ابنى فى أولى كلية آداب جنوب الوادى في قنا فيه عيب كبير اتعلم يكذب فى كل حاجة علشان مزعقش معاه ومعارضهوش في حاجة مع العلم إن هو مكانش بيكذب وكان بيصلى وكان كويس لغاية تالتة إعدادى الظروف حكمت إني أنزل اشتغل طول النهار وارجع بالليل وهو طبعا واخد راحته برة واتعرف على صحاب جديدة واتغير من ساعتها ومرجعش زى ماكان برغم إني سبت الشغل بعد سنة وقعدت في البيت بس خلاص معرفتش ارجعه زي ما كان لانه كان شايف أن أصحابه هما اللى صح
ومن ساعتها وانا بقاسى معاه علشان يستقيم ويصلى ويكون واضح معايا وميكذبش ويكون صريح ويخاف من عقاب ربنا حتى لما بيشتغل بياخد من فلوس القبض ويقوللى مدانيش الفلوس كلها ويمر الوقت واكتشف أنه صرف الفلوس مع صحابه وطبعا السجائر وانا تعبت وطبعا مفيش مواظبة في الصلاة وانا تعبت قوى هو ممكن يرجع زى الاول ولا حيفضل كدة علطول ياريت تفيدونى اتعامل معاه ازاى وكمان بيتعرف على البنات فى الموبايل ويكون صداقة معاهم يعد طول الليل يتكلم معاهم من الموبايل
🎤 إجابة صوتية
تم النشر الأربعاء، ١٦ أبريل ٢٠٢٥
هقول لحضرتك رأي مش هيعجبك بس هو ده بنسبه كبيره اللي بينفع معاهم في الفتره دي. بكل بساطه شيلي ايدك عنه وسيبيه يتحمل مسئوليه الغلط بنفسه. طريقه حضرتك معاه هتطول التجربه والوقت والشذ والعند واوقات كتير ممكن يكون عايز يرجع عن الطريق وينعاد عشان مايبقاش مشي كلامك عليه. فبكل بساطه يرى عاقبه الأمور عشان يتفهم الوضع لكن طول ماحضرتك بتحاوطي عليه هيفضل حاسس انك هتلمي وراه او انك مسئوله عن اخطاءه. جربي لو مرتين تلاته تصدقيه اما يجي اتغدى معاه وخلي الوقت حلو كلميه انك شوفتي فيديوهات ع النت للشيخ كذا وعجبك اسلوبه ماتبقى تشرحلي كده بيقول ايه عشان مش بلحق اسمع الحلقه كلها ع اليوتيوب وهكذا تفنني انه يقربلك عشان هو كبر وماما اللي تؤمر وتنهي دي مش بتنفع مع الجيل ده وخصوصا الولاد. وحضرتك انا مقدره خوفك الجميل ده وحرصك انه يكون احسن حد في الدنيا مجهودك اللي اتعمل واللي بيتعمل ربنا يجازيكي عليه بالجنه♥️ حضرتك ادعيله كتير اوي ولو في حد في المنطقه في سنه وتعرفي مامته وبيتردد على الجامع او دروس قرآن قوليلها بلطافه كده لو يعدي على ابني معاه في الفجر. يبقى حد من سنه يدخله الطريق لحد ماربنا يوفقه ويعرف الطريق الحلو بلطف من ربنا. فاانا هطلب من حضرتك تهدي وتدعيله وتديله الثقه تاني وربنا يصلحنا كلنا بإذنه. حضرتك محتاجه تجربي الحل ده فتره كبيره بصبر وبهداوه. واعرف كمان ناس بتكلم شيوخ المنطقه تخلي الإمام يعدي ع كل الشباب يجمعهم. هما رجاله وعارفين الولاد بيبحبوا يسمعوا ايه يتعاملوا ازاي في السن ده كويس. بس تكون ناس عاقله. وحضرتك عرفاهم ومش بيتبعوا تيار سياسي اياكان.
تم النشر الاثنين، ١٤ أبريل ٢٠٢٥
أختي العزيزة، أولاً أشكرك على ثقتك في طرح هذا الموضوع المهم. إنّ مرحلة الشباب مليئة بالتحديات، وخصوصًا عند الانتقال إلى مرحلة جديدة مثل الحياة الجامعية. يبدو أن ابنك يواجه صعوبات في التكيف مع تغيرات الحياة الجديدة، وهذا قد يساهم في سلوكياته الحالية. إليك بعض النصائح التي قد تساعدك في التعامل مع ابنك: أهميّة الحوار : حاولى دائماً أن تتحدثي مع ابنك بلطف وبدون توتر. استمعي إلى وجهة نظره وافهمي مشاعره، فقد يساعد ذلك على بناء الثقة بينكما. توجيهه بحب : بدلاً من إظهار الاستياء من تصرفاته، حاولي توجيهه بطريقة إيجابية. اجعليه يشعر بأنك تقفين بجانبه وأنك تريدين له الخير. القدوة الحسنة : كوني قدوة له في السلوك والتدين. أظهري له كيف أن الالتزام بالصلاة والصدق يمنحان الحياة طعماً ومعنى. تشجيع الأنشطة الإيجابية : حاولي إدخاله في أنشطة تسهم في تطوير شخصيته، مثل التطوع أو الانضمام إلى مجموعات تدرس أو تهتم بالقضايا الاجتماعية. تحديد الحدود : كوني واضحة معه بشأن الحدود والقيم التي تريدين أن يتبعها، وأهمية الصدق في حياتنا. تحددي له العواقب إذا استمر في سلوك الكذب أو الاستهتار. استشارة مختص : إذا استمرت القضية، قد يكون من المفيد استشارة أخصائي نفسي أو مستشار نفسي يساعده في توجيه مشاعره وأفكاره بشكل صحيح. أسأل الله أن يهدي ابنك ويرده إلى الطريق الصحيح. كوني دائماً مصدر دعم له وحاولي أن تشعريه بأنك تحبينه مهما كانت تصرفاته.
تم النشر الاثنين، ١٤ أبريل ٢٠٢٥
والله يا حبيبتي أنا حاسة بتعبك جدًا لأن مفيش وجع أكبر من وجع الأم على ابنها خصوصًا لما تحسي إنك عملتي اللي تقدري عليه ومفيش نتيجة بس حاولي تفكري إن ابنك لسه صغير ولسه ممكن يتغير الشباب في السن ده بيتأثروا جدًا بالصحاب وبيفتكروا إنهم دايمًا فاهمين كل حاجة وده طبيعي في المرحلة دي محتاج يسمعلك بس من غير ضغط ولا زعيق حاولي تقربي منه كصحبة مش كأم بتأمر وتنهي اسأليه عن يومه عن صحابه عن اللي بيفكر فيه واتكلمي معاه بهدوء من غير خناقات حتى لو قال حاجات تضايقك خديها بحِكمة الصلاة والسجاير وكل ده هييجي مع الوقت بس أهم حاجة يرجع يحس إنك جنبه مش واقفة له على غلطة وطبعًا الدعاء ادعيله في كل سجدة وربنا قادر يهديه مهما بعد ❤
تم النشر الثلاثاء، ١٥ أبريل ٢٠٢٥
مرسى قوى ياحبيبتى
تم النشر الأربعاء، ١٦ أبريل ٢٠٢٥
ربنا يقويكِ بجد واضح انك تعبتي فعلاً وبتحاولي بكل طاقتك ترجعيه وده في حد ذاته حاجه عظيمة «إِنَّ الَّذِينَ آمَنُوا وَعَمِلُوا الصَّالِحَاتِ إِنَّا لَا نُضِيعُ أَجْرَ مَنْ أَحْسَنَ عَمَلًا» جزاكِ الله خير المحاولات وأصلح حالك وحال ابنك ابنك دنيا وآخرة يا أمي❤❤❤
تم النشر الثلاثاء، ١٥ أبريل ٢٠٢٥
أولا انا في نظري ان الولد لا بد هيرجع زي الأول بسبب حرصك .. جزاك الله خير ، وهو هيجيله يوم ويتعب من اللي معاه او يفشل في حاجة معينة تفوقه وترجعه للطريق الصحيح ، ولاكن ده ممكن يتأخر لأن دماغه اندمجت مع الأسلوب ده .. وللأسف لسة التلفون معاه ولسه صحابه معاه ... انتي كأمه مش هتعرفي تنافسي اغراء البنات والسجاير ... فباختصار اللي عليكي انك تحاولي تقطعيه عن أي شئ يفكره بالحاجات دي بالإضافة إلى انك لازم تعيدي شحن نفسك كل فترة والا هتتعبي وتوصلي لمراحل سيئة من الغضب فهيكرهك ويعند أكثر .. ١<<فحاولي تمنعيه من اي شئ يربطه بأصدقاء السوء ٢ <<اهتمي بنفسك ٣<<اشغليه في اي حاجة يستمتع بيعا
تم النشر الاثنين، ١٤ أبريل ٢٠٢٥
لعرض السؤال في فدني اضغط هنا