السلام عليكم ورحمة الله وبركاته
انا مخطوبة بقالي حوالي شهر وشوية بس انا مش فرحانة ابدا بخطوبتي ومش مقتنعة بخطيبي مع انه كويس وبيحاول طول الوقت يبينلي انه بيحبني وانه بيخاف عليا بس انا مش حابة ده والمفروض اكون مبسوطة بس انا مش مبسوطة خالص
مكنتش مقتنعة بيه من البداية بس اهلي فضلوا يقنعوني بيه لحد ما وافقت بس دلوقتي انا مش مرتاحة ابدا في الكلام معاه او في اي حاجة وحساه مش شبهي في اي حاجة ومبحبش حد يتكلم عليه قدامي ويقعد يقولي ده خطيبك وحبيبك بحس نفسي مش طايقة الكلمة دي
ولما جيت اتكلمت مع ماما قعدت تزعق وتقولي اني بفتري وانه مش هلاقي زيه تاني وانه لو ده مشي مش هتحضر لي اي حاجة بعد كده وانا مش شايفة كده
شايفة طالما مش مقتنعة ومش مرتاحة يبقي خلاص بس دلوقتي انا بين نارين ماما ونفسي لدرجة انه حاليا بقيت بتمني لو اموت او يحصل حاجة بس الجوازة دي متكملش ونفسيتي طول الوقت وحشة حاولوا تفيدوني اتكلم مع اهلي ازاي عشان اخليهم يفسخوا الخطوبة او اعمل اي؟
السلام عليكم، اعطيه واعطي نفسك فرصة تتعرفي عليه فعلا، لأن احتمال إن شعورك بالضغط وإنه مفروض عليكِ هو اللي أدى لكرهك للموضوع وعدم تقبلك للشخص رغم إنه ممكن يكون إنسان كويس جدًا ويصلح زوج يقدرك ويحترمك. صلي استخارة واركني مشاعرك على جنب واطلبي من ربنا هو اللي يختار لك الأصلح، لو الزواج من الشخص ده فيه خير ربنا هيسره إن شاء الله ولو كان شر لكِ ربنا هيبعده ويكتب لك الخير مع حد تاني. المشاعر عادة بتغطي على أحكامنا العقلانية فجنبي مشاعرك شوية وبعد ما تصلي استخارة ابدئي اتعرفي فعلًا عليه، اتعرفي على دينه وأخلاقه ومعاملاته لك وللناس، الخطبة أساسًا عشان تتعرفوا وتشوفوا القبول بينكم وهل تصلحوا للزواج وإنشاء أسرة سليمة مع بعض ولا لأ. إذا بعد فترة محصلش قبول ولا اتفاق واكتشفتِ إنه لأ، مش هو الشخص اللي عاوزاه كزوج فخلاص من حقك فسخ الخطبة، لأن استمرارك فيها ظلم للشخص ده وظلم لنفسك، وبعد الزواج خيار الانفصال هيكون أصعب جدًا. صلي وإن شاء الله ربنا يكتب لك الخير ويرضيك به.
تم النشر الأربعاء، ٢٦ مارس ٢٠٢٥
اول حاجه اهدي خالص عشانك وعشان نفسك عارفه الموضوع صعب وبالنسبة لينا كبنات وكلام الناس والأمهات والعيله عارفه والله وبالنسبالهم كارثه لو فسخنا خطوبه بس الاكيد انك تشوفي انتي عايزه أي وهما كلهم مش مهم حىى مامتك ممكن يبقي موقفها طبيعي إلى حد ما بس فالاول وفي الاخر دي حريتك الشخصيه ده الي هتكملي معاه حياتك ده الي هتفضلي عايشه معاه تحت سقف واحد بس خليني أسألك حاجه الأول هل ده لسبب معين الي مخليكي للدرجادي كارهه الموضع موقف معين مثلا سابق منه او حد كان في حياتك بس لسه متوقفه عليه أو تجربتك قبل كدا فخايفه من فكرتك للجواز لو اي حاجه من دول فلا حاولي تدي فرصه جربي ممكن يبقي هو الشخص الصح فعلا ونتي مش شايفه ده حاولي تشوفي الإيجابيات وبلاش تفكير زايد مثلآ اديله فرصه انما لو انتي فعلا مش مرتاحه وحاولتي وحاسه انو مفيش اي فرصه يبقي خلاص انا بقولك احسنلك تلغي الموضوع خالص عشان ده مستقبلك وقرارك وهما مش هينفعوكي فحاجه بعد كدا متقلقيش لو على النصيب هييجي صدقيني في يوم من الايام ربنا كاتبه لك هيبقي كاتبلك حد انتي بجد ارتحتي اول مشوفتيه وعن تجربه سابقه بتكلم كان حد قريب مني جالها عرسان يامه مقولكيش وسبحان الله ولا واحد منه كانت حاساه كانت بتدي فرصه لأجل النصيب وانها مترفضش على مفيش حتى كان ساعات متبقاش مقتنعه ويعدوا يضغطوا عليها قد كدا لحد متقبل وسبحان الله بردو كان الموضوع بيبوظ لوحده من عنده بقى او فجاه من غير سبب بتيجي كدا والله فمره بقي كان عريس بردو من العرسان وسبحان الله اول مشافته وقعدت معاه ارتاحت حست انو هو دا ومعاندتش زي كل مره وفعلا اتخطبوا وربنا يرزقهم الذرية الصالحة فانتي كمان استني على مترتاحي بجد
تم النشر الأحد، ٣٠ مارس ٢٠٢٥
السلام عليكم ورحمة الله وبركاته اهلا بيكي الزوج قبول، يعني ممكن عريس يكون ممتاز بالنسبه لكل البنات و انتي شايفه انه غير مناسب يبقي خلاص هو غير مناسب فعلا ليكي. و هنا انتي محتاجه تتكلمي مع والدتك مره تانيه و تقولي أسباب رفضك مع ان كلمه انا مش حساه تكفي. و نقطه انها مش هتحضر ليكي حاجه دا كلام يستخدمه معظم الأمهات للضغط علي البنت أو الابن. خلي بالك دا قرار مصيري و لازم قرارك يكون من نفسك لان زي ما بنقول بالعامية انتي اللي هتعيشي و انتي اللي هتستمري مع الشخص دا. لو انتي قافله منه خالص اتكلم مع والدك أو والدتك، و لو حسه أن ممكن يكون فيه حاجه أتأني و أدي نفسك فرصه تانيه. و ربنا يكتب لكي الخير كله
تم النشر الجمعة، ٢٨ مارس ٢٠٢٥
وعليكم السلام ورحمة الله وبركاته. أختي العزيزة، أقدر مشاعرك وما تمرين به من صراع داخلي. إن شعورك بعدم الارتياح وعدم القناعة بخطيبك هو أمر مهم ويحتاج إلى التفكير العميق. أولاً، يجب أن تعرفي أن الزواج هو ارتباط يتطلب توافقًا وانسجامًا بين الطرفين، وإذا كانت هذه العوامل غير متوافرة، فمن الطبيعي أن تشعري بعدم الراحة. إليك بعض النقاط التي يمكنك التفكير فيها: تقييم العلاقة : حاولي أن تقيمي مشاعرك تجاه خطيبك بعقلانية. هل السبب هو عدم التوافق الشخصي فقط، أم هناك أسباب أخرى؟ من المهم أن تكوني صادقة مع نفسك. التواصل مع العائلة : إذا كان لديكِ مشاعر قوية بشأن عدم رغبتك في الاستمرار، فقد يكون من المفيد التحدث إلى والدتك بصدق. استخدمي لغة هادئة وعبّري عن مشاعرك بوضوح، وشاركيها أفكارك ومخاوفك. قد تكون البداية بمشاركة مشاعرك السلبية وتأثيرها عليكِ. طلب المساعدة : إذا كان من الصعب عليكِ التحدث مع والدتك بمفردك، يمكنك الاستعانة بشخص آخر من العائلة يمكنه التوسط بينكما أو حتى مستشار للزواج. اختيار الوقت المناسب : اختاري لحظة مناسبة للحديث مع والدتك، واستعدي لها جيداً. كوني هادئة ولا تنجرفي وراء العواطف السلبية أثناء الحديث. النظر إلى المستقبل : تذكري دائمًا أن القرار النهائي هو قرارك، وأن الأهم هو راحة وسعادة حياتك المستقبلية. إذا استمريتي في الشعور بعدم الارتياح، قد يكون من الأفضل لك الابتعاد. الاستماع لنفسك : حاولي أن تستمعي لإحساسك الداخلي، لأنه في النهاية، أنت الوحيدة التي ستعيشين حياتك. إذا شعرت أنك بحاجة إلى مزيد من الدعم أو الإرشاد، فلا تترددي في استشارة مختص في العلاقات. أتمنى لك كل التوفيق والسلام الداخلي.
تم النشر الأربعاء، ٢٦ مارس ٢٠٢٥
صلى استخاره وشوفى ولكن والدتك ملهاش دخل انتى الى هتتزوجى ومش كل حاجه فلوس وعيشه مرتاحه وعشان حياتك ا بعد كده متبقاش عذاب
تم النشر الأربعاء، ٢٦ مارس ٢٠٢٥
وعليكم السلام ورحمه الله وبركاته خليكي ف البدايه مع ربنا قربي منه بعد كل صلاه اقعدي كدا بينك وبين ربنا احكي اللي مضايقك حاولي تكوني صريحه مع ربنا ف الكلام وادعي أن لو فيه الخير يكمل لو انتي قلبك ارتاح من بعد الدعوه اعرفي انها رساله من ربنا ومتسعجليش ع طريق ربنا حطك فيه ولو فيه الخير هيكمل ولو فيه الشر يصرفه عنك الفكره انك كل ماهتكوني قريبه من ربنا وتحصل حاجه حلوه أو وحشه قلبك بيحس لأن قريب من ربنا
تم النشر الأربعاء، ٢٦ مارس ٢٠٢٥
وأنك تكملي هو ال. هيدفع الثمن ولو سبتيه أنت ال. هتدفعي الثمن والدتك شايفه مصلحتك أكتر منك وعارفه إيه المناسب معاكِ وإيه ال. مش مناسب لأنها ببساطة فاهمة كل حاجة عنك وشايفه إن خطيبك هيصونك ويستحمل كل تصرفاتك وده ال. ممكن تكوني مش واخده بالك منه وفي النهاية هتدفعي الثمن لو كان قبول منك ورضا أو لو كان تمرد كل شيء هيكون بثمن
تم النشر الأربعاء، ٢٦ مارس ٢٠٢٥
بصي موضوع الرأي أو القرار في النهاية لازم يكون منك سواء بالقبول أو الرفض
تم النشر الأربعاء، ٢٦ مارس ٢٠٢٥
لعرض السؤال في فدني اضغط هنا