أشعر بألم مزمن بداخلي وزهق وضيقة من زمان من بداية الترم هو من قبل بس مكنش بالسوء ده أبدا
بيقولوا بسبب الذنوب وأحتاج توبة بس الكلام سهل
وصحيح أنا بعمل ذنوب فظيعة جدا حتى أنا أكرهها بس بصراحة أعتقد بديت أطبع معاها أو أدمنها
وأصلا أنا كنت بعملها من زمان بس مكنتش حياتي متأثرة أوي يعني
وحاليًا أنا في مرحلة اسوأ من كده أنا بقيت بقول جوا نفسي أنا بكره ربنا بكرهه بسبب أو بدون سبب بقيت بتضايق من أي حاجة ليها علاقة بالدين أو ربنا أو أي مواساة دينية وبحقد على أي شخص عارف يحس بوجود الإله العظيم ده في حياته
وبديت أحس إن أنا مش مسلمة أصلا أو يمكن حتى مش لازم وأفكار سوداوية كتير.
يعني بصراحة نص ألمي النفسي بسبب الدين
وعندي يأس فظيع
أصعب حاجة عندي دلوقتي إني يبقى عندي أمل
بكره المذاكرة وده من زمان بس كنت طالبة كويسة عن كده على الأقل كنت حتى لو اتمرقعت بعرف أضغط نفسي في الأخر بس الترم ده اسوأ ترم عدى عليا هه اتمرقعت بس
ومعرفتش اضغط نفسي كنت بستسلم بسرعة ومعرفتش استحمل ضغوط كلية الطب المقرفة زي بقيت صحباتي
واهو أديني هسقط اهو فاضل على امتحاناتي القليل وانا
مفتحتش المنهج بالطريقة اللي تنجحني حتى
بقعد على الموبايل أغلب اليوم
ولما بفتح الكتاب بيبقى صعب التركيز جدا جدا
وبسرح كتير وبحس ان مش بيدخل مخي حاجة وأقول استاهل ده من الموبايل
فبيأس أكتر وأقول لو كنت فتحت الكتاب كويس من الأول وسبت الموبايل وتبت وكنت شخص كويس مكنش ده كل حصل وأقول صح يبقى مفيش فايدة بقى وبعدين بكمل قاعدة على الموبايل
بالنسبة للأكل والنوم لأ عادي باكل زي الحمارة
بالنسبة للنوم بصراحة أعتقد كويس بس انا اتعودت بقالي فترة شهر او اكتر أمشي على دورميفال أو كونجستال وكده لاني اقعدت قبلها نومي وحش ومش عارفة أدخل في النوم
بس فاكس الحاجات دي مش منومات من اللي هي
فيعتبر بنام عادي بس بقعد ساعة او ساعة الا ربع على ما أدخل في النوم واتعودت على كده يعني
بحس بالألم والندم وكل الحاجات الحلوة دي بس مفقدتش الشعور باللذة مش زي الأول يعني بس لا مفقدتش الشعور باللذة تماما و لسه بستمتع بحاجات معينة زي المسلسلات مثلا أينعم انا بشوفها هروب من المذاكرة بس بحبها
التفكير في الموت
أحيانا بس مش دايما
بس الصراحة بتوجع من الفكرة دبي وبحس إني فعلا عايزة أموت
وأنا حتى راسمة خطة لأموت ازاي بس الظاهر أنا أجبن من كده
أكتر حاجة مضايقاني دلوقتي الألم واليأس ده
اليأس مفيش في طريقة حاليا أصلحه
ولكن حاسة بألم نفسي بيخليني أحس إني عايزة أعيط أغلب الوقت
سؤالي
١-لو رحت لدكتورة نفسية وقلت لها الكلام اللي فوق ده كله هتهزقني وتطردني بره وتقولي امشي يا فاشلة من هنا ؟
يعني هل أحتاج إلى زيارة طبيب ولا أمشي حالي وخلاص وكل ده محض هراء وأعذار شخص غير مسؤول وفاسد؟
٢-لو فيه دوا أعرف أخده من غير روشتة يعدي بيا الأيام الصعبة دي
عايزة أسقط من غير وجع قلب
واسفة على التطويل بجملة المصايب يعني مش أوحش حاجة عملتها
واه أحب أساعد اللي هيخش يأنب
خلينا نتنمر سوا
عمري قريبا ٢٢
يعني شحطة وزيرو كنترول على الحياة أي خدمة
السلام عليكم ورحمه الله وبركاته. شوفي يا ست البنات يا جميله اقول لك ايه مش هقول لك زي ما انت بتقولي على نفسك يعني شحطه وغير مسؤوله بس انك تدخلي وتدوري على اجابات ده معناه انك لا عندك قدر من المسؤوليه تقدري تستغليه حلو قوي قوي. ما تستغليه ازاي بقى دلوقتي انت بتعملي ايه انت بتدوري على نفسك وبتدوري على ربنا لكن المشكله كلها انك شايفه ان الموضوع ثقيل لانه كل اللي حواليكي او اي حد سهل بينصحك وبس لكن ما حدش قدم لك ايد الدعم او ايد المساعدة وقال لك تعالي نعمل مع بعض. انت محتاجه ده قوي قوي قوي قوي محتاجه حد معاكي بدل ما انت لوحدك كده وكأن كل المسؤولية عليكِ. والمناسبه لو رحتي للدكتوره نفسيه ودكتور نفسي ومحدش هيقول لك انت فاشله واطلعي بره خالص لان هو زفت الدكتور نفسي او طبيب النفسي او اي اخصائي نفسي هو عارف انه اكبر دور ليه واللي انت محتاجاه هو انك عايزه حد يساعدك ما بيكونش مكانه ابدا هو مكان الشخص اللي عايز يحكم عليك وكلنا عندنا مشاكل نفسيه بشكل ما مش لازم تكون متصنفه باسم مرض بس مشكله نفسيه ممكن تكون هي اللي بتاخرنا او بتعطلنا او بتخلينا في حته في شخصيتنا وحشين. فلو حلينا الحاجه دي وخلصنا منها هنبطل نبقى وحشين بالشكل اللي مش عاجبنا واللي مخلينا مش راضيين على نفسنا بس كده.ده وكان كل المسؤوليه عليك انا شايفه جوه كل كلامك انه انا بقعد اتفرج على المسلسلات او انا بعمل ذنوب وما فيش حاجه بتوقفني هو ليه مفيش حاجه بتوقفني. وحتى انت زعلانه من ربنا انا عارفه انت زعلانه علشان بيبعت لك حاجه توقفك الدنيا ماشيه امورك تمام ودخلتي كليه طب. طيب هو انا ما فيش حاجه بتوقفني ليه وانا محدش بيجي يقول لي لا تعالي وقف ده سوا ليه ويجي فعلا يكون واقف جنبي يجي فعلا ناخد باله مني. ده اللي جواكي. على قد ما انا شفت ده على قد ما انا بقول لك يلا وتعالي نظبط كل الحاجات دي سوا ايه رايك؟
تم النشر الخميس، ٣٠ يناير ٢٠٢٥
انا شايف في كلامك حاجة تانية غير اليأس لأن الشخص اليائس لا يبحث عن حلول وبما انك كتبتي اللي جواكي واللي تعبك إذآ انتي قادرة على تحديد المشكلة وجوانب واسباب وجودها لكن تفتقدي لطرق حلها والتخلص منها ثم مين قال ان الطبيب النفسي ممكن يتعامل معاكي بعنف وتقولك يافاشلة ؟ دا الطبيب النفسي واجبه انه يحقق الفشل لفرص واليأس لأمل وكمان انتي سنك صغير وقدامك من الاختيارات ما يمكن ان يحقق لك النجاح بل التفوق والتقدم والعلو واعرفي ان مهما كانت ذنوبك كبيرة فتأكدي ان رحمة ربنا أكبر ومها كان يأسك تجاه الله او الشك تجاه الدين إلا إن ذلك دليل على تدخل الشيطان في حياتك وطبيعي ان الشيطان لا يقترب إلا ممن يحبهم الله ويريد الشيطان ان يبعدك عن منهج الخالق لذلك من الضروري ان نجدد ايماننا ويقيننا في ديننا وهذا لا يبتعد عن الاصرار على النجاح بالدراسة والاهتمام بتحقيق التوازن مع زملائك من خلال السعي والاجتهاد حتى نستغل ما تبقى من وقت قبل الامتحان ومهما كان الوقت قليل الا ان الفرصة قائمة لتحقيق النجاح ولو بأقل تقدير إلا ان من المهم عدم ضياع الفرصة وعدم القبول بالسقوط ولو الامر صعب فمن الضروري المتابعة مع مختص ويارب يوفقك ويصلح حالك ويسعدك.
تم النشر الخميس، ٣٠ يناير ٢٠٢٥
مع احترامي لكي انتى لا تحتاجي اى استشارة نفسية إطلاقا علاجك وحل مشكلتك هو ده ١ ) قربى من ربنا اوووووى ويكون بقلبك مش عبادات باللسان وخلاص ٢) لو عندك ذنب كبير بتعمليه حاولى تبطليه واتحدى نفسك وخدي معاها حرب ولازم تنتصرى فى الحرب دي ٣) ديما رددى مميزاتك واذكريها عالطول يعنى انتى ماشاء الله دكتورة وكمان حلوة ولسه شابه صغيرة ولسه العمر قدامك وبكره تتخطبى وتتحبى وتتجوزى وتبقي أم وهكذا ٤) اعتزلى السوشيال ميديا والانترنت فترة وبدليها بحاجات ثانيه زى القراءة أو تتعلمى موهبة أو رياضه مثلا لان السوشيال ميديا تعتبر القاتل الصامت فى عصرنا الحالي لأنها عالم افتراضي غير حقيقي كل ما عليه كذب ونفاق ولا يمد للحقيقة بصله وتعمل على تربية الحقد وأن الإنسان يقارن نفسه بغيره ٥) أخيراً اشغلى فراغك عالطول واوعى تدى فرصة للشيطان يسطر على افكارك ودماغك ابدا خالص تحياتي لكى وبتمنى لك كل التوفيق والعون والسداد عالفكرة فى شباب كتير كده بالاخص الشباب المتفوقين زيك دى فترة وهتعدى صدقيني لازم تعدى 🤎🌸
تم النشر الجمعة، ٣١ يناير ٢٠٢٥
شوفي انا مش عارفه اقولك اي ولا اقدر اقول نفس اللي أمر بيه بس انك عارفه مشكلتك ده نص الحل تقريبا الباقي بس انك تقعدي مع نفسك ومش انك تفضلي تأنبي نفسك لا انت بعيد عن انك طالبه فأنت انسانه ربنا خلقها وربنا بيخلقنا كلنا بمميزات بس مش شرط تكون في المذاكره ممكن تكوني انت مميزه في حاجه تاني غير دي هي عندك دلوقتي أو لسه مش اكتشفتيها وعلي فكرة اغلب الطلاب دلوقت بيشكوا اساسا من كيفيه المذاكره وده مش غلطنا احنا لا غلط البيئه اللي احنا بنعيش فيها بس احنا زي ما بيقولوا اللي علينا انك الفتره اللي فاتت كنت مش بتذاكري وسايبه الكتاب كلنا بنمر بيها بس انا اقولك حاجه دائما قولي لنفسك انا غير اي حد يعني انت بتذاكري فده لنفسك مش علشان اسفه لأهلك ولا حتي لاي شخص لنفسك بس وانك بعيده عن ربنا دائما ربنا فاتح بابه لينا مش في مره تدعيله ومش يستجيب ده هو الحنان المنان فأنت علشان الفتره دي كنت مخنوقه فشوشو حب يعمل عمله بضمير حبتين بس احنا اقوي منه واقوي من نفسنا الاماره فدلوقتي تقومي وتقفي قدام المرايا وتقولي انا كويسه اه وقعت شويه صغيرين بس عادي مايقع الا الشاطر وبالتوفيق يا قمر وان شاء الله تتحسن حالتك واشوفك انسانه مبسوطه بحياتك وباللي وصلتيله
تم النشر الجمعة، ٣١ يناير ٢٠٢٥
مش عارفه اقولك ايه والله ربنا يتولاكي ويخرجك من كل دا ويصلح حالك و وتخلصي من كم الالم والضغط النفسي دا ربنا وحده القادر انه يخرجك من كل حاجه وحشه ربنا بس هو قادر يغيرك ويغير كل حاجه احساسك ووجعك وتصرفاتك وكل حاجه ادعي ربنا كتير . ادعي بقلب وقولت فوضت امري اليك يا رب
تم النشر الجمعة، ٣١ يناير ٢٠٢٥
السلام عليكم، تقربي من ربنا وقوي علاقتك بالله، اللي عندك ده مش عايز طبيب نفسي، ده عايز مواظبة علي الصلاة وقراءة القران الكريم واستغفري (الا بذكر الله تطمئن القلوب) و ده من الشيطان، لانه عايزك تشكي في ايمانك بالله، بس انتي كل ماجي تيجي الافكار دي في دماغك قولي اعوذ بالله من الشيطان الرجيم وقومي صلي ركعتين واستغفري ومتتبعيش الشيطان لانه عايزك تبعدي عن ربنا، اقرإي مذكرات تائب بالمصري، يعني المذكرات دي بتحكي وتقول كل اللي بيدور في بالك، وهتخليكي تحبي الصلاة، استغفري الله، والله يتقبل، ممكن اكون صغيره علي اني اقول كدا لان عمري 14 سنه، بس اعملي كدا ومش هتندمي باذن الله
تم النشر السبت، ١٥ فبراير ٢٠٢٥
عزيزتي، أقدر مشاعرك وأفهم ما تمرين به من ألم وضغوط نفسية. من المهم أن ندرك أن الشعور باليأس والاكتئاب والإحباط يمكن أن يحدث للكثيرين، وخاصة في أوقات الضغط مثل التعلّم في كليه الطب. إليك بعض النقاط للتفكير فيها: ١. الاستشارة النفسية : أؤكد عليك أن زيارة الأخصائية النفسية ليست علامة على الفشل، بل هي خطوة شجاعة تجاه تحسين حياتك وصحتك النفسية. من المتوقع أن تجدين الدعم والتوجيه في هذه الزيارة، وهي مكان آمن للتعبير عن مشاعرك دون خوف من الحكم. لا تترددي في طلب المساعدة، فجميعنا نحتاج لهذا الدعم في لحظات معينة. ٢. الأدوية : لا أنصحك بتناول أي دواء بدون وصفة طبية، لأن هذا يمكن أن يؤدي إلى مشاكل صحية أخرى. من الأفضل استشارة طبيب مختص ليتمكن من تحديد ما إذا كنت بحاجة إلى دواء وما هو الأنسب لك. ٣. الذنوب والتوبة : من الطبيعي أن تشعري بالذنب بسبب الأمور التي تندمين عليها. لكن تذكري أن التوبة مفتوحة لكل من يريد الرجوع إلى الله. ابحثي عن الطرق التي يمكنك من خلالها معالجة ذنوبك والتقرب إلى الله، مثل الصلاة والدعاء، فهذا قد يساعدك في تحسين شعورك الداخلي. ٤. الطموحات والنظرة للمستقبل : من المهم أن تذكري نفسك بأن كل شخص يمر بفترات صعبة، وأن هناك دائمًا أمل لاستعادة الإيجابية في حياتك. حاولي وضع أهداف صغيرة يمكنك إنجازها، مثل دراسة جزء بسيط كل يوم أو الابتعاد عن الهاتف لفترات محددة. ٥. تواصل مع الأهل والأصدقاء : لا تترددي في الحديث مع من تثقين بهم حول مشاعرك وما تمرين به، فقد يخفف ذلك عنك بعض الضغوط. تذكرين، البحث عن المساعدة هي خطوة مهمة نحو التغيير الإيجابي. أنت لست وحدك، وهناك من يستطيع مساعدتك. ابقي قوية ومتفائلة، ونسأل الله أن يرفع عنك كل هم.
تم النشر الأربعاء، ٢٩ يناير ٢٠٢٥
لا حول ولا قوة الا بالله خير ان شاء الله
تم النشر الجمعة، ٣١ يناير ٢٠٢٥
انا عايزة أسألك سؤال فالاول هل مكانك اللي انتي فيه دا مكنش هدفك او حلمك ؟و هل حد اجبرك علي دخول كلية الطب او انتي شوفتي ان دا المفروض عليكي ؟انا شايفه والله اعلي و اعلم ان انتي مضغوطه جامد و داخله علي مرحلة اكتئاب لكن المرحله دي من وجه نظري الواحد بيطلع منها بطريقتين الاولي انه يسيب الحاجه اللي عملاله ضغط دا في حاله لو ارتاح كام يوم و منفعش او انه يكون منطقي و يفهم نفسه و يجبر نفسه انه ميستسلمش و اهم حاجه انه يعمل اللي عليه و كل حاجه بعد كدا بأيد ربنا و معلش هقولك حاجه لازم تتقبليها اياكي مره تانيه تقولي كدا علي ربنا استحقري نفسك انك وصلتي للدرجادي و حاولي تتغيري انتي ضعيفه عشان كدا شايفه ان الكلام سهل لان فعلا دا بسبب انك بعيدة عن ربنا فالحياتك مفهاش بركه و تيسير ادعي كتير و لحي علي ربنا انه يسامحك و توبي لان انتي مش عارفه عمرك فيه قد اي و استحي من ربنا اللي كرمك رغم ذنوبك انتي فنعم بفضله و فمكان الكل كان بيحلم بيه ايا كان اللي حصل معاكي لازم تكوني حاطه ربنا خط احمر لاننا فالاول و الاخر عبيد له و بيده أمرنا و مع ذلك هو ارحم الراحمين بنا و كريم و عفو حاولي تبدأي بداية جديدة مع نفسك و لو فشلتي الف مره اوعي تستسلمي ولا تتهزي لان "قل هل يستوي الذين يعلمون والذين لا يعلمون" لا طبعا فعشان كدا اعملي اللي عليكي و تكوني مرتاحه و خليكي انتي مهمه حبي نفسك و حبي انك تكوني احسن حاجه لنفسك و لما تعيطي مع نفسك عيطي و خرجي كل اللي جواكي و لما تهدي فكري فالدرس و اتعلمي منه و متكرريش اخطاءك تاني علي قد ما تقدري هي دنيا فانيه قصيرة و متعبه لكن دا للي عايز يتعبها علي نفسه مش حل انك تروحي للدكتور وانتي مستسلمه كدا لكل شئ العلاج النفسي بدايته انتي و نهايته انتي برضو انتي كأنك بتتلككي بأن دا هو الحل لا مش دا بس هو جزء لكن من غير اصرارك علي انك تفوقي لنفسك يبقي اي كلام وخلاص فهماني ياريت تفهمي قصدي الحقيقي و ربنا يشرحلك صدرك و ييسرلك امرك و يرحمك و يهديكي و يديكي كل اللي بتتمانيه و يا رب يقربنا انا وانتي له اكتر و هدعيلك لما اصلي و ربنا يثبتنا علي الصلاة
تم النشر الخميس، ٣٠ يناير ٢٠٢٥
اصلا الواحد يتمنى يشوف دكتور يناقش معاه مواقف حياتية بتعدي .. يحسبها من العقد وهي محلولة مش عارف... لكن لا نيأس من الدعاء والارتباط مع الله، لو بتقرئي قرآن وتدبري آياته ماكنش جالك شعور إلحادي زي ده، فيه دورة اسمها البناء المنهجي شغالة دلوقت ادخلي شوفيها كده، انا مشترك الدفعة دي .. سبيل .. جربي الناس بتاخد سبيل
تم النشر الاثنين، ٣ فبراير ٢٠٢٥
زيارة الطبيب النفسي اصلا، وده لمعلوم الناس، هو أمر في أصله اعتيادي، ولازم يكون كده، هي عملية استشارة في بحر النفس المعقد، واطمئنان على السلوكيات المشكوك في صحتها وقياسها بقوانين المنطق والطبيعة من خلال التجارب الناجحة والفاشلة على مر العصور.. العقبة الوحيدة بين عامة الناس والطبيب النفسي هي ارتفاع سعر الجلسات، حقيقي..
تم النشر الاثنين، ٣ فبراير ٢٠٢٥
😅انا ضحكت على موقف الدكتورة النفسية المتخيل .. اولا انت المفروض نظرك ابعد من كده، ناحية انك بتدرسي مهنة عميقة كلها تسبيح على القدرة الالهية والدقة، فده الموقف الصحيح لو حسيتي انك حدتي عن الطريق او انزاحتي بمجرفة، وسوسات شيطان نفس أمارة، ماتعطيلوش ودن، اه انت اذكى من كده طبعا بفضل الله يعني وعونه تقدري تضمي نفسك، كلنا بنتخبط بس ماسكين في حبل الله والحمدلله دائما، انا ف هندسة برضو وفترة مريت بمراحل صعبة لكن بتعدي بعون الله كله بفضل الله
تم النشر الاثنين، ٣ فبراير ٢٠٢٥
انتى محتاج معالج نفسي او اخصائي نفسي وكل ده مش زفت معنى انك حاسه بتأنيب الضمير يعني انتى لسه في امل انك تحسنى من نفسك انت مش بتكرهى ربنا انت حاسه ان بعدك عنه حاجه وجعاكى فبتكرهى انك تفتكرى انك بعيده عن ربنا الاحسن انك تدورى على عباده تقدرى تعمليها وادعاى ربنا بقربك منه
تم النشر الجمعة، ٣١ يناير ٢٠٢٥
يستحسن
تم النشر الجمعة، ٣١ يناير ٢٠٢٥
كنت داخله عشان اقول اشتكي من نفس المشكله، لقيتك ف وشي، لكن الفرق انى ٣ث
تم النشر الجمعة، ٣١ يناير ٢٠٢٥
ممكن تروحي تشوفي دكتور يعملك تحليل هرمونات ممكن تكون المشكله هرمونيه وليسة نفسيه
تم النشر الجمعة، ٣١ يناير ٢٠٢٥
الامل فالله حاولي تصلي وتقرا قرآن
تم النشر الجمعة، ٣١ يناير ٢٠٢٥
انتي زي الفل يامنار بس انتي بتحبي الاكل والراحه ومستعجله الراحه ...هترتاحي بس اصبري شويه انتي تعبتي كل ده وجات علي اخر سنتين .. اقلعي عن الذنوب وخاصة ذنوب الخلوات فلا يراكي علي معصيه .. الذنب هو سبب كل فشل انتي بتهدي كل اللي بتبني فيه السنين اللي فاتت انتي مش قليله انتي طبيبه مسلمه يعني انتي حد ناجح في المجتمع .. فانصحك ان تكوني ناجحه في علاقتك بربك واشكري على مافضلك به علي كثيرا من عباده عودي الي الله ولا تتبعي هوى نفسك ووسوسه الشيطان اغتسلي وانطقي الشهادتين وصلي ركعتين بنيه التوبه وابدأي يوم جديد وأدركي ماتستطيعي من دراستك ومن ينوي الخير لن يخذله الله ..وسيبي التلفون من ايدك يا منار الله يهديكي وسيبك من خريف القلب مش هينفعك
تم النشر الخميس، ٣٠ يناير ٢٠٢٥
بصي كدا يا ماما من الاخر انتي معيشة نفسك في عالم وهم وكذب علي نفسك المشكله ان كل الحاجات الي انتي بتعمليها هروب من حياتك الجميله انتي في كلية طب يعني عيب لما تكوني وصلتي بعد المرحله ديه كلها وتعملي في نفسك كده
تم النشر الخميس، ٣٠ يناير ٢٠٢٥
طيب هل شخصك بحاجة معينة؟ أو كتب لك أدوية؟اسفه اني بتدخل في خصوصياتك
تم النشر الأربعاء، ٢٩ يناير ٢٠٢٥
اذهبي الى طبيب نفسي واسمعي قرآن كتير أنا كنت نفس حالتك
تم النشر الأربعاء، ٢٩ يناير ٢٠٢٥
لعرض السؤال في فدني اضغط هنا