السلام عليكم،
أنا عايزة احكي تجربتي عشان باقرأ مشاكل كتير شبهها...ربما تكون رسالة للي بيقراها دلوقتي. في شهر ١٢ اللي فات كنت في أسوا أيام حياتي، كنت حرفيا باتمنى الموت النهارده قبل بكرة و كنت بخطط للإنتحار واظبط كل حاجة ومش بيقف الموضوع غير على التنفيذ، واللي كان بيمنعني اني مش عايزة اموت كافرة بس كنت متأكدة ان اللي هشوفه عند ربنا اهون بكتير من اللي بيحصلي في الدنيا... وكان بيمنعني برده اني مش متأكدة اني هموت لإن ممكن حد يلحقني او تحصلي اعاقة مستديمة واعيش في ندم طول حياتي فماكانش قدامي غير اني اؤذي نفسي... بشد في شعري واقصة واعور نفسي واعض نفسي لغاية اما اعورها واقطع الأكل. وبسبب دا جاتلي امراض كتير واهلي ودوني عند اكبر دكاترة عشان اتعالج منها والحمد لله باتحسن مع الوقت وروحت لدكتور نفسي ومستمرة على العلاج والحمد لله برده ساعدني كتير. اللي حصلي دا كان بسبب واحد عشمني فيه بطريقة صعب اوصفها وهكلم اهلك وهاقنعهم وهاتقدم الف مرة و،و،و.... من اول مرة اتقدم واهلي رفضوه وهو خلع، كإنه نسى وعوده ونسى كلامه ونساني... فأخدت الصدمة بقا!! ازاي ينسى! ازاي يكذب! ازاي يعيش حياته عادي! وبدأت حالتي تسوء ومنعت الأكل والمذاكرة ومابقيتش اروح الجامعة وحصل اللي انا حكيته فوق واستمر الموضوع دا ٥ شهور لغاية اما روحت لدكتور نفسي وساعدني اتحسن...
دلوقتي بقا مش على لساني غير الحمد لله حتى يرضى، الحمد لله ان اهلى رفضوه، الحمد لله ان بعده عني لإني لما فوقت اكتشفت إني والله العظيم كنت عامية، اول مرة اصدق ان مراية الحب عامية، كل تصرفاته كانت تدل انه نرجسي بخيل واناني وانا ماكنتش شايفة دا او ماكنتش عايزة اشوف ولا كنت عايزة اصدق انه كدا عشان مابعدش عنه. فالحمد لله وقفت على رجلي وبساعد نفسي اني ارجع احسن من الاول وعلى يقين تام ان ربنا هيعوضني لإنه عارف اني ضعيفة وهو القوي الحنين. وبجد باتمنى ان اللي بيقرأ رسالتي دلوقتي وفي حياته حد سام يبعد عنه، واللي بيكلم حد بدون علم الأهل يبطل يكلمه عشان مايمرش باللي مريت بيه، آي نعم قولت لأهلي بس قلتلهم متأخر يعني كنت عملت حرام حبة حلوين وكانت أول مرة واتعلمت منها اقسى درس في حياتي.
إلهام كبير رسالتك! الحمد لله أنت على الطريق الصحيح نحو التعافي. استمري على العلاج مع الدكتور النفسي وحاولي تركيزك على نفسك وصحتك النفسية أولا وقبل كل شيء. استخدمي هذه التجربة الصعبة كفرصة للتعلم والنمو وابتعدي عن الأشخاص السلبيين في حياتك. قد تكون هذه المرحلة صعبة ولكنك ستخرجين منها أقوى وأكثر حكمة. تذكري دائمًا أنك قوية وتستحقين السعادة والراحة النفسية. ابقي متفائلة وثقي بأن الله سيعوضك عن كل ما مررت به بالأفضل فيما هو قادم. دائماً هنا إذا احتجتين للدعم والمساندة.
تم النشر الأربعاء، ٢٢ مايو ٢٠٢٤
معلش متزعليش الحياه تجارب ولدينا بنتعلم وان شاء الله ربنا هيعوضك
تم النشر الخميس، ٢٣ مايو ٢٠٢٤
شكرا لمشاركتك والحمد لله إنك بخير ويارب دايما بخير وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ
تم النشر الخميس، ٢٣ مايو ٢٠٢٤
معاكي حق فعلا مرايا الحب عاميه لأني مريت بنفس التجربه ولما فوقت عرفت انو بخيل جدا واناني
تم النشر الأربعاء، ٢٢ مايو ٢٠٢٤
فعلا معاكي حق 👌 الواحد مش بيتعلم بسهولة بس الحمدلله انك أتعلمتي من اللي حصل
تم النشر الأربعاء، ٢٢ مايو ٢٠٢٤
ربنا يعوضك خير، ويجعل رسالتك دى تكون هداية لبنات. كتير بتعانى م نفس المشكله دى 🩵واكيد الحمدلله ع كل حال بس هو عمتا لو البنات تأمن ب النصيب وان اللى ربنا مختاره ليها هيكون وتنتظره ف الحلال ... ربنا يصلح حال الشباب والبنات أجمعين 🩵
تم النشر الخميس، ٢٣ مايو ٢٠٢٤
يارب يعوضك بالخير وجميل كلامك والاجمل هو رسالتك لكتير في نفس مشكلتك ويارب يراضي قلبك ويسعدك
تم النشر الأربعاء، ٢٢ مايو ٢٠٢٤
ربنا يعوضك خير عن كل احساس وحش حسيتي بيه♥️خليكي فخورة بنفسك انك قدرتي تعدي كل ده وافضلي دايماً قريبة من ربنا وياريت لو تدعيلي ربنا يكتبلي الخير
تم النشر الأربعاء، ٢٢ مايو ٢٠٢٤
لعرض السؤال في فدني اضغط هنا