السلام عليكم هو دي مشكلتي انا بس ولا في ناس كده غيري انا من النوع اللي عيلتي لو انت ما جبتيش درجات يقعدوا ينتقدوني اللي هو ده احسن منك في ايه ده جايب درجات عنك ويقولوا لي احنا موفر لك احسن عيشه انا من معيش متوسطه لكن لما انا دخلت ثالثه اعدادي هنا بدا ظلم في الدرجات لان انا من دفعه كورونا فاتظلمت في درجه ثالثه اعدادي وكمان لما دخلت اولى ثانوي قلت مش هتظلم في الدرجات وظلمت الترم الاول و الترم الثاني وكمان كان عندي اكتئاب من تالته اعدادي بسبب درجاتي وزاد في اولى ثانوي ودلوقتي انا حاليا الترم الثاني في تانيه ثانوي وانا خايفه من درجاتي لانه انا خايفه حد ينتقدني لانه الترم الاول كان اول مره في حياتي اجيب ملحق في ماده وحرفيا ده وشمتوا فيا اهل ابويا وسلايف ماما ما بقيتش عارفه وخايفه ان انا اجيب نتيجه ما تعجبش ماما لانه انا لما برجع درجاتي في الامتحانات ساعات ما بقاش فاكره الاجابات او كده ببقى خايفه لاحسن انقص كثير رغم ان بلاقي كله معايا لما الامتحان بيبقى وحش او حلو او متوسط بيقولوا انه فعلا الامتحان كان وحش او ما عرفوش يا حلو او كده يعني اصحابي ان معايا بيقولوا بجد ولانه هم فعلا مش عارفهين بس وانا خايفه من نتيجه الترم الثاني لانه انا من كتر الاكتئاب انا كنت بذاكر بس ما بذاكرش كثير زي الاول من كتر الاكتئاب بقى دماغي بحسه ان بيقول اللي هو هتذاكر مش هتذاكر هتفضل نتيجتك واحده مش هتتغير وغيرت طرق مذاكره كثيره وحرفيا انا كنت بذاكر بس انا اكتئابي وحزني وان انا حرفيا ما بقاش عندي شغف زي انا اذاكر زي الاول حتى الترم الثاني بالنسبه لي انا خايفه من درجاتي جدا لانه انا مش عارفه انا خايفه ان انا اتوبخ من امي او ان انا حد يشمت فيا انا مش عارفه ده ايه ده بالظبط وهل انا لوحدي في الموضوع ده في ناس تانية معايا
بصي من الطبيعي جدًا تخافي من التيجة تخافي من اللوم..من المقارنة، تخافي من الشماتة..طبيعي جددًا بس اسمعي كلامي كإنسان عدي من كل المراحل دي هي عبارة واحدة: درجاتك مبتحددش انتي مين..مبتحددش قيمتك كإنسان، ولا قيمتك ف عيون الناس..ومش معني أن درجاتي نقصت ف انا نقصت ف عيون الناس، احنا بشر والأداء الدراسي دا بيتوقف ع حاجات كتير تعرفي أولها إيه؟ الراحة النفسية..ال انتي فقدتيها من زمن، من اول ما بدأوا يلوموكي ويقارنوكي..عارفة انتي محتاجة إيه، محتاجة تعرفي قيمة نفسك وانه انا مش عبارة عن درجة اولًا..ثانيًا ثقي في نفسك ثقي اني بعمل ال عليا في مذاكرتي وبدخل الإمتحان والباقي مش عليا..مهما الناس لامتك وشمتت فيك افتكري دا: انا مش درجتي..الدرجة مش هتحدد الناس هيبصولي ازاي، ولو بتحدد يبقا الناس دوا أغبيا مش انا "مدام عملت ال عليا طبعًا" ومتتحامليش وتضغطي ع نفسك اوي كدا..انا شوفت ناس جالها مشاكل نفسية صعبة بسبب الدرجات، درجات إيه ال تبوظ حياة إنسان..أهم حاجة هي انتي ونفسيتك ال مش هتتعوض يا قمرر❤️❤️
تم النشر الأربعاء، ٢٢ مايو ٢٠٢٤
انتي رقم واحد ف حياتك ولا بالمقارنة ولا بالاحسن اعملي الي عليكي وتخيلي نفسك ف أعلى مكان واسعى وإن ليس للإنسانِ إلا ما سعى هتسعى لكذا وتعملي كل اللي مطلوب هتخديه 1+1=2 ماتضغطيش نفسك بكلام حد ولا تزعلي واعملي لنفسك كورنر خاص بيكي مايتأثرش بأي حاجه ف الدنيا ومع الوقت هتفهمي كلامي
تم النشر الخميس، ٢٣ مايو ٢٠٢٤
بصي أنا فضلت ف الموضوع ده لغايه 3 ثانوي كل سنه احاول ارضيهم وابقى أحسن من اللي بيقارنوا بيني وبينهم دول وماعرفتش بس كنت بكمل واحاول ، تالته ثانوي كانت حرب بالنسبه ليا وسويت فيها اللي ربنا يعلمه وبرضو جبت نفس مجموعي اللي متعوده عليه رغم المجهود كان أكبر بكتتتير بس ربنا كاتب كده دخلت كليه ولا بحبها ولا عمري تخيلت نفسي فيها ، عايزه اقولك اني يعني حققت نفسي فيها وعوضت وبتاع وبقيت واو آه ياستي عوضت فعلا وبقيت 2 ع الدفعه عمري ف حياتي معرفتش احساس الترتيب ع الدفعه ولا كنت اتخيله بس ربك لما يعوض طب ايه الفايده الفايدة انك تراني ربك ثم نفسك بعد كده كل حاجه هينه انتي رقم واحد ف حياتك ولا بالمقارنة ولا بالاحسن اعملي الي عليكي وتخيلي نفسك ف أعلى مكان واسعى وإن ليس للإنسانِ إلا ما سعى هتسعى لكذا وتعملي كل اللي مطلوب هتخديه 1+1=2 ماتضغطيش نفسك بكلام حد ولا تزعلي واعملي لنفسك كورنر خاص بيكي مايتأثرش بأي حاجه ف الدنيا ومع الوقت هتفهمي كلامي
تم النشر الخميس، ٢٣ مايو ٢٠٢٤
طبيعى انك تقلقى او تخافى وانتى منتظرة نتيجة امتحان وده بيحصل مع اغلب الطلبه انتى خوفك وقلقك اكبر من كده لانه مرتبط بانتقاد الاخرين ووجعك من كلامهم و تانيبهم
تم النشر الأربعاء، ٢٢ مايو ٢٠٢٤
مرحبًا! أنا ذكية هنا لمساعدتك. اولاً، أنا أسفة جداً إنك تمري بتجربة كده بخصوص الدرجات والانتقادات، بس عشان عيلتك تنتقدك علشان الدرجات مبيبقاش دليل إنك غير كويسة. النجاح والقدرات مش بتتقاس بالدرجات بس. عندك مواهب وقدرات تانية ممكن تتفرد فيها. وصحيح ان الظروف الحالية ممكن تكون صعبة وزيادة الضغط على الدراسة، بس لازم تحافظي على صحتك النفسية. ابدأي تطبيق تقنيات التأمل والاسترخاء وممكن تساعدك تقنيات التخلص من الضغط. واعتقدي في نفسك وحاولي تعيدي تشجيع نفسك وتقولي لنفسك إنك تستحقي النجاح. ودوري على دعم صحابك وأهلك اللي بيقدروك وبيشجعوك. وبالنسبة للإكتئاب، ممكن تفكري في التحدث لمرشد مدرسي أو لوري دكتور نفسي لمساعدتك في تقدير الوضع والتعامل معاه بشكل أفضل. انتي مش وحدك في هذه التجربة وهناك الكثيرين محتاجين دعم ومساعدة. كلنا في برنامجك وفرصك للإرتقاء بنفسك. إسأليني دايما إذا احتجتي حاجة.
تم النشر الثلاثاء، ٢١ مايو ٢٠٢٤
لعرض السؤال في فدني اضغط هنا