السلام عليكم، هو طبعًا كان غلط إنك تنزلي صورها بدون إذنها وإنك تنزليها كأنها أنتِ، وكان ممكن التصرف ده يدخلك في مشاكل كتير أنتِ في غنى عنها، وبرأيي كمان حتى لو بإذنها ممكن يكون غلط، خاصة لو هي بتقدم محتوى فيه مخالفات شرعية فهتكوني بتحملي الذنب بنشرك محتواها. فكويس جدًا إنك فكرتِ إن ممكن يكون ده غلط ومسحتِ المحتوى بتاعها. لو حاسة إنك عملتِ ذنب تجاهها في الفترة اللي نزلتِ صورها فاستغفري وانوي متكرريش ده مع أي حد. *** حكاية بقى إنك طلبتِ تكوني فان لها، فلو انتِ عملتِ كده عشان بس مجرد إنك تخرجي من موضوع تنزيل محتواها دون إذنها فخلاص كانت محاولة وهي تصرفت بالطريقة دي فتجاوزي الموضوع. لكن عندي نصيحة صغيرة على موضوع طلب إنك تكوني فان لشخص على أي منصة، بالنسبة لي شايفة موضوع الفان ده غير صحي ومضر لشخصيتك. لو مثلا أنتِ متابعة حد وبيقدم حاجة بتفيدك فعلا وبتطورك للأفضل ومش بيقدم أي تفاهات فده شيء جميل وممكن تدعمي الشخص ده بتفاعلك على محتواه بطريقة كويسة وعقلانية، لكن، إني أتحول لمجرد معجب ورقم في متابعين شخص ما وأعمل زي البنات دلوقتي لما بيعملوا خناقات مع بعض عشان أشخاص تانية بتعمل محتوى وبتشتهر على حساب وقتكم فهنا الغلط، ___ هنا أنا من غير ما أحس بأؤذي نفسي وبعطلها عن إنها تتطور وتصنع مكانة لنفسها، وببقى مجرد ترس في ماكينة بتحرك الناس دي لشهرتها مش أكتر. ___ نصيحة من أخت أكبر منك، قللي من التيك توك والسوشيال ميديا وكل هوس الفانز هناك وتابعي بس كل حاجة تفيدك وتغير حياتك للأفضل، وقتك غالي جدًا جدًا وعقلك كمان غالي فاختاري تصرفي وقتك في إيه وتملأي عقلك بإيه. ربنا يوفقك.
كلامك صح جدا جدا جدا بس انا فعلا طلبت منها هي لقيتني مش منزله حاجه تخصها لسه قامت عامله بلوك مش عارفه لي بسس انا عمري ما اعمل كده تاني كده خلاص مفيش عليا ذنب مع اني زعلت منها حسيت اني قليله لما قولتلها كده وهي عملت بلوك بس وشكرا علي كلامك بجد 💘
تم النشر الاثنين، ١٧ مارس ٢٠٢٥
لعرض الإجابة في فدني اضغط هنا