دلوقتي أنا عرفت حد وكدا من حوالي من ٣ شهور وأنا رفضت كتير الموضوع من الأول لأنه حرام فالشخص حاول كذا مرة وعملت بلوكات كتير وهكذا إلي أن استجبت للموضوع وهكذا ومرينا بال ٣ شهور دول وأنا دايما في بالي اللي هو حرام وكدة وحبيته وكدة وأنا صعب جدا ان اتخلي عن حد بحبه وهو شخص كويس الي حد ما وبيحصل بينا خلافات كتير وبنحلها وأنا مش بحب انه يزعل وكدة لأنه بطبيعته شخص حساس جدا ومر بحاجات مأثرة عليه ولكن أسلوبه فالزعل بيبقي مش كويس وبيقول كلام بيحسسني انه ولا كأني فارقاله ويرجع بقي بعد الزعل يقولي اسف ومكنتش اقصد انا ببقي زهقان وعديتها كذا مرة ولكن ببقي مضااايقة لأني مش بحب أسلوبه دا ولكن بضطر ان استحمل علشان مبقاش بياعة من وجهة نظره وكدا ومش بستحمله في أسؤ حالاته ولكن كلامه بيبقي صعب وفي وسط دا انا أصلا مضاااايقة من نفسي لأن الكلام بينا حرام ولكن حاولنا كذا مرة نبعد وبرضوة بنرجع وصراحة المحاولات بتبقي من عنده وحصل خلاف النهاردة بينا وأنا قولتله انت خسرتني النهاردة وسبب الخلاف علشان اتاخرت شوية فالرد عليه فافقعد يقول انه زهق من الحوار ده وان كل شوية يتكرر وانا الصراحة مليش فالحورات المتدارية وكدة ولما بتاخر بكون بعمل حاجة مثلا فالبيت وفهمته قبل كدا ان مش عايشة لوحدي حواليا ناس وأكيد بنشغل معاهم
قام قالي أنا مش هحاول تاني اللي عاوز يمشي يمشي واللي عاوز يقعد يقعد مش محاول تانيوقال متقوليش انت خسرتني دي تاني هل بقي هو يقصد الكلام دا ولا علشان مضايق برضوة بجد تعبت مبقتش عارفة افرق ومضغوطة بسبب ان الموضوع حرام أصلا مش عارفة اتصرف ازاي وانا الحمد لله شخصية كويسة بشهادة الجميع والي حد ما ملتزمة ومختمرة وبلتزم بالدين ولكن يشاء ربنا واقع فالحوار ده اعمل اي لان بحس ان كدة متناقضة !!
لو عايزة الرد في كلمتين: متخونيش ثقة أهلك فيك وخليكي فاكرة إن العلاقة دي بنسبة ٩٩٪ مش هتتطور لزواج ودة معناه أنك عاملة تعملي في ذكريات الله أعلم هتطاردك كم سنة لقدام بعد ما كل واحد يروح لحال سبيله.
تم النشر السبت، ١٩ أغسطس ٢٠٢٣
إجابة حضرتك في السؤال نفسه الموضوع لا يرضي الله بأي شكل من الأشكال. واضح إنه عنده حب سيطرة وتحكم زيادة شوية وتعلق قلق برضو باين فموضوع إنه مبيصبرش على تأخير الرد. استعيني بالله عز وجل وسدي كل الابواب الي ممكن ترجعك للعلاقة دي وأشغلي نفسك بما يصلح أمور دينك ودنياكي، ولو حابب يكمل في العلاقة خليه يتقدم لوالدك وحضرتك ووالدك تقيمه وتشوفوا صلاحيته. وحاولي ترتبطي بصحة صالحة تخفف عنك ويعينوكي. يسر الله لكي ووفقك إن شاء الله.
تم النشر السبت، ١٩ أغسطس ٢٠٢٣
محتاجة اعرف هو عنده كام سنة؟ بصراحه اللي بالتصرفات ديه ل اما شخص صغير في السن .. ل شخص غير ناضح بتاتا. يعني ايه لما تتأخري في الرد يقول الكلام ده؟ وهل اساسا ده خلاف يستاهل عليه كل ده؟ ده شئ لا يبشر بالخير، مع كل طبعا اللي قولتيه عنه .. وانه فيه صفات مش عجباكي وانه لما بيزعل على اي خلاف بيقول كلام جارح ليكي. وفي الحقيقة هو ده السؤال التاني : هل انتي تقبلي شخص زي ده يكون زوج ليكي؟ يعني لما تحصل مشكلة ما بينكم هل تقبلي انك لو اتاخرتي عن الاكل مثلا عليه ساعة يقلب الدنيا؟ او يقولك كلام مش كويس، او حتى يمد ايده؟ هل تقبلي شخص زي كده يكون فعلا زوجك، متفكريش في الحب على قد ما تفكري في سلوكيات الشخص نفسه .. الحب مش مهم على قد ما احترام الشخص ليكي مهم، على قد ما تقديره ليكي مهم، على قد ما حاجات كتيرة اوي مهمه اكتر من الحب. ثانيا - والاهم انتي طبعا مقتنعة ان ده كله حرام .. ف ده شئ ميرضيش ربنا .. ف ياريت تفكري في ربنا اكتر من اي حد، رضاه هو المهم .. مش الشخص هو المهم. ودمتي بخير
تم النشر السبت، ١٩ أغسطس ٢٠٢٣
أيوا ، الحمد لله أنا بعمل اللي بتقولي عليه ده الحمد لله وبحفظ قران وبروح جيم الأمور متيسرة الحمد لله يارب خيير وأن شاء الله تلبسي الخمار يا جميلة
تم النشر السبت، ١٩ أغسطس ٢٠٢٣
؟؟
تم النشر الأحد، ٢٠ أغسطس ٢٠٢٣
.....
تم النشر الأحد، ٢٠ أغسطس ٢٠٢٣
انتي بشهادتك عارفه انه حرام خلاص اقطعي وخليكي قوية انتي كده مش بياعة انتي كده صالحة ولو هو عايزك هييجي ويتقدم مع اني مش مقتنعة باسلوب زعله الغريب ده يعني ايه حد لما يزعل يقول كلام دبش ويرجع يقول اصلي كنت زعلان...انتي لازم بردو تدخلي جروبات دينية ووتشغلي وقتك بحاجات زي القراءة او الرسم وحاوطي نفسك بالدين عشان لما نفسك تخونك تروضيها ومتخافيش وربنا معاكي وافتكري {ولا تقربوا الزنا إنه كان فاحشة وساء سبيلا} بس وربنا يعينك ويثبتك ويبعد عنك شرار القوم ويرزقني الخمار زيك كده♡.
تم النشر السبت، ١٩ أغسطس ٢٠٢٣
لعرض السؤال في فدني اضغط هنا