الاجابة المختصرة ) هى فقط تجربة دى مش حياتك كلها ومحتاجة تتعرفى على نفسك عشان تقدرى نفسك فى اى تعامل مع اى شخصية قدامك وعشان تقدرى تحطى نفسك على طريق سليم وتقدرى تستوعبي الحياه وتستوعبى الماضى والحاضر والمستقبل ...لان كله متلغبط معاكى حاليا انصحك تلجأى الى لايف كوتش ..ده افضل متخصص هيساعدك ترتبي كل اللى جواكى وتبدأى من جديد وبثقه
تم النشر السبت، ٢٩ أكتوبر ٢٠٢٢
ازيك يا جميلة، يارب تكوني بخير وبأفضل حال. يؤسفني كل اللي انتِ تعرضتِ ليه. ولكن حتى مع كل اللي بتقوليه لسه الأمل موجود، والدليل على كده وجودك هنا، وانك لسه بتسألي عن مخرج من المشاكل اللي انتِ فيها حاليا. أهلك قدري موقفهم، هو أكيد لو هنتكلم من الناحية الصحية والنفسية مش لازم يقولوا كل شوية أنك السبب في كل ده، ولكن إلتمسي ليهم العذر، هما أكيد مكانش حد فيهم يتمنى كل ده. مع ذلك هما وقفوا معاكي في الاول زي ما قولتي، فحاولي تلتمسي ليهم عذرهم برده في اللي هما فيه، لأنهم أكيد مضايقين علشانك. تاني شيء، حاولي تبدأي من جديد عارفه أنه صعب جدا عليكي، على كل اللي مررتي بيه، ولكن مفيش حل تاني علشان تسترجعي نفسك من جديد، وكمان تسترجعي ولادك. ابدأي من أخر نقطة وصلتي ليها قبل ما تقابلي الشخص ده، حلمك كان إيه من وأنتِ في الجامعة، رجعي الحلم ده لو لسه حباه، دوري على شغل، يوفر ليكي مصدر دخل. فكري في مستقبلك من تاني، وابداي مشوارك، هيكون صعب، وهيكون في تحديات، وهو ده تمنه أكيد مفيش حاجه سهلة، أعملي كدا علشان نفسك وولادك، علشان يجي اليوم اللي هيكونوا فيه فخورين بيكي. دلوقتي هما اه لسه صغيرين والاب بيحاول يكرهم فيكي، لكن بعد كدا هيفهموا لما يكبروا. حاجه كمان، متحاوليش بأي طريقة من الطرق أنك ترجعي تحاولي مع الشخص ده تاني بتاتا، هترجعي إلى إيه؟ أنتي مش هترجعي لأي حاجه حلوة إطلاقا مع الشخص ده، هتبقي بدمري نفسك لو حاولتي معاه ترجعيله. حاولي معاه بس في نقطة معينة .. وهي انكم تتعاملوا بشكل محترم، وإن خلاص الموضوع خاص ما بينكم ولكن لسه في ولادكم، حاولي تتكلمي معاه بهدوء جدا، وتوصلي معاه لحل بحيث تقدري تشوفي الولاد، يكون بينكم تفاهم واحترام، مش لازم علشان انفصلتم تكون الأمور سيئة بالشكل ده، يعني حاولي على قد ما تقدري تفتحي الكلام معاه في الموضوع ده بشكل هادئ جدا. لا تيأسي، انتي اكيد محتاجة تكوني كويسة، محتاجة الأوضاع تستقر، وتتحسن، حاولي جاهدة أنك توصلي للسلام ده، اشتغلي، واتعلمي، اعملي صحاب، ارجعي شوفي صحابك القديمة، رجعي علاقتك بيهم، لو هما مش موجودين، شاركي في حاجات تطوعية .ظ هتتعرفي على ناس جديدة، اعرفي ناس تديكي طاقة إيجابية. اتمني ليكي السلامة
تم النشر السبت، ٢٩ أكتوبر ٢٠٢٢
لعرض السؤال في فدني اضغط هنا