عندي اصحاب من ونا صغيره جدا و كبرنا سوا اهلهم يعرفوا اهلي و صحاب و جيران و كل حاجه
طبعا لما كبرنا تغيرت شخصيتنا
هم بقوا بيلبسوا ديق و يبينوا شعرهم ربنا يهديهم
و بيحطوا ميكب
انا مبعملش دا و بلبس جيب دايما و لبس واسع و مبحطش ميكب عشان حرام
دلوقتي انا بقيت احس قعدتهم معايا بتأثر عليا يعني انا ذي مقولت مبحطش ميكب لما بنتجمع و ابقا خارجه معاهم بيدوني و يقولولي حطي ذينا ف بحط و كمان ف اللبس شويه بيلبسو لبس غيري خالص اكيد شكلو حلو بس لبس مينفعش لمحجبات و انا مبسمعش اغاني لما بقعد معاهم هم عارفين مبسمعش بيسمعوني بردو و يشغلوها
يعني انا من قريب كنا خارجين سوا و قعدت افكر كذا مره ان انا البس ذيهم انا اصلا كنت بلبس ذيهم بس ربنا هداني الحمد لله
فكرت كذا مره ابعد بس دايما يقابلني معاهم مواقف كتير و اقابلهم و اقعد معهم او لما ببعد بيبقا واضح اني ببعد ف بييجوا يكلموني و يقولولي متبعديش و يرنوا و يقعدوا معايا عشان مش عايزين يخسروني انا كمان مش عايزه اخسرهم بس انا دا بيأثر عليا نصحتهم كذا مره اتخانقو معايا بسبب النصيحه دي ان هم يوسعوا من لبسهم و كدا قالولي ملكيش دعوه و كل واحد حر و مش هتتحكمي ف لبسنا و غيرو ونا اصلا مليش دعوه فعلا بس انا عايزاهم يبقوا احسن
و بردو بحس اني انانيه كل مببعد لأن مفكرتش غير ف مصلحتي و انهم بيأثروا عليا و مصونتش العيش و الملح اللي مبينا و اني مينفعش ابعد بعد السنين دي كلها
بس دايما بردو بحس انهم مش شبهي لا ف لبس ولا ف تعامل ولا اي حاجه يعني هم خروجاتهم مثلا يحبوها ف كافيه و يفضلوا يتصوروا طول القاعده دا اللي بيعملوه بينما انا مبحبش القاعدات الرسميه دي خالص احب ملاهي او بحر او اي حاجه فيها تسليه تخلينا نلعب سوا و نضحك و هم بيحبوا الشكليات شويه يعني بيبصوا لغيرهم مره واحده فيهم قالت هشتري ايفون صحابي كلهم جايبين و هعمل عيد ميلادي ف مكان كبير عشان صحبتي عملتو ف كذا و كل شويه تقارن نفسها ب صحابها و تقلدهم ف طبع و طريقه كلام و كل حاجه و دايما بقضل اقولها متبصيش لغيرك و احمدي ربنا ع اللي معاكي و خليكي ع طبيعتك شخصيتك ف الحقيقه احلى بس دا طبع فيهم مش بيتغير مش هقدر اغيرو
ونا واحده مبتحبش المناظر قدام الناس يعني معلش بس ف داهيه الناس لو انا مش هقعد ع طبيعتي و راحتي انا مبأذيش حد ونا قاعده ع راحتي مثلا عشان معملش كدا و مبحبش البس حاجه مش بتعبر عني او حاجه غير اللي متعوده ألبسها او اغير نفسي عشان حد عايزني ابقا كذا او اقلد حد عشان اعجب ف دايما بحسهم مختلفين عني ف كذا حاجه مش دي بس
ف انا حقيقي مش عارفه اعمل ايه ابعد ولا أكمل معاهم
للاسف فيه نقطة معينه انتي ذكرتيها خطيرة جدا .. قولتي لنفسك مرة :"كنا خارجين سوا و قعدت افكر كذا مره ان انا البس ذيهم". الصاحب ساحب .. ف انتي ممكن تتفني وتتسحبي من غير ما تحسي للاسف. مهما كنتي متخيلة انتي قد ايه متمسكة بدينك، بس ممكن تضعفي في وقت ما، وده اللي حصل .. بدأتي تفكري ف ده في مرة! انا مقدرة انهم صحابك .. بس يعني ايه صاحب، الصاحب يقويكي ميضعفكيش، يعينك على طاعة ربنا .. ميبعدكيش عنها. ف دول دلوقت مش بيعملوا ايه حاجه تخليكي تقربي من ربنا! معلش ايه بقى لازمتهم في حياتك؟ بيدوكي هما ايه؟ الحقيقية هما بيدوا .. بيدوا ذنوب مش اكتر .. بيسمعوكي اغاني، عايزنك تلبسي وتحطي ميكب .. المرء على دين خليله .. ومش معنى انك عايزة تبعدي يبقى انتي كده انسانه سيئة .. بالعكس! انتي بتحافظي على دينك، هو فيه اكتر من كده عند ربنا! ف طبعا ابعدي، هتختاري اصحابك، ولا هتختاري دينك .. لان انتي كده مخيرة ما بينهم! ف ايهما تختاري؟ اتمنى تختاري دينك
تم النشر السبت، ٩ مارس ٢٠٢٤
الصاحب ساحب فاحنا هنا قدام احتمالين ...يا اما هما اقوى ويسحبوكى ...يا اما انتى اقوى وتسحبيهم فاذا كنتى مش بالقوة الكافيه وهيكونوا بالنسبالك فتنه ويسحبوكى فكده بلاش منها الصحبه دى والعادى والطبيعى ان علاقاتنا بالاخرين تختلف من وقت لوقت حسب اختلاف افكارنا وشخصياتنا و اهدافنا كمان فانتى راجعى نفسك فى اهدافك فى الحياه واذا كانوا مش هيدعموكى فيها ...فخلى علاقتك بيهم محدوده جدا عشان العشره الطيبة بس ابدأى كونى صحبه تانيه تسحبك وتمشى معاكى فى اتجاه هدفك
تم النشر السبت، ٩ مارس ٢٠٢٤
بصي مادام الاهل عارفين بعض حاولي تكلمي اهلهم ينصحوهم مادام هما مش قابلين النصيحة منك لاكن انتي بتقولي انك ساعات بتستجيبي ودا أول مدخل الشيطان ليكي هما يمكن بيحبوكي ذي مبتقولي معا إن عمر مكان مدة الصداقة تدل علي قوتها ممكن تعرفي واحدة في كام شهر تبقا علاقتك بيها أقوي واصدق بكتير من صداقة قعدت سنين ولو هما فعلا بيحبوكي ماكنوش طلبوا منك تعملي حاجات إنتي رافضاها وهما عارفين بكدا فامن وجهة نظري إبعدي عنهم لأنهم عاوزينك نسخة منهم وأظن إنتي مش عاوزة كدا والعيش والملح هما باعوه لما حتي ماقبلوش منك نصيحة فهتصونيه إنتي واخر حاجة أحب اقولهالك لا طاعة لمخلوق في عصيان الخالق وربنا يثبتك ويجعلك من الصالحين المصلحين وينفعنا بيكي وخلي بالك هما عاوزين يبعدوكي عن طريق ربنا فامتوفقيش وتذكري أن الجنة هيا المؤوي وربنا يبارك فيكي لأنك سألتي ودا دليل إنك في الطريق الصحيح والسلام عليكم.
تم النشر السبت، ٩ مارس ٢٠٢٤
لو شايفة انهم مفيش فايدة معاهم مش بيسمعوا النصايح يبقى ابعدى مش هايفيدوكى بحاجة لما تعملى زيهم انتى احسن منهم بكتير سيبك من المناظر والكلام دة عارفة قارنى نظرة الناس ليهم ونظرتهم ليكى هاتلاقي الناس بتضيكى نظرة احترام محدش يقدر يكلم معاكى بطريقة وحشة ولا حد يضايقك وانتى ماشية لاكن هما للاسف هايخلو الناس تتكلم عليهم بصى اهم حاجة صمعت البنت هى دى الى بتقعد انتى اه عاملة خاطر للعيش والملح والصداقة الطويلة ممكن تخلى كلامك سطحى معاهم قللى كلامك معاهم بس بجد اوعى تتأثري بيهم
تم النشر السبت، ٩ مارس ٢٠٢٤
ابعدي عنهم ، الرسول عليه الصلاة والسلام بيقول المرء علي دين خليله ، و مره فمرة حتحسي انك غريبه و مش مرتاحة و حتبقي زيهم ، ابعدي عنهم و ربنا يرزقك افضل صحبه ليكي وتكون صحبه صالحة ، و مدام كل حد حر ليه هما عايزينك تسمعي اغاني و تحطي ميكب ، هما علشان يحسوا انهم صح و مفيش اي حد يغلطهم عايزنك تبقي زيهم ، زي الي بيشرب سجاير و بيعزم علي صاحبه بيها ، ابعدي عنهم في اسرع وقت و ادعيلهم بالخير و الهدايا و بس ، كفايه محاولات
تم النشر السبت، ٩ مارس ٢٠٢٤
السلام عليكم حبيبتي بصي بأخلاقهم لو أخلاقهم متغيرتش. يبق انت قدمتي النصيحه لهم فالالتزام باللبس وبس. خليكي معاهم المهم انتي متتاثريش بالكلام ده كلو عارف زي ايه. زي ناس مسلمات. راحوا اعرة في بلاد زي امريكا والصين طبعا في اختلاط بينهم وفي تنوع وحريه فاللبس. بس هل معني ده أن انتي هتلبسي زيهم وتقلظيهم وتخسري دينك عشانهم لا طبعا. خليكي معاهم مدام واثقه من ادبهم امكن قصدي لبسهم لاكن هل أخلاقهم وادبهم تغير فاللحظادي تبعدي. عشان دي سمعه. لاكن دلوقت خليكي معاهم عشان هما عيزينك وشريينك وانتي كمان. ومتربيين مع بعضكم بس كده من باب لكم دينكم ولي دين. كده يعني
تم النشر الأحد، ١٠ مارس ٢٠٢٤
انتي لا كئيبة و لا متشددة ، انتي بس متدينة و ده الطبيعي ، ابعدي علشان متلاقيش نفسك زيهم مع الوقت بجد
تم النشر الأحد، ١٠ مارس ٢٠٢٤
الانسان بيتأثر بشده بالي حواليه ، متحطيش نفسك جوا النار و تقولي مش حتتحرقي ، اهربي بنفسك و هما ربنا معاهم
تم النشر السبت، ٩ مارس ٢٠٢٤
انا فعلاً بقيت أحس اني غريبه زياده عن اللزوم و كمان هم بيفضلو يقولولي كئيبه او متشدده اوي عشان مبحبش الأغاني ولا اللبس الديق
تم النشر الأحد، ١٠ مارس ٢٠٢٤
لعرض السؤال في فدني اضغط هنا