عدة مشاكِل متنوعة تواجهنِي...
السلام عليكم ورحمه الله وبركاته. انا عايزه اقول لك مبدئيا انت جميله قوي وربنا يديم عليك النعم اللي انت فيها وأهمها نعمه البصيره. دي من الجزئيات اللي احنا بنغفل عنها وبنبقى فاكرين ان هي حاجه ممكن حد يحطها في حد لكن تعالي كده نفكر مع بعض الاب والام اللي بيبقوا مركزين وبيربوا وبينبهوا وبيكونوا عندهم مساحه يعرفوا يعملوا فيها ده او الاب والام اللي ممكن يغفلوا عن حاجات او في حاجات تبقى واقعه منهم على قد يعني درجه وعيهم وعلى قد درجه فهمهم الاثنين كده كده في قبلهم حد هو اللي بيربي الولاد في حد هو اللي بيراعي الولاد دول وهو ربنا سبحانه وتعالى من احلى الدعوات اللي انا بشوف انه اي اب وام محتاج يدعيها حتى لو هو مركز جدا وبيعمل كل حاجه علشان يربي ولاده ان هو يدعي ربنا انه ربنا يحفظهم ويربيهم بمعيته ويجعلهم في معيته انت الحمد لله الحمد لله ربنا كان محافظ عليك وكنتي في معايا الله لو حد سمعت الجمله دي وقولتي نفسك بس انا يعني في أخطاء عملتها يعني ووقعت وقعات لو كان حد مركز معايا مكنتش وقعتها. ارجع اقول لك خلي بالك مفيش حد مش هيغلط مفيش حد مش هيوقع في الغلط لانه احنا في هدف باننا بنقع في الغلط نقع في الغلط عشان احنا البشر نقع في الغلط عشان نتعلم عشان دي طريقه نتعلم بيها احنا بنقع في الغلط عشان نعرف ان كده كده محتاجين نروح لربنا ونقول له يا رب اغفر لنا يا رب احنا اسفين على الغلط اللي احنا غلطناه عشان ربنا بيحب يسمع صوتنا. وهنا خليني اقول لك على اخر حاجه اتكلمتي عليها هي مسألة الدعاء ربنا بيحب يسمع صوتنا في الدعاء بغض النظر بقى عن ان دي حاجه هتتحقق قريب او بعيد او ان دي حاجه تتحقق او مش هتتحقق اصلا وهي دي النقطه اللي بتخلينا موقف في وقت نبقى بندعي بقلب قوي قوي قوي من جوانا حاسين بان كل حته في جسمنا بتدعي الحاجه وبتتمناها وبعد شويه نبطل ندعي بالحاجه دي او بغيرها علشان احنا وقت بنكون بندعي قوي قوي بنبقى عندنا كده احساس اللي هو يعني انا لما هدعي بالقوه دي يعني عندي يقين واكيد اكيد ربنا هيحقق اللي انا بقوله ده بالظبط وبالحرف قريب جدا يقيننا في ربنا جميل لكن هو يقيننا المفروض يكون اكثر في ماهية الدعاء يعني والدعاء اصلا عشان ربنا يسمع صوتي ربنا ما هيستقبل الدعاء ده بان هو هياخده ينفذه لي بالحرف تمام هيأخروا عليا تمام مش هيحققهولي بالشكل ده وهيديني بداله حاجه ثانيه تمام طيب لا مش هيحقق لي اي حاجه لها علاقه بالدعوه بس هيشيل من عليا حاجه وحشه كانت هتحصل لي تمام واحنا بندعي ما بنكونش واخدين بالنا من كل الكلام ده واحنا بندعي بيبقى مركزين في الحاجه اللي احنا بندعي بها وعايزينها وبس ومش شايفين انه ممكن الدعاء ده ربنا لما يسمعوا يحققه لنا بس بطرق تانيه كتير جدا جدا. انك محتاجه حد يكون بيرشدك وحد يكون بيوجهك ده احتياج اساسي وطبيعي جدا بس خلينا نقول مع اختلاف كل الظروف سواء الاب والام موجودين هو مش موجودين مشغولين او فاضيين بيعرفوا يوجهوا او ما بيعرفوش ايا كان كل ده كل حد فينا بعد ما بيكبر بيقدر يختار لنفسه مين الشخص اللي هو هيشوفه قدوه وهيشوفه هو ده الشخص اللي هو حابب انه يكون الموجه له ممكن يكون بابايا ومامتي ناس كويسين ومحترمين وطيبين وزي الفل لكن ما عندهمش العلم الكامل اللي انا محتاجه اعرف عنه اكتر فمحتاجه ان هو يوجهوني فيه زي ما انت قلتي التفاصيل مثلا اللي هي ممكن تكون تفاصيل شرعيه ما هو ما يعرفوش عنها حاجه يعني ما هما يا دوبك كله يعرفوه انه الشخص اللي بيتجه في اتجاه ربنا وبيلتزم بالفروض وبيقرأ قران فهو كده يعني على الطريق السليم هم كده مش غلط انت محتاجه تعرفي امور شرعيه وفقهيه اكثر هم للاسف عندهم جهل بيها فده معناه انه لا انا هحتاج انه يكون الشخص اللي بيوجهني شخص عنده العلم ده لانه انا حابه ان ده يكون اتجاهي في الحياه. هبدأ اشوف مين اللي ممكن يؤدي الدور ده ممكن ما يكونش حد قريب مني وممكن ما يكونش حد جنبي طول الوقت ولا احد من قرايبي او عارفي او او حد بيتواصل معاه بشكل مباشر الحمد لله ربنا امنا علينا بنعمه هي نعمه التواصل عن طريق الانترنت وانه في شيوخ وان في معلمين وان فيه أساتذة وفي ناس كثير جدا موجودين بيقدموا طول الوقت العلم ده والنصايح دي وانك تعلمتي بالطريقه دي ده مش معناه عيب في اهلك ده معناه انه الحمد لله انت قدرتي تستخدمي المصادر دي بشكل صح وبشكل يفيدك ومش بالشكل الغلط فدي حاجه كويسه وده ممكن يكون تحقيق لدعوه والدتك اللي للاسف مشغوله في الشغل اللي هي ما قدرتش ان هي تفضي نفسها منه عشان تكون مركزه معاكي اكثر ولكن ممكن كانت طول الوقت بتقول يا رب حافظ على بنتي يا رب احفظها بحفظك يا رب اجعلها في معيتك ما تعرفيش هي كانت بتدعي بايه ربنا كان هو اللي بيربيكي بدل ما هي كانت غصبا عنها مشغوله في الشغل. نفس السياق ونفس الاتجاه هيكون في اختلافات ما بيننا وما بين اهلنا هيكون في اختلافات ما بيننا وما بين اللي حوالينا بما اننا اخترنا طريق غالبا هم مش على نفس الطريق فده ما فيهوش مشكله خالص انه انا هيكون عندي مبادئ انا ملتزمه بها انا مش عايزه اختلط بشكل معين، انا مش محتاجه اتجنب اللي حواليا ولكن هيكون الافضل كثير والاحلى كتير جدا جدا ليكي انك تبقي قاعده معاهم مفيش مشكله لو اول ما يبداوا يعدوا الحدود او يتصرفوا بحاجه انت بترفضيها او انت مش موافقه تكوني جزء منها قومي من المكان قولي لهم انا اسفه يا جماعه لا يعني طالما بتقولوا الكلمه دي لا انا مش مش هعرف اقعد لانه الكلمه دي وحشه جدا وما ينفعش انها تتقال على اي حد ولا حتى تتقال بهزار، قد ما انت هتكوني ماشيه على نهج الرسول صلى الله عليه وسلم انه هو جالنا بالرساله علشان يتمم مكارم الاخلاق فانت تقدري انك تنشري الاخلاق الحسنه بانك انت شخصيا تمارسيها انت تكوني جميله ولطيفه وبتتعاملي معاهم وقاعده ملتزمه بالاحتشام عشان خاطر انت قاعده مع غير محارم ملتزمه بالكلام اللي بحدود عشان خاطر انت قاعده مع محارم هتاخذي بالك من كل الكلام ده ولكن اول حاجه تعبي الحدود هتعتذري وتقومي فقد ايه هم هيبقوا مهتمين بانك تفضلي موجوده معاهم هيبدأوا يحترموا حدود جديد وهتبقي عملتي حاجه جميله جدا لانك علمتيهم وهقولها لك كده ببساطة غصب عنهم ان هم يكونوا احسن هيلاقوا نفسهم ده وضع افضل ان هم ما يستخدموش الالفاظ دي او على الاقل مش هيستخدموها وانتوا متجمعين او على الاقل مش هيعملوا النميمه او الغيبه من غير ما يحسوا انتم متجمعين وهتبقي كسبت ثواب انهم كل مره هيفتكروكي فيها هيفتكروا انه ايوه دي قريبتنا اللي دايما بتنبهنا على الحاجات دي تقول لنا استغفروا او تقول لنا يلا نقول دعاء المجلس عشان فقلنا اي كلمه غلط فنبقى ربنا غفر لنا لو عملنا حاجه من غير ما ناخد بالنا، خليكي قدوه حتى سنك صغير احنا نقدر يكون قدوه بحاجات صغيره جدا ما تستحقريش اي عمل حسنه ممكن تكوني احسن وربنا يرفعك بدرجات باذن الله. واحنا موجودين هنا ما تقلقيش خالص نقدر نكون معاكي في اي حاجه انت محتاجاها.
تم النشر الاثنين، ٣ مارس ٢٠٢٥
السلام عليكم، إحساسك بالحزن لعدم وجود شخص يوجهكِ إحساس طبيعي ومش محتاجة تلومي نفسك عليه لكن المشكلة دي بتواجه نسبة كبيرة من الجيل الحالي وكمان الجيل اللي قبله، وخاصة كل ما تدهورت الظروف الاقتصادية واضطر الأهل للانشغال أكتر. أنتِ قلتِ إنك متفهمة ظروف أهلك، فحاولي تتأقلمي أو قربي من والدتك واسأليها أنتِ لو قابلتك مشكلة. الأهل ساعات مع انشغالهم مش بياخدوا بالهم أو بيكون عندهم مشكلة في التواصل مع أولادهم فممكن احنا ناخد الخطوة دي. ** وأكيد بما إن الانترنت بقى حاجة لازمة في حياتنا فحاولي تكوني واعية أكتر، تدخلي إيه عقلك ومتدخليش إيه وأي أفكار اعرضيها الأول على دينك وشوفي ربنا قايل إيه واقبلي وارفضي على الأساس ده بس. ***** الأهل في نقطة إنهم شايفين أن الواحد لازم يكون بيصلي ويؤدي حاجات معينة من الدين فلازم تفهمي إن الدين فيه الجانبين، فيه عبادات للظاهر وللباطن، واحنا مش هنتحاسب على الأخلاق بس. غير إن مش مهم رأي الأهل ونظرتهم للتدين، المهم هل رأيهم ماشي مع صميم الدين اللي المفروض احنا نكون عليه ولا لأ. اهتمي بالناحيتين وحاولي متقصريش في الظاهر أو الباطن، وخليكِ متوازنة ووسطية. *** بالنسبة للشباب وكلامهم عن البنات المختمرات فده طبعا تعميم غلط ودي مشكلة في تفكيرهم هم ومش لازم احنا نبني عليها أي قرار أو تفكير يخصنا. عادي احنا بشر، المحجبات والمختمرات والمنتقبات مش ملائكة ومش كلهم لابسين الحجاب تدينًا، ممكن عشان وضعهم الاجتماعي، ممكن لابسينه عادي تدين لكنهم بشر وممكن يضعفوا عادي وضعفهم ده خلاهم تنازلوا عن مبادئ الحجاب. فيه ناس بتصلي وبتسرق وبتختلس وبتكذب... هل ده مبرر إننا نشوف الصلاة فيها مشكلة ونقول هنوقف صلاة عشان فيه ناس بتصلي وبتعمل كذا؟ لأ، طبعا... احنا نصلي ونلتزم ونكون احنا أفضل نسخة... نكون النسخة اللي ربنا أرادها لنا لما أمرنا نلتزم بأوامره وننتهي عن نواهيه. ملناش دعوة بنظرة الناس أو أخطاء الغير. **** قربي من ربنا واستعيني به عشان تقدري تثبتِ على التزامكِ. توقعي في زمننا إن ناس كتير مش ماشية على ميزان الدين الصح ومهما كان الغلط منتشر بينهم إن ده خلاص بقى العادي ونمشي وراهم. خليكِ مستقلة وشوفي ربنا قايل إيه واعمليه مهما كان الناس بتعمل أو بتنتقدك أو بتحاول تشدك لنفس طريقهم. **** بالنسبة لموضوع الزواج والماديات، عادي الأم تشوف إن أهم حاجة الأخلاق لكن الماديات مهمة كمان، يمكن عشان لسه صغيرة فمش قادرة تتفهمي تفكير مامتك وخاصة وهي عايشة الظروف الاقتصادية وملتزمة بكم فطبيعي تفكر تختار لك الوضع اللي تطمئن إنك هتبقي مرتاحة فيه من وجهة نظرها. *** الدعاء، مهما كانت العبادة، سواء صلاة أو دعاء أو لبس حجاب، مهما كانت تقيلة التزمي بها وواظبي عليها واستعيني بربنا إنه يحببها إليكِ، ده مدخل للشيطان عشان يخليكِ تيأسي من العبادة وتتوقفي عنها. كل مشاكلك اللي ذكرتِها، حلها تستعيني بربنا وتسأليه الثبات والهداية وصلاح الأحوال. ** أرجو أكون أفدتك، بالتوفيق إن شاء الله.
تم النشر الأحد، ٢ مارس ٢٠٢٥
شكرا لـ حضرتك، واكيد عمري ما هزعل من نصيحة حد ليا...
تم النشر الأربعاء، ٥ مارس ٢٠٢٥
اقولك علي حاجه انت حد كويس بس عندك شويه حاجات بسيطه لازم تتظبت عندك أولها ثقثك ف نفسك ومزعليش مني انت لازم تحبي نفسك اكتر من كده وبطلي جلد لذاتك الفتره العمريه اللي انت فيها دي وراد فيها اللخبطه خدي امورك ببساطه كل هذه الأمور ستمر حبي نفسك وتعاملي في كل امورك بما يرضي الله
تم النشر الأربعاء، ٥ مارس ٢٠٢٥
انتي محترمه جدا بجد بسم الله مشاء الله عليكي قوي علاقتك بربنا وخليكي ديما زي مانتي محدش هيهمه انتي ايه او تربيتك ايه انتي محترمه لنفسك و ل ربنا ولدينك ولأهلك وبس ومتحطيش كلام اي حد ف دماغك ربنا يارب يقدرك ويكرمك ويعوضك عن كل شئ صعب في حياتك
تم النشر الاثنين، ٣ مارس ٢٠٢٥
الشتات مش عارف بس لما سمعت تسجيلاتك قولت الكلمة دي حاسس انها وصف اللي انت فيه بصي بالنسبة إلى أهلك فدول اهلك هم مش صحابك ممكن تغيري هم وكدا بس حاولي يكون عندك رأي، يعني ايه أعارضهم 🤨 لأ محدش قال كدا بس مثلا مينفعش تقولي ليهم على طلب من غير دليل يدعمه فمثلا يا ماما مش كل الأغنياء واللي معاهم فلوس كويسين ازااي يعني 🤔 يعني ممكن يكون معاه فلوس ومش كويس كأخلاق ولا صلاة ولا غيره، مامتك خلي بالك مركزة على غني هيعيشك في رفاهية وكدا بس عادي هي اكيد خايفة على مستقبلك ، فأنت دايما لما تعارض لا ماما مينفعش ليه عشان كذا وكذا فهمتي ده هيساعد على الإقناع أكتر 🙂 بعد كدا بالنسبة للخمار جزاك الله خيرا 👏 لا تسمعي بلا شباب بلا زفت الشباب لما يقولوا كدا على النساء المحجبات وغيره لأن أنت كدا بتضيقي عليه حريته 😂 ما هو مش عارف يشوف اللي تحت النقاب فدول أصلا شباب سوء ، ربنا يكفيك شرهم ويحفظك 🤲💛 بالنسبة لأولاد عمامك او خالك فأنت متحفظة تمام هم مش خواتك فأنت هتصارحي معاهم او تدردشي معاهم لا في حدود. كونك متحفظة ف أنت تحمدي ربنا على النعمة دي يا ريت الكل بيفكر نفس تفكيرك،، وأخيرا ربنا يحفظك ويعينك ويعافي والدك من كل سوء🤲🤍،. أتمنى مكنش نسيت حاجة وآسف على الإطالة دلواتي عرفت أنا ليه قولت شتات في الأول.
تم النشر الاثنين، ٣ مارس ٢٠٢٥
شكرا جدا لـ حضرتك
تم النشر الأحد، ٢ مارس ٢٠٢٥
بصي خليكي زي ما انتي ميهمكيش اي حد والتزمي بخمارك وفكك بقا من كلام اليتيوب وكل دا دول ناس بتقول اي حاجه عشان مشاهدات وخلافه وطالما انت عارفه انك لبساه عشان ربنا خلاص ميهمكيش اي حد وبالنسبه لموضوع التوجيه فممكن تكلمي مامتك او تحكي لها او كده بس اهم حاجه انك تلتزمي بصلاتك والقران والخمار وسيبي وكل حاجه لربنا وفوضي امورك لله وكل حاجه هتكون كويسه ان شاء الله
تم النشر الأحد، ٢ مارس ٢٠٢٥
فيه شيئ جميل وصى به النبى صلى الله عليه وسلّم الا وهيا صلاة الاستخاره اجعليها جزء من حياتك وان شاء الله تكونى مرتاحه وسعيده فى حياتك
تم النشر الثلاثاء، ٤ مارس ٢٠٢٥
شكرا لـيك...
تم النشر الاثنين، ٣ مارس ٢٠٢٥
لعرض السؤال في فدني اضغط هنا