عندى مشكله وهى انى مش عارفة اقرب لربنا.
بحكم كل اللى حواليا انى قلبى طيب وهين ولين. دمعتى قريبه جدا وعندى كميه عطف على الانسان والحيوام متتوصفش والحمدلله حمدا كثيرا ربنا يديمها نعمه يارب بتصدق على الحيوانات وبحس بيهم وبطعمهم دايما فى الشارع ولو حد جه على سطوح بيتنا بسيبله اكل وفى الكلية والحمدلله ان ربنا انعم عليا بلين القلب.. فيا اغلب الصفات الكويسة والحميدة زى انى مثلا مبعرفش اغلط فى حد ولا اشتم باى الفاظ ومبعرفش اقول كلام مش كويس ، زى انى لبسى فى الغالب واسع لا بيشف ولا يصف ومحترم كله ، بقرا قران وبسمعة ، بساعد الناس ودايما بنصح بكلام ربنا ، بهون على غيرى وبسنده ، يعنى الحمدلله ربنا انعم عليا باخلاق حميده وجميله بس هى مشكلتى الوحيده والاكبر انى مش عارفه اقرب لربنا
بقرا فى الدين كتير ومؤمنه بكل حاجه خلقها ربنا ولو حد سئلنى بقدر افيده ، اعرف قدر فى الدين مش هين وبسمع دايما فيديوهات عن الصلاه والانتظام فيها وعقابها بس مبعرفش انتظم ، ممكن اصلى يوم اتنين وواحده واحده حاجه تشغلنى او اكسل وارجع مصليش تانى وانا مش عاجبنى حالى كدا خالص وبجاهد واعافر مع نفسى بس اللى مخوفنى ان قلبى مبقاش يتأثر باى حاجه بسمعها وبعدى الكلام والفيديوهات اكن مشوفتش حاجه
انا بجاهد كتير والله بس مش عارفة وبدعى دايما ربنا يثبتنى ويقربنى بس مفيش برضو
انا كنت منتظمه جدا وبجتهد فى صلاتى وبقيم الليل دايما واقرا قران وعلاقتى بربنا كنت راضية عنها انى ملتزمه ومش بفوت فرض بس فى حد لعب عليا ودخل حياتى ومن تعاملى معاه عرفت انه ليه علاقة بالجن والحاجات دى وانه اصلا لعب عليا بالطريقه دى وخلانى بعدت عن ربنا وسبت كل حاجه كنت بعملها فى العباده لا بقيت اصلى ولا اقرا قران ولا حاجه كان بيسيطر عليا جدا ، قبل كدا كان الفجر ياذن اجرى على الصلاه من بعد ما دخل حياتى كنت اقوله رايحه اصلى يقولى طب وكلامنا ومعرفش كان بيعملى ايه بس بعدنى جدا عن ربنا وبعدها عرفت انه لا بيصوم رمضان ولا بيصلى وبيشرب وحاجه اخر قرف والحمدلله عرفت ابعد عنه مع انه مش سايبنى فى حالى والله بس دلوقتى المهم عندى ارجع لربنا تانى فممكن تساعدونى رجاءا واسفه على المطاوله
ادراكك لنفسك جميل و مميزاتك و المشكلة اللى عندك. متسمعيش تانى للفيديوهات عن الصلاة بس اسمعى عن تذلل العبد لربه . الشيطان ممكن ميعرفش يخليكى تعملى حاجة غلط بس ممكن يخليكى تعجبى بحاجة صح لدرجة الغرور وده اللى بيخليكى تقيلة ومن غير ما تحسي تبطلى تعملى طاعات اخرى. الايمان يزداد وينقص ....بس ده مش فى الفروض ...ده فى النوافل الزيادات الحقيقة ان كل اللين والرفق والرحمة ممكن ميتشافوش عند ربنا لو مش بنؤدى الفرض. جاهدى نفسك تانى بالتدريج حتى لو فرض واحد ف اليوم والتزمى الدعاء ده ( اللهم ردنى اليك مردا جميلا ) ( اللهم تولنى فيمن توليت ) ( اللهم لا تكلنى الى نفسي طرفة عين )
تم النشر الأربعاء، ٧ ديسمبر ٢٠٢٢
أولا، أحب أشكرك على ثقتك بي وعلى شجاعتك في الحديث عن مشكلتك. أنا متأكدة من أن الله سيساعدك في حل هذه المسألة وأول خطوة لتقربي من الله هي توجيه الدعاء إليه والإيمان بأنه سيسمع دعائك وسيساعدك في هذا الأمر. هذا الأمر يحتاج إلى صبر وجهد، فلا تتعجلي النتائج ولا تيأسي. استمري في الصلاة وقراءة القرآن، وحاولي تحديد وقت محدد كل يوم للصلاة والتزام به. يمكنك أيضًا التفكير في الاحتفاظ بسجادة الصلاة في مكان رئيسي لتذكرك بالصلاة. حاولي أيضاً ترك البيئة والأصدقاء الذين يمكن أن يؤثروا عليك سلبًا ويحاولون إبعادك عن الدين. اختري أصدقاء مؤمنين واحتملي أن يكون هناك من يريد ممارسة العبادة معك. أيضًا، ابحثي عن بعض الموارد عبر الإنترنت للمساعدة في تحسين معرفتك بالدين والإسلام. هناك العديد من المواقع والمنتديات الإسلامية التي يمكنك الانضمام إليها للحصول على المساعدة والأفكار. أخيرًا، لا تيأسي وتذكري أن الله سيساعدك في هذا الأمر إذا كنت مستمرة في الجهد والصلاة. لا تترددي في طلب المساعدة من الله واتخاذ الخطوات اللازمة لتوفير البيئة اللازمة لكي تقربي منه.
تم النشر السبت، ١٨ مارس ٢٠٢٣
انا دايما بردد "اللهم ردني اليك ردا جميلا" و "لا حول ولا قوة الا بك" وعن تجربه كل ما بحس نفسي ببعد سبحان اللي بيقربني ليه تاني
تم النشر الأربعاء، ١ فبراير ٢٠٢٣
عن تجربة. شخصية. بداية الحل. اني كنت بردد ايه الكرسي كتير. وذكر لا حول ولا قوه الا بالله كتير والصلاة على النبي والاستغفار. كنت بحس انها بتمهد للرجوع لربنا وبتشرح الصدر
تم النشر الثلاثاء، ١٣ ديسمبر ٢٠٢٢
إدراكك للمشكلة وما حولها كويس جداً يخلينا نركز فكام حاجه..... الاولى خليكي على يقين أن كل الناس إيمانها يزيد وينقص وبتيجس علينا كلنا لحظات فتور ف العبادة .. المفروض نتعامل معاها من غير ذعر عشان الفترة دي تعدي بسلام من غير ما الشيطان يجرجرنا لخطوات تانية تنقص من إيمانا.. طيب ممكن نتعامل ازاي؟ من وجهة نظري اهتمي بإنك تسجلي كل فتور فأي فرض .. يعني النهاردة مثلا في صلاة مصليتيهاش تسجيليها ف نوت بوك عشان تعوضيها أول ما تقدري .. طيب صليتي كله بس في صلوات جمعتيها مثلا؟ يبقى كل صلاة صلتيها بعيد عن معادها هنستغفر قدامها 100 مره مثلا أو حددي أي ذكر ... الذكر من اسهل العبادات عشان مفيهوش مجهود يدوب بس بتحركي لسانك وتستحضري قلبك كده وانتي بتذكري الله... ممكن بعد فترة تزودي طاعة تانيه مع الذكر المهم إن مفيش فتور ف أي عبادة يعدي عليكي بدون ما تعملي عباده تانيه أخف عليكي.. وهنعمل كده عشان الشيطان ييأس منك لأن كده الطاعة اللي بتفوتيها بتعملي غيرها ف كده هو مش كسبان حاجه. طيب حاجه كمان .. النهاردة كله كان تمام ومفوتناش ولا أخرنا صلاة نسجل برضو ف النوته بس ف صفحة تانيه .. وكل ما نجمع 5 أيام نكافئ نفسنا بخروجة مثلا أو تشتري لنفسك حاجه عايزاها.. وانتي وشطارتم بقى ف انك تأجلي أي حاجه نفسك فيها لحد ما تكملي 5 أيام عشان يبقى عندك دافع تستمري. من ناحية تانيه بالنسبة لقراءتنا وفيديوهات التزكية هنغير فيها شوية .. اسمعي حاجات مختلفه زي مثلا شرح لاسماء الله الحسنى.. محاضرات في السيرة النبوية .. نوعي في الجانب ده بهدف إنك تغذي روحك وتحبي ربنا أكتر .. ولما بنكون عايزين نحب حد بنعرف عنه أكتر ف ركزي ف النقطة دي أكتر. وفي كتاب اسمه أول مره أصلي .. اقرأيه او ممكن تلاقيه سماعي في أي برنامج قراءة كتب زي (أخضر) وممكن تلاقيه على يوتيوب أو ساوند كلاود.. المهم الكتاب ده دخليه حياتك ف وقت ما تلاقي نفسك فاقده الشغف ومعندكيش ارادة تستمري على اللي قلناه فوق. خليني أفكرك بكام حاجه على الهامش كده.. 1- أي عمل خير أو طاعة بنعملها ممكن تقربنا من ربنا وممكن تبعدنا عنه لو اتغرينا بيها وحسينا اننا احسن من غيرنا عشان بنعمل كذا. 2- الصلاة لو تمام.. يبقى في حساب في القبر لاعمالك الخير والشر .. لو الصلاة مش تمام .. يبقى مفيش قيمة لأي عمل. 3- (ألا بذكر الله تطمئن القلوب) .. سِبحتك ف ايدك وعلى قد ما نقدر طول ما مش بنتكلم أو بناكل يبقى لسانا فاضي يبقى نذكر الله. 4- الدعاء ثم الدعاء ثم الدعاء والتوسل والتدلل الشديدين في الدعاء. رَدكِ الله إليه رداً جميلاً وأعانكِ وأنهم عليكي بمن يشدد بأذرك.
تم النشر الأربعاء، ٧ ديسمبر ٢٠٢٢
دائما ردد الدعاء ده اللهم اعنى على ذكرك وشكرك وحسن عبادتك
تم النشر الثلاثاء، ٦ ديسمبر ٢٠٢٢
كلنا بيجي علينا فترات الايمان بيقل ويضعف فيها متيأسيش حاولى مرة واتنين لحد ما ربنا يكرمك ويوفقك داومي علي الأذكار داومي علي النوافل والصيام خلي ذكر الله في لسانك علي طول حتي لو بتصلي علي سطر وسطر صلي مهما كان حالك المهم متبعديش ولا تقطعي الصلة الي بينك وبين ربنا وربنا ييسر لك الأمر
تم النشر الثلاثاء، ٦ ديسمبر ٢٠٢٢
مهما كانت ذنوبك لا تتركي الصلاة فهي العهد الذي بيننا و بينهم وهي عماد الدين واعلمي أن رحمة الله وسعت كل شئ ...
تم النشر الثلاثاء، ٦ ديسمبر ٢٠٢٢
صحبة صالحه سد الثغرات تدرج جهاد نفس ترقيق قلب ختاما اسمعي قرأن السهرة وسبر الصالحين اقري لابن القيم
تم النشر الثلاثاء، ٦ ديسمبر ٢٠٢٢
ارحنا بها يا بلال ♥.... الصلاة ربنا مفرضهاش علينا علشان تبقي روتين يومي او حاجه انت متعود تعملها... لا... مهموم.. صلي... نفسك في حاجه... صلي... محتار في حاجه روح ليه واسجد بين ايديه واتكلم معاه وقوله يارب انا محتار اختارلي الصح... عملت ذنب.. روح ليه واسجد وقول يارب سامحني.. ربنا بينادي علينا في الثلث الاخير من الليل ويقول هل من تآئب فأغفر له... واول ما تقول يارب ربنا بيرد عليك ويقولك لبيك عبدي.. يارب انا نفسي في كذا.. ربنا هيرد عليك ويقولك لك ما سألت يا عبدي... اوعي في يوم تصلي وانت بتعمل الموضوع ده علي انه روتين يومي... انت رايح تقابل ربنا.. فاهم معني الكلمه.. انت رايح تقابل اكتر حد بيحبك اكتر من ابوك وامك.. فاهم.. خش في الصلاه وقول الله اكبر وانسي همك وانسي كل حاجه وخليك معاه.. واقرأ الفاتحه بهدوء وتدبر كده وخليك فاكر انه شايفك وسامعك وانت بتكلمه فاشوف بقي انت هتكلم ربنا ازاي... لما المشركين كانوا بيأزوا الرسول صلى الله عليه وسلم بالكلام ربنا قاله ايه... بسم الله الرحمن الرحيم «ولقد نعلم انك يضيق صدرقك بما يقولون فسبح بحمد ربك وكن من الساجدين» صدق الله العظيم زعلان مخنوق مكتئب الدنيا جايه عليك مش موفق في شغلك راجع حساباتك مع ربنا ومع الصلاة بالذات وارجعله هتلاقي ده كله راح بمجرد ما ترفع ايدك للسما وتقول بس يارب بس تقولها وانت متأكد انه سامعك وانه هايلبي طلبك.. خلي بالك انت لما تصلي وتبدا تقرأ الفاتحه وتقول الحمدلله رب العالمين الرحمن الرحيم.. ربنا بيرد ويقول حمدني عبدي مالك يوم الدين... ربنا بيقول مجدني عبدي اياك نعبد واياك نستعين.. ربنا بيقول ذلك بيني وبين عبدي اهدنا الصراط المستقيم صراط الذين انعمت عليهم غير المغضوب عليهم ولا الضالين.. ربنا بيقول لك يا عبدي ما سألت... واعي حد يستهون بالفاتحه لانه قيل في بعض الاحاديث انها اعظم سوره في القرآن الكريم... فا تخيل لما الحوار ده كله في الفاتحه بس فما بالك لما تقرأ ما تيسر ليك من آيات الذكر الحكيم... ولا لما تركع وتقول سبحان ربي العظيم... وتقف وتقول اللهم لك الحمد والشكر كثيرا طيبا مباركا فيه... ولا لما تسجد وتبدأ وتقول سبحان ربي الاعلي و اللهم لك الحمد حتى ترضّى ولك الشكر اذا رضيت ولك الحمد بعد الرضي وتبدأ تدعيه.. اه علي فكره انت ممكن تكلم ربنا بالعاميه عادي جدا... اه والله عادي وتحكيله علي مشاكلك وهمومك وتقوله يارب ساعدني... علي فكره انت لو اتكلمت مع ربنا ربنا هيحل ليك كل مشاكلك لكن لو اتكلمت مع اي انسان آخره هيقولك معلش ويطبطب عليك... ويسلام لمه تروح تصلي كده وانت مبتسم واول ما تسجد تقوله يارب انت وحشتني وانا عايز اتكلم معاك وتقوله يارب انا بحبك وتقوله يارب حببني وحبب قلبي في طاعتك اكتر واكتر يارب... والله عمرك ما هتسيب فرض وهتجري علشان تصلي اول ما تسمع الاذان... هتلاقي حياتك كلها متغيره للاحسن وهتلاقي في حياتك كل الخير والفرح والسعاده.. من الاخر كده الصلاة والذكر هما مفتاح السعاده في الحياه... آلا بذكر الله تطمئن القلوب..
تم النشر الاثنين، ١٦ يناير ٢٠٢٣
السلام عليكم.. الشيطان ليه طرق وأساليب كتير عشان يبعد المؤمن عن ربه بس المؤمن العاقل بيكتشفها من أول وهله(إن الذين اتقوا إذا مسهم طائف من الشيطان تذكروا فإذا هم مبصرون) وأكيد حضرتك اسشتعرتي في بداية انحدارك وبعدك عن ربنا وتركك للصلاه.. أكيد استشعرتي انك في غل الشيطان بس ما بادرتيش بالرجوع والتوبه
تم النشر الثلاثاء، ٦ ديسمبر ٢٠٢٢
اتفرج على بودكاست ايه المشكلة فى الصلاة
تم النشر الخميس، ١٦ مارس ٢٠٢٣
شوفى فيديو لدكتور محمد الغليظ اسمه كيف اقوم بعد الانتكاسة هيفيدك جدا على اليوتيوب
تم النشر الاثنين، ١٢ ديسمبر ٢٠٢٢
لعرض السؤال في فدني اضغط هنا