السلام عليكم ورحمة الله وبركاته
انا علطول ببقى خايفة على اخواتي لما حد منهم بيسافر او حتى لما بيخرج برا ببقى قلقانة اوي وخايفة عليهم وشيطاني بيجبلي مية حكاية وحكاية لحد ما ياجوا بالسلامة وبطمن عليهم مع العلم اني مش الاخت الاكبر انا قبل اصغر واحدة
وكمان انا بتعلق بسرعة لدرجة اني ممكن ازعل اوي واقعد كدا فترة على قلم بحبه خلص او ضاع او استيكة ضاعت مني او اي حاجة تانية معايا ليها ذكرى
وللأسف انا بريط سعادتي بأشخاص معينة وحاولت إني أخلص نفسي من كدا بس ماقدرتش
الموضوع دا بيسببلي اني ممكن أفضل مستمرة مع ناس لمجرد اني خايفة بس من الشعور والوجع اللي هحس بيه لو بعدت عنهم حتى لو بيأذوني
مش عارفة دا بالنسبة لناس حاجة كويسة ولا لا
بس اللي أعرفه إني بتعب من الشعور دا ومن المجاهدة عشان ابقى احسن
وعليكم السلام ورحمه الله وبركاته كنت زيك جدا جدا وهو فعلا امر متعب جدا ومرهق نفسيا بشكل صعب ولكن هو له قسمين قسم بال نسبه لتعلقك بالاشخاص وقسم لتعلقك بالحاجات الماديه البسيطه وانا كنت زيك في القسمين بالنسبه للقسم بتاع الحاجات الماديه ربنا خلصني منه بفضله تعالى لما مرة جيت اخد كوبايه راحت وقعت مني واتكسرت فزعلت عليها اتصلت بامي وكنت متضايقه جدا راحت قالتلي مفيش حاجه يتزعل عليها غير عمر البني ادم وسبحان الله رغم انها كانت بتقول كل الكلمه دي كتير الا انها في المرة دي تحديدا غيرت شئ جوايا وخلتني مبصش على اي حاجه ماديه تقع او تضيع او تنتهي وحصل جوايا احساس انه خلاص عمر الحاجه دي خلص والعمر ال يتزعل عليه هو عمر البني ادم الحمد لله كل احبابك بخير ال يضيع يتعوض وحاجه تانيه كمان ان الحاجه ال مش بتكمل معاك بتكون مش رزقك كان بابا الله يرحمه دايما يقول ليس للانسان من رزقه الا ما اكل فأفنى وما لبس فأبلى وما تصدق فأبقى وكانت بنتي وهي صغيرة عندها لبس بس مكنتش ترضى تلبس معظمه وكانت تعلق على كقمين بس هم ال بيعجبوها وترضى بيهم مهما احاول معاهم فكنت افتكر الجمله دي ان فعلا رزقها فال هي بتلبسه الباقي ده مش من رزقها وسبحان الله لما صغر عليها اديتهم لحد اصغر منها وكانت بتلبسهم فده رزقها مرة كمان واحد كان قاعد مع اهله وبيفطروا وكانوا عاملين بيض مسلوق فاكل نص البيضه ومات ولما راحوا غسلوه ودفنوه ورجعوا بصوا لقيوا نص البيضه التاني على السفرة فبقي بابا الله يرحمه يقول رزقه كان نص البيضه بس النص التاني مش بتاعه فمشي وسابه وكان دايما بابا الله يرحمه يقول لي النعم في حياة البني ادم نوعين اما هي هتمشي وتسيبك او انت هتمشي وتسيبيها فدايما اشكري ربنا عالنعمه الموجوده واساليه الرضا والبركه وحسن الاستمتاع بالنعمه فاي حاجه ماديه تخلص ادعي ربنا يرزقك بالافضل منها واحمدي ربنا ومتزعليش عليها بالنسبه بقى للاشخاص وده المهم اولا الشيطان بيستغل الشحص ال زي كده ويلعب على الحته دي جامد اوي ويسبب له سوء ظن بالله سبحانه وتعالى ويسبب له الحزن الشديد بصي الاية دي ( انما النجوى من الشيطان ليحزن الذين امنوا وليس بضارهم شيئا الا باذن الله) شايفه النجوى ال هي حديث النفس من مين ؟ من الشيطان ليه؟ ليحزن الذين امنوا وليس بضارهم شيئا الا باذن الله كنت كتير جدا بسبب اني متزوجه بعيد عن اهلي اتخيل ان جالي تليفون بيقول ان بابا الله يرحمه مات واقعد ابكي واحزن واتنكد مع نفسي واكلمه عادي وتاني يوم ارجع اتخيل تاني واحزن تاني لغاية ما كذا مرة قرات الجمله دي ( لا تتوقعوا البلاء قبل حدوثه فالبلاء اذا نزل نزل معه لطف الله وسكينة تحمل المصيبه اما البلاء اذا توقعتيه نزل معه وسوسة الشيطان وحزن النفس وسوء الظن بالله سبحانه وتعالى ) سبحان الله قرات البوست كذا مرة وكان بيظهر قدامي كل فترة ودي حقيقه لما مات بابا الله يرحمه ربنا انزل عليا سكينه ورضا بفضله وكرمه والله دي حاجه الحاجه التانيه اني كنت بسمع عن فضل اذكار معينه لازم لما تقوليها تقوليها بيقين في فضلها وثوابها زي من قال ( حسبي الله لا اله الا هو عليه توكلت وهو رب العرش العظيم) سبع مرات في الصباح والمساء كفاه الله ما اهمه من امر الدنيا والاخرة من قال ( بسم الله الذي لا يضر مع اسمه شيء في الارض ولا في السماء وهو السميع العليم) ٣ مرات في الصباح والمساء لا يضره شئ وغيرها اذكار كتير لها فضل كبير بقيت لما ربنا سبحانه وتعالى يمن علي واقولهم في الصبح ويجي الشيطان يوسوس لي باي شئ افتكر اني قلت ده اذن ربنا هيكفيني هم قلقي على اخواتي اذن ربنا لن يجعل الضر يمسني زي بالضبط يقين الصحابي ال قالوله بيتك اتحرق قال لهم والله ما احترق قالوله لا احترق احنا كنا عنده قال لهم والله ما احترق فلما راحوا يشوفوه لقيوا ان فعلا بيته ما اتخرقش وان ال اتخرق هو البيت ال جنبه فسالوه انت ازاي كنت واثق كده من غير ما تشوف حاجه قال كنت قايل الدعاء الصبح وال يقوله لا يصيبه مكروه ابدا والدعاء هو ( اللهم انت ربي لا اله الا انت عليك توكلت وانت رب العرش العظيم ما شاء الله كان وما لم يشا لم يكن ولا حول ولا قوه الا بالله العلي العظيم اعلم ان الله على كل شئ قدير وان الله قد احاط بكل شئ علما اللهم اني اعوذ بك من شر نفسي ومن شر كل دابه انت اخذ بناصيتها ان ربي على صراط مستقيم) احسني التوكل على الله والتسليم لامر الله واستعيذي بالله من الشيطان كثير جدا وربنا يحفظك ويبارك لك في اهلك
تم النشر الخميس، ٢٣ فبراير ٢٠٢٣
دي فطره طيبه انك اصيله وباقيه ولكن لو زادت عن المطلوب جهد ملوش لازمه علاجه فمصطلح اسمه الاستغناء يعني قلبي محفوظ ومتحصن من اي فقد إلا الذنب فقط ال يصيبني بالقلق علي صحيفتي.. ولكن اي شئ دنيوي بشر بقي ماديات ايا كان مجرد مخي بس ال بيتفاعل مع الحدث ولكن يمر عالقلب مرور الكرام.. طيب ازاي بنحقق المفهوم ده ونطبقه عملي! أولا الجانب الروحاني (your believes) يقينك بربنا.. لازم يبقي قلبك مليان ومتعلق بس بربنا ومطمنه وواثقه جدا انه سبحانه وتعالي مش هيبعد عنك اي شئ الا لما يعوضك بالافضل ليكي ولكن احنا ال رؤيتنا ضيقه.. لو افتكرتي كام مره حسبتيها وفرجت من حيث لا تحتسبي اصلا وبعيد عن كل ترتيبك, يعني حسن التوكل علي الله واستوداع ما تملكيه لوجه الله وفي حفظ الله وانه الشيطان يحبنا نحزن ونتحسر علي ال مش موجود عشان ننسي الموجود ونتمتع بيه.. فدي اول حاجه تشتغلي عليها انك تقرأي كتير عن اسماء الله الحسني هترتاحي اوي اوي بجد ثانيا الجانب العقلاني ال هو افكار جواكي تلهيكي وتمنع الافراط ده انك تعملي ال عليكي من غير اي مزايده ولا ضغط يعني الاخذ بالاسباب والوعي, ان كان مع اشياء ماديه تحافظي عليها ولما تنكسر او تضيع تزعلي دقيتين وخلاص كانت ذكريات حلوه وهعمل غيرها مع الجديده وبس خلاص, مع اخواتك توعيهم وتحذريهم وتطمني مره وبس خلاص, اصحابي بعاملهم كويس بعزه نفس مش طيبه مفرطه وبرضو ال باقي باقي وال مشي علي حسب درجته بتمسك بيه مره اتنين وخلاص يمشي, قولي لنفسك انا مش بايدي اي حاجه زياده فليه بقي عمال تعيد وتزيد!. ولما فكره تتكرر كتير اكتبيها عشان خلاص متفضليش تفكري فيها. ثالثا الجانب الجسدي وده بانك تمارسي تمارين تنفس وتدبر وتسترخي وتشربي حاجات ترخي اعصابك والعاب تروض اعصابك. وازني بينهم وان شاء الله ترجعي للفطره السليمه بدون افراط
تم النشر الخميس، ٢٣ فبراير ٢٠٢٣
وعليكم السلام ورحمة الله وبركاته طبعا انتى عارفة انه تعلق اخواتك طبعا عشان انتى شايفة ان الامان مرتبط بوجودهم وهما مهمين عندك. وبتحسي ان الحياة بتبقي فاضيه لو هما مش ف الصورة قدام عينيكى. ( الحل دايما فى الموضوع ده اننا نشوف ربنا اكتر ونظرتنا تكون اوسع...نشوف ان كل الاشخاص مهما كانوا قريبين وغاليين فهما مش باقيين فى الحياة ولا احنا كمان ...بس ربنا بس هو اللى باقى ) تخيلى انك فى البحر وعاوزة تطمنى ان الموج مياخدكيش بعيد ( يا ترى هتتمسكى فى قطعة تلج هتسيح بعد مده ولا هتمسكى فى صخرة قوية ) ده كده بيبقي شبه اختياراتنا فى التعلق...كأننا بنحكم على نفسنا بالتعاسة لان فى يوم ما هنزعل اكيد. يبقي ليه بقي من الاول ...خلينا كلنا نتعلق بربنا ونتقبل كل شىء بيحصل فى الحياة حوالينا.
تم النشر الخميس، ٢٣ فبراير ٢٠٢٣
ارتباطك بأخواتك وخوفك عليهم شعور حلو جدا لكن لما بيزيد عن حده بيبقا مرهق ليكي جدا وده ليه اسباب كتير زي ان ممكن تكون بتعاني من مشكله ف الانفصال ودي بيكون ليها اساس ف الطفوله وبيترجم عليه كل اشكال القلق من فقدان اشخاص مقربين او اصحاب او التأثر بفقدان متعه انتهاء فيلم او مسلسل وسهل اننا نتعامل معاه حاولي تحطي مشاعرك دي من خوف وقلق ع انها افكار خوف وقلق افكار بتزن عليكي وتخليكي مش متطمنه من حقك تطمني عليهم مره واحده ف سفرهم لكن لو الفكره اتكررت تاني انك تسألي عليهم شتتيها بتسبيح او استغفار او انك تعملي نشاط معين بدني او ذهني زي العد بترتيب معين بحيث انك تشتتي افكار الي تخص القلق عليهم ومتسمحيلهاش انها تسيطر عليكي والفكره لو زادت معاكي ناقشيها ف ذهنك مره واحده وقوليلها ان اخواتك بيسافروا كل مره بيرجعوا بالسلامه وانك سألتي عليهم مره كفايه قيسي بقا كل افكار القلق الي تخص الاشخاص ع الموقف ده وحاولي تطبقي المواجهه والتشتيت واعمل تمارين الاسترخاء العضلي والتنفسي كل ميتزيد عليكي افكار القلق وخلي عندك فكره ف دماغك دايما شغاله كل حاجه زي مليها بدايه ليها نهايه الفلم بيبدأ وبينتهي والعلاقات الاجتماعيه بتبدأ وبتناهي والانسان زي مبيتولد وبيبدأ ف الحياه بينتهي بالوفاه ودي سنه الحياه لازم نؤمن بيها ونتقبلها عشان نعرف نتأقلم ونعيش بهدوء
تم النشر الخميس، ٢٣ فبراير ٢٠٢٣
و عليكم السلام ورحمة الله وبركاته. الواضح انك حد محترم جدا و حساس جدا و علي عكس ما يقول الناس ف دي حاجه كويسه جدا و نادرة اليومين دول و لكن لتعلمي ان الاعتدال هو أفضل الحالات لكل شئ في الوجود اما الإفراط و التفريط هما أساس كل مشكلة . ما أنتي عليه هو الإفراط و الذي قد يساعدكي علي التخلص من ذلك بعد حول الله و قوته والاستعانه به هو إدراككي لطبيعة الحياة الدنيا و فهمك الصحيح الواعي لمعني الفقد و التغافل و الصبر عدم الكمال المطلق في هذه الدنيا( اقرأي اكثر عن ذلك ) . و نصيحتي لكي أن تتعاملي مع كل الناس قريب أو غريب بيما يرضي الله تعالي فقط و بدون النظر أبدا الي صورتكي في مخيلة أحد . (حيث أنكي تبالغي في ذلك علما بأن لكل شخص ما يلهيه عنكي أو عنه نفسه )
تم النشر الخميس، ٢٣ فبراير ٢٠٢٣
لعرض السؤال في فدني اضغط هنا