انا شاب عندي 22 سنه دايما صحابي بيستهزئوا بيا وبكلامي معاهم وبياخدوه بتريقه وتنمر حتي مش بحسهم بيبادلوني نفس الحب بحس انهم مش مهتمين بوجودي اصلا ودايما شايفين اني طري وفافي ... وغير كدا انا حساس جدا واي كلمه بتجرحني حتي اللي قدامي بيقولها بهزار بس بجد محدش بيعيرني اي اهتمام ودايما انا اللي بحتجلهم وبحاول ابينلهم اني بحبهم علشان اسمع كلمه حلوه منهم او حد يحبني ويصاحبني وبجد انا علي وشك اني انهار بجد واعتزل كل حاجه والدنيا كلها ده غير اني معنديش ثقه فنفسي ودايما مهزوز وبتوتر بسرعه واي حاجه بتقلقني وتخوفني وتخليني افكر كتير وده بيخليني اغلط كتير في شغلي وتحصلي مشاكل كتير بسبب كدا
بص ، الناس دايما بتحب تتلم حوالين الشخص المحبوب الناجح. في الحالة دي انت فعلا محتاج تشتغل علي نفسك وتبني كارير ناجح وتهتم بلبسك وشكلك ونضافتك لان دول عوامل أساسية عشان تجذب الناس ليك ، وكمان لو هما عندك على الفيس او الانستغرام ، اعملهم انفريند أو unfollow وشوف ناس تانية. صدقني ، نفسيتك هتتحسن لما تبعد عنهم و ده عن تجربة
تم النشر الأحد، ١ أكتوبر ٢٠٢٣
السلام عليكم ورحمة الله وبركاته شكرا لحضرتك ع المشاركة شاب في مقتبل العمر لسه بتبدأ حياتك ليه تحط نفسك في دواير ناس بتحس فيها بعدم الأمان انت حساس زي مابتقول اللي يقدر ده تمام مش بيقدره وبيخترق حدودك شيله من دايرتك حب نفسك اكتر وطورها فمجال عملك عشان شغلك يتكلم عنك وتكتسب ثقة اكبر حلو انك تفكر كتير طبعا بس مش افكر بس لازم فعل يحفزك نشوف بنخاف ونقلق من ايه ونتعلم مهارات تقلل القلق ده نهتم بنفسنا شوية بعقلنا نغذيه نشغله بما ينفع
تم النشر الأحد، ١ أكتوبر ٢٠٢٣
ببساطه انت معرفتش تحب نفسك عارف لو حبيت نفسك مش هتزعل كده ركز في مستقبلك وشوف ايه الحاجه الا ممكن توصلك لطريق النجاح ولم تقف علي ارض صلبه كل الناس دي هتتلم حوليك بس اتعلم تحب نفسك وبلاش تتعشم لان العشم اخرته وحشه احنا في زمن مينفعش ولا تبقا طيب ولا تتعشم امشي في طريق نجاحك وكل دول هيجرو وراك
تم النشر الأحد، ١ أكتوبر ٢٠٢٣
معلش ي باشا بس كل الزعل دا عشان ايه ....؟ صحاب يعم وحد الله بس وانسي كلمه صحاب واشتغل غل نفسك وبص لشغلك وركز وان شاءالله موفق دايما.. الصحاب اللي زي دول متمشيش معاهم اصلا وميستهلوش حد يزعل عليهم .. أما مخاوفك وتوتر وكدة ف ي باشا تقعد مع نفسك ايه اللي بيسببلي التوتر واحاول انساه ايه مخاوفي واجربها بحيث اكسر حاجز الخوف مره واتنين وتلاته لحد ما ارتاح من مخاوفي ومتبقاش عقبه ف شغلي فاهمني؟.. وربنا يريح بالك ويوفقك
تم النشر الأحد، ١ أكتوبر ٢٠٢٣
استنى من هنا لحد اخر عمرك ...مفيش اختلاف هيحصل....تعالى اقولك ليه؟ انت ناقصك حنيه واهتمام من اهلك اولا ...وبتصبها فى الاشخاص الاخرين الاشخاص |( اللى انت مسميهم صحاب ) طالما مش بيقدموا اللى انت محتاجة يبقى انت مكانك غلط وسطهم هما مش هيغيروا من نفسهم عشانك ...هما بيزقوك انت تبقى شبههم عشان يعرفوا يحترموك انك تكون حساس مفيش مشكلة .....بس مينفعش ده يظهرك بشكل طرى ...الرجولة محتاجة صلابة قصاد المواقف الوحشة اكتر من اللى انت عامله ده . الثقه تبنى يا ولدى ...وانت محتاج تشتغل عليها ويكون جنبك حد كبير ويرشدك لحد ما تقف على رجلك .\ الناس دى كده كده مش صحاب طالما استخدموا معاك طريقه غلط ومحاولوش يساعدوك غير صحبتك دى وانك تحب حد مش كافى ...اتاكد انهم بيحبوك فى المقابل وحب انت نفسك الاول
تم النشر الاثنين، ٢ أكتوبر ٢٠٢٣
انت محتاج شخص يدعمك نفسيا يساعدك ويعرفك ازاى تحب نفسك كفاية و تثق فى نفسك وبعد ما تمتلك مهارة الثقة بنفسك هتقدر بعدها هتقدر تختار مين يكون فى حياتك ومين لا وتكون راضى عن نفسك جدا وهتقدر تغير اى سلوك عندك مش حابه يكون موجود ووقتها هتكون انت المتحكم فى امور حياتك وكل الى حوليك هيعرفو هم بيتعاملو مع مين انت تقدر تغير اى حاجه مش عاجباك فى شخصيتك وتكون افضل نسخه من نفسك
تم النشر الأحد، ١ أكتوبر ٢٠٢٣
محتاج فعلا تعتزلهم وتثفل كل البيبان منهم لأنهم لو كانوا صحاب كانوا ساعدوك مش عملوا معاك كدة، وتبدأ تحب نفسك عشان تستغني عن الحب الوهمي إللي بيجيلك منهم، ولما هتبدأ تحب نفسك هتعرف أنت اصلا تكون محب وتدي حب أضعاف إللي كنت بتاخده وهيبقي مش فارق معاك حب أي حد ليك المهم رضاك عن نفسك لو مش بتعمل حاجة غلط أبدا أعرف عن نفسك واستكشفها شايفة إنك محتاج الخطوة دي جدا وحاول لو حتة إنك فافي وفرفور دي مضيقاك، أكيد تصرفاتك بتوحي لإلي قدامك إنك كدة، فبطلها عشان تعرف تعيش الحقيقي والواقع والصحه والمفروض
تم النشر الأحد، ١ أكتوبر ٢٠٢٣
شوف حد واثق من نفسه واعمل زيه وقلده واتفرج ع محتوي اليوتيوب الثقة بالنفس هيفرق معاك في واحد اسمه فارس ع اليوتيوب بيكلم في الموضوع ده
تم النشر الاثنين، ٢ أكتوبر ٢٠٢٣
لعرض السؤال في فدني اضغط هنا