حابة أفضفض شوية وإنكم تدعولي كتيير
عندي بكرة إمتحان كيميا، من وقت إمتحان الفيزيا وأنا مش كويسة وعندي طاقة سلبية كبيرة مفيش وقت إنها تخرج أساسا، مش زعلانة على الحل لإنه خير وأنا سعيت على قد ما قدرت وعارفة إن لو رجع الزمن مفيش مجهود زيادة أقدر أعمله، لكن مش قادرة أتخطى مشاعري في اللجنة بعد ما إتصدمت من الوقت إللي مكنش مكفي كمية الأسئلة إللي كلها أفكار مركبة ومحتاج لكل سؤال وقت كبير وخلاص فاضل ١٠ دقايق وأنا لسه مخلصتش المقالي والأسئلة الاختياري إللي عليها درجتين في أسئلة في الأول معلمة عليها أرجع لها أراجع حلي فيها، بدأت أعصابي تنهار ومبقتش قادرة أسيطر عليها، والحمد لله بالعافية قدرت أحل الأسئلة إللي عليها درجتين منها إللي ربنا ألهمني إجابتها بمنطق ومنها إللي اخترتها بتفكير ثانيتين حرفيا، جيت عند المقالي دماغي وقفت خلاص وكان الوقت خلص بس المراقبين سايبينا نكمل والمراقب وقف جمبي وفضل يقولي حلي إكتبي أي حاجة بس كنت خلاص مش قادرة أفكر وفي النهاية كتبت في واحدة قانون والتانية سيبتها، ووقت ما أنا قاعدة مش قادرة أفكر حسيت بحسرة وأنا شايفة البنات بينقلوا من بعض المقالي ويملوا بعض إللي فاضل لهم حسيت بالقرف منهم بصراحة وحسيت إني حزينة عليا وإن أنا كنت أعرف أحل ومكنتش محتاجة أكتر من نص ساعة بس.
الآن أنا خايفة جدا الوقت يزنقني في الكيميا أو يحصل نفس الحاجة وفعلا لو حصل الموضوع هيدمر نفسيتي لإني بكتم في نفسي علشان أقدر أعدي..
شكرا إنكم أخدتوا من وقتكم وقرأتوا الكلام دا، عاوزاكم تدعولي كتييير إن ربنا يكرمني ويستجيب دعائي، إدعولي في ظهر الغيب "دعوة المسلم لأخيه في ظهر الغيب مستجابة" إن شاء الله، وإدعولي أخرج بكرة مجبورة من الإمتحان وإن ربنا يرزقني بركة الوقت.
حبيبتي أنسي الماده اللي عدت بكل مافيها علشان ماتتعطليش نفسك عن الماده اللي جايه لاتبكي علي اللبن المسكوب وبدل ماتلعن الظلام أضئ شمعه فكري في الماده اللي جايه وأبذلي مجهود فيها علشان تعوضي اللي انتي شاعره أنك خسرتيه
تم النشر السبت، ٦ يوليو ٢٠٢٤
ربنا يوفقكِ في كل امتحاناتكِ ويبارك في وقتكِ وإن شاء الله تفرحي بنتيجتكِ. الامتحانات مش محتاجة منك غير إنكِ تكوني نايمة كويسة وأعصابكِ هادية... حتى لو مذاكرة نص نص ورحتي الامتحان نايمة كويس ومش متوترة عقلكِ هيقدر يسترجع كل اللي درستِه وتقدري تحلي كويس لكن لو كنتِ العكس حتى لو مذاكرة 100% هتلاقيكِ مش قادرة تفتكري والوقت بيجري منكِ. وطبعًا متنسيش أذكار المذاكرة وأدعية الامتحانات ودعاء النسيان. أهم حاجة افتكري إن دي مش مرحلة مصيرية زي ما الناس فاكرة وما دام عملتِ اللي عليكِ ثقي إن ربنا هيكتب لك الخير دايمًا. بالتوفيق يا قمر.🌹🌹
تم النشر السبت، ٦ يوليو ٢٠٢٤
أول حاجه، حبيبتي، تفائلي بالخير وإن شاء الله تجديه. أنا فاهمه قديش الموضوع صعب ومضغوط، بس خليكي واثقة إنك مجتهدة وعملتِ اللي تقدري عليه. دلوقتي خلاصة الفكرة إنك تخلّي طاقتك مكثفة على امتحان الكيمياء وتنسي اللي حصل في امتحان الفيزياء. دعي نفسك تسترخي الليلة، كلي حاجة خفيفة، واعطي نفسك شوية وقت راحة. ممكن تقومي بتمارين تنفس بسيطة، خدي نفس عميق من أنفك واطلعيه ببطء من فمك. كرري ده كام مرة. ده بيساعد على تخفيف التوتر والقلق. وبالنسبة لامتحان الكيمياء، حاولي تقسمي الوقت اللي عندك بذكاء. ابدأي بحل الأسئلة اللي تعرفي إجاباتها كويس وبعدها انتقلي للأسئلة الأصعب. لو حسيتِ إنك حترمي دقيقة كتير على سؤال صعب، اتركينه ورجعي له بعدين. وطبعا هكيد حندعيلك، يا رب يرزقك التوفيق والنجاح ويبارك لك في وقتك وتطلعي من الامتحان بفرحة. خلي ثقتك بنفسك عالية وافتكري إن ربنا معاكي وفي ظهرك دائمًا. وأخيرًا، بعد الإمتحان، مهما كانت النتيجة، مكافئة نفسك بأي حاجة بتحبيها. انتِ متستاهليش غير كل خير. ربنا يوفقك يا حبيبتي ويجبر قلبك ويرزقك أحسن الدرجات.
تم النشر الجمعة، ٥ يوليو ٢٠٢٤
انتي عملتي اي انهاردة بقا
تم النشر السبت، ٦ يوليو ٢٠٢٤
ربنا يوفقك ويبارك لك في وقتك
تم النشر السبت، ٦ يوليو ٢٠٢٤
@abdo كان كويس بس الوقت بيزنق مننا في الأخر بس الحمد لله لعله خير
تم النشر السبت، ٦ يوليو ٢٠٢٤
لعرض السؤال في فدني اضغط هنا