السلام عليكم ، انا شاب عمرى ٢٥ سنة نشأت فى اسرة متوسطة التدين بنصلى ونصوم وكل حاجه لكن مش على قدر عالى بالإلمام بالعلوم الشرعية والفقه وهكذا ،،
ربنا من عليا من حوالى سنتين تلاته بالبحث والتعلم والتفقه فى امور دينى وتعمقت شويه بين اهل العلم والشيوخ والفتاوى وهكذا وبما انى حاليا سن البحث عن شريكة الحياة بدأت ابحث عن الزواج الإسلامى واكتشفت انه بعيد كل البعد عن العادات والتقاليد المتعارف عليها فى مجتمعنا من حيث مبالغة فى التجهيز والقايمة والمواضيع الجدليه دى ، ف انا فكرى اختلف عن فكر اهلى تماما بقيت حابب اتجوز زواج شرعي بدون قائمة ولا افراح زفاف فى قاعات واختلاط واغانى الى آخره كده طبعا انا اول حد فى العائلة افكر بالمنطق ده اللى هو ما اخواتك الكبار اتجوزوا وقرايبك اتجوزوا محدش عمل الطقوس دى بغض النظر ان ده الصح ف انا ضد القائمة قلبا وقالبا ومايل جدا لفكرة الزواج الشرعي انى اجهز بيتى قدر استطاعتى وادفع مهر للعروسه عكس العادى فى العيله انى اجيب نصف التجهيزات وامضى على قائمة زى ما الناس كلها بتعمل لأن اهلى شايفين ان ظروفى المادية مش هتسمح انى اجهز شقتى من كل شئ واتجوز العروسه بشنطة هدومها وانا شايف ان اقدر اعمل كده حتى لو هطول فترة الخطوبة شويه بس مربطش نفسى بقايمة امضى عليها انا شايف انها حرام وبدعة ف انا حاسس انى بهرى وبحاول اقنع اهلى عالفاضى ولا محالة هتجوز بأعراف المجتمع مش بشرع ربنا ف ايه رأيكو مش عارف اعمل ايه ؟
وعليكم السلام ورحمه الله وبركاته. خليني اقول لك انك مش اول حد يفكر كده ويعمل كده وينفذه فعلا يعني الحمد لله ان في يعني نسبه تحترم دلوقتي حتى ممكن انت تكون بس ما شفتش النسبه دي او ما توفقتش انك تبقى حواليك المحيط ده من الناس عشان تشوف ان الموضوع قابل للتنفيذ ولكن انت عادي جدا ممكن تعمل ده زي ما في غيرك شباب عملوه والحمد لله في اهالي من بيوت طيبه عندهم ابهات فاهمين شرع صح وبينفذوا ده بكل حب وكل ود يعني. بص انا عايزه اقول لك انه بس الفيصل في الموضوع ده ان قد ايه انت تثبت انك شخص مش بس بتحاول تطبق الشرع في الحاجات اللي هي هتبقى في نظره المجتمع بتوقع حق للي قدامك قد ما انت تبقى بتثبت انك انت شخص. ضمن وا حاولت انك تخطب او او تتزوج بنت اهلها برده الموضوع بالنسبه لهم ثقيل هو ده يتقل عليك الدنيا شويه فاا ان شاء الله المجموعه اللي انت اتعلمت معاهم علم شرعي والمجتمع اللي فاهم الدين اكتر تقدر من وسطهم تلاقي ان شاء الله بيت طيب كده. ينفذ معك الصح من غير مقاومه كتير ومن غير ما يحسسوك ويشكروك في نفسك انه ما فيش داعي انت تعمل يعني لكل الناس ما عملتش زي ربنا يوفقك ان شاء الله ويثبتك على الحق واهم حاجه اقولها لك ثاني راعي انك تكون متوازن في تطبيق الشرع على نفسك الاول قبل ما يكون على اللي قدامه.ن انت شخص. فعلا بتراعي ربنا في نقط كثير جدا. بتراعي تطبيق الشرع. على نفسك قبل ما تكون عايز تطبقه على اللي قدامك فده اللي هيخلي الناس اللي قدامك ترتاح انها تنفذ معاكي اللي انت عايز تنفذه بسهوله مش مهم تكون انت اول حد بيعمل ده في العيله بالعكس ده تتميز يعني دي حاجه تدعو للفخر انك تتمسك بانك تعمل ده حتى لو انت اول حد وما تستجيبش للمقاومه بقى بتاعه هيجرى ايه يعني لو عملت زي الباقيين لا هيجرى ايه ان انا مش عايزه انزل باقيين وخلاص انا عايزه اعمل الصح حتى لو الصح ده اكون انا الوحيد اللي بعمل الصح انا مش هتشكك في نفسي. اه استمر في اللي انت عايز تعمله همم بحره بس البيت الطيب اللي ان شاء الله تلاقي فيه زوجه الصالحه اللي يكونوا اهلها برده ماشيين بالشرع لانك لو
تم النشر الجمعة، ٥ يوليو ٢٠٢٤
السلام عليكم ورحمه الله اهلا بك دينيا دا متفق عليه ، اما العرف و العادات و التقاليد مختلفه ، ايام زمان كان الرجل فيه صفات كتييره من أهمها الشهامه و الكلمه بتاعته عقد ، لكن الان فيه مشاكل كتيره بتتعرض ليها الست، و مبقاش الأهل يوافقوا علي الكلام دا إلا نادر. الأهل بيكون عندهم سؤال واحد بس، ايه ضمان بنتي لو جيه قالها في يوم خلاص كل واحد يروح لحاله؟؟ دلوقتي القائمه دا حق من حقوق الست و للاسف لو فيه حد قال مفيش قائمه الشك بيصيب قلوب الناس نظرا للمشاكل الكثيره اللي بتحصل. ثانيا وجهه نظر اهلك نظره موضوعيه جدا ، الاجهزه دلوقتي بمبلغ كبير جدا و العفش دا غير تجهيز الشقه نفسها و الدهب و المؤخر لو هتاخده في الاول ، الموضوع فعلا محتاج مصاريف كبيره.. دا غير ان اي بنت عاوزه تنقي حاجتها بنفسها و بتكون مستنيه اللحظات الفرحه دي من زمان.. الست بتحتاج مكان و عفش محدش عارف ايه اللي ممكن يحصل، يعني لو أهلها جرالهم حاجه و جيه الزوج محصلش وفق و سألوا بعض و معندهاش مثلا مكان تعمل ايه؟؟ ايام الرسول صلى الله عليه وسلم كان فيه شهامه و معاني كتيره للرجوله مبقتش موجوده حاليا للاسف مع بعض الناس، ف الأهل هيطمنوا ازاي!و دا حقهم الصراحه، لان الست هتفضل ست و الراجل هيفضل راجل. بمعني هيقدر يتصرف و يروح و يجي، أما الست صعب و دا اللي بيميزها و بيخلينا نفكر مره و اتنين و عشره في موضوع القائمه. اما بالنسبه للفرح في ناس بقت تعمل كدا و يطلعوا عمره عادي او يسافروا اي مكان. ربنا يوفقك و يرزقك بالزوجه الصالحه
تم النشر الخميس، ٤ يوليو ٢٠٢٤
اتجوز على نهج و شرع ربنا اللى شرعه لعباده عشان تستقيم أمور حياتهم . ابنى بيتك و أسس شقتك بأثاث على قد ما تقدر و ادفع مهر لزوجتك و لا تمضيش على قائمة . القايمة اولا تخوين و هى مش من الشرع فى شيىء و بدعة . و مدخل من مداخل الشيطان عند حدوث أى خلاف ما بين الزوج والزوجة و دا وارد و طبيعى أنه يحصل . و مصر أصبحت أعلى معدل طلاق فى الشرق الأوسط. بلا مبالغة و ارجع للأحصائيات . نتيجة العك اللى بنشوفه فى الزيجات . و ان كل الأمر أصبح مقتصر على الماديات . مش على الدين . متذلش نفسك بالقايمة. حتحس طول العمر انك متخون و انك مذلول . و بيتك فى مهاب الريح عند حدوث أى خلاف حتى لو انت اللى صح و زوجتك هى اللى غلط . الست المصرية أصبحت تستقوى بالقوانين الحالية و القائمة ضد زوجها . و انصحك بلاش تجوز مصرية من الأساس.
تم النشر الجمعة، ٥ يوليو ٢٠٢٤
انا شخصياً هعمل زيك لأن ده الصح.. ماتمضيش قايمه ومتاخدش برأي ست ف الموضوع ده لأن كلهم رأيهم واحد ومش منصف ف موضوع القايمه ده
تم النشر الخميس، ٤ يوليو ٢٠٢٤
وعليكم السلام ورحمة الله وبركاته، ما شاء الله عليك، مبسوط إنك بتحاول تتفقه في دينك وتعمل الصح، ده في حد ذاته حاجة كبيرة ومهمة. الفترة دي بتكون محيرة ومليانة تحديات، خصوصاً لما تيجي تحاول توازن بين طموحاتك الشخصية والتقاليد المجتمعية وضغوط الأهل. عشان توازن الأمور دي، حابب أقدم لك كذا نصيحة: التواصل مع الأهل: خد وقتك تتكلم مع أهلك بروية ووضوح، حاول تشرح لهم ليه انت شايف إن الزواج بالطريقة اللي بتفكر فيها هو الأصح. استند لآراء موثوقة ومن العلماء اللي تثق فيهم لتوضح وجهة نظرك، لكن خلي كلامك مختصر ومباشر. التفاهم والتسوية: ممكن متقدرش تغير كل العادات دفعة واحدة، لكن ممكن تعمل نوع من التسوية بين المتطلبات الدينية والتقاليد العائلية، ممكن يكون الزواج بشكل متواضع ولكن مع بعض التفاصيل اللي أهل الكل معتادين عليها. البحث عن شريكة توافق فكرك: وجود شريكة حياة متفقة مع فكرك ورغباتك الشرعية مهم جدًا. ده هيكون دعم كبير ليك قدام أهلك لأن هيكون عندك حليف في هذا الأمر. الاستعانة بطرف ثالث: ممكن تستعين بشخص من العيلة يحظى باحترامهم أو بشيخ أو عالم دين تثق في رأيه للمساعدة في توضيح الأمور لأهلك. الصبر والدعاء: خلي عندك صبر واستمر في الدعاء لربنا ييسر لك الأمور ويهديك للطريق الصح. تذكر دائماً إن أي تغيير كبير مش بيتحقق بسهولة، خصوصاً لما بيبقى صدام مع عادات وتقاليد عمرها سنين. خلي عندك إصرار وصبر وأذكر دايماً إن ربنا معاك طالما نيتك صافية وقلبك مخلص. الله يوفقك ويوفقنا جميعاً للأخذ بالأسباب والقرارات الصحيحة.
تم النشر الخميس، ٤ يوليو ٢٠٢٤
بص صراحه أنا شايفه إنك لسه صغير إشتغل كويس وأثبتلهم إنك تقدر تعمل كده وانك قدها وقبل كل ده لازم تدور ع البنت المناسبه لتفكيرك ولطريقتك يعني شوف وآحده يكون تفكيرها زيك ومش عاوزة فرح وأغانى وكده وآحده تكون عاوزة فرح أسلامى ولازم قبل م تخطبها تفهمها طباعك كويس جدا وتفهمها إنت عاوز اى ع ميحصلش مشاكل ف الخطوبه وكمان ع ميحصلش طلاق ف المستقبل المهم يعني انت اشتغل كويس جدا وحط كل تفكيرك الوقت الحالى ف شغلك وازاى تكبر من نفسك وتبقى قادر إنك تشتغل كويس وتعمل كل أللى نفسك في ده وبس ولما تلآقى بنت تعجبك روح لأهلها علطول وفهمهم كل ده وكمان إنك ممكن تطول ف الخطوبه شويه وأكيد ربنا هيوفقك طلما إنت عاوز تعمل بشرعو ولو أهلها موفقوش خلاص إستنى إن الله مع الصابرين وانت كده كده لسه صغير وملكش دعوة بكلام الناس
تم النشر الثلاثاء، ٩ يوليو ٢٠٢٤
طالما مبتعملشى حاجة تعضب ربنا اتجوز بالطريقة اللى تعجبك أديها اللى ربنا أمرك بيه و انسى القايمة و اللى يفرض عليك تمضى قايمة و أنت اللى مجهز بيتك كله بنفسك ابعد عنه و ابحث عن بنت من محيط دارسى الفقه من الرجال اللى تعرفهم علشان تسهل على نفسك الأمور و تعرف حال البيت قبل الدخول لأهله موافقين على النظام دا و لا لأ أما أهلك فافهمم أنك عاوز ترضى ربنا و إن شاء الله يفرحوا بفرحك فى الحلال و رؤية أولادك بالتوفيق
تم النشر الجمعة، ٥ يوليو ٢٠٢٤
اتقدم لواحده بنفس درجة تدينك وهى هتقبل غير كدا صعب تلاقى حد يقبل
تم النشر الجمعة، ٥ يوليو ٢٠٢٤
استمر وإن شاءلله تتوفق لكل خير واما المقاومة وضغط اهلك عليك ده طبيعي يحدث هو عمره مكان في حاجه بترضي ربنا الناس بتعديه بالسهل عندنا في البلد إلي بربي دقنه على السنة بيقول عليه إرهابي وإلي بيصلي كل فرض بفرضه بيقول عليه اه يعمنا الشيخ (سخيرة) بس انت ما تستسلمش اهم حاجه وخليك مثالا لكل واحد عايز يعمل زيك انا انصحك إنك تبحث على بنت الحلال ويكون اهله موفقين على الموضوع
تم النشر الجمعة، ٥ يوليو ٢٠٢٤
لعرض السؤال في فدني اضغط هنا