السلام عليكم
انا عندي اكتر من مشكلة كلهم بدأوا لما ماما اتوفت …
اتوفت فى شهر 1 اللى فات، انا فى تانيه كلية والاخت الكبيرة وعندي اخت فى ثانوية عامه واخ فى اولى اعدادي …
المهم مسؤولية البيت كلها بقت عليا فى اول كام شهر مكنتش حاسه بحاجه لان كان فى كذا حد بيساعدني بس من ساعة ما الدراسة بدأت والمسؤلية زادت خالص ومحدش بيساعدني نهائيا
والمفروض اكون واخدة بالي من نضافة البيت واحضر فطار وغدا وعشا وفى نفس الوقت اهتم بنفسي وشكلي وحفظي للقرآن لان دي وصية امي الله يرحمها
وبالدراسة لان دي السنه اللى هيترتب عليها التخصص وبرضو المفروض اسمع لاخواتي وأذاكر لاخويا الصغير لانه كمان صعب خالص ولو اتلهيت عنه بيبقا نزل الشارع
وطبعا بابا طول اليوم فى الشغل حرفيا وانا مبحبش اضغط عليه لانه فيه اللى مكفيه وبصراحه بخاف أقول له يقوم يفكر يتجوز …
انا بجد تعبت خلاص ومعنديش طاقة مبعرفش اعمل كل حاجه دايما لازم بيبقا فى نقص وكذا حد من قرايبي شايفين ان ده دلع وانى اقدر اخد بالي من كل ده بس بجد تعبت والله وحتي شكر وتقدير من اللى فى البيت مبلاقيش نهائيا
يعني مثلا اليوم اللى معملش فيه اكل تلاقيهم بيقولو انا مش قد المسؤولية وماما مكنتش بتعمل كدا اعصابي تعبت كل يوم بصحى بدري احضر فطار وبعد كدا غدا والبس وانزل الكلية وانا مستعجلة ولو نزلت بدري اكيد بيبقا الاكل متعملش وارجع تعبانه مش عارفة اعمل اي ولا اي
قد ايه دي مسئوليه كبيره. وماشاء الله واضح انك بتحاولي تعمليها ع اكمل وجه. اولا اعرفي ان دي عباده لان مقامك من حيث أقامك الله. فاانا عيزاكي تاخدي نيه كده وانتي بتعملي كل عمل انه لوجه الله. ثانيا انتي محتاجه قعده حلوه كده مع اخواتك وكل واحد يعرف مسئولياته كويس واللي مبعملهاش تقولي مش هعملها وايام الاكل تتقسم واللي مش بيعرف بعمله يحضرله ليكي. تنظمي وقتك وتعلمي اخوكي الصغنن يذاكر لوحده ازاي اولا لان دي مهاره ليه ثانيا يقلل عليكي ربع الوقت. اختك كمان تساعدك لو مساعدت تعمل اللي يخصها بس. هيبقي بابا بس هو اللي مش هينفع فده مسئولياته كلها عليكي من منظور البر ❤️انتي بقي حددي لنفسك وقت تذاكري وكمان اي وقت ينفع يتخطف ف اليوم. ممكن ماتقدريش تنفذي ده كله ف الترم ده. ممكن اللي جاي. بس اعرفي لو عودتيهم ع كده مش هتعرفي تغيري ده ابدا. فلازم تاخدي القرار. وصدقيني ربنا يجازيكي خير ع كل عمل ليكي لاخواتك وبابا. واطلبي من ربنا الاعانه هيقويكي اوي. طيب لو اخواتك ماسعدوش انتي بقي قسمي المسئوليات ومش لازم كل حاجه تبقى perfect زي ماما. وحبيبتي ربنا يقدرك ويصبرك ع فراقها ويرحمها ويجعلها ف الفردوس الأعلى.
تم النشر الخميس، ١٩ ديسمبر ٢٠٢٤
وعليكم السلام ورحمه الله وبركاته. اولا البقاء لله وربنا يرحم والدتك. ويجعلها في احسن مكان باذن الله ويغفر لها. ثانيا انت مش محتاجه تكوني ماما لازم تبقي عارفه ده كويس جدا جدا انت الاخت الكبيره فقط لا غير انت مش هتكوني ماما ومش هتكوني اللي بتحمي البيت من ان بابا يتجوز ثاني. ما تحطيش نفسك في الوضع ده نهائي. لانه مع اي موقف هيحصل واي حاجه هتتطور في الحياه هتلومي نفسك فانت هنا مش محتاجه تحملي نفسك مسؤوليه هي مش بتاعتك كلها بالشكل ده. هي فقط اختيار. ولو اخترنا اختيار خلاص يبقى احنا ناخده بكل ظروفه. ولو حصل اي حاجه احنا مش هنندم ومش هنقول لنفسنا انا يا ريت ما اخترت الاختيار ده علشان نختار الاختيار لازم نكون واضحين ومركزين قوي ايه الاختيار دلوقتي انت محتاجه تختاري. تكوني الاخت الكبيره اللي بتدعم البيت بشكل كبير؟ وعارفه نظام البيت وتقدر ان هي تحاول تنقله لكل اللي موجودين في البيت علشان يكون زي ما ماما كانت موجوده الله يرحمها. ولا انت عاوزه تاخدي مكان ماما حرفيا فيبقى عليك كل المسؤوليات وكل يبقى بيسالك انت عن اللي بيحصل واللي ما بيحصلش اختاري الاول ما بين الاختيارين دول لانه كل واحد فيهم هيفرق عن التاني لو اخترتي تكوني الاخت الكبيره. هنا المسؤوليه بقت مشتركه مسؤوليه البيت وكل حاجه بتحصل في البيت مسؤوليه مشتركه ومش عليك انت لوحدك. فهنا في جزء عليك في جزء على اختك في جزء على اخوك وكلكم مع بعض هتبداوا تمشوا نظام البيت اللي انتم عارفينه من قبل ما ماما الله يرحمها. تتوفى. وتبداوا كلكم تشاركوا بعض في الموضوع ده انت هيبقى عليك العيب الاكبر بس في انك تساعديهم انهم يعملوا ده صح لانك انت الاكبر فقط لا غير. لو اخترتي تكوني ماما هتبدئي تشيلي جزء كبير جدا من حياتك ومستقبلك ودراستك وكل الكلام ده ليه؟ لانك لسه ما عندكيش الخبره الكافيه بانك تكوني ماما بالشكل اللي ماما كانت بتعمله لان طبعا انت مش في ناس سنها ولا عديتي باللي هي عدت بيه. انت لسه بتعملي ده لاول مره وحتى لو كنت بتساعدي ماما قبل كده فاكيد مش زي انك تشيلي كل حاجه وتفكري في كل حاجه وتعملي في كل حاجه. فهتحتاجي ان احنا هنقول لك ساعتها خلاص الدراسه هتحتاجي انك تركيزك فيه هيقل ممكن توقعي شويه محاضرات ممكن مستواك يبدا يقل وما تزعليش ساعتها لانك قررتي تبقي ماما. اخواتك هيبقى من حقهم ان هم يجوا يحكوا لك على مشاكلهم وانت تحليها. ضروري تحليها ما ينفعش تقولي لحد انا مش فاضيه لان خلاص انت شلت المسؤوليه. شوفي انت حابه اختاري انهي حاجه فيهم.
تم النشر الجمعة، ٢٠ ديسمبر ٢٠٢٤
والله ربنا يعينك انتي حد عظيم جدا ويستاهل الشكر والتقدير مش اي حد يقدر يعمل اللي انتي بتعمليه فكك من قرايبك و اللي بيقولوه محدش بيحس بحد فاكرين نفسهم جامدين بس لما يتحطو في مكانك مش هيعرفو يعملو حاجه من اللي انتي بتعمليه ممكن تقسمي الشغل مع اختك اللي في ثانوي ممكن ممكن تاخد الفتره اللي انتي بتكوني فيها فالجامعه او الأوقات اللي مبيكنش عندها دروس فيها ممكن ده يخفف عنك شويه + والله أنا فخورة بيكي جدا جدا 🫂
تم النشر الخميس، ١٩ ديسمبر ٢٠٢٤
وعليكم السلام ورحمة الله وبركاته، أختي سارة، أشعر بألمك وضغوطك الكبيرة بعد فقدان والدتك، وأقدر تمامًا مدى الصعوبة التي تواجهينها في تحمل مسؤوليات البيت والدراسة في نفس الوقت. فقد الأم هو واحد من أصعب الأوقات في حياة الإنسان، وأنت تقومين بجهد بطولي لتحمل هذه المسؤوليات. إليك بعض النقاط التي قد تساعدك على تنظيم حياتك وتخفيف الضغط: وضع جدول زمني : حاولي إعداد جدول زمني يتضمن مواعيد محددة للمهام اليومية، مثل وقت إعداد الوجبات، وقت الدراسة، ووقت للاهتمام بنفسك. يمكنك استخدام مفكرة أو تطبيق على هاتفك لتسهيل عملية التخطيط. توزيع المسؤوليات : إذا كان ممكنًا، تحدثي مع أخواتك وأخيك حول تقسيم المهام اليومية. على سبيل المثال، يمكن لأختك الكبرى مساعدتك في تحميل بعض المسؤوليات أو حتى مشاركة في إعداد الوجبات. تحديد الأولويات : حاولي تحديد المهام الأكثر أهمية في يومك والأشياء التي تنقصك لصحتك النفسية مثل تخصيص وقت بسيط لنفسك. فالعناية الذاتية لا تعني الانشغال عن المسؤوليات، بل هي ضرورية لكي تظلّي قادرة على القيام بكل ما تحتاجينه. تواصل مع والدك : تحدثي مع والدك عن شعورك بالضغط. من المهم أن يعرف ما تمرين به، فهو قد يكون له القدرة على دعمك أو مساعدتك بطرق لم تخطر على بالك. احرصي على التفاؤل : تذكري دائمًا أن الزمن سيساعدك في تخفيف الآلام، ووجودك في هذه المرحلة هو جزء من خطتك المستقبلية. كلما استثمرت في نفسك ومهامك، كلما تمكنت من تجاوز هذه الأوقات الصعبة. لا تترددي في طلب المساعدة : إذا شعرت بالضغط الكبير، قد يكون من المفيد استشارة متخصص نفسي. فهذا لن يكون علامة على الضعف بل على القوة والوعي للحفاظ على صحتك النفسية. تذكري أن مررت بالضغط الكبير بسبب الظروف، لكن ذلك لا ينقص من قيمتك وقدرتك. أنت تستحقين الدعم والتقدير، وأنت تقومين بعمل رائع رغم كل المصاعب. وفقك الله وأعانك ويسر لك أمورك.
تم النشر الأربعاء، ١٨ ديسمبر ٢٠٢٤
لعرض السؤال في فدني اضغط هنا