انا عندي ١٦ سنه واول ما اتولدت وانا طالعه شخصيتي حلوه وعالقه وكانت كل حاجه فيا حلوه وكان عندي حلم اني اطلع مهندسة ديكور وانا صغيرة كان كلوا بيقولي يبشمهندسه وكانت كل حاجه حرفياً فيا بيرفيكت وكانت الناس بتحسسني اني مميزه جدا وكان عندي شغف للحياة لحد ما بقيت في تالته اعدادي ومسكت موبايل شخصيتي اتحولت حرفياً نسيت دراستي اللي كان لازم اهتم فيها لان الناس كانت مستينه اشوف هجيب كام لأن اخواتي كانوا ممتازين وبيطلعوا من الأوائل ومفروض ابقاا زيهم ومشيت مع واحده مش شبهي في تربيتي وعملتني حاجات كتير غلط و حرفيا بقت شخصيتي وحشه جدا وبقيت اهتم لكلام الناس ومبقاش عندي ثقه فنفسي خالص اي حد بيقولي كلمه ضايقتني اقعد بعيط بالساعات وبقيت كئيبه جدا وشكلي كئيب بعد ما كان كلوا بيقولي اني شكلي مبهج بقت شخصيتي مقرفه جدا بجد وزمان لما كان حد بيكلمني بطريقه وحشه وكنت بعرف ارد عليه كويس اوي ودلوقتي حرفيا الناس بتعقد تهزق فياا وانا ساكته مش عارفه ارد حسه ان مبقاش عندي كرامه وكنت بعرف اركز في الدروس واركز في حياتي دلوقتي مش عارفه اركز خالص دماغي طول الوقت شاغله تفكير وصداع وكل الناس واخده عني فكره اني مش مهتمه للدراسه لاني بقعد في الدروس مش مركزه خالص انا بجد مش مصدقه ان انا بقيت كده مش قادرة اسامح نفسي اللي عملته فياا مش مصدقه اني بقاا يتقال عليا فاشله بعد ما كان كلوا بيقول عليا ممتازه كل ما بفكتر كده بنهار بحس ان في سكاكين في قلبي وكان زمان كله بيقول عليا محبوبه وليا صحاب بيحبوني دلوقتي بقيت منبوذه ولا حد يعرفني ولا اعرف حد وبقيت بهين نفسي قدام الناس وهفضل اقلل من نفسي بقيت كل ما بمشي مع حد ابرر له اني مكنتش كده وان دي مش شخصيتي وبقيت خايفه طول الوقت المشكله ان ده كله باين عليا الناس او ما بتتكلم معايا بتقولي خلي عندك ثقه في نفسك بجد والمدرسين في الفصل في المدرسه بيفضلوا يقولولي اذاكر عشان اطلع زي اخواتي قدام العيال والموضوع ده بيأذيني جدا ودلوقتي داخله تالته ثانوي وانا مينفعش ادخل علمي رياضه ولا احقق حلمي عشان نسيت الرياضه خالص ومبقتش نافعه فيها خالص بس بجد مريت بحاجات وحشه السنتين دول ومش عارفه اتخطي اي حاجه صعبان عليا نفسي اوي علي اللي حصل فيها وفي نفس الوقت كارها لانها عندها كل حاجه تقدر تخلي حياتها حلوه وحسه اني ظلمت نفسي اوي بجد ومش قادرة اسامح نفسي وانا داخله تالته ثانوي دلوقتي والحاجه اللي تقدر تخليني انسي كل ده اني هبقي دكتورة زي اخواتي بس انا خايفه ان ده ميحصلش وهفضل طول عمري كده
على فكرة من يوم ما دخلت البرنامج دا من كام شهر و انا لاحظت ملاحظة غريبة جدا إن كل المشاكل اللى هنا اغلبها من بنات من سن 14 سنة ل 18 سنة عايشين حالات ضياع بعد التفوق او حالات عنف أسرى و عدم راحة فى البيت بس قصتك دى ينطبق عليها حل واحد بس انك اتحسدتى و العين صابتك ورشقت فيكى و بدلت حالك من احسن واحدة متألقة وفخورة بنفسها لأوحش وحدة منزوية و قرفانة من نفسها و الحالة مبتجيش فعلا غير من الحسد وعشان ترجعى تانى يبقى لازم تشيلى النظرة اللى رشقت فيكى دى وتخرجيها منك و عشان تخرجيها لازم تستحمى و تجيبى الرقية الشرعية للحسد وموجودة على النت وتحطى الهيدفون فى ودانك وتغمضى و تسمعيها و متجيبيش رقية طويلة هاتى اى رقية لأى شيخ بتحبيه متزيدش عن نص ساعة و أول ما هتسمعيها هتقعدى تدمعى كتير كتير كتير و تاوبى كتير كتير لحد بوقك ما يوجعك من المتاوبة و تزهقى بس اوعى تشيلى الهاند فرى من ودانك وتقومى لكن اسمعيها وكرريها لحد ما نفسك ترتاح و كرريها كل يوم و هاتى ازازة مية معدنية لتر ونص و افتحيها و حطى بوقك عندها كأنك هتشربى منها و هية على مكتب و هاتى الرقية بتاعة الحسد مكتوبة من ع النت هتلاقى فيها ايات اقرييها وانتى مقربة بوقك من الازازة عشان نفسك وصوتك يبقى فى المية و و اشربى منها بعد ما تخلصى و رشى شعرك و امسحى صدرك منها و شيلى الباقى و اعملى كدة 3 ايام ورا بعض و اوعى ترمى الباقى منها فى الحوض او الحمام لأنها بقى فيها قرآن و هتحسى بروقان و امنعى بقى صحبة السوء و اللى علموكى الغلط و ابعدى عنهم و ارجعى البنت الأمورة الحلو العسل اللى كله بيحبها و صدقينى هتتغيرى و هتبقى زى الفل و ربنا هيعينك طالما اعتمدتى عليه و قلتى يارب زيل همى و ريح بالى و اشرح صدرى و ارجعى بعد ما تنفذى قوليلى حالك بقى ايه و فرحينى
تم النشر الثلاثاء، ٧ مايو ٢٠٢٤
أولا الجيء لله وحده ... هو هيعينك .... ثانياً ابعدي كل البعد عن أي حاجة تزعل ربنا منك أو أي حاجة بتاذيكي ..... ثالثاً صلي كتير وادعي كتير واقري قرآن وخلي ليكي ورد على الأقل صفحة وخلي وقت لنفسك شوية ...... من غير أي حد أو حاجة سواء أشخاص أو تليفون .... مش معنى كده تعزلي نفسك طول الوقت .... بس خلي لنفسك وقت مع نفسك تدعي وتعرفي نفسك صح ...
تم النشر الخميس، ٩ مايو ٢٠٢٤
وبالنسبة للموبايل قللي من التصفح فيه خليه للضرورة فقط عشان تركزي في حياتك ومستقبلك
تم النشر الثلاثاء، ٧ مايو ٢٠٢٤
انتي لسه صغيره ممكن تكوني خسرتي جولة لكن الماتش لسه شغال مخلصش ارجعي تاني زي الاول واحسن حبي نفسك وحبي دراستك وصحبتك دي اقطعي علاقتك بيها نهائي وخليكي واثقة في نفسك انك هتقدري ترجعي حياتك زي الاول بيرفكت واحسن تاني انتي لسه صغيره والحياة قدامك طويلة وجميلة ان شاء الله بالتوفيق يا باشمهندسة أو دكتوره اللتنين لايقين عليكي 🌹
تم النشر الثلاثاء، ٧ مايو ٢٠٢٤
لعرض السؤال في فدني اضغط هنا