مرة في مرة بتعرف على نفسي اكتر وبشوف صفات فيا بتبقى حلوه مثلا فبنميها وكده واما الصفات الوحشه بتعرف عليها وبحاول التعامل معاها فانا شخص هادي جدا.. واكتشفت مؤخرا اني بتكسف قوي هذكر موقف..
كان في واحد شغال في شقه بتاعتنا كان بيقول لي هات لي علبه سجاير وكده بس انا مش المفروض عليا ان انا اجيب صح تمام بس انا كسفت ان انا اقول له لا ومواقف من دي كتير بتكسف انا بس ما بقاش عايز اعمل الحاجه دي بس بتكسف واخجل
فايه الطريقه الصحيحه ان انا اتخلص منه وازاي اتعامل معاه في حياتي
وشكرا لكم ❤️
التجربة هي خير معلم، عليك اجبار نفسك بقول لا مرة، وصدقني الراحة التي ستعود عليك من قولها ستجعلك فيما تلا لا تخجل. ولتقليل خجلك يمكن الرد بلا في مكالمة هاتفية اولًا هذا سيجلك تستطيع قولها بأريحية أن من ترفض طلبه لا يراك. وإن كان الأمر متأزمًا بشدة فيمكنك زيارة أخصائي نفسي سيساعدك على فعل هذا بشكل صحي ومناسب باذن الله
تم النشر الجمعة، ١٢ مايو ٢٠٢٣
واجه خوفك.......بتتكسف تقول لا؟ يبقى قول لا ممكن يكون صعب بس بعد ما تقول كلمة لا على حاجه انت مش عاوز تعملها وقتها هتحس بتقدير ذاتك و عدم الكسوف .....ده حقك انك تقول لا لو مش عاوز تعمل حاجه و طبعا قول لا بأدب و اسلوب حلو......ثانيا و اهم حاجه لازم تحط حدود لو حد حاول يتعداها توقفه عند حده اعرف انت بتحب ايه و بتكره ايه في طريقة تعامل الناس معاك و حاول تكتشف نفسك اكتر لان وقتها هتقدر تحط حدود بسهولة ......الحدود مهمه جدا للصحة النفسيه و كمان لتقدير الذات .....لو مش حابب تعامل شخص ما معاك ببساطه قوله انا مش بحب الأسلوب ده أو قوله انه تخطى حدوده .....مثلا الموقف الي انت ذكرته تقدر تقوله انا مش عاوز اجيب السجاير تقدر تجيبها بنفسك أو ممكن تبعت حد تاني يجيبها طبعا قوله الكلام ده بس مش بنبرة حاده لا بنبرة عادية جدا المهم انك تواجه خوفك في الاول و بعد كده هتلاقي الموضوع سهل و مش صعب
تم النشر الخميس، ١١ مايو ٢٠٢٣
تقبل ردود الافعال وتخيل دايما اسوأ سيناريو لاحداث وخليك مستعد ليه مش هتكون ولا خايف ولا مكسوف لانك هتكون عارف هتتصرف ازاى ( ده لو حصل اصلا ) قول لنفسك دايما ان طالما اللى قدامى متكسفش يقول اللى يناسبه يبقى انا متكسفش ارد عليه باللى يناسبنى . اعرف بالعامية كده ان الحياء حاجة والكسوف حاجة تانيه ممكن تقف تتكلم بالحق بس وانت عندك حياء ومتذكرش اى لفظ وحش لكن انك تسكت عن الحق ده كده يبقى انت دخلت فى دايرة الظلم والنوع ده من الكسوف هو ظلم للنفس لازم تبعد عنه تماما.
تم النشر الجمعة، ١٢ مايو ٢٠٢٣
لازم تتعلم انك تقول لأ ... متتكسفش انك تقولها، انت كده بتجي على نفسك انت، ولو انت خايف احسن اللي قدامك يزعل او يضايق، هل انت كده هتكون مبسوط، يعني تفرح اللي قدامك وتزعل نفسك يعني! هتبقى مبسوط ولا هتبقى حاسس انك مش طايق نفسك، وهتبقى حاسس انك ليه مش بتقول لأ، هيحصل ايه يعني، هو انا ليه باجي على نفسي كده؟ لو الموضوع كبر منك .. الناس هتعرف نقطة ضعفك ديه، وهيستغلوك .. ف اي حاجه مش مناسبة ليك اعترض، وقول رأيك .. ولا مش هعمل كده .. متجيش على نفسك على خاطر حد. لان مفيش حد هيقدر ده وهيستغلك بعدين، لان فيه ناس تقدر تعمل الحاجه بنفسها ... بس بتعتمد على الشخص التاني انه هو ده الشخص اللي هيعمل كل اللي هطلبه منه. ف قول لأ. واجبر نفسك انك تقولها حتى لو مكسوف، مرة ف مرة هتتعود.
تم النشر الجمعة، ١٢ مايو ٢٠٢٣
انت ممكن تشوف حد قريب منك شوية بتتكسف منه و تتكلم معاه في الموضوع ده و تستخدمه كتجربه فانك تقوله لاء و تشوف انت بتتكسف من ايه و تتكلم معاه فيه و كدا .
تم النشر الجمعة، ١٢ مايو ٢٠٢٣
لعرض السؤال في فدني اضغط هنا