تعرفت على شخص وتقدم لخطبتي واكتشفت أنه متزوج، أنا متعلقة به ولا أريد أذية زوجته، ما العمل؟

Question

اتعرفت علي شخص من حوالي شهرين او تلاتة كان داخل في حلال و كلم والدتي و هكذا و كان هيخطبني و عرفت مؤخرا انو متزوج و عندو بنت ، و انا كنت اتعلقت بالشخص ده بالفعل سيبتو 10 ايام من غير كلام و رجع هو فتح الموضوع و قالي انو مش مرتاح مع زوجته و انو عايز يسيبها و يكمل معايا بما يرضي الله و كلم والدتي تاني بعدها بفترة من رجوعنا مراتو كلمتني و قالت لي أن حياتها كويسة و أنا بررت ليها الفكرة و هي قالت لي انا مصدقاكي و هكذا و واجهتو أن حياتك كويسة فإيه طيب ليه ، قالي مفيش واحدة في موقف زي ده هتقولك انا جوزي مش بيحبني بالعكس هتبينلك انك السبب في ده و قعدنا يومين منتكلمش انا و هو و رجع تاني انو عايزني من بعد لما والدتي كلمتها و قالت لها أن خلاص الموضوع انتهي ، بس هو زعل من والدتي أن لا ليه بتنهي الموضوع و أنها سابت البيت و مجرد فترة صغيرة و هيبقي معايا في الحلال حاليا هي بعتت لي علي واتساب و قالت لي بالغلط بس انا عارفة أنها هي بعتت لي سناب شات و قبلت لقيتها منزلة صورتها هي و هو من 4 ايام ، مع العلم أن المفروض انها سابت البيت حاليا . اعمل ايه مع العلم أن ولله انا اتعلقت بالشخص ده و في نفس الوقت انا حاولت انو يرجع لمراتو كذا مرة و هو اللي مش حابب أو مش عايز يكمل و أن القبول من عند ربنا و ماما حاولت قالي انتي ملكيش اي ذنب انا اللي مش حابب و انا حقيقي معنديش طاقة سيباه هو اللي يحاول و انا حقيقي مش عايزة اسبب لمراتو اي أذية و لا هو ، اعمل ايه

Accepted Answer

السلام عليكم، بصي أنا ممكن أتفهم إن واحد بيدور على زوجة تانية وبيسأل الناس ويرشحوا له ويدخل البيت من بابه ويتقدم ويوضح ظروفه. بس إن واحد يروح يكلم بنات ويتعرف ويصاحب ويتحجج إنه يعني ناوي يتزوج وكمان يخفي حكاية إنه متزوج أصلا ولو اتعرف إنه متزوج يقول أصلها تعباني في حياتي أو احنا منفصلين أو باقي معها عشان الولاد وغيره من الاسطوانات اللي بيضحكوا بها على البنات فده شخص يعني لا يوثق به ولا يؤتمن. إذا كان الشخص ده من النوع الأول كنت قلت ماشي ممكن تفكري وإذا مش عندك مانع تكوني زوجة تانية وتواجهي كل الاحتمالات اللي هتترتب على اختيارك فتمام صلي استخارة وفكري توافقي أو لأ. لكن بكل اللي حكيتِه، الحوار ميطمنش. يعني صراحة شايفة إنك في غنى عن كل الحوارات وزوجته أهي من قبل أصلا ما توافقي وهي داخلة في حرب معك بعد ما حاولت تفهمك بالأول إنك تبعدي وإنه بيضحك عليكِ... هل مستعدة تكملي حياتك في مشاكل معها؟ هل ضامنة متكونيش مجرد نزوة ويطلقك بعد كده ويرجع لها هي وبنته؟ *** انتِ بتقولي إنك متعلقة به... هل مستعدة لنتائج التعلق ده؟ بدل ما تتخلصي من تعقلك وتقطعي علاقتك تمامًا بشخص كذب عليكِ وأخفى حقيقة زواجه مستعدة تتزوجي منه وتواجهي كل الاحتمالات اللي ممكن تواجهيها بعد كده؟ النسيان وفك التعلق أكيد صعب بس مش أصعب من الاحتمالات اللي ممكن تقابلك إذا وافقتِ على الزواج منه. استعيني بالله وفكري كويس. وأعتقد إنك لسه صغيرة في السن وفيه رجال كتير في البلد... مجتش عليه يعني.

Answer

لو مش عندك استعداد تبقي زوجة ثانية انسي الموضوع تماما واقطعي علاقتك بهذا الشخص نهائيا - قال صلى الله عليه وسلم (لا تسأَلُ المرأةَ طلاقَ أختِها لتستفرغَ ما في صَحْفتِها ولِتَنكِحَ فإنَّ لها ما قُدِّر لها)

تعرفت على شخص وتقدم لخطبتي واكتشفت أنه متزوج، أنا متعلقة به ولا أريد أذية زوجته، ما العمل؟

اجتماعية

حب

زواج

سؤال من احد أعضاء فدني

تم النشر السبت، ٢٥ يناير ٢٠٢٥

2 إجابة

8 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك