان قبل كده. بس لو كل واحد ساب اللي بيحبه او حتى مات كانت كل الناس ماتت ورا احبابهم، ومكانش حد كمل ولا عاش حياته. سبيه واتقي الله وربنا هيعوضك بحد احسن، واحسبيها كويس لان اساسا لو الموضوع نفع بعد كده وده صعب شوية واتجوزتوا الحب مش هيكمل، ومش هينفعك في حاجه بكل الخناقات والتصرفات بتاعته، لان الحب محتاج لدعم كل شوية، انتي لو بتسقي الزرع كل يوم وجيتي كام اسبوع سبتيها من غير مياه هتموت، الحب برده كده، كل شوية محتاج لدعم علشان يفضل ومينتهيش.
تم النشر الاثنين، ١٣ مارس ٢٠٢٣
بصي هو الكلام كان حلو جدا لحد مقلتي انه خلى كلامكم خارج وبعدها اتغير معاكي دي محتاجه يتحط تحتها ميت خط ونفسر ازاي واحد يطلب حاجه زي دي من بنت وكمان قريبته وكمان عايز يتجوزها ليها كذا احتمال من ضمنهم انه كان بيختبرك او انه بيطفشك او انه قال طالما مفيهاش حلال يبقا نركز ف الحرام طيب سؤال هل ده يؤتمن عليكي اصلا؟ وبعد كده بدأ يتغير معاكي وتغيره ده يثبت انه مش عايزك وانه للأسف دخل ف طريق التجاوزات يتسلى ويضيع وقت ومراعاش حتى انك قريبته او ان ده ممكن يترد ف اخته وكما تدين تدان رئيي من اخت كبيره ليكي متكلميهوش واقطعي اي طريقه تواصل بيكي وانتو متخانقين عادي وهقولك ده هيفيدك ف ايه اول حاجه لو هو عايزك وشاريكي فعلا هيعمل المستحيل عشان يوصلك ويعتذر ووقتها ارفضي اي كلام معاه لحد ميبقا الي بينكم رسمي تاني حاجه هيبينك انك مش مدلوقه ولا هتموتي عليه تالت حاجه لو فعلا بيتسلى هيبان هنا وهيناسكي اسابيع وشهور وهيفتكرك بس لما يكون عايز يرجع للتجاوزات ف خلي بالك وحاولي تفكري ف كلامي صح وان اي تجاوز بينكم حرام متغضبيش ربنا وتخسري ثقه اهلك عشان اي حد
تم النشر الاثنين، ١٣ مارس ٢٠٢٣
حبيبتي هو واحد فاقد الأمل ومحبط من ظروفه وانتى واحدة أهلك رافضينه ودة شخص مجروح فقالك خلاص نلعب بيها طالما انا جواز مش هتجوز ولا حد هيرضا بيا اسلي روحى واعيش كانى متجوز وف كل ده طبعا طظ فيكى وف سمعتك وفوكل حاجه تخصك م انتى اصلا عيلتك رافضاه فتستاهلوا
تم النشر الثلاثاء، ١٤ مارس ٢٠٢٣
يا بنتى انتى عارفه ان الموضوع غلط وانتى فى فترة مراهقة وكنتى بتتسلى وهو كمان اه اتقدم مفيش مشكلة بس زى ما انتى قولتى تشوفى مضصلحتك وكده كده الحياه صعبه ولا الموضوع موضوع حب ولا غيره انتى عيشتى حالة المشاعر دى وخلاص وبدأتى تفوقى وتشوفى مصلحتك فين متحطيش اهلك السبب وبس انتى كمان بتقولى هو معندوش حاجة يقدمهالك وانتى عارفه ان ده مهم عندك لو قالك هنتجوز بس مش هجيبلك هدايا وهقولك بحبك بس فى حين ان فى عريس هيجيبلك هدايا وشبكة ...انتى اللى هتقولى العريس وهتسيبيه من غير ما حد يقولك حاجة اقفلى يا بنتى الموضوع ده وارجعى للخط السليم واستغرى ربنا من كل ذنب وان شاء الله يرزقك بالزوج الصالح.
تم النشر الثلاثاء، ١٤ مارس ٢٠٢٣
بما انى جربت و حاية بسكى و فاهمه ده ممكن تكون دى كلها اشارات من ربنا عشن تبعدى و لما تدخلى فعلاقة تكون حلال عشان ربنا يباركلك فيها و قربى من ربنا هتلاقى الامان بجد و هتتحسنى،اى حاجه بتبدا بالحرام بتنتهى بالحرام و الحزن
تم النشر الاثنين، ١٣ مارس ٢٠٢٣
لعرض السؤال في فدني اضغط هنا