مش عارفة ليه بحس بتريقة لما حد يعرف اني في كلية تربية
وبلاقيهم بيتريقو كده يعني هتبقي مدرسة وبيضحكو كده
هو اي المشكلة عشان انا مش فاهمة بجد وبحس اني بتضايق اوي وأبقى عاوزة اقوم امشي من وسطهم فاهمين؟
المدرس ده الى طلع الدكتور والمهندس وكل الكليات الى ببقدسوها دى ومهووسين بيها ناس كتير وعندهم تفكير زى ان لو انت مش فى الكليات دى يبقى انت مستوى أقل عموما الناس دى هتقابليها كتير بس لازم يكون فى حدود فى الهزار يعنى تحاولى تقوليلهم انك مش حابه التريقه وبعدين مش كل الى دخلوا كليات قمه شغالين وحياتهم كويسه المقارنه عموما حاجه مش كويسه خالص قارنى نفسك بنفسك عشان تعرفى تطورى من نفسك وسيبك منهم المحاميين بيقولوا عليهم حراميه ونصابين والتجار بيقولوا عليهم غشاشين وبيكدبوا على الزبون والمحاسبين بيقولوا عليهم حراميه حتى عامل النظافه الى بيساعدنا بيتريقوا عليه وبيتجنبوه ولو قعدنا نحكى فى موضوع اختلاف اراء الناس على المهن مش هنخلص صدقينى وفالاخر دول بشر لا يقدروا ينفعوكى ولا يضروكى الا بإرادة ربنا ف هما لا يقدروا الا على الكلام ( بتوع كلام) طب بذمتك دى ناس نزعل منهم ؟ اعتقد نزعل عليهم أفضل
تم النشر الأحد، ٢٩ ديسمبر ٢٠٢٤
للأسف نظرة المجتمع المتخلف للمعلم نظرة متدنية مع أن المعلم المفروض هو حامل لواء العلم و أنه هو اللى بيخرج الناس من ظلمات الجهل إلى النور و العلم سلاح و اقوى سلاح تقاس قوة الدول بما تمتلكه من معرفةو علم و قدرة على البحث و عشان كدا دول زى المجر و المانيا و امريكا و كندا و كمان اسرائيل بيحطوا المعلم كأعلى تصنيف مهنى سواء في التعليم الجامعى أو ما قبل الجامعى . و عشان تعرفى أن الأشخاص اللى بيتعرضوا ليكى بالتهكم و السخرية عقليات متخلفة . و لأن الإعلام للأسف سفه دور المعلم و حط من دوره و خاصة في الافلام و المسلسلات و دا مقصود خاصة فى مجتمعاتنا و اللى أظهرت المعلم بصورة الشخص أما المعقد أو الغبى أو الذى يجرى وراء جمع المال من الدروس الخصوصية و عمموا تلك الصورة على جميع من امتهن تلك المهنة و لا شك أن مجتمع المعلمين به تلك النماذج كأى مهنة و لكن الأغلبية من المعلمين هم أصحاب رسالة . و هى مهنة الرسل و الانبياء والمرسلين. فعليكى أن تفخرى بكونك فى كلية من أعرق الكليات و انكى سوف تكونى معلمة المستقبل و عليكى أن تعدى نفسك جيدا لتتحملى تلك الأمانة . أمانة اطفال و شباب الغد . و نصيحة أخيرة ليكى الوعى بيفرق كتير اوى فى حياتنا . العلم هو اللى بيخلى الإنسان عنده وعى و دى كلمة كبيرة اوى و عميقة و مهمة جدا فى حياة اى انسان . لولا المعلم ما اصبحت الدول دولا لها شأن .
تم النشر الجمعة، ٢٧ ديسمبر ٢٠٢٤
السلام عليكم، هو الحقيقة إن المشكلة موجودة في تفكيرهم هم إذا كانوا بالفعل يقصدوا السخرية من مهنة التدريس.. لكن فيه احتمال إنه يكون هزار تقيل شوية من هزار الناس لما يفكروا دمهم خفيف وأي حاجة ينفع نسخف عليها مع أصحابنا. المعلم أساسًا في الدول المحترمة والشعوب اللي بتفهم هو مربي أجيال وبيتحمل مع الأسرة مسؤولية التربية مع التعليم وخاصة في الأعمار الصغيرة لأن الطلبة بيقضوا معظم يومهم في المدرسة. ** أنتِ مش محتاجة تبرير لحد ولا محتاجة سؤال ليه بيسخروا... المفروض مهما كانت ردود الأفعال تكوني واثقة في نفسك وكليتك ومهنتك أيًا كانت لأن مش كل ده هو اللي بيحدد قيمة الإنسان. دينك وأخلاقك وتفكيرك وإسهاماتك في الحياة هي اللي بتحدد. وفي النهاية لا يحق لشخص الحكم عليكِ ما دمتِ لا تفعلين ما يغضب الله سبحانه وتعالى. لا تسمحي لأحد بالسخرية منك ويمكنك إحراجهم بالذوق. ** نصيحة أخيرة، تذكري إن مهنتك سامية وعقول أجيال كتيرة هتكون أمانة بين يديكِ فتأكدي إنك تقومي برسالتك بما يرضي الله وتتأكدي ماذا تغرسين في نفوس طلابك وسط الانحدار المؤسف للأجيال حاليًا.
تم النشر الخميس، ٢٦ ديسمبر ٢٠٢٤
حضرتك مش هتثقي ف نفسك انتِ واثقه أصلا، لازم تحطي ف دماغك ڪده، وبعدين مالها مهنة التدريس، المدرس هو مُنشيء الاجيال، سواء دكاتره او مهندسين او ممرضين او.. او... الخ)، اللي بيقولك كده غير متحضر، وغير واعي، ومتخلف ڪمان.. فـ أنا عايزاڪي تحبي جامعتك وتخصصك، عشان الي حضرتك بتحطيه ف دماغك وتعتقديه عن نفسك هو اللي الناس بتعتقده عنك، امشي واتكلمي وردي بكل ثقه من غير اهتزاز ف نبرة صوتك، ولا تردد ف تصرفاتك، بشرط انها تكون ف السليم زي م الأستاذه شيماء ذڪرت. ومتشغليش دماغك بحد يسُڪره وروقي ڪده 🤍🤍
تم النشر الخميس، ٢٦ ديسمبر ٢٠٢٤
ماتخليش كلامهم ونظرتهم السطحية دي تأثر عليكي ، وإذا كانت تعليقاتهم بطريقة سخيفة ومُتعمّدة لاحراجك رُدّي عليهم ماتسكتيش وتباني ضعيفة الشخصية ولا تشيلي ف نفسك وتزعلي ، ومش شرط يبقى أسلوبك وحش وكلامك وقح عشان تاخدي حقك بس ماتتردديش ف إنك تحرجي اللي بيحاول يقلل منك وتخليه يحترم حدودك ، دي أمثلة لردود ممكن تقوليها : وايه المشكلة يعني مش فاهمة؟ ضحكوني معاكم معلش بقا لو دخلت كلية مش عاجباكم أصله مستقبلي أنا ومايخصش حد غيري وكده والله أنا عن نفسي راضية بنصيبي وبالمكان اللي أنا فيه ومبسوطة لو عندكوا انتوا اعتراض دي مشكلتكم حاضر هنلغي المدارس والتدريس عشان حضراتكم متضايقين من المهنة دي ومش معترفين بأهميتها بلاها خالص ولا تزعلوا نفسكم المفروض دي نكتة أضحك ؟ ابتكري ردود 😂♥️ ولكن راعي إنك ماتغلطيش ف حد ولا تقوليله كلام جارح ولا تقللي منه زي ما حاول يعمل معاكي خليكي ذكية ، مجرد إنك تحرجيهم وتردي بثقة هيخليهم مايكرروهاش تاني ويحترموكي
تم النشر الخميس، ٢٦ ديسمبر ٢٠٢٤
عزيزتي، أشعر بما تمرين به من مشاعر التهميش والسخرية، وأفهم تمامًا شعورك بالإحباط. العمل كمعلمة هو مهنة نبيلة ومهمة جدًا، فهي تؤثر في حياة الأجيال القادمة وتساهم في بناء المجتمع. السخرية تجاه مهنة التعليم قد تكون ناتجة عن عدم فهم قيمة هذا العمل الجليل. يجب أن تتذكري أن التعليم هو أساسي لتقدم أي مجتمع، والمعلمات يشكلن حجر الزاوية في هذه العملية. هناك العديد من المشاهير والناجحين في مختلف المجالات بدأوا مسيرتهم كمعلمين. إذا واجهتِ تعليقات مؤلمة، حاولي أن تتجاهليها، فأنت تعرفين قيمتك وأهمية ما تختارينه. وعندما تشعرين بالرغبة في الابتعاد عن تلك الأجواء، يمكنك وضع حدود لنفسك. تحدثي مع أصدقائك أو أفراد عائلتك الذين يدعمونك ويشاركونك رؤيتك للمعلم ولبنائه للمجتمع. وتذكري دائمًا، الثقة بالنفس هي مفتاح التعامل مع أي تحدٍ. استمري في إيمانك بمستقبلك وبأهمية المهنة التي اخترتها.
تم النشر الخميس، ٢٦ ديسمبر ٢٠٢٤
بالعكس مهنه التدريس مهنه مقدسه جدا ومهمه والمدرسين هما اللي بيطلعوا اجيال دكتوره ومهندسين ومدرسين بردك وهمي اللي بيعملوا الطلاب الصح والخطا والنبي صلى الله عليه وسلم كان افضل معلم يكفي شرفا ذلك
تم النشر السبت، ٢٨ ديسمبر ٢٠٢٤
يمكن لأنهم كانو طلبة فبييجي في بالهم مدرس معين فبيضحكو
تم النشر الجمعة، ٢٧ ديسمبر ٢٠٢٤
لعرض السؤال في فدني اضغط هنا