السلام عليكم
عندي 15
مش عامله اي انجازات في حياتي
مش عارفه اعمل اي
مش مقربه من ربنا
اجتماعيه زياده عن اللزوم انا معنديش حلم معين يعني مثلا زي الطب الهندسه الكلام دا مش عاوزه ابدا ف ثانوي ودا من كتر اللي سمعتو عنها كرهت حاجه اسمها تعليم معنديش هدف معين انا عارفه اني زي مليون شخص تايه ومش عارف حاجه بس انا مش عاوزه ابقي من المليون دول عاوزه اتغير عاوزه اعمل حاجات كتير غير كدا في اولاد بتدخل تكلمني اللي هو بحبك والكلام دا بس بعمل بلوك من غير معرف مين اصلا لاني مش عاوزه اعيش في ظلام اكتر من كدا . عاوزه اتعلم برمجه واشتغل بس بس لغايه دلوقتي لنا مش فاهمه حاجه ولا عن البرمجه ولا عن التعليم حاسه اني انسانه تايه معرفش اي حد بسمع اغاني بحس اني معقده ديما مش عارفه حتي اوزن حياتي اشتغل ولا اتعلم . مش عارفه أرتب حياتي ازي .البيئه اللي عايشه فيها معندهمش اي فكره يعني مثلا دعم مفيش تحفيز مفيش .حتي اصحابي عقلهم صغير جداا ببقا ماشيه معاهم بحس انو هما في عالم وانا في عالم تاني عندهم أنهم يمسكون سيره الناس عادي يقعدو يحبطو في الواحد عادي عقلهم صغير لدرجه اني عاوزه انقل مدرسه ثانوي بعيده عنهم عشان اختلط بناس واعيه فاهمه لكن بابا مش راضي لغايه ماقربت اتجنن من اللي عايشه فيه بحس الدنيا مقفله من كل حته واصحابي انا مش عاوزه اختلط بيهم لانو انا هكون زيهم بكرا او بعدو انا مش عارفه اعمل ايه والله
غالب التطلعات في سنك تتبع القطيع فتري كافة الطلبة تتوزع طموحهم بين الطب والهندسة. كونك أصلًا غير راغبة في الطب ولا الهندسة هو علامة على وضوحك ولو قليلًا بينك وبين نفسك. سنعود لهذه النقطة، ولكن دعيني أتناول معي النقطة التالية وهي غياب دعم الأهل، يا عزيزتي نسبة كبيرة جدًا من الأهل ليس لديهم الوعي الكافي ولا يعرفون أصلًا معنى كلمة دعم، فبسطي الأمور، كوني مباشرة خلال الحديث مع أهلك، مثلًا قولي: يا أبي أريد رأيك في كذا، يا أمي لو كنت مكاني في الموقف الفلاني ماذا كنت فعلتِ، إلخ. نقطة الأصدقاء، على فكرة أنت في نعمة، كنت قادرة على البحث حتى وصلتِ لمجتمع مثل فدني، يمكنكِ المشاركة هنا، والتعامل مع العقليات والثقافات المختلفة سيشبع تعطشك للنمو الذهني. نعود لنقطة الطموح، غالبًا حتى الثلاثين يخوض المرء تجاربه حتى يعرف ما يريحه حقًا، لذلك اجعلي هدفك الآن الانتهاء من الثانوية العامة بأعلى الدرجات أيًا كانت خياراتك وقتها.
تم النشر الأربعاء، ٢٤ يوليو ٢٠٢٤
فى البداية كده.انتى بنوته جميله وحابه انك تتغيرى وتثبتى نفسك ودى حاجه مميزه فيكى. فى كتير مننا فى البداية مبيعرفش يحدد هو عاوز ايه يعنى بيكون متلخبط شويه خلينا نتفق أن بدايه اى حاجه ناجحه تبدأ بعلاقتنا بربنا علشان كده لازم نتقرب من ربنا اكتر ده هيفرق فى حياتك جدا خلى عندك اراده علشان تقدرى تحددى انتى عايزه ايه .الان الإرادة القويه والثقه بالنفس اهم عاملين علشان تكونى مختلفه وتقدىر تخططى لمستقبلك حاولى تكتبى وتحددى مع نفسك ايه هدفك وممكن تحققيه ازاى ،نفسك تعملى ايه. اكتبى باستمرار اللى بتعمليه وانجازاتك ايه وكل ما تعملى إنجاز كافئى نفسك مارسى رياضه بتحبيها هتساعدك انك تتخلصى من الأفكار السلبية لو ليكى صديقه مقربه أو لايف كوتش اتكلمى باستمرار معاهم وشاركيهم افكارك لأن الدعم النفسى مهم جدا وافتكرى دايما أن ربنا معاكى فى كل خطواتك وبيساعدك وانك قوية وهتقدرى 🌷
تم النشر الأربعاء، ٢٤ يوليو ٢٠٢٤
ده جدول عبادات بسيط اعملي بنفس طريقة وألزقي على مكتبك بنفس الطريقة كل يوم تصحي تخلصي صلاة معينه تعلمي بالقلم الرصاص على مربع هتحسي أنك عايزه تعملي وتنجزيهم كلهم لان ده هيعزز عندك الشعور بتحفيز مخك للإنجاز، في نهاية اليوم رجعي انتي عملتي ايه ومعملتيش ايه وخلي عندك تحدي انه في اليوم الجاي هتعلمي على كل دول مش هتسيبي حاجه فيهم، عادي لو في الاول مش عارفه تلتزمي اوي متخليش شيطان يضحك عليكي ويحسسك بالفشل. عن نفسي لما بتكاسل في عبادة عنداً في شيطان تاني يوم بعمل ضعف مجهود في العبادة دي اليوم تاني وهي دي الإرادة الي عايزها تبقا عندك. مهم تعلمي برصاص وفي بداية يوم جديد تمسحي الي عملتي عليهم علشان تبدأي تعلمي على عبادات اليوم الجديد. ربنا يوفقك ويحقق لك كل الي بتحلمي بي انل واثقة انك هتقدري توصلي يوما ما
تم النشر الأربعاء، ٢٤ يوليو ٢٠٢٤
وعليكم السلام ورحمه الله وبركاته. 15 سنه ومش عامله انجازات في حياتي طيب الاول كده يعني ايه انجاز؟ هل الانجاز لازم يكون حاجه كبيره الحقيقه لا ممكن انت تنجزي شيء صغير وانت ممكن انت تقومي انت اللي تروقي البيت من اوله لاخره وده يبقى ينجاز ليه هنسميه انجاز لانه ممكن يكون غيرك في نفس سنك مش بيعرف يعمل ده في نفس الوقت اللي انت بتعمليه فيه انت خلصتيه في ساعتين زمن رتبتي وروقتي ولمعت وعملت خليتي البيت كده جميل. غيرك مش بيعرف يعمل ده فساعتها هنسمي اللي انت عملت؟ قدرتي تكوني دايما عندك انضباط مثلا مع نفسك وتقولي على طول بتقومي الصبح بدري مش. كسوله مثلا ده هيبقى انجاز كمسميات الانجاز مهمه جدا اييي في كلمات كده بتبقى كلمات لها صدى كبير وبنفتكر انها لازم تبقى حاجه كبيره لا خالص مش انت حاجه كبيره. فانت لو قعدتي مع نفسك وعملتي زي ما انا عملت كده في شويه الامثله هتلاقي لك انجازات. طيب هل نقف عند الانجازات الصغيره لا نبقى دايما عايزين نزودها عايزين نزود الانجازات الصغيره وعايزين نعمل انجازات ثانيه كبيره. طب هل انت كده تايهه لا ده مفيهوش توهان ده دي اسمها مرحله استكشاف ف السن اللي انت فيه هو سن استكشافي تستكشفي جوانب شخصيتك تعرفيها فعلا مش اللي هو كده وخلاص لا تعرفي فعلا انت مين انت شخصيتك ايه انت فعلا بتحبي ايه وما بتحبيش ايه انت مياله الايه ومش مياله الايه دي مرحله مهمه جدا فتركيزك في المرحله دي على الاستكشاف اهم من اي حاجه تاني. فاستكشفي انت بيشدك انهي مجال طب وانت هتعرفي ده منين لما تجربي؟ فانا عايزاك كل المجالات. تدخلي تفهمي عنها اسمعي بتتكلم عن المجال ده بيعملوا فيه ايه وبيوصلوا لفين وبيبداوا ازاي اسمعي بس مش شرط ان انت تخشي تتعلمي لانه مفيش حد بيختار مجال على طول كده وفي ناس بتختار مجالات وبتبقى موهومه وفاكره ان هو ده انسب مجال ليها وبعد ما بتدخل في التفاصيل بتقول ايه ده لا انا مستحملش المجال ده وبعد كده يقوموا مغيرينه عشان كده بت. بس بعد ما دخلوا درس الكليه وطلعوا اول ما يطلعوا يشتغلوا يشتغلوا سنتين ثلاثه وبعدين يقولوا لا مش ده المجال اللي انا عايزه اكمل فيه ويروحوا يدرسوا مجال تاني من اول وجديد الله طب هو عملوا ايه هم بقى. ما عملوش زيك كده وما استغلوش ولا استكشاف فانت اشطر من الناس دي كلها ولو استغلتي مرحله الاستكشاف وسن الاستكشاف ده هتبقي حاجه عظيمه جدا جدا جدا ان شاء الله خدي الوقت ده وسيبك بقى من كل الناس الثانيه اللي هي مش بتعمل اي حاجه مفيده دي وحتى لو مش بيدعموكي مش مهم خالص همم استغلالك انت المرحله هيدعمك حبك لانك توصلي لشخصيتك اللي انت تكوني فخوره بيها هو ده اللي هيدعمك شوفي كل المجالات اللي موجوده سواء مجال البرمجه او غيره ما تتعلميش حاجه دلوقتي استكشفي فقط ربنا معاك.
تم النشر الأربعاء، ٢٤ يوليو ٢٠٢٤
اولا عايزاكي تعرفي كونك ١٥ سنة ده انتي لسه صغيرة والحياة مجرتيش بيكي زي ما انتي حاسه ولسه قدامك عمر طويل إن شاء الله تحققي كل الي نفسك فيه فخدي نفس عميق كده وتأكدي أن مفيش حاجه فاتتك وبدل الفرصة الواحدة هتلاقي مية في انتظارك والشاطر الي يعرف يستغلهم بهدوء. إحساسك ده كلنا مرينا بي واحنا قدك المشاعر المتلخبطة والسؤال بيتردد على ذهنك انا ايه هدفي وعايزه اطلع ايه لما اكبر وازاي ابقا ناجحة؟، فعايزاكي تعرفي ان دي هرمونات فترة المراهقة بتلعب دور كبير اوي في الحتة دي وكمان في الغضب الي وصلي من كلامك، جايلك من مستقبل وبقولك لما هتكبري هتعرفي ازاي تتأقلمي مع بيئة أهلك ودي البيئة الوحيدة التي يجب تأقلم معاها من ناحية التعامل وليس شرط أن يكون تأقلم ده انك تكوني شبهم في تفكير او الأحلام وهتقربي منهم اكتر وكل الإنسان لما بيكبر والعلاقات قوة ترابطه مع اهله بتزيد ويكتشف هي علاقة الوحيدة التي يجيب الاستثمار فيها، ممكن تحفيز الي بتتمني انه يجي من أهلك هما نفسهم ميكنش عندهم وعي بي مش مدركين مدى اهميته زي ما انتي ما شاء الله متعلمة ومدركة مدى اهمية التحفيز والتشجيع، فممكن تبحثي حتى لو على صديقة واحدة تكون شريكة الرحلة شبهك ومهم مهم يبقا حد شبهك علشان تعرفي تتأقلمي متصاحبيش ناس مش شبهك واتعلمي تحطي حدود لنفسك اتعلمي ازاي لما اكون ازاي ابعد عن حد ابعد عنه فعلا مش هو يجبرني على قربه مني، متسابيش مدرستك خليكي فيها وخلي عندك إرادة إنك تقولي لا انا مش قابله بعلاقتي بيهم وترفضي علاقتهم دي سواء بشكل مباشر او غير مباشر بتجاهلهم. طب بحثت كتير وملقتش حد شبهي، إذا اكتفي بذاتك وبعلاقتك مع ربنا فقط وتحسين علاقتك مع أهلك لا تقبلي بما لا ترغبي فيه، لعدم توافر ما تبحثين عنه.
تم النشر الأربعاء، ٢٤ يوليو ٢٠٢٤
حبيبتي لو على الاحباط احنا في حياتنا ناس كثير قوي لازم تحبطك لازم تخليك واقفه مكانك ما تتحركيش. وفي ناس في حياتك اصلا محطوطه علشان خاطر بس يخليكي تتراجعي عن اي حاجه صح تخليك واقفه مكانك وما تتحركيش ولا تعملي اي حاجه اما بقى ان انت عايزه تتعلمي فدي في حد ذاتها حاجه كويسه مش حاجه وحشه. المشكله ان احنا بقى هنبدا نتعلم ازاي؟ يبقى واحد نحط هنا هدف انت بتقولي ما عندكيش اهداف معنى ان انت تدوري على حاجه تتعلميها ده لوحده هدف يبقى احنا الهدف بتاعنا موجود ان احنا عايزين نتعلم برمجه وعايزين نغير من نفسنا وعايزين نقرب لربنا في حاجات كتير في اهداف كثير في حياتنا يبقى احنا هنبدا بالاهداف دي ولو على موضوع التعليم ما فيش حد فينا كان متعلم اي حاجه كلنا بنبتدي وبنتعلم وبننجح وانت باذن الله هتنجحي مدام ليكي هدفي.
تم النشر الثلاثاء، ٣٠ يوليو ٢٠٢٤
حبيبيتي سنك لسه صغير علي الانجازات انتي مش متأخره ولا حاجه متشليش هم، حاولي تتعلمي المهارات اللي تنفع قدام وربنا معاكي
تم النشر الخميس، ٢٥ يوليو ٢٠٢٤
ف career coach دي بتقعد معاكي وبتساعدك تعرفي انتي ايه ميولك وايه نوع شخصيتك وايه هدفك ومجال مناسب ليكي كونك تحددي ده بدري وتقدري تكتشفي نفسك هيساعدك كتير فكل الي بتقولي عليه وفتحقيق أهدافك واختياراتك في الحياة. هنزل بوست قريب جدا هتكلم فيه عن موضوع ده إن شاء الله وهنزل لينكات فيها اختبارات بتحدد شخصيتك وميولك زي ميولك اتجاه الفن او اتجاه التحليل والاكتشاف وكل هذا بيتم بناء عليه فيما بعد مجال مناسب ليكي. اول ما انزل بوست ده هكون حريصة اني هبعتلك اللينك هنا. ولتقوية علاقتك بربنا ابدأي بحفظ القرآن الكريم مع معلمة قرآن سواء في اقرب مسجد ليكي وده الافضل لبناء صحبة صالحة او حتى اونلاين، هشارك معاكي جدول عبادات بسيط هشارك صورته في أجابه اخرى هيساعدك جدا في الالتزام. ثانياً اسمعي بودكاست لياسر الحزيمي، اسمعي معتز مشعل، اسمعي لابراهيم الفقي الناس دي ممتازة في مجال التنمية البشرية وتعطي كاقة إيجابية وتفسير كل ما تمر بي في حلقاتهم على يوتيوب والأهم من ذلك أن مرجعهم الدين.
تم النشر الأربعاء، ٢٤ يوليو ٢٠٢٤
عليكم السلام، كيف حالك؟ أول حاجة أحب أقولك إن مشاعرك طبيعية جداً وأي حد في سنك ممكن يحس بالحيرة دي. خليني أقولك كام حاجة ممكن تساعدك ترتبي حياتك وتلاقي شوية من الاستقرار اللي بتدوري عليه. تحديد أهداف صغيرة وواضحة : مش لازم الأهداف تكون كبيرة. ابدئي بحاجات بسيطة ممكن تحققيها في وقت قصير. البرمجة والاهتمام بالتعليم : لو عندك شغف بالبرمجة، ابدأي بكورسات أونلاين مجانية زي CodeCademy أو Coursera. اتدرّبي عليها وتعلمي بالراحة. العلاقة بالله : حاولي تعملي علاقة روحية قوية بالله، حتى لو بأبسط الأشياء زي الصلاة والقراءة البسيطة من القرآن، دي هتساعدك تحسي براحة نفسية كبيرة. التقليل من الأصحاب اللي بيحبطوك : ضروري تشوفي مين الناس اللي بيأثروا عليك بالسلب وحاولي تبعدين عنهم. لو ما قدرتيش تغيري المدرسة، حاولي تقللي التواصل معاهم والتركيز على نفسك. تطوير نفسك ذاتيا : القراءة، التعلم من الإنترنت، وتجربة حاجات جديدة، حتى لو حاجات بسيطة. تطوير نفسك هيخليك تحسي إنك بتتقدمي. غلق الأغاني السلبية : لو الأغاني بتأثر عليكي بالسلب، حاولي تسمعي حاجات أخرى تكون ملهمة ومحفزة. تدوين يومي : جربي تكتبي يومياتك، دا هيساعدك تخرجي كل مشاعرك وتكوني قادرة على تحليل مشاكلك بشكل أفضل. البحث عن الإيجابيات : حاولي تلاقي حاجة بتحبيها في حياتك وابقى عليها. مفيش حد حياته خالية من الحاجات الحلوة. كوني على يقين إنك هتقدري تغيّري حياتك لو ركزتي على الحاجات الصغيرة وبنيتي نفسك بهدوء. أنت الأقوى من حيرتك ومشاكلك، ويجب أن تؤمني بنفسك. إذا احتجتي أي نصيحة أخرى، أنا هنا لمساعدتك.
تم النشر الأربعاء، ٢٤ يوليو ٢٠٢٤
حاولي تلتزمي بالصلاه واحده واحده وماتقسيش علي نفسك وطالما عندك شغف انك تتغيري صدقيني هتتغيري للاحسن ان شاء الله
تم النشر الجمعة، ٢٦ يوليو ٢٠٢٤
لعرض السؤال في فدني اضغط هنا