السلام عليكم
انا بكتب الكلام وانا حرفيا قلبي بيتكسر ومنهارة
والله ي جماعة انا مفيش حد اتكلم معاه غيركو
انا مليش اب، امي وابويا منفصلين وليا اخ اكبر مني بسنتين..امي معظم الوقت ف شغلها وانا كمان ف شغلي ومش بنقعد مع بعض ولا بنتكلم ولا بتعرف تحتويني ولا تحضني..واخويا دايما مع نفسه كده ومع تليفونه وطبعه غشيم
دلوقتي كل ما يحصل مشكلة بيني وبين اخويا امي تدخل وياريتها بتحل دي بتدخل وتيجي عليا انا
النهاردة مثلا كنت بعمل شغل وبتكلم ف التليفون راح اخويا ضربني بجلدة ع رجلي ووجعتني اوي كنت هعيط. وانا بتكلم مع الناس مسكت نفسي وبعدها كنت هروح لاخويا ازعقله عشان الي عمله لقيت ماما مزعقالي وعماله تقولي احترمي نفسك وملكيش دعوة بيه وجت عليا انا روحت زقيته وزعقتله عشان والله وجعتني وهي عماله تزعقلي انا راح هو ضربني في بوقي حصل فيه حاجة معرفش اي هي راحت برده مزعقالي انا اقسم بالله ما قلت له هو ربع كلمة
اتنرفزت وزعقت فيهم هما الاتنين عشان حسيت بظلم وهي كمان بتشتمني راحت جاية عضتني ايدي اتعورت وعايزة تكمل وتضربني وبتقول مش هكلمه ولا اقوله حاجة عشان هو الراجل
سؤالي بقى انا معنديش حد اشتكيله مين ممكن اروحله يطبطب عليا لما اقرب الناس ليا بيعملوا كده قلبي بيعيط والله ي جماعة وحقيقي حاسة بظلم ومش عارفة المفروض اعمل اي
قربي من ربنا وادعي ان ربنا يجيب لك حقك لان دعوه المظلوم مستجابه ادعي كثير جدا وقربي من ربنا لان ربنا ما بيرضاش بالظلمه ان شاء الله ربنا هيجيب لك حقك خليك بس معتمد على ربنا ومتاكده انه هو عمره ما يرضى بالظلم وان كما تدين تدان ان شاء الله ربنا يوفقك وحقك ييجي
تم النشر السبت، ٢٨ سبتمبر ٢٠٢٤
قوليلها ابنك يضربني و انت ساكته لو حصل و كررها هعمله محضر عنف منزلي و هسجنه و جسمي يشهد طالما العملية اصلا واصلة للضرب ، يلا بقي و بالمناسبة صوتي و لمي الناس و الدنيا و الجيران علشان كله يبقي شاهد لحد اما اخوكي اللي ملقاش حد يلمه ولا يربيه مع احترامي ليكي يتلم بس الغلط مش عليه الغلط علي امك فرحانة بيه ، روحي اكشفي بكره او لما تقدري علي نفسك ، و حاولي تشوفي حد كبير في العيلة و تحكيه و ييجي يتدخل لازم حد ياخد عليه عهد انه ميحطش ايده عليكي بس خليكي فاكرة انتي اللي سمحتي لهم بكده ، ملحوظة اخوكي سادي و معندوش اي احترام لأي انثي و لولا المحروسة بتطبطب عليه كان ضربها هيه كمان زائد انه مش راجل علشان المفروض يكون هو سندك بعد والدك مش العكس .. كلميها و ياتلم ابنها يا اما اسجنيه الشكل ده مش خسارة فيه السجن المشكلة مش في كده .. المشكلة انك لسه قاعدة معاهم .. فحرفيا معنديش حل بس حاسس بشعورك . لازم حد كبير يتدخل و له كلمة عند اهلك يتدخل ..
تم النشر الجمعة، ٢٧ سبتمبر ٢٠٢٤
وعليكم السلام ورحمة الله وبركاته. أختي العزيزة، أقدّر مشاعرك الصادقة وآلامك التي تشعرين بها. من الواضح أنك تمرين بوقت صعب جدًا، وأنك تبحثين عن الدعم والاحتواء اللذين تحتاجينهما. أولًا، يجب أن تعرفي أن مشاعرك صحيحة ومشروعة. إنه شعور مؤلم عندما لا تجدين الدعم من عائلتك. إن العنف، سواء كان لفظيًا أو جسديًا، غير مقبول، ويجب أن تأخذي خطوات لحماية نفسك. حديثك عن وضعك يدل على مدى قوتك ورغبتك في البحث عن حل. لتخفيف هذه الضغوطات، يمكنك التفكير في بعض الخطوات التالية: التواصل الهادئ : حاولي التحدث مع والدتك أو أخيك في لحظة هادئة، وعبّري عن مشاعرك بطريقة هادئة دون اتهام، حيث يمكنك أن تقولي شيئًا مثل: "أشعر بالحزن عندما يحدث كذا". البحث عن الدعم : كوني صادقة مع نفسك واعملي على بناء شبكة دعم. ربما يمكنك العثور على صديقة مقربة أو فرد من العائلة غير مباشرة يمكنك الوثوق به. الحديث مع شخص خارج الوضع يمكن أن يكون مريحًا ويعطيك منظورًا مختلفًا. التوجه للجهات المعنية : إذا استمر الوضع دون تغيير، يمكنك التفكير في زيارة مختص نفسي أو استشاري يمكنه مساعدتك في التعامل مع مشاعرك وتقديم نصائح عملية. العناية بنفسك : حاولي ممارسة الأنشطة التي تجلب لك السعادة، مثل القراءة أو الكتابة أو الرسم. هذه الأنشطة يمكن أن تكون منفذًا لمشاعرك. اللجوء إلى الله : الدعاء واللجوء إلى الله هو أكثر الأشياء التي تجلب الطمأنينة. تذكري أن الله قريب، وأنه يسمع شكواك. أختي، من المهم أن تصبري وتبحثي عن طرق لإدارة هذه المشاعر. لا تترددي في طلب المساعدة من المتخصصين إذا كنت بحاجة إليها، فطلب الدعم هو علامة قوة وليست ضعف. حفظك الله ورعاك.
تم النشر الجمعة، ٢٧ سبتمبر ٢٠٢٤
ـ بصي يحبيبتي الاول كده انتي كام سنه؟ ثانيا.. بصي بقا النوع ده مينفعش تعديله الموضوع ده كده عشان هيزيد فيها وانتي كده هتزدادي خوف منه او من مامتك، انا عارفه انه ممكن يكون اقوي منك وكده، وسواء كان اكبر منك او اصغر منك هقولك تعملي اي، لو ضربك بأي شكل قومي اضربيه، مش انتي كده كده هيضربك وكده كده هتتخانقوا؟ خلاص بقا يبقا لازم تطلعي من الخناقه دي وانتي مبسوطه من نفسك حتي لو انتي انضربتي المهم ان هو كمان انضرب، مش يضربك وتسكتي، عارفه لو حتي بترتعشي منه كده، اضربيه برضوا ان شالله بعصاية المكنسه، حتي لو هيقوم ويضربك اضربيه، عارفه لي؟ عشان انتي لما تضربيه هو هيعمل حسابك بعد كده، حتي لو جيه يضربك بعد كده، مش هيكون زي الاول واوعي تبيني الضعف قدامه خالص،(اعملي نفسك شجاعه،مثلي انك شجاعه) انا قريت مقوله قبل كده بتقول " مفيش فرق بين الشجاع واللي بيمثل انو شجاع عشان مش هتعرف تكشفهم من بعض" ومع الوقت هتلاقي انك مبقتيش تخافي منه خالص، وبالنسبه لمامتك لو جات تعاتبك او تزعقلك مترديش عليها، بصيلها ف عنيها كده لخمس ثواني وابتسمي بأبرد ابتسامه عندك، واوعي تسيبي حقك ابدا مهما كنتي خايفه مهما كنتي ضعيفه ولو ضربك قولي "اللهم كما اراني قوته فيّ اريني قوتك فيه"، اقعدي اكتبي مذكراتك كل يوم وروحي الجيم وابني كتله عضليه ف جسمك عشان تبقي اقوي، وافتكري ان مهما كنتي انتي منين، من الصعيد ولا من اى حته ف العالم، احترامك لنفسك وحبك لنفسك بينبع من جواكي، انتي تحتوي نفسك، انتي بتحبي نفسك عشان انتي تستاهلي الحب ده وتستاهلي كل الخير اللي ف الدنيا، متفكريش ان عشان احنا بنات يبقا احنا ضعاف، لأاه خالص، احنا اقوي من اقوي حد ف الكون ده، ومحدش يقدر يقلل من احترامنا لنفسنا عشان احنا عارفين نفسنا كويس، قريت مقوله بتقول "انت ما تعتقد انك تكون" لو فاكره نفسك ضعيفه هتبقي ضعيفه ولو فاكره نفسك قويه هتبقي قويه،، واتكلمي مع ربنا وخصوصا الساعه اللي قبل الفجر ربنا بينزل فيها وبيستجب الدعاء، ادعيه بيقين وهو هيستجيب، اتكلمي معاه، وفكك من الناس المتخلفه دي، وانا موجوده ف اى وقت حبيتي تتكلمي معايا ي حبيبة قلبي، وربنا انتي قمر وعسل، والقمر ملوش الا القمر اللى زيه، ابتسمي بقا كده وصلي ع النبي يـ سُـڪر 🥰😊
تم النشر الاثنين، ٣٠ سبتمبر ٢٠٢٤
يا ترى لو كان عندك ولد و بنت هتعامليهم زى بعض ولا هتفرقى في المعامله برضو و تكسرى بخاطر البنت و تقولى إحنا صعايده ؟ اعتقد اجابتك على السؤال دا هتريحك و هتعرفى تتصرفى صح إن شاء الله. ربنا يصلح لك الحال يارب.
تم النشر الأحد، ٢٩ سبتمبر ٢٠٢٤
مافيش حد كبير تشتكي له زى خالك أو عمك أو جدك أو حد قريب منكم.. يتكلم معاهم عشان يعرفهم إنهم ميعرفوش ربنا بالتصرفات دى؟ حسبي الله ونعم الوكيل في كل ظالم.. ربنا يصلح لك الحال يارب.. ادعى ربنا يحفظك و يعوضك خير يارب.
تم النشر السبت، ٢٨ سبتمبر ٢٠٢٤
يا ريت بعد كده انتي او اي بنت لو حد جيه يضربك تحمي وشك بكل شكل ممكن ..
تم النشر الجمعة، ٢٧ سبتمبر ٢٠٢٤
لعرض السؤال في فدني اضغط هنا