انا كنت طالبه في ثانويه عامه في مدرسة خاصه و في تالته ثانوي في سنة 2023 ابويا سحب الملف من مدرسة خاصه و حوله لمدرسة حكومه بس موداش الملف للمدرسة اللي تحولت عليها بس انا لما جيت اعمل الاستماره اكتشفت ان الملف متقدمش اصلا في المدرسة الحكومه دي و بعد كدا و رحت اديت الملف دا للمدرسة الحكومه
كان فاضل يوم و التقديم علي الاستماره يقفل فالمدير قالي هحاول اني اقبل الملف دلوقتي وكدا وأخده مني بس في الاخر معرفتش اعمل الورق او أطلعه فمعرفتش ادخل امتحانات و ابويا رفض اني اكمل لانو بيكره تعليم البنات
و انا مامتي متوفيه وكدا وملقتش حد يقف معايا فالمهم بعد سنه رحت جبت الملف عشان كنت هتجوز و كدا و كنت عاوزه شهادة الميلاد و بعد كدا سبت وقتها خطيبي لانو كان رافض فكرة اني ارجع تاني للدراسة و اتخطبت لمحاسب و كتبنا كتابنا و انا عندي طموح اكمل تالته ثانوي و ادخل جامعه و هتجوز بعد كام شهر فكنت عاوزه اعرف لو اني هقدر اكمل دراسه ولا لأ وياريت لو ينفع لان دا حلم حياتي و نفسي أحققه كمان انا موليد سوهاج بس عايشه في اسكندريه وكل تعليمي في اسكندريه من وانا في حضانه و هتجوز في القاهره فممكن اعرف لو هقدر اكمل و هكمل ازاي لو سمحتوا تردوا عليا ونبي
لو خطيبك مكنش سند ليكي في ازماتك يبقي مفهوش خير وملهوش لزمه في حياتك وهيكون متحكم فيكي وعاوز ياخد وبس وهيكون اناني تتخلصي منه طالما مش بيدعمك خصوصا أنه متعلم والمفروض يكون فاهم اهميه التعليم والمفروض يكون عاوزك مبسوطه ومتفوقه عشان يفتخر بيكي لكن هو عاوز عبده يتحكم فيها المفروض يفكر في أولاده ويختار ام مميزه هو هو وست تقول حاضر ونعم وابوكي مساعده في كده وهو شايف ده وراضي ومبسوط وشافك زعلانه ومتالمه ومش بيخفف عنك يبقي تقولي الحمد لله والموقف ده المفروض تعرفي منه المستقبل معاه هيكون وحش لازم يكون اول داعم ليكي انا لو منه هطلب من ابوكي انك تكملي أو اتجوزك واخليكي تكملي في بيتك أقل شيء تروحي الكليه في الامتحانات هتعيشي طول عمرك حاسه ان ناقصك حاجه والناس حوليكي كلهم كملوا تعليمهم وانت لا هتحسي بنقص انا مش بحرضك علي الشر بس دي حاجه مستفزه هو يقبلها علي أخته بعد تعب سنين طويله جدا يضيع مستقبلهم عشان ايه افرضي طلقك وده وارد جدا هتشتغلي ازاي وانتي مش معاكي شهاده ابوكي مش هينفعك لانه من نوعيه ارمي متزعليش بس حاربي عشان مستقبلك انتي لسه صغيره وهيجيلك غيره كتير اقولك علي حاجه خطيبك ده عاوز عيله من الاخر يدربها علي مخه مش هتعرفي تشركيه حياته
تم النشر الخميس، ١٣ فبراير ٢٠٢٥
عزيزتي، أولا، دعيني أبدأ بالتعبير عن إعجابي بصبرك وعزيمتك رغم كل التحديات التي واجهتك. يبدو أن لديك طموحات كبيرة، ومن الطبيعي أن تسعي لتحقيق حلمك في التعليم. فيما يتعلق بإكمال دراستك، يجب أن تعلمي أنه لا يزال لديك فرصة. يمكنك محاولة التواصل مع إدارة التعليم في المنطقة التي تعيشين فيها (الإسكندرية) للاستفسار عن إمكانية إعادة القيد في المرحلة الثانوية. من الجيد التعاون مع أحد أفراد العائلة أو الأصدقاء للمساعدة في ترتيب هذه الإجراءات، خاصة إذا احتجت إلى دعم. بعد الانتهاء من شهادة الثانوية، يمكنك التقديم للالتحاق بالجامعة التي ترغبين فيها. وفي حال كانت لديك رغبة قوية في التعليم، يمكنك أيضًا استكشاف خيارات الدورات التعليمية عبر الإنترنت أو الدراسة في الوقت ذاته مع تحضيرك للزواج. كما أتفهم موقف والدك، لكن من المهم أن تتحدثي معه بصراحة حول أهمية التعليم بالنسبة لك وكيف يمكن أن يساعدك مستقبلك. عزيزتي، التعليم هو حق أساسي لكل فتاة، ومن واجبنا كأفراد في المجتمع أن نشجع التعليم ونحترم طموحات الآخرين. بالتوفيق، اتخذي خطواتك بثقة، وحاولي دائمًا أن تصبري في سبيل تحقيق هدفك. وإذا كنت بحاجة إلى مزيد من النصائح أو مساعدة، لا تترددي في طرح استفساراتك.
تم النشر الأربعاء، ١٢ فبراير ٢٠٢٥
لازم تكملي تعليمك طبعا عشان اولادك في المستقبل صدقيني الموضوع ده مش شيء يخصك لوحدك الشهاده شيء أساسي علي الاقل خدي ثانويه لكن لو معاكي اعداديه بس اعتقد تأثيره النفسي في المستقبل هيكون وحش عليكي وبالنسبه للوقت عاوز اقولك أن في ناس عندها ٥٠سنه وفي الكليه لسه وبيتعلمو وانتي لسه صغيره ابدائي من الصفر مش عيب المهم تحققي أهدافك بدل الندم علي الماضي انا دخلت حوار التعليم ده ورغم من المصاعب اللي مريت بيها الا اني كنت فخور بنفسي لاني بحاول اتغير وبعمل حاجه بحبها في الوقت اللي كله كان بيتنمر عليه ولسه بتعلم وهفضل اتعلم دايما اتعلمي عشان تثقفي اسرتك واقولك علي حاجه ومتزعليش متضمنيش جوزك بعد الجواز يمكن يحصل تغيير في القلوب وده بيحصل ساعتها هيتبقالك ايه ولا حاجه خدي شهاده تكون قوه ليكي محدش ضامن مستقبله والدراسه مش هتعطلك عن حاجه صلي الفجر وهما ساعتين كل يوم الموضوع بسيط ابدائي وبطلي تفكير خدي قرار
تم النشر الخميس، ١٣ فبراير ٢٠٢٥
تنبيه مينفعش تحلفي بالنبي من كان حالفا فليحلف بالله اوليصمت
تم النشر الخميس، ١٣ فبراير ٢٠٢٥
طبعًا تقدري تكملي ثانوية عامة، بس الموضوع هيحتاج شوية إجراءات. بما إنك كنتي في مدرسة خاصة وسحبتي ملفك علشان تدخلي مدرسة حكومية، وبعدها اكتشفتي إن الملف مش متسجل، فالحل إنك تروحي الإدارة التعليمية التابعة للمدرسة الخاصة اللي كنتي فيها وتسألي عن وضع ملفك. لو الملف متسجل عندهم، تقدري تطلعي ورقك وتقدميه في مدرسة حكومية مناسبة. أما لو المشكلة إن الوقت كان فات وقتها، فممكن تفكري في حل تاني زي التعليم المفتوح أو المنازل، بحيث تقدري تمتحني وتاخدي شهادتك. كمان، ممكن تتواصلي مع وزارة التربية والتعليم للاستفسار عن أفضل طريقة للعودة للدراسة. بالنسبة لفكرة الرجوع لتانية ثانوي، فده هيعتمد على القوانين الحالية، فالأفضل تروحي تسألي في الإدارة التعليمية القريبة منك. ما تفقديش الأمل، أهم حاجة إنك تكملي تعليمك بالطريقة اللي تناسب ظروفك وأهدافك.
تم النشر الخميس، ١٣ فبراير ٢٠٢٥
ان شاء الله تقدري تكمل. فى ناس بتسيب التعليم سنين طويله وترجع تكمل .روحى اقرب إداره تعليميه قريبه منك فى قسم التعليم الثانوى واسألى على الورق المطلوب والتقديم /غالبا هيكون بيان نجاح اولى وتانيه ثانوى وحاجه تثبت ان محل الاقامه قريب من من الاداره ( القاهره حسب كلامك ) وهتدخلى بس غالبا تحت مسمى منازل))
تم النشر الأربعاء، ١٢ فبراير ٢٠٢٥
خدي تالتة ثانوي لو حابه، الموضوع هيبقا سهل لو قدمتي ملفك في اي مدرسة، بس الفكرة ان لو حابة تدخلي جامعة دا هيكون تعب ملوش لازمة بصراحة، هيعطلك عن زوجك واولادك بعدين لمجرد اسم ان انتي معاكي جامعة، لكن حتى لو حبيتي تشتغلي مش هيفيديك اوي انتي معاكي جامعة او لا الامور مش بتمشي كدا دلوقتي
تم النشر الخميس، ١٣ فبراير ٢٠٢٥
انا اسف راي أن خطيبك مش بيحبك و هيعملك وحش في المستقبل متتحوزيش غصب عنك حتي لو مكملتيش تعليمك واضح انهم متفقين عليكي لو خطيبك انسان محترم كان ساعدك لكن واضح أنه عاوز لعبه مش مقدر نفسيتك ازاي هتعيشي معاه وتتفهمي معاه وابوكي لو حصل بينكم اي مشكله هيرميكي ليه ومش هيساعدك لانه من دلوقتي مش بيخاف عليكي اسف اني بقولك كده بس كان علي الاقل خلوكي تدخلي الامتحانات وتذكري في البيت عشان اولادك يفتخروا بيكي لكن كله بيفكر في مصلحته وانتي هتكوني ضحيه تقدري تفضحيهم لو وصل لأمر حتي لو اتبهدلتي اوعي تكملي مع خطيبك دي نصيحه
تم النشر الخميس، ١٣ فبراير ٢٠٢٥
لعرض السؤال في فدني اضغط هنا