انا تعبت بجد نفسي احس اني حلوة نفسي الاقي حد يحبني حتى
انا الحمدلله حلوة شكلا وطيبة جدا ومحترمة بس بستغرب ان محدش بصلي ولا حد حب يرتبط بيا فالكلية او فالمدرسة رغم اني عارفة انه حرام وعلى طول بحب من طرف واحد حتى بقيت اتضايق من صاحبتي فالكلية تكلمني على الولد اللي هي مرتبطة بيه وانه مش قادر يستغنى عنها حتى الولد اللي حبيته راح بعتلها هي ادد عالفيس ومبعتليش وجت قالتلي وغاظتني بس بهزار مش قصدها بس انا من جوايا اتضايقت وزعلت وعيني دمعت وبقيت اخاف اخدها فأي نشاط فالكلية معايا لحسن تخطف هي الأنظار ومحدش يبصلي تعبت من الشعور ده وبقعد اسأل نفسي هي احسن مني فإيه طيب ورغم اني عندي ١٩ سنة بس اي بنت بتتجوز من عيلتنا بيبقى عندها حاجة وعشرين بس بتضايق وبحس اني وحشة مثلا ومببقاش فرحانلهم زي زمان وانا صغيرة بقيت خايفة اصلا
بصي يا جميل حابه اقولك ان والله مش بالجمال الخارجي خالص ولكن الجمال الداخلي اهم من ده كله وبما انك انسانه محترمه وطيبه يبقي جوهرك جميل ونقي وياما بنات ملكات جمال ولكن من جواهم مش حلوين او اخلاقهم مش حلوه والي اقدر اقولهولك اوعي الشيطان يضحك عليكي ويصورلك ان صاحبتك دي احسن منك لمجرد انها مرتبطه بولد واصلا علاقتهم محرمه فكري معايا كده الي زي دي كسبت ايه ولا اي حاجه مجرد فرحه دلوقتي بس ولكن خسرت دينها ودنيتها واخرتها عشان بس استسلمت لشيطانها الي صور لها ان الولد ده شاريها او ان الي هي فيه ده صح واحب اقولك والله هتندم قدام لان مفيش ولد بيلاقي بنت قابله بعلاقه محرمه وارتباط والكلام ده وهيفوت فرصه انه يتسلي بيها والله عمره يوم ما يجي يتجوز هيفكر فيها لانه ساعتها هيدور علي واحده غاليه منزلتش من نفسها زيك كده يا جميل فا اوعي تزعلي علي حاجه زي دي خالص والله نصيبك هيجيلك في الوقت المناسب الي ربنا كاتبه ليكي مع الشخص الصالح الي يقدرك ويصونك وبكره تفتكري الوقت ده وتضحكي علي تفكيرك حاليا وتعرفي ان ترتيب وعوض ربنا أجمل بكتير من غير اي مجهود منك ولا بقا ارتباط ولا الكلام ده نصيبك هيجيلك وانتي غاليه في بيت اهلك وغير كل كده كسبتي رضا ربك عليكي وولا تزعلي نفسك يا قمر اتمني اكون ساعتدك شويه ودي نصيحه من اختك الصغيره 🙂مش صغنونه اوي يعني 18 🙃وربنا يقدملك كل الخير يا جميل 💗
تم النشر الخميس، ١٩ سبتمبر ٢٠٢٤
انتى المفروض تحسى اد ايه انتى مميزة بس انتى اللى فاهمه التميز غلط دلوقتى انتى حلوة وحلاوتك متحاوطه باخلاق بيجبر اى حد يعرف انك مش متاح معاكى انه يتخطى الحدود اتبسطى انك احسن منها فى الاخلاق الظاهره لكل اللى بيشوفك
تم النشر السبت، ٢٨ سبتمبر ٢٠٢٤
بصي اول حاجة لما اهلك ادولك موبيل و سيبينك تروحي الجامعه لوحدك و ترجعي لوحدك هما عملوا كده عشان واثقين فيكي فمتكسريش ثقتهم فيكي و لا تكسريهم و المفروض تشكري ربنا أنه بعد عنك كل الفتن دي و هو عايزك متقعيش في الغلط و في العلاقات المحرمه و نصيبك هيجي هيجي بس في الحلال و الاحسن ليكي تبعدي عن صاحبة السوء دي
تم النشر السبت، ٢٨ سبتمبر ٢٠٢٤
بصي انا مريت بكده شويه بس ف الاخر ببقي فرحانه بنفسي ان مش ماشيه ف طريق غلط ع الاقل احترم نفسي وابقي فرحانه اني م القله القليله ف الزمن ده وان ربنا هيعوضني بالاحسن طول م انا ماشيه تمام وف الحلال وبالفعل ده حصل وربنا عوضني بحد يحبني م طرف واحد واتقدملي ف متشغليش بالك بالاسوء وركزي ف انك محترمه ومش بتقبلي اي شئ حرام ف انتي لسه صغيره وان شاء الله ربنا هيعوضك كل خير ❤
تم النشر الأحد، ٢٢ سبتمبر ٢٠٢٤
الله لا يخلق شيئآ ليس جميلآ في جمال خارجي وفي جمال داخلي جمالك داخلي جميل وجمال الخارجي كمان جميل بتقدري تعتني بنفسك ومضهرك عادي يعني تلعبي رياضيه بتعتني بنفسك من تغذيه بتفيد الجسم والزواج او نصيب هو قسمه ونصيب ممكن ربك مخبيلك حاجه افضل واحسن متلهيش نفسك وتقلقي اذا قلقتي تقدري تتأملي وتسترخي وتنظمي افكارك بيساعدك تهدي ويخف توتر والقلق وانصحك بتطبيق loona فيه نغمات بسيطه بتساعدك ع الاسترخاء وتأمل واهم حاجه تتنفسي شهيق زفير ببطئ وبراحه بتركزي ع تنفسك فعلآ بيخفف توتر عندك وبيهدئ افكارك تعلمي مهاره جديده مثل رسم شاهدي مسلسل يضحكك فلم اسعدي نفسك بنفسك لا تشيلي هم الزواج والحب تذكري هو قسمه ونصيب المهم تعتني بنفسك ومش معناتها انك ما تحبيتي انك مش حلوه وجميله مش مهم حد يحبك متركزي ع دي شيئ كتير المهم تحبي نفسك المهم تسعديها اقعدي مع اهلك تكلمي قوي علاقتك فيهم اكثر وتوكلي ع الله لما تعملي اي حاجه توكل ع الله شيئ جميل زيك زيدي ثقتك بنفسك برضى نفسك ابحثي عن الايجابيه اهم حاجه هي انك تعتني بنفسيتك، اما بنسبه لموضوع الغيره مش محتاجه صراحه تغيري كلنا ناس ناقصين وفينا عيوب مش كاملين ابدآ الله وحده هو الكامل كلنا فينا زين والشين لذا متبصيش ع غيرك وتغيري ممكن قسمتك بعدين ممكن لك خيار تاني غير عن صحبتك حياتها تختلف عنك ومصيرها يختلف عنك ممكن يكون اختيارها مش كويس او كويس الله يوفقها بحياتها، وتذكري لازم تصبري صبر جميل وكلمه كل حاجه في وقتها حلوه ف هيه فعلآ حلوه الي عليكي هو تسعدي نفسك وتؤمني بنفسك وتعتني فيها والله يوفقك بحياتك ويسعدك دنيا واخره وانشاء الله قريب تصيري احلى عروسه انشاء الله بتوفيق ليكي .
تم النشر الجمعة، ٢٠ سبتمبر ٢٠٢٤
علي فكرا عادي يعني انا ولد ويمكن فهمك لاني مريت الي حد ما بنفسك تجربتك دي بس هرجع واقولك مش يمكن ده احسن لينا لانه مش طريقنا. وان الاحسن مستنينا في الاخر؟؟ عارف موضوع يزهق انك تحس انك مش حلو ان قيمتك اقل ان محدش بيبصلك ناس بتحتقرك بتضحك عليك محدش بيحبك ولا معجب بيك ولا ولا ولا بس زاي مقولت مش يمكن ده احسن لينا
تم النشر الخميس، ١٩ سبتمبر ٢٠٢٤
انصحك كأب . أن تتخيرى الصحبة الصالحة فالمرء على دين خليله فلينظر أحدكم من يخالل و أن تحرصى على التمسك بأخلاق الاسلام و التحلى بالفضيلة و العفة و الحياء و الثقة بالنفس فتلك الصفات جمال يفوق اى جمال . كما أن رسول الله صلى الله عليه وسلم كان أشد حياءا من العذراء في خدرها . و لنا في رسول الله قدوة حسنة. و اجعلى نفسك زهرة لا يلحق من عطرها الا من يحافظ عليها فأنتى ام المستقبل و الزوجة الحبيبة لزوجها و انتى وتد الخيمة لبيتها و الأبنة المحبة لأبيها . اسأل الله أن يمنحكى رضا يثمر فى نفسك سعادة و يقينا أن الله سيمنحك الحب الحلال و ليس مشاعر طائشة ترهق صاحبها و تنزل به إلى الهواية .
تم النشر الخميس، ١٩ سبتمبر ٢٠٢٤
انتي مش قولتي إنك حلوة وطيبة ومحترمة كمان يبقى خايفة من إيه، اللي زيك في الزمن ده يعتبر ثروة نادرة بيبحث عنها الشخص الصالح اللي هو نادر جدا برضوا، فالموضوع بيبقى صعب شوية بس لما يجيلك نصيبك الصالح والمناسب لكي وتشوفي مشاكل البنات اللي كنتي بتغيري منهم ساعتها هتعرفي إنك كنتي الأفضل منهم وحصلتي على الأفضل، وبالنسبة للواد اللي مصاحب صديقتك ده هتغيري منها على إيه ده عيل بيتسلى يعني مش راجل ولو هي هبلة هيضحك عليها ويمكن يعمل معاها حاجة غلط لا سمح الله.
تم النشر الخميس، ١٩ سبتمبر ٢٠٢٤
عزيزتي، أقدر مشاعرك وأفهم الصراع الذي تشعرين به. الغيرة والشعور بعدم الثقة في النفس هما مشاعر طبيعية، ولكن من المهم أن نتعلم كيف نتعامل مع هذه المشاعر بشكل صحي. أولاً، تذكري أن الجمال ليس مجرد مظهر خارجي، بل أيضًا يتضمن الأخلاق والكيان الداخلي. يجب أن تكوني فخورة بنفسك وبقيمك الأخلاقية، وأنت بالفعل تُظهرين أن لديك شخصية جميلة وفقًا لحديثك. عندما تشعرين بأن صديقتك تلقى حظًا أكبر في العلاقات، حاولي أن تتذكري أن لكل شخص مساره الخاص. ربما يكون لديها تجاربها، بينما أنتِ أيضًا ستحصلين على الفرص المناسبة في وقتها. لا تقارني نفسك بالآخرين، بل ابذلي جهدك لتحسين ذاتك وتطوير مهاراتك واهتماماتك. أما بالنسبة لمشاعر الحزن والقلق، فالأفضل هو التحدث بشكل مفتوح مع صديقتك عن مشاعرك. قد تجدين أنها تشعر بالضغوطات أيضًا، وقد يساعد التبادل في التخفيف من مشاعر الغيرة. أخيرًا، تذكري أنه من الجيد أن تركزين على نفسك وأهدافك، ولا تجعلي نظرة الآخرين تحدد من تكونين. حاولي الانخراط في أنشطة تُعزز من ثقتك بنفسك، وابحثي عن الأماكن التي يمكنك أن تُعبري فيها عن نفسك بشكل إيجابي. كوني صادقة مع نفسك واحتفظي بالإيمان بأنه لكل شخص نصيبه. سيأتي اليوم الذي ستجدين فيه من يُقدّر جمالك الداخلي والخارجي.
تم النشر الخميس، ١٩ سبتمبر ٢٠٢٤
لعرض السؤال في فدني اضغط هنا