السلام عليكم
انا بقالي ٥ سنين متزوجه ومعايا طفل ٣ سنين والحياه بيني وبين زوجي مستحيله ف العيشه واهلي ضاغطيتين عليا جامد فةاني استمر معاه وهو اول فرصه بتيجي عشان اخد حقي واخلي اهلي يشوفو خقيقته يقلب الترابيزه ويطلعني انا اللي غلطان اني بخرج عن شعوري ويستفزني ويخليني اغضب واتعصب وصوتي يعلي اعمل ايه عشان اهلي يقدرو يشوفوه زي ما انا شيفاه وهو طول الوقت شايف اني غلط واني مش حلوه واني ماليش ف اي حاجه حتي تربيتي لابني كمان يااااريت حد يفدني بجد
اعملي محاوله اخيره مع جوزك ومع اهلك، يعني محاولتين في نفس الوقت.. وخلي اهلك هم اللي يكونو اصحاب الفكره عشان لو الموضوع فشل يكتشفو ان فعلاً عندك حق، واعملي محاوله اخيره مع جوزك عشان يعرف قيمتك.. انتي مش خدامه عند حد.. وفي الاخر اتمنى ان ربنا يهدي الحال يعني
تم النشر الاثنين، ٢٦ يونيو ٢٠٢٣
طيب ما تعملي زيه!! بس بعقل، وبرزانه، يعني ايه؟ يعني هو بيعصبك، وبيخليكي تخرجي عن شعورك، واللي بيشوف القصة من بره هيقول انتي اهو اللي بتعلي صوتك، وانتي اللي غلطانه وانتي وانتي!! هو بيستغل كل ده، يبقى نحاول اننا نعكس الصورة ديه قدامه وقدام اهلك، ازاي؟ يعصبك، مترديش خليكي هادية .. معاملتك معاه تبقى لطيفة .. حتى لو عمل حاجه تضايق وتعصب... اتناقشي معاه بهدوء جدا.. سواء بقى قدام اهلك او بينكم مع بعض. خليكي واثقة من نفسك قدامه، يعني هو شايف انك مش حلوة، طيب اتناقشي معاه شايف كده ليه، والله لو اسبابه مقنعة شوفي انتي ممكن تعملي ايه، لو اسبابه من الهوا، يبقى كأنك مسمعتيش حاجه، وزودي ثقتك في نفسك اكتر، واهتمي بابنك وب بيتك.
تم النشر الاثنين، ٢٦ يونيو ٢٠٢٣
لما يكون عندنا صفة اللى قدامنا بيستغلها زى ما بتوصفى كده عشان يقلب الترابيزة ...يبقى اول حل انى احرمه من الصفة دى انه يستخدمها . بتعصب ..ادرب نفسى على الهدوء ونشوف اذا حصل نفس المواقف هتبقى دى الحجه عليه هو ان الشماعه اللى كان بيعلق عليها افعاله اللى فى حقك وحشة بقت مش موجوده ...وده هيوقع عليه الغلط قدام نفسه وقدام اى حد . لو مشكتك معاه كثرة انتقاده ليكى ...فبعيدا عنه كونى واثقه فى نفسك وكل ما تتجاهلى الانتقادات ( بس لو هى مش فى محلها فعلا ...) كل ما هيبدأ يبطلها لانه بينتقدك عشان يخليكى تتأثرى وتاخدى رد فعل او عشان يقول لنفسه انه كده راجل بجد ( طبعا دى فكرة غلط عنده ) نظرتك لنفسك مهمه وانك تسمعى كلامه بردوا وتقيسيه اذا فى مصلحتك وولا لا ده مهم ( لان وارد تكونى مش حابه انه يعدل عليكى بشكل عام ويكون هو قاصد ينصحك مش اكتر )
تم النشر الاثنين، ٢٦ يونيو ٢٠٢٣
حاولي تقعدي مع جوزك مش قعدة عتاب لا اقعدوا قعدة ود وأسأليه اي اللي مزعلك واي اللي اقدر اغيره في رجالة كتير بتيجي بالتفاهم والود ساعتها هتفتحوا قلوبكم لبعض وممكن الحال ينصلح. اذا كان غير كدا ف لازم تفهمي اهلك الموضوع كامل واشرحي كل التفاصيل وهدديهم ان الموضوع دا لو متحلش انتي مش ضامنة هتعملي اي. كمان حاولي تقربي من جوزك شوفي اي خلل صلحيه لو حاجات مش بيحبها غيريها، حاولي تغيري ف سستم كل حاجة ف حياتكم حسسيه بالتجديد
تم النشر الاثنين، ٢٦ يونيو ٢٠٢٣
إيه الحاجات اللي مخلية الحياة بينكم مستحيلة زي ما بتقولي؟
تم النشر الاثنين، ٢٦ يونيو ٢٠٢٣
لعرض السؤال في فدني اضغط هنا