السلام عليكم، احنا مش المفروض أصلا نكون شبه بعض حتى مع الأقارب والأصحاب والمعارف، مينفعش نكون نسخ من بعض وإلا هتبقى الحياة ملهاش معنى، احنا بنكمل بعض. فكرة إحساسك بالوحدة وسطهم ملهاش علاقة إنهم مش شبهك، ممكن فيه مشكلة بالتواصل، مهما بلغ اختلافكم أكيد فيه نقط مشتركة، اهتمامات أو أفكار ممكن تتلاقوا فيها. لو ملقتيش النقاط المشتركة فده لا يمنع إن يكون فيه ود وتواصل خاصة مع القريبين مننا. فكرة إنه كله بقى عاوز مصلحته أعتقد فيها تعميم. ممكن ظروف الحياة بتتدخل فتحسي إنهم مهملين أو مش بيسألوا أو مش بيقدموا نفس اللي بتقدميه، ممكن أسباب تانية، ممكن انتِ عاطفية وغيرك مش بيعرف يتعامل بعواطفه، فيه أسباب كتير، فنحسن الظن لكن كمان نقلل عشم وتوقعات. في تعاملك مع الناس عمومًا حاولي تقللي توقعاتك، أو متتوقعيش منهم شيء معين عشان لا تنصدمي بعد كده. أي فعل أو تصرف تعمليه خليه دائمًا لوجه الله، في الحالة دي حتى لو اللي قُدامك مقدرش الفعل ده فهو خلاص اتحفظ عند ربنا واللي عند ربنا مش بيضيع. فقللي توقعات في العلاقات عمومًا، حطي نفسك رقم واحد وقدريها وثقي بها واستغني عن الناس، الحاجة الدائمة للحصول على رضا الناس أو توقعاتنا منهم بتخلينا للأسف نتصرف لاشعوريًا بطريقة ممكن تنفرهم مننا، لكن الشخص اللي بيركز على نفسه ويقدرها ويستغني عن الناس، بيحصل معه العكس، الناس هي اللي بتسعى عشان تشتري رضاه وقربه. جربي كده تركزي على نفسك الفترة الجاية وتطوريها وتزودي ثقتك بها وإن شاء الله تلاقي تغيير أفضل في حياتك. بالتوفيق.
لعرض الإجابة في فدني اضغط هنا