انا كنت داخل 3 ثانوى وانا عندى شغف كبير اوى انى مضيعش ولا ثانية من وقتى وانى اذاكر اكبر قدر ممكن لدرجة انه وصل عليا وقت كنت بذاكر الحد الأدنى 18 ساعة فيما فوق كمان فى اليوم الكلام ده فى اول السنة وصلت بيا انى كنت مراجع دروس اكتر من 15 مرة لدرجة انى كنت حفظت كل حاجه فى الدرس اكنه. pdf فى دماغى بس دلوقتى بقيت فاقد الشغف خالص ومبقاش جايلى نفس انى افتح كتاب وراكمت كتييير اوى وبقيت متأخر عن زميلى وعن الناس كلها و النهارده من الصبح لحد دلوقتي وانا عمال احسن من حالتى النفسية وانا مش عارف ومذاكرتش طول اليوم الا 3 ساعات بس ومش عارف اعمل ايه ولا انا عارف اقوم والنفسية زى الزفت ومش عارف الم المتراكم وحاسس انى بقيت ضايع وحلمى بدأ يضيع قدامى وانا مش عارف اعمل حاجه واهلى حاطين فيا امل علشان انا كنت بذاكر حلو اوى فى 2 ثانوى وفى تالته كنت بعمل مجهود جبار انا معملتهوش قبل كده فى حياتى و اول شهر كنت بقفل الامتحانات اللى بمتحنها ارجو الإفادة وبأقصى سرعة علشان انا حاسس انى ضعت خالص ونفسيتى بقت فى الأرض😢😢😢🥺🥺🥺
اللي حصل انك ضغطت على نفسك زيادة ... كل وما فيه ان حصلك فتور شوية. ومحتاج تاخد بريك علشان ترجع تاني بنشاط. الموضوع بسيط جدا .. بس انت تتقبل اللي انت فيه اهم حاجه علشان تعرف تعديه. حاول انك ترفه على نفسك شوية، باي حاجه بقى انت بتحبها، المهم تفصل وتحفز نفسك باي حاجه .. وبلاش فكرة الضغط ديه .. هي اللي عملت ليك ده كله، الموضوع عامل زي مثلا الفون لو قعدت مثلا تستخدمه علطول ومش بتسيبه من ايدك .. اللي هيحصل انه هيسخن وممكن يهنج. ده اللي حصلك .. هنجت شوية ف محتاج تسيب نفسك ترتاح. ياريت يكون فيه نص يوم ف الاسبوع او يوم تفصل فيه عن اي حاجه، علشان تستعيد نشاطك وحيويتك فيه. وبالتوفيق باذن الله
تم النشر الثلاثاء، ٢٣ يناير ٢٠٢٤
بص يا بطل انت مش محتاج تحفيز عشان ترجع تلم المتراكم عليك ولا محتاج حلول من حد .. الحل عندك انت. اصل اللي يبدأ تالتة ثانوي بمذاكرة فوق ال 10 ساعات دا اصلا واحد واعي و فاهم ، و عارف هو عاوز ايه كويس و عنده هدف محدد و بإذن واحد أحد هيوصله .. فـ انت بالنسبة لك كل اللي حصل هو شوية تعب بعد مجهود كبير .. انا فاكر بردو لما كنت في تالتة ثانوي جه عليا شهر 1 دا كنت بنام 14 ساعة في اليوم و مكنتش قادر اذاكر ساعتين علي بعض ، ف دا طبيعي جدا بعد مجهود اتبذل الفترة الأخيرة ،وانت بردو جيت علي نفسك جامد لان 18 أو 15 ساعة مذاكرة دا كتير ، المذاكرة بالعقل و التركيز مش بالوقت.. ممكن اذاكر ساعتين تلاتة بتركيز يعوضوا يومين تلاتة مذاكرة والله . المهم يا بطل ان كل اللي عليك تعمله دلوقتي بس انك تنظم الدنيا شوية ، يعني قول لنفسك كدا مش هنذاكر عدد ساعات كتير الفترة دي ، حلو اوي 8 ساعات .. مش قادر ابدأ ب أقل مش مشكلة خالص صدقني بس المهم يبقي عندك خطة و تبقي عارف انت هتصحي من نومك هتعمل ايه في يومك .. كمان حاول ترفه عن نفسك شويه و متضغطهاش اكتر ماهي مضغوطة ، و اهم حاجه طبعا مش محتاج اقولهالك هي علاقتك ب ربنا ، والله من غيرها ما هتوصل لحاجه حتي لو بتذاكر 24 ساعة في ال 24 ساعة .. و اخيرا بالنسبة لحوار التراكمات اللي عليك دا ف طبعا انت مش محتاج اقولك تعمل ايه ، هو حته جدول معفن هتكتب فيه كل المتراكم عليك و هتديله ساعتين بس في يومك و هتهتم بالجديد اكتر طبعا .. في خلال شهر بإذن الله هتكون لميت كل اللي فات و هتجيب زمايلك و هتبقي احسن منهم كمان .. اجمد كدا يا بطل انا عارف انها صعبة بس انت قدها و تقدر تعملها إن شاء الله زي ما غيرك عملها ووصل لحلمه ربنا معاك و ييسر لك امورك كلها يارب
تم النشر الأحد، ٢١ يناير ٢٠٢٤
الكل عدى بفتره فقدان الشغف ف 3 ث بس اهم حاجه الواحد ميطولش ف الفتره دى افتكر الهدف اللى انت محدده من الاول اتخيل يوم النتيجة وانت جايب المجموع اللى نفسك فيه وفرحه اهلك والناس اللى حواليك بيك الحاجات دى هتشجعك اكتر ومتقولش انا متأخر عن اللى حواليا انت لسه قدامك اكتر من ترم كامل يعني تقدر تلم كل اللى فاتك وتراجعه كتير كمان ربنا معاك اعمل جدول حاول تذاكر جزء قديم من اللى مذاكرتوش مع جزء جديد وحل اسأله كتير الحل هيفيدك عن المذاكره كمان ربنا يوفقك ويحقق لك كل اللى بتتمناه
تم النشر الاثنين، ٢٢ يناير ٢٠٢٤
الترويح عن النفس مطلوب حتى شرعا ... ذاكر الكم اللى تقدر عليه و ٣ ساعات بس بانجاز حلوين مش وحشين. حته الشغف دي انساها .وانك مش عايز تذاكر مش مهم ذاكر بردو وخالف نفسك .تعبت ريح .زهقت اخرج .لكن متتخلاش عن هدفك ف النص وخصوصا انك بذلت مجهود فيه .انا ف ثانوى كنت بنام ٨ او ٩ ساعات واصحابى كان فى منهم بتنام ٣ ساعات بس ! .انا معظم ايام السنة كانت بترسي على ساعتين او ٣ .لكن وقت الامتحانات تعبت فيه جدا جدا وفى ليالى كنت بنام فيها ساعتين واذاكر ٢٠ ساعه والله .. طبعا ده لا انصح به .. لكن الفكرة كلها ع حسب مجهودي وقتها وع حسب حماسي وزنقتى وظروفي .. وف الاخر انا جبت ٩٩٪ واللى كانت بتنام ٣ ساعات والارقام دي جابت ٩٠ تقريبا ..الفكرة كلها انك بعد الساعتين ولا ال٣ تقفل المذكرة وتسمع ع نفسك تلاقى نفسك بتعرف تسمع صح .. تحل اسئلة امتحانات تلاقى نفسك عارف تحل صح ..وبالمناسبة السر ف كتر الحل وان حتى لو السؤال حافظه صم ترجع تحله تانى للمرة المليون عادي جدا ...هتلف كتير وهتكتشف ان الحكاية كلها ف الإنجاز والإتقان والدقة ف الإجابة مش ف عدد الساعات كعدد ولا بالفل مارك ف الدروس ..لانى فاكرة انى ف الدروس نادر لما اقفل الامتحانات بردو ..لكن اخر السنة كنت حالّة كل كتب الوزارة والملخص الوحيد اللى كنت جايباه مش ٥٠ واحد ! وكنت قبل م اشوف السؤال ولا المسئلة اقول اه دي بتاعت ٢٠٠٨ اه دي بتاعت ٢٠١٢ يعنى من كتر الحل حفظت السنة اللى جه فيها السؤال ..ده بالنسبة للمذاكرة اللى هي تعتبر اقل من ٥٠٪ ف الاخذ بالاسباب .. السبب الاكبر والاقوى على الاطلاق هو الدعاء ..انا كنت بدعى وانا رايحة الدروس وانا راجعة قبل المغرب ده كان مستحيل يعدى من غير دعاء ولا قبل الفجر وكنت بدعى قبل م انام واول م اصحى وقبل الدروس وف رمضان لاااازم قبل الفطار واقول لاهلى يدعولى وكنت اروح للمدرس واقوله ادعيلى وكنت تقريبا قربت امسك الناس ف الشارع واقولهم ادعولى والله! ..الدعاء معجزة بالمعنى الحرفي ..انا كنت ف امتحان الاحياء والله قبل اللجنه كنت بذاكر وبحفظ سؤال والمراقبة قالتلي جاية تذاكرى هنا اللى ذاكر ذاكر ومرضيتش ادخل الامتحان الا لما حفظت الاجابة ودخلت لقيتها ف سؤالين والله ! فكنت بعمل اللى اقدر عليه لحد اخر لحظه ونفس بجد ...انا فاكرة ان اختى سألتنى قبل النتيجة .. انتى حاسة نفسك قصرتي ! ..قولتلها "انا لو شايفة نفسى قصرت ففعلا قصرت ف المذاكرة لكن مقصرتش ابدا ف الدعاء"! العبرة بالنهاية وكتر التكرار وشده الالحاح ف الدعاء
تم النشر الثلاثاء، ٢٣ يناير ٢٠٢٤
حاول تتقرب من ربنا اكتر وكمان مش بالوقت اللي بتذاكره يعني انت بتقول انك كنت بتذاكر 18ساعه انت ممكن ال18ساعه دول تكون استفدت منهم 3ساعات بالكتير قوي وممكن التالت ساعات الللي انت ذاكرتها دي تكون أنجزت كميه كبيره جدا من اللي عليك انت باين عليك ماشاء الله مجتهد وربناعمره ما هيضيع تعبك لسه عندك وقت كبيررر انك تبدأ من الاول حاول تتفرج على ڨديوهات عحفيزيه حاول تبدأ يومك بدري حاول تصحي قبل ما اي حد يصحي مش لازم تكتب وقتك كله مذاكره يعني ذاكر وقت يكون حلو تنجز في اللي انا عايزه أقوله مش من كتر الساعات يبقي انت كده ذاكرت لا حاول تذاكر وقت يكون مناسب ووقت تكون خلصت في اللي عليك
تم النشر الثلاثاء، ٢٣ يناير ٢٠٢٤
حاول تستعين بالله وتبدا تستعيذ بالله كده من الشيطان ثاني حاجه الدعاء ادعي كثير واهم حاجه بقى في حوار الحلم وان شاء الله مش هيضيع ولا حاجه ولكن حط في بالك ان الحلم اللي انا عايز اوصل له ده هعمل بيه مثلا ان انا اقدر اساعد الفقراء والمساكين فدي حاجه كويسه قوي وهتخليك ان شاء الله قادر وتعمل كل حاجه. ربي معك ربنا يصلح حالك
تم النشر الأحد، ٢١ يناير ٢٠٢٤
• كُل ما في الأمر أنكَ ضغطت على نفسك جدًا في بداية العام ، فبدأت تشعُر أنك فعلت ما عليكَ ؛ فأخذت راحة بعض الوقت ؛ فخرج الوضع عن سيطرتك ، أنتَ تحتاج إلى تغير روتين يومك ، وتجديد طاقتك النفسية ، أي تشحن نفسك حتى تتمكن من إكمال ما بدأت فيه ، أخرج وأسعد نفسك فيما لا يُغضب اللَّه طبعًا ، وصلي جميع الصلوات في المسجد حتى تشحن طاقتك الروحية والإيمانية ، وبعدها أستعيذ باللَّه من الشيطان ، ونظف غرفتك وجهز مكتبك ، وحضر مشروب سُخن تُحبه ، وأغلق هاتفك ، وذاكر بتركيز ، ولا تدخل كثيرًا على مواقع التواصل الإجتماعي لأنه يضيع الوقت ، يُستحسن أن تُغلق كُل مواقع التواصل الإجتماعي ماعدا الواتساب.
تم النشر الثلاثاء، ٢٣ يناير ٢٠٢٤
استعين بالله وادعي كتير ان ربنا يقويك وخلي هدفك قدامك ومش هتتنازل عنه مهما حصل وأعتقد أن ده عادي ممكن يحصل ولسه قدامك وقت حوالي ٥ شهور هتلحق تذاكر وتلم فيهم ربنا معاك ان شاء الله
تم النشر الاثنين، ٢٢ يناير ٢٠٢٤
لعرض السؤال في فدني اضغط هنا