توقفت عن دراسة الماجستير في نصف الترم بسبب الإحراج من طلب المال من أهلي! ماذا أفعل؟

Question

اهلي كانوا عايزين كده جدا وشايفين إنه الصح إبداء بعد التخرج ع طول بدأت ماجستير شهر 9 اللي فات واهلي دفعوا المصاريف الترم وتمام ع كده دلوقتي الترم التاني بداء شهر 3 السنه دي ومادخلتوش بسبب أن حاسه بالمسؤولية تجاهم بقت تقيله وأنا ف نقطه طلب الفلوس دي حساسه بدرجه لا تتخيلوها لدرجه أصلا عشان أطلب مصاريف اول ترم ده فصلت تلت ايام صاحيه من التفكير والعياط بس عشان مش عارفه افاتحهم ف الموضوع العيب مش فيهم والله خالص العيب عندي والمسؤوليات اللي عندنا وحاليا أنا مادخلتش الترم التاني مع باقي دفعتي وزمايلي وبضايق اوي لاني ف جروباتهم وحسه أنهم مستمرين وأنا اللي ثابته كده لدرجه عايزة أقولهم أدوني اللي بتذاكروا اتسلى فيه ، ونقطه الشغل برضو صحبتي بتشتغل كل شويه تقعد تقولي الشغل وقرف الشغل بعيد عنك ربنا مايوريكي كأنها البت الشقيانه وأنا المدللة ف البيت. المهم بس ماقولتلش لأهلي عن إني مابداتش وهم مش حاسين بكده يعني لو هم سألوني عن دنيتي كنت قولت بقى مصاريف وعايز وبتاع ف الموضوع صعب اكتر عشان ماحدش سأل وأنا مش بلوم اوي النقطه دي لأن الحياه صعبه واكيد ملهين ف حاجات اصعب من كده بكتير دلوقتي أعمل ايه بدور ع شغل بلاقي شغلنات قليله اووووي عليا أنا مفروض هتعين بس الله اعلم امتى الكليه مش محدده وقت ويمكن كمان سنه وأنا عندي احتياجات أنا معيش ولا ربع جنيه لو طلبت هيدوني بس أنا كبرت ع حكايه مصورف دي وتقيله اوي عليا تقيله أنا اخر شغل عملت انتر فيو عشان اشتغل سكرتاريه والله المديرة قالت أنا مستخسراكي هنا بعد ما شافت السي في بتاعي وقالت أنا نفسي تكوني معانا بس لا روحي كملي طريقه و كريرك وولاحتى عارفه الاقي شركه كويسه اقدم فيها بعدها صعبت عليا نفسي اوي ومش عارفه اتصرف خالص دلوقتي اصرف نظر عن الماستر خالص ولا ايه العمل الناس اللي اتعينت عملتوا ايه وانتو مكاني وفي الفترة دي

Accepted Answer

لازم تكملي رسالة بتاعتك مينفعش تضيعي اللي بداتي ولما ربنا يكرمك انشاء الله ابقي عوضي اهلك عن تعبهم معاكي وساعديهم ولو ممكن تشوفي اي شغل اون لاين او تنزلي مثلا علي جروبات فيس وتسالي وربنا مش هيضيع تعبك ولا تعب اهللك وخليكي فاكرة ( وَأَنْ لَيْسَ لِلإِنسَانِ إِلَّا مَا سَعَى ۝ وَأَنَّ سَعْيَهُ سَوْفَ يُرَى} مفيش حاجة في الدنيا سهلة ولا تقبلي باقل من اللي انت تستحقيه وادعي ربنا انه يسهل عليكي كام شهر اللي فاضلين في رسالة الماجستر وربنا يوفقك.

Answer

السلام عليكم ورحمه الله وبركاته بصي يا ست البنات يعني انا هوريكي الموضوع من اتجاه كده ممكن انت لسه مش واخده بالك منها ممكن يكون عندك حساسيه وشعورك بالمسؤوليه تجاه اهلك اللي هو حاجه جميله جدا جدا كلهم مخلينك الموضوع صعب قوي كان خلينا نشوف كده الوضع اذا انت كملتي في اللي انت بتعمليه ده وما دخلتيش الترم الثاني وما كملتيش الماستر هتبقى النتيجه ايه هتبقى النتيجه انك بداتي حاجه ما كملتيهاش؟ اهلك هتبقي ما عملتيش الحاجه اللي هم شجعوك عليها وادعموك فيها من الاول خالص وما قالوش ان عندهم اي مشكله خالص انهم يصرفوا على الماستر بتاعك. هتبقي يعني كده من ناحيه ثانيه زودتي عليهم الحمل لان لما هتيجي تعملي الماستر تاني هتعملي من اول وجديد الترم الاولاني اهو كده حضرتك بتعملي لنفسك ايه او بتعملي لهم ايه لا انت كده بتعملي ضرر ما من شعورك بالمسؤوليه دي بدل ما تتقليه في الموضوع فتروحي لطريق هو هيؤدي لضرر اكتر ما هو يؤدي الفائده فاحنا خلينا ناخد الامور بشكل افضل يبقى برضو في شعور بالمسؤوليه وفي تقدير منك لها انت هتطلبي منهم الفلوس لو موضوع انك تروحي وتطلبي ده تقيل عليكي ابعتي الموضوع ده في مسدج لماما او لبابا. كل ما تلاقي الموضوع تقيل عليك استخدمي طريقه المسجات اكتر من انك تروحي وتتكلمي بشكل واضح او يعني وجها لوجه تاني حاجه ما بينك وما بين نفسك اعتبري انه ده جميل انت شايلاهم واول ما ربنا هيكرمك بشغل ويكون مرتبك كويس هترد لهم الجميل ده بحاجه تانيه تفرحيهم بها فترديها لهم بشكل ثاني هتجيبيه هديه لماما هتجيبي هديه لبابا هتساعديهم بحاجه البيت وده هيكون ردا على الفلوس اللي هم يعني ايه اثقلوا على نفسهم زي ما انت حاسه وصرفوها على الماسك بتاعك بس كده خلي الامور جواكي متوازنه. واحط لها حلول واقعيه بدل ما تقدري تلفي في دايره المشاعر والاحاسيس اللي في الواقع بنحط لها افعال مش مفيده خالص. وربنا معك وان شاء الله توصلي النتيجه كويسه.

Answer

السلام عليكم ورحمه الله اهلا بيكي إن العلماء ورثه الانبياء، إن الانبياء لم يورثوا دينارا أو درهما إنما ورثوا العلم فمن أخذه آخذ بحظ وافر. خطوه الماچيستير مهمه خصوصا لو عندك تعيين أعضاء هيئه التدريس ، و خطوه لابد منها لا محاله و لذلك اللي بيعطلك هنا هي افكارك انتي ، و لكن لو سألتيهم هو انا لو طلبت حاجه كدا أنا ببقي بحمل عليكم ؟ كدا انتوا هتكونوا مضغطوين ؟ هتلاقي ردود عكس اللي في دماغك خالص. هتاكدلك انك فخر ليهم. ثانيا تجنبك انك تقولي محتاجه ادفع المصاريف دا معملش حاجه غير سلبيات و خلاكي متروحيش تدريب. و لما تطالبي هتاخدي إيجابيات و هتطلعي للنور بالعلم و المعرفه. و دا محتاج محاولات كتير منك ف انك تطالبي بحقوقك ، حقك في التعليم دا حق ليكي و ادام عندكم المقدره يبقي لا ترتدي دي فرصه ليكي حاليا و انتي لسه في بيت والدك ، اما لما يكون في زواج هتكون الأعباء اكتر بكتير ف اكتسبي الفرصه دي و كملي العلم نور و مرتبه عاليه في الدنيا و الآخرة.

توقفت عن دراسة الماجستير في نصف الترم بسبب الإحراج من طلب المال من أهلي! ماذا أفعل؟

مهنية

اجتماعية

أهل

تعليمية

سؤال من احد أعضاء فدني

تم النشر الخميس، ٢٣ مايو ٢٠٢٤

6 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك