السلام عليكم و رحمة الله
انا في قصة حصلت لي و الصراحة اثرت في نفسيتي و دراستي و اظن اني الوحيدة اللي انتبهت لها.
من كم شهر كنا مسافرين نغير جو و لما كنا راجعين انتبهت لرقم غريب على تليفون ابويا و فيه رسائل حب و وحشتني و كدا طبعا في البداية حاولت انكر او اقنع نفسي بأي حاجه بس بعد شهر تقريبا كنا رايحين نحضر حفلة و انتبهت على نفس الرقم و تقريبا نفس نمط الرسايل.
هنا انا مقدرتش انكر اكتر و مرضت لاني فعلا ماقدرتش احكي لأي حد حتى لأمي خوفا من اني اخرب البيت وخفت اصارحه لاني الصراحة ماتعودش اكلم حد في العيلة في المواضيع دي و انا امبارح شفت نفس الرقم ونفس الرسايل و كل مرة بشوف فيه الرقم بمرض و بزعل و بيجيلي ارق
يا ريت تقولولي اعمل ايه من غير ما اواجه اي حد فيهم
اقدر جداً ما أنتى فيه وفي هذه الصدمة الكبيرة ولكن لى عتاب عليكى وهو لماذا تبحثى فى هاتف ابيكى وانتى مخطئة فى هذا التصرف ثانياً: ربما تكون هذه نزوة وسوف تزول سريعاً إن شاء الله حاولى أن تتقربى من والدك وتشعريه دائماً بأنك فخورة بكونه والدك لانه شخص ملتزم حتى يضعك دائماً أمامه فى تصرفاته ثالثاً إذا كانت والدتك مقصره تجاه ابيكى حاولى لفت نظرها بأسلوب مهذب رابعاً لا تبحثى فى خصوصيات أحد لانك لن تجني من ذلك إلا التعب "لا تسألوا عن أشياء إن تبد لكم تسؤكم" ربنا يهديكى وييسر لكى الحال اللهم آمين يارب العالمين
تم النشر السبت، ٢٦ أكتوبر ٢٠٢٤
بجد وعن تجربه ملكيش دعوه واوعي تقولي لحد اي حاجه انا عملت وقولت لاهلي بقيت بتعاير بعدين فامانه انتي ملكيش دعوه ومتقوليش لحد وسيبي الامور تاخد مجراها انصحك تفضفضي لحد برا العيله اصلا صحابك مثلا او كده اؤكدلك انتي ملكيش دعوه بحاجه
تم النشر السبت، ٢٦ أكتوبر ٢٠٢٤
وعليكم السلام ورحمة الله انا مقدرة ان مشكلة النوع ده من المشاكل هو انك اتصدمتى فى ان والدك صورته اتهزت قدامك عارفه انك بتفكرى وبتدورى حتى على سبب يكون دفعه انه يكون عنده علاقة مع سيدة غير مامتك عارفه انك مش قادرة تتقبلى نوعية الخطأ دى من بابا المواقف هتفضل تحصل فى حياتك عشان تتعرفى على الحقائق الحقيقة ان بابا بشر وممكن يخطأ ( ده لو علاقته بالسيدة صاحبة الرقم علاقة غير شرعيه) الحقيقة ان بابا سواء فى مشاكل مع ماما او كويسين فهو لو قرر يتزوج مره ثانيه فهو معاه الحق ده بما لا يضر الزوجتين ( ده لو علاقتة بالسيدة انها زوجته) عاوزة متتعبيش فعلا تقبلى الحقائق اولا ..مقاومتك لشىء وارد حدوثه مش هيغير من حقيقته بعد التقبل نقدر نقولك تتعايشى ازاى ..بس عدى المرحلة دى الاول
تم النشر الجمعة، ٢٥ أكتوبر ٢٠٢٤
لازم المواجهة معاه بس يكون بعيد عن امك وهو اكيد مش هيزعلك لانك حته منه وهو عارف انك بتتعبى وانتى يمكن ترجعيه لعقله هما كده الرجالة ترديه لعقله ويفوق من نزواته ربنا يهدى
تم النشر الجمعة، ٢٥ أكتوبر ٢٠٢٤
بخاف اصارحه لاني ابدا مش متوقعه رد فعله هيكون ازاي
تم النشر الأربعاء، ٢٣ أكتوبر ٢٠٢٤
ممكن تفاتحي بابا ف الموضوع خصوصا لو متفهم وواسع .. عادي بهداوة كده : بابا عايزة اقولك حاجة، انا بحب ماما وبغير عليها وكده، هو هيفهم ويشرحلك -و يبرر
تم النشر الأربعاء، ٢٣ أكتوبر ٢٠٢٤
لعرض السؤال في فدني اضغط هنا