أفكر في الانتحار .. أكره نفسي لاني خذلت نفسي بنفسي ولا أستطيع أوفي بالوعد الذي قطعته ..!

Question

ممكن تعتبروها فضفضه لاني تعباان فكلامي ممكن يكون مش مترتب... كل الي كان نفسي فيه اني اكون ناجح، ناجح فكل شىء معرفش لي وازاي بس دايما بشوف الي حواليا ناجحين فحاجات مختلفة الي ناجح دراسيا والي ناجح اجتماعيا، رياضيا، فكريا، ابداعيا، كارزمه وبيعرف يتعامل مع الناس، عنده ستايل، وغيره انا الوحيد المنبوذ الي مش فالح فحاجة ولا بعرف اعمل اي حاجة اكاد اكون اشبه للبهائم باكل وبشرب وبنام حتي الالعاب الالكترونيه فاشل فيها، دخلت تالته ثانوي وكلي نشاط وجد ان السنادي هبطل العادات السيئة وهاكل الكتب اكل وهحل و و و بس كل ده طلع كلام ومعملتش اي حاجة كل يوم كنت بقول هصحي بدري علي الفجر وادح كل يوم بقول بكره بكره، انهاردة هظبط معاد نومي وبكره جاب بعده جاب ٧ شهور، ٧ شهور؟! اه والله ٧ مفقتش فيهم ولا عارف هما عدو كدا ازاي ده امبارح انا كنت لسه بادئ دروس، مش متخيل نفسي وانا الوحيد وسط اصحابي ال٣ الي جايب مجموع في الارض كلهم بيذاكروا ما شاء الله وبيطلعوا من اوائل وانا مصاحبهم من ٥ سنين كل يوم مستواي بينحدر، انا مش غيران منهم بالعكس انا بدعي لهم دايما انهم يجيبوا مجاميع عالية ويدخلوا الكلية الي نفسهم فيها من كل قلبي انا بس زعلان علي حالي زعلاني انهم بدأوا يبعدو عني زعلان علشان شكلي وحش وسطهم .. مكدبش عليكوا انا تعبت من نفسي لا عارف اصلحها ولا عارف اربيها لا عارف ابطل ذنوب ولا عارف استقيم علشان كدا بفكر في الانت٪حار، عارف انه حرام وانه كبيرة بس انا كدا كدا خسران، عمري مكسبت، انا الي زي عايش لي اصلا؟! انا شخص سيئا جدا وفاشل ومليش اي فايدة او لازمة لا وسط الناس ولا وسط زمايلي

Accepted Answer

ازيك عامل ايه ؟ هأفضفض معاك زى انت ما بتفضفض كدة زمان اوى و انا فى سنك فى ثانوية عامة كنا برضه زمايل زيكم كدة و كان كل واحد حاطط فى دماغه انه يدخل علمى عشان يبقى دكتور و التانى رياضة عشان يبقى مهندس و كان كله تحت الاتنين دول ما يسواش حاجة فى المجتمع و كان فينا اللى بيذاكر و فينا اللى بيلعب شوية و يذاكر شوية و دخلنا الامتحان لكن الامتحان ايامنا كان دح كتابة 3 ساعات و مكنش زى النهاردة كدة اختيار من متعدد و يكفى انك تقرا المعلومة مرة و اتنين وتلاتة عشان مخك يمر عليها بس و يعرف ان دى الصح لكن مش مطلوب حفظ الكتاب من الورقة للورقة ودا يسهل عليك انك تقرا ودايما عشان قدامك مادة علمية يبقى اللى كتب الكتاب عمله زى البيت له باب ومفتاح و غرف و سطوح و مينفعش تدخل بيت من الشباك او تنط من ع السطوح لكن لازم تدخل من الباب و يكون معاك خريطة لتصميم البيت عشان متدخلش تتوه فيه و مفتاح اى كتاب هو المقدمة اللى فى اول الكتاب بتوع الصفحتين اللى فى أوله اللى عليهم توقيع المؤلف و خريطة الكتاب هية الفهرس اللى بيعرفنا جواه ايه و لما تطلع كلية ان شاء الله هتكتشف ان كتب الثانوية الصغيرة دى كانت هايفة جمب مراجع وكتب الكليات و بعد ما طلعت الكلية اكتشفت ان الكتاب عندنا كان الف صفحة فتخيل انت ان عندك مادة الكتب فيها من 800 ل الف فكنت اهرب من رهبة الكتاب بايه ؟ اقرا المقدمة عشان اشوف الكاتب عاوز ايه من المادة دى و بعدين ارجع للفهرس و اقرا الموضوعات و لما الاقى موضوع شدنى فيه وعاوز اعرف بيتكلم عن ايه وازاى اروح جايب رقم الصفحة بتاعته و داخل قاريه و عشان المعلومة اللى فيه كان عندى فضول اعرفها فلما قريتها مرة ثبتت فى دماغى خلاص وموضوع ورا موضوع بقى الكتاب قدامى زى البلد اللى بقيت عارف اغلب شوراعها يعنى لو مشيت فيها مش هأتوه زى كدة ما تروح تصيف فى اسكندرية او شرم او اى حتة وبتنزلها لأول مرة و تبدأ كل يوم تنزل فيها شارع او منطقة تتمشى يبقى تانى مرة لما تروحها هيبقى عندك فكرة عنها وتمشى فيها لوحدك يقوم لو حد قابلك و سألك على شارع فيها هتقوله تطلع يمين فى شمال علطول هتلاقيه و انت مش من سكانها و لا عايش فيها اهو بالظبط الكتاب فى ايدك كدة لا تلتزم بترتيب ولا يدروس فاتت و لا بحاجة غير انك عاوز تعرف المعلومة بس وتركنها جوة دماغك و اللى تلاقيه غامض عليك افتح يوتيوب و اكتب اسم الدرس هتلاقى خمسين شرح له يفهمك اوله من آخره و نسيت أقولك اننا بعد ما خلصنا ثانوية فينا اللى دخل كلية تربية وفينا اداب وفينا حقوق وفينا طب و فينا اعلام و هندسة ومعهد كلنا خلصنا بس اتقابلنا فى الحياة ومفيش حد احسن من حد الا بشغله و حب الناس له بتعامله الحلو معاهم فى شغله و انا باحتاج لدا و التانى بيحتاجلى و غيرى بيحتاجله لان كل المهن بتكمل بعضها فى مجتمع واحد فانت بس قول يارب و اتوضى كدة و متضيعش وقتك بين التنطيط فى الدروس وانت عندك اليوتيوب فيه شرح كل حاجة وهتقدر توقف الدرس وتعيده او تجيب شرح لمدرس تانى وتالت ودايما خلى على لسانك لا حول و لا قوة الا بالله اللهم صل وسلم و بارك على سيدنا محمد و هتفرج و ايام و هتمر و هتفتكرها و تضحك لان دايما النجاح مش بييجى الا بعد مطبات كتير فدوس بنزين وعدى المطب دا يابطل و انطلق

Answer

طيب انت هل كنت عايز تبقى ناجح علشان اللي حواليك ناجحين؟ ولا انت عايز تكون ناجح علشان فعلا انت عايز ده؟ لان فيه مشكلة انا شوفتها ف كلامك .. انك بتقارن نفسك باللي حواليك .. طيب ليه انت معيش نفسك في كل ده؟ انت لو عايز تبقى ناجح ، حدد اولا انت عايز تبقى ناجح في ايه؟ وليه؟ مش مهم تبقى شبه حد .. كون نفسك انت . ومش مهم اللي فات وضاع منك .. المهم اللي جاي، مهما كان الوقت المتبقى حتى لو كان شهر ، اعمل اللي عليك فيه، مفيش قدامك حل تاني تقدر تعمله غير كده. ربنا يوفقك

Answer

لو عندك اب وام واخوات. بيحبوك. ومحافظ علي علاقتك بربنا ومش تعبان وصحتك زي الفل صدقني انت كده مش. محتاج حاجة الباقي سيبه علي ربنا وحاول مرة واتنين وبراحة علي نفسك عشان انت عايش في نعمة كبيرة اوي حس بيها عشان انا اعرف ناس بيطلعوا اوائل بس اهلم معقدنهم في حياتهم وناس نفسهم بس اهلهم يهتموا بيهم ومامتك دي احضنها واسجد لربنا واشكره دي نعمة كبير. حاسس نفسك مش نافع في حاجة لاء ربنا ماخلقناش عبثا اعمل اقل حاجة اضحك في وش الناس وقول كلمةحلوة لاى حد وساعد اي حد محتاج اي حاجة وده كفاية جدا ومحدش شكله وحش وافتكر ان ربنا الرحيم قال لقد خلقنا الانسان في احسن تقويم عارف مين ال شكله وحش الشخص الضعيف وال مش واثق في نفسه عارف يعني ايه الثقه في النفس يعني عارف ومتقبل انه بيغلط وانه مش كامل وصفة الكمال ل ربنا سبحانه وتعالي وعارف امته بعترف بالغط وبيصلحه

أفكر في الانتحار .. أكره نفسي لاني خذلت نفسي بنفسي ولا أستطيع أوفي بالوعد الذي قطعته ..!

نفسية

اجتماعية

تعليمية

اكتئاب

خوف

امتحانات

سؤال من احد أعضاء فدني

تم النشر الأربعاء، ٦ مارس ٢٠٢٤

5 إجابة

50 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك