فى ولد انا وهو صحاب وهو كويس جدا جدا ومحترم لكن المشكله ان هو بيحبنى وقالي انو هو حابب تاخد خطوه اقرب وترتبط وانا رفضت مع انى برضو حابه ارتبط بيه لانو حد كويس وهو وعدنى انو هيفضل معايا لحد ما يكبر ويتقدملي الفكره أن انا رفضت عشان انا شايفه نفسي حد مؤذى وببعد من غير اسباب وشايفه انى مش قد الحوار ده وان انا غير مستعده تماما الارتباط ف قولتلو وبعدنا وبعد شهرين ونص رجعنا نتكلم امبارح هو حد عزيز عليا وانا بحبو وكنت قولت لنفسي مش هرجع اكلمو تانى معرفش ايه الي خلانى ارجع اكلمو محستش بنفسي غير وانا وهو رجعنا نتكلم انا فعلا بحبو بس انا عاوزه ابعد عن اى حاجه ممكن تعلق مشاعرى أو تتعبنى اجبهالو ازاى مع أن انا لو بعدت عنو هتعب اوى والله عشان حبيتو ؟
طيب هو اولا مينفعش يكون فيه علاقة ما بينك وما بين ولد .. سواء بقى كانت صحوبية او كانت ارتباط غير شرعي ده دينيا. لو اتكلمنا بعيدا عن الدين .. شوية هنلاقي برضه الموضوع مش هينفع. طيب ليه؟ اولا يعني ايه لما اكبر هنتجوز؟ معنى كده انه مراهق اساسا، ف انتي هتاخدي ع كلام واحد مراهق ازاي؟ ويعني ايه حب في السن ده؟ انتي بالنسبالك الحب يعني ايه؟ اهتمام وكلام حلو؟ اللي بيحصل في السن ده ما هو الا انجذاب واهتمام لا اكتر ولا اقل. واللي بيحصل انكم بتتعلقوا ببعض شوية، ف انتوا بتبقوا فاكرين انه حب، بس هو بيبقى تعلق شوية .. حد اتعلقتي بكلامه لفترة مش اكتر. لو استمريتي معاه ف الكلام وقعدتي بقى معاه سنيين على الموضوع ده، مترجعيش تندمي وتقولي ياريت كنت قطعت العلاقة ديه .. لان ده غالبا اللي هيحصل واليل بيحصل عموما من الشباب الصغير. ده لو كان اساسا صادق اصلا، يعني انا بفترض معاكي على ده كله انه فعلا صادق في كلامه، اما موضوع بقى انه بيتسلى بيكي ده حاجه تانيه. ف ياريت تخافي على نفسك اكتر من كده. كده كده الارتباط هيجي هيجي .. ف متورطيش نفسك في حاجه انتي مش قدها ولا ينفع تكوني قدها دلوقتي ولا هو كمان. لو اقتنعتي بالكلام ده، روحي قولي له، انا مش هينفع اتكلم معاك تاني لان ده ميرضيش ربنا، حتى لو صحوبية. واعملي بلوك بعدها.
تم النشر الثلاثاء، ٢٤ أكتوبر ٢٠٢٣
واضح ان سنكوا صغير وده مش توقيت علاقات نهائي لان اخرها انك هتتأذي ولا هترتبطوا ولا حاجه من دي هتحصل حبيبتي بلاش نغضب ربنا وحافظي علي نفسك اقطعي الموضوع تماما متسيبيش الباب موارب زي ما بيقولوا لان ده هيجرك لحاجات اكتر واكتر والنهاردة سهل تبعدي بعد كده صعب اقفلي اي باب نهائي للكلام متتابعيهوش عالسوشيال ميديا وعرفيه انك بتنهي الموضوع نهائيا ولو ليكوا نصيب ربنا هيجمعكوا وقتها اشغلي نفسك باي حاجه مفيده تعمليها تطوري بيها نفسك رياضه اقري كتب اي انشطه بتحبيها وكل ما يجي علي بالك اطردي اي افكار عنه مع الوقت هتنسيه وربنا يحفظك ويحميكيي يارب
تم النشر الأربعاء، ٢٥ أكتوبر ٢٠٢٣
احساسك صح ....هو مفيش داعى للارتباط عشان متتعلقيش بمشاعر وخلاص تجيبهالوا زى ما قولتى كده ...بلاش تعلق بمشاعر وقتها هيبقى طويل و غالبا هنأذى بعض من غير ما نحس ولو هو شاريكى لما يكبر بقى يبقى يجى يتقدم حقيقى انتى اتعودتى عليه وطبيعى الواحد يتبسط بحد بيحبه وكل ما بتحسى انك عاوزه شوية عاطفة بتلاقى نفسك راجعه تتكلمى معاه اقفلى الكلام ده كله ولا حتى صحاب دى ومفيش خطوة اسمها ارتباط ...الخطوات بتبدأ مع الاهل
تم النشر الأربعاء، ٢٥ أكتوبر ٢٠٢٣
العلاقات دي نهايتها دايما سيئه، اقل ما فيها انك هتتعلقي بيه ومش هيتقدملك بنسبه ٩٩.٩ ولو حصل واتقدملك واتقبل حياتكم بعد الجواز هتبقي سيئه بنسبة ٩٩.٩ ونقطه اخيره، محدش يملك انه يوعد واحده بالجواز الا لو كان هينفذ ف خلال الأسبوع أو الشهر الي وعد فيه، غير كدا دا بيلعب او بيلعب بيكي. وانا كدا بتكلم عنه انه حسن النيه، انما لو سيئ النيه هيكون له أغراض تانيه وأهداف تانيه. وربنا يوفقك
تم النشر الاثنين، ٢٣ أكتوبر ٢٠٢٣
كل علاقه بدايتها لا ترضى الله ، نهايتها لن ترضيك.
تم النشر الأربعاء، ٢٥ أكتوبر ٢٠٢٣
بصي حطي رضا الله سبحانه وتعالي نصب عينيكي ؛ خليني اذكر نفسي واذكرك احنا عايشين ليه ؟ موجودين ليه ؟ عشان نعبد ربنا سبحانه وتعالي متخليش الدنيا تسحبنا من الحته الاساسيه اللي مفروض نقف فيها ويوم ما تيجي حاجة تانيه ممكن تكون مغريه وفيها كلام حلو ومشاعر وبتاع اسألي نفسك السؤال دا هيوقظ عندك كل سائر روحك "قل أذلك خيرٌ ام جنةُ الخلدِ التي وعد المتقون فيها" ؟!
تم النشر الأربعاء، ٢٥ أكتوبر ٢٠٢٣
لعرض السؤال في فدني اضغط هنا