انا تالته إعدادى ومش عارفه ادخل إيه .. والدتى عايزانى ادخل معاون مباحث ال هى سنه ونص انا مستويه حلو جدا وعلطول بطلع التالته على المدرسه وولدى عايزنى ادخل تمريض علشان مصاريف الثانوي غاليه علما انا والدى شغال فراش فى مدرسه وشغال أمن فى شركه عادى انا ممكن اشتغل واصرف على تعليمى انا عايزه اخش ثانوى وبعدين كليه طب خايفه اكون مش قد الخطوه ديه ويكونوا هما صح وجزاكم الله خيرا
يا ريت تعرفي أن فيه مؤسسات خيرية بتعطي منح للطلاب لاستكمال التعليم الجامعي مثل مؤسسة مصر الخير .. وأكيد هتلاقي اللي يشرفه أنه يدعمك في الثانوي برضه طالما أنك متفوقة .. واعرفي أنك ممكن تتفوقي في الثانوية من غير دروس خصوصية وبأقل التكاليف كما أنك ممكن تشتغلي في الأجازة أونلاين وأنت في بيتك (في السوشيال ميديا مثلا ودي حاجة مطلوبة بكثرة) وتوفري مصاريفك بنفسك ودي حاجة ممكن تتعلميها لوحدك فيا ريت ماتتخليش عن حلمك لأن الفرحة اللي بابا وماما هيفرحوها بيكي إن شاء الله هتكون كبيرة وهتغطي على أي صعوبات واجهوها معاكي .. ويا ريت تتابعي معانا هنا قبل أي خطوة وتطمئنينا ..
تم النشر الأربعاء، ١١ يناير ٢٠٢٣
هتكوني قد المسؤولية طالما انتي عايزة كده باذن الله متخافيش .. انتي تحاولي تظبطي امورك في كل حاجة في الثانوية العامة .. بحيث انك تقللي من مصروفتها على قد ما تقدري. وطالما انتي متوفقة خلاص ايه اللي يمنع .. لانك لو انتي قادرة فعلا هتفضلي طول عمرك زعلانه انك محاولتيش على الاقل. ف انتي حاولي واعملي اللي عليكي ... والموضوع دلوقت بقى منفتح جدا .. في المذاكرة تقدري تشوفي دروسك اونلاين .. ولو عايزة تاخدي مثلا درس تاخدي في حاجة هتكون صعبة عليكي .. خليكي قد المسؤولية اتجاه نفسك ومتخافيش
تم النشر الثلاثاء، ١٠ يناير ٢٠٢٣
توكلى على الله بس كونى قد المسؤولية وذاكرى كويس ومتزوديش عليهم فى الدروس ...انتى ممكن تذاكرى اون لاين اصلا دلوقتى الدروس كتير
تم النشر الثلاثاء، ١٠ يناير ٢٠٢٣
ادخلي ثانوية عامة وماتخديش دروس وهتلاقي أن مصاريفك مش أكتر كثير من مصاريف المدارس التانية وقولي لوالديك أي قرش هيصرفوه عليك دلوقتي في الثانوي هترديه لهم أضعاف إن شاء الله لأنك متفوقة ولك مستقبل كويس وربنا يوفقك وينفع بيك وتبقي دكتورة تنفع الناس كلها
تم النشر الثلاثاء، ١٠ يناير ٢٠٢٣
حياة الإنسان عبارة عن شوية قرارات مهمة بتغير مصير الإنسان بالكامل للأحسن او للأسوء.. اقعد معاهم و ناقشهم في رغبتهم دي و شوف انهي الأصلح لك ولازم تحكم عقلك كويس قوي لان ده واحد من القرارات المصيرية، و لازم لازم لازم تاخده بنفسك بعد اما تحسبه كويس حلو و وحش بمعني تحسب لو الخطوة دي نجحت او فشلت مصيريك هيبقي ايه و تأثيره علي حياتك، برضه لازم يبقي عندك شخصية و القرار يبقي قراراتك لان دي حياتك انت مش حياة ابوك ولا امك مع كامل الاحترام.. بس عايزك و انت في الوسع كده تحسب كل الخيارات بتأني و تاخد وقت و بلاش تختار حاجه علشان هيه الاسهل، الناس بتتعب في شبابها علشان ترتاح لما تكبر و لما تاخد القرار تتحمل مسؤلية قرارك للآخر و متحملش حد النتايج، علشان اصلا القرار قرارك و انت بطل قصة حياتك بس لازم تسأل و تستشير الأكبر منك خصوصا لو انت لسه مسؤل منه، بتمني لك التوفيق.
تم النشر الثلاثاء، ١٠ يناير ٢٠٢٣
أن شاءالله شكرا جدا لحضرتك
تم النشر الأربعاء، ١١ يناير ٢٠٢٣
لعرض السؤال في فدني اضغط هنا