تغيرت فجأة للأسوأ وانقلبت حياتي للنقيض ولا أستطيع فعل شيء لأتغير، كيف أعود كما كنت؟

Question

السلام عليكم انا مكنتش بسيب فرض نهائي و لا قراءة القرآن و كنت بعمل ورد كتير لدرجة كنت مخصصه ختمه معينه لما بركب المواصلات و ختمه معينه ف شغلي و ختمه ف البيت كنت منوعه جدا و الراحه اللي كنت فيها متتوصفش... و شفت الرسول عليه افضل الصلاه والسلام مرتين ف المنام و كنت بحلم بالكعبه ودايما مقتنعه ان ربنا بيرد عليا لما بسأله و كنت بحب اكلم ربنا جدا ف قيام الليل و مفيش حاجه طلبتها من ربنا الا و كان مستجيب لكل دعواتي ولو محصلش كان بيعوضني بالاحسن نيجي من حوالي سنه وشويه كل ده اتقلب رأس ع عقب مبقيتش بصلي نهائيا ولا حتى بحس بالذنب واحيانا بتضايق اني مش ندمانه حتي بقيت اضحك ع نفسي بإن مش عندي وقت بطلت كل حاجه بترضي الله عز وجل و كتير اللي لاحظ تغيري ولما سألت قالولي، حسد واللي قالي اكتئاب واللي قالي مس وبصراحه انا بقيت مش حباني كده حتى اصاحبي بطلت اكلمهم ولا اسال ولا حتي بيوحشوني بقيت مش بحتاج غير اوضتي وسريري ومتحركش حتي فوني بقيت بتخنق منه افيدوني بالله ومحدش ينصحني واللي هو لازم تصلي انا عارفه الكبائر وعارفه كل ده بس انا فعليا مش قادره

Accepted Answer

خلينا نقول و نحلل مشكلتنا الاول.. المشكلة اللي بتواجهك دلوقتي هي تحول كبير في حالتك الروحية والنفسية، من شخص كان ملتزم بالصلاة والعبادات وبيحس بقرب من ربنا، لشخص حاسس ببُعد تام عن كل ده، ومعاه إحساس بالذنب والتخبط.. كمان عندك عزلة اجتماعية، وناس كتير لاحظت التغيير اللي حصل ليك، لكن الأسباب اللي قالوها مختلفة (حسد، اكتئاب، مس)، وأنتي نفسك مش قادرة تحددي السبب الحقيقي.. تحليل المشكلة: التغير المفاجئ.. كنتي في حالة روحية عالية، وبعدها حصل انقلاب تام في حياتك، وده ممكن يكون بسبب عوامل نفسية، أو ضغوط خارجية، أو حتى فتور طبيعي. الشعور بالذنب والضيق.. احساسك إنك مش قادرة ترجعي لحالتك السابقة بيزود عندك الضغط النفسي، لأنك دايما بتقارني بين حالك دلوقتي وحالك قبل كده. العزلة وعدم التواصل.. بقيتي مش قادرة تتفاعلي مع اللي حواليكي، لا أصحابك ولا حتى نفسك، وده ممكن يكون علامة على اكتئاب أو إحباط شديد... الخمول واللامبالاة.. حتى لما حد بيكلمك أو بيسألك، بتحسي انك مش مهتمة أو مخنوقة، وده ممكن يكون مرتبط بعدم وجود دافع جواكي يحركك.. التفسيرات المختلفة..ناس قالت حسد، ناس قالت مس، والبعض قال اكتئاب، لكن الأهم إنك تحاولي تفهمي نفسك وتحدد السبب الحقيقي علشان تقدري تتعاملي معاه... إيه الحل؟ محتاجة تعرفي إن اللي بتمري بيه طبيعي ومش نهاية العالم، فيه ناس كتير بيحصلهم فترات فتور وبُعد عن العبادات، لكن الأهم هو إزاي تتعاملي مع ده وترجعي واحدة واحدة... محتاجة تفهمى حالتك الاول... قبل أي حاجة، لازم تحددي إذا كنتي بتمري بفتور ديني عادي ولا اكتئاب محتاج تدخل نفسي.. لو فتور ديني.. هتلاقي نفسك مش قادرة تصلي، لكن عندك إحساس بالذنب وعايزة ترجعي.. لو اكتئاب.. هتلاقي نفسك فقدتي الرغبة في كل حاجة، حتى الحاجات الدنيوية اللي كنتي بتحبيها، وكأنك مش حاسة بأي مشاعر.. لو حسد أو مس.. هتحسي بأعراض زي صداع شديد بدون سبب، أحلام مزعجة متكررة، كسل وخمول غير طبيعي، نفور من العبادات بدون أي سبب منطقي... لو شاكة إنه اكتئاب، الأفضل تستشيري طبيب نفسي، ولو شاكة إنه حسد أو مس، اقرأي الرقية الشرعية واسمعي سورة البقرة يوميا والاذكار.. رجعي علاقتك بربنا تدريجيا.. مش لازم ترجعي للحالة الروحية العالية مرة واحدة، المهم تبدأ بخطوات صغيرة.. صلي ركعة واحدة بس قبل النوم، حتى لو مش قادرة تكملي الصلاة كلها... اسمعي قرآن حتى لو مش بتقرأي، المهم يكون فيه ذكر لله في يومك.. استغفري بأي عدد حتى لو 10 مرات بس في اليوم..قليل مع الاستمرارية احسن من كتير متقطع.. كسر العزلة والروتين.. غصب عنك، حاولي تخرجي من البيت حتى لو لمشوار صغير.. قابلي أصحابك، حتى لو مش حاسة إنك عايزة، لأن العزلة بتزيد المشكلة..اعملي نشاط جديد، حاجة بسيطة زي المشي أو رياضة.. عافرى مع نفسك لان دا العلاج... غيري طريقتك في التفكير.. بلاش تضغطي على نفسك وتقارني وضعك دلوقتي بوضعك زمان... ركزي على التحسن البسيط بدل ما تفكري إنك لازم ترجعي زي الأول مرة واحدة.. أي تحسن بسيط، حتى لو قدرتي تصلي ركعتين، هو إنجاز، شجعي نفسك عليه... استعيني بشخص قريب منك.. اختاري شخص مقرب تحكي له اللي بتمري بيه، يكون شخص حكيم بيسمعك بجد.. لو معندكيش حد، ممكن تكتبي مشاعرك في ورقة كل يوم، ده بيساعدك تفهمي نفسك أكتر.. اتأكدي إن عندك سبب تعيشي عشانه...لما الإنسان بيفقد هدفه في الحياة، بيحس بالخمول واليأس... فكري في حاجة كنتي بتحبيها أو هدف نفسك تحققيه، وابدأ تشتغلي عليه خطوة خطوة.. الأهم من كل ده، إنك تصبري على نفسك، وترجعي لربنا واحدة واحدة، متضغطيش على نفسك، وربنا رحيم وهيعينك.. حاجة اخيرة.. احيانا مع علو الهمة وزيادة الايمان اوى..بيحصل تأثير عكسي.. الواحد بيحس انة عمل كل حاجة علية وانة قريب اوى وبيتغر وساعات بيحس انة احسن من غيرة.. وهنا بتكون بداية الانحدار.. وفى احيان تانية مابيكنش القرب دا مبنى على اساس صلب بيكون حسب مانفسك تكون حابة.. نفسك حابة تقرب فبتقرب اوى ولما تحب تبعد بتبعد اوى لكن مافيش قواعد اساسها الانضباط تحيدك وتخليكى ترجعى للصح حتى وانتى بعيده.. وحاجة كمان لازم تحذرى وتحطيها ف حسابك حرفيا مدمرة.. خلى بالك من ذنوب الخلوات.. حتى لو انتى مش حاسة الاسباب در بتكون السبب لما ندقق اوى ف مشكلتنا.. وربنا يقويكى ويهديكى ويهدينا..

Answer

وعليكم السلام ورحمه الله وبركاته. اولا انا هقول لك انه في اجابه لاستاذ عبد الرحمن. هو يعني ما سابش نقطه الا واتكلم فيها ووضحها فيا ريت اجابته كويس جدا جدا. خليني انا اكلمك في نقطه محدده. اذا كان كان في جواكي في وقت ما انت ملتزمه وبتعملي كل الكلام ده اذا كان كان في جواكي حته ولو صغيره ولو واحد في الميه حاجه نفسك فيها وقاعده مستنياها بتقولي قد ما انا هكون ملتزمه كده ربنا هيديني الحاجات دي حتى ولو بعد فتره الحاجه دي لسه ما جاتلكيش لسه ربنا ما رزقكيش الحاجه دي. وشوفتي الحاجه دي عند حد. وجه الشيطان استغل اللحظه دي اللي انت بتشتقي فيها للحاجه اللي انت نفسك فيها وشفتيها عند حد. فهنا في احتمال ان هي تكون دي النقطه اللي قلبت الوضع راسا على عقب.

Answer

الشيطان دخل في دماغك انك بتصلي وتقري قران ومش بتسيبي فرض، وخلاكي انك مثلا بدل ما كل ما تروحي مكان تقرأي جزء، خلاكي متقرأيش ابدا الا في الصلاة، شويه شويه خلاكي متصليش قيام الليل شويه شويه خلاكي متصليش الفجر، بيقعد يقلك انتي بتصلي وتعملي وتعملي ودا مش بيصلي ولا يقرأ قران، لحد ما وصلتي لحالتك دي، وابدئي من جديد، وحسني علاقتك بربنا، وان شاء لله هتبقي أحسن من الاول، ممكن اكون صغيره علي كلامي لاني عمري 14 سنه، بس جربي وان شاء الله هتبقي افضل من الاول

تغيرت فجأة للأسوأ وانقلبت حياتي للنقيض ولا أستطيع فعل شيء لأتغير، كيف أعود كما كنت؟

نفسية

دينية

اجتماعية

سؤال من احد أعضاء فدني

تم النشر الأربعاء، ٥ فبراير ٢٠٢٥

5 إجابة

9 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك