السلام عليكم، قبل ما تستمع للملحدين وشبهاتهم، هل كان عندك أي علم شرعي؟ هل درست عقيدة وبنيت أساس صح لدينك ولا كان مجرد القشور اللي درسناها بالمدرسة وصلاة بنؤديها حركات ومجرد واجب وخلاص من غير ما نعرف جوهرها ولا ليه بنصليها؟ طبيعي جدًا لما يكون مفيش أساس صح ومش متعلم دينك ولا عارف ربنا حق المعرفة، نفسك هتطوح مع أي شبهات تسمعها. مش عارفة أنت أصلا سمعت لمين ومقتنعتش، ممكن تضرب لي أمثلة؟ *** كل شبهات الملحدين اللي قابلتني مكررة ومتعادة من سنين والعلماء ردوا عليها بردود قوية ومقنعة. أنت بتقول إنك شفت حجج الملحدين قوية والشيوخ كانوا بيهربوا بس أنا شفت العكس كتير ومن ملحدين مشهورين وعلى فكرة أغلب فيديوهاتهم بتستخدم أساليب نفسية خبيثة وبيتلاعبوا بعقلية أي حد مش فاهم أسس ولا علوم شرعية. بيكدبوا عادي وبيزيفوا وبيقصوا من الأدلة اللي فاكرين إنها أدلة ومعتمدين إن اللي بيسمع مش هيدور وراهم ويكشف كذبهم وتناقضهم. وعكس ما حصل معك أنا شفت مناظرات لعلماء عرب وأجانب من مختلف الجنسيات وعادي بيردوا على الملحدين ومثيري الشبهات بردود مقنعة جدًا. لكن عارف المشكلة في إيه كمان غير عدم وجود علم وعقيدة قوية؟ لو أنا من جوايا أصلا عندي مشاكل مع الإله، عندي رفض لحاجة في واقعي وشايف ظلم في قدري أو قدر اللي حواليا، لو أنا مش عاوز القيود اللي فارضها عليّ الدين وحابب أعيش براحتي من غير تأنيب ضمير، أو عندي ميل إني أصدق حاجة فلانية عشان هوايّ فمهما اتقدم لي أدلة همشي ورا الهوى ده وهصدق الطرف التاني وأفتكر إن حججه قوية ومقنعة ومعه الحق. (طالب الحق يكفيه دليل وصاحب الهوى لا يكفيه ألف دليل) فإن شاء الله تكون طالب حق فعلا وبتدور على حبل نجاة بسؤالك هنا. **** ارجع خطوة لورا، وقف سماع لكل دول، ملحدين بقى أو متدينين وشيوخ. انس أي أفكار دخلت دماغك ووجه قلبك بصدق ورغبة حقيقية إنك تعرف الحق وادعي خالق الكون اللي كنت بتصلي له إنه يهديك للحق ويهديك لطريقه. ربنا أبدًا مش هيترك حد بيدور على الحق من قلبه وعاوز يوصل له فعلا. ** هداك الله وإيانا للحق وثبتنا عليه.
ما شاء الله، عمره كم اللي دارس كل حاجة ومتعمق في الدين للدرجة الرهيبة دي؟ ده العلماء بيفنوا عمرهم كله ومش بيحيطوا بكل شيء في العلوم الشرعية وهو حافظ كل حاجة وفاهمها... مفيش حد شفته طالع يقول إنه ألحد أو ترك الإسلام إلا ولازم يؤكد إنه كان سلفي ودارس كل شيء وعارف كل خبايا الدين عشان الكل يقول آمين وراه... وبمجرد ما أسمع دقيقة واحدة لكلامه بلاقي كم أخطاء لغوية وقراءة غلط للآيات ومخارج حروف كارثية... وعامة حتى لو كلامك عن الشخص ده صحيح... عادي جدًا لو كان سلفي ودارس وترك الدين ولا حتى ألحد... أذكر شخصية من التاريخ الإسلامي الملحدين طايرين بها، كان مشهور وسط المناظرين المدافعين عن الدين وفي النهاية ألحد... هل ده دليل حق يعني؟ هل ده دليل إن مفيش إله والكون ده اتخلق صدفة واحنا كنا نتيجة تطور ومجرد وسخ كيميائي زي ما بيقول الملحدين؟ لما بسمع عن حد من دول مش بيخطر ببالي غير قول الله سبحانه وتعالى (واتل عليهم نبأ الذي آتيناه آياتنا فانسلخ منها فاتبعه الشيطان فكان من الغاوين) بالمناسبة، مش شرط رفض الشيوخ المناظرة إنهم خايفين ولا مش عارفين يردوا، ممكن مش عاوزين يشهروه أو من قبيل إماتة الباطل بعدم ذكره وممكن قوي عارفين إن مفيش فايدة أصلا من الكلام معه لأنه شخص أصلا مش بيناظر عشان الحق ولا عاوز يعرفه أصلا. أتمنى إنك متكونش زيه بتجادل لمجرد الجدال والشبهات. إن كنت صادق وبتبحث عن الحق فسهل جدًا توصل له، لكن لو بتطرح سؤالك هنا لمجرد الترويج للفكرة أو نشر الشبهات فجرب تقف مع نفسك وتراجعها.
تم النشر الثلاثاء، ١٨ مارس ٢٠٢٥
طيب انت تقول إنه حافظ لكتاب الله وفقيه فى دينه ومع ذلك الحد فى الله وانى اشك فى ذلك .. فمالا تعرفه يا صديقى أننى طيله العشر سنوات الماضية كنت دخلت فى دهاليز هذا الفساد الفكرى والظلام الروحى وكنت اعتقد اننى على صواب حتى هدانى الله بفضل الله ... ديننا دين البرهان والحجة فدع البيّنة تكون على من ادعى .. يمكنك طرح النقاط التى جعلته يترك الاسلام والتى جعلتك تتشكك ولنرى إن كان عالما حقا ام جاهلا يرتدى ثوب العالم كبقية حزبه .. ما رأيك ؟
تم النشر الاثنين، ١٧ مارس ٢٠٢٥
أنا مدرستش أي شئ في الدين ومش فاهم حاجة بس في شخص ملحد كان سلفي وحافظ القرآن بكل تجويداته وتفسرياته وكتب الفقه والسنه والسيرة وغيره يعني كل شئ في الدين وأخذ سنوات من البحث وفي النهاية أتحول للإلحاد بعد دراسة عميقة جدا لسنوات والشخص ده ياما هربوا منه علماء كبار ودايما بيدعوا أي عالم يناظره وكلهم مش بيردوا عليه تماما ولا بيعبروه حتى في فيديوهات بعيد عنه وكأنهم بيتجنبوه لسبب غير معلوم وكأن عشان جاء من داخل الدين وعارف كل خباياه بالضبط فليس عندهم ما يقنعوه به والشخص ده 99% من الناس اللي بيسمعوه مهما كانت قوة إيمانهم بيلحدوا لدرجة إنه في مشايخ وأبنائهم ألحدوا على يده وهذا الرجل ليس مسلط من جهه معينه عشان يفسد الشباب لا بالعكس هو فاهم وحافظ كل شئ في الدين أكتر مني ومنك وعنده حججه المنطقية كلها من القرآن والسنه ويريد من أي شخص يثبت له عكس ما يقوله ولكن أنا بقولك للمرة التانية الراجل ده بالتحديد كل العلماء والمشايخ بيتجاهلوه ومش بيردوا عليه ولكن بيطلعوا فقط يردوا على بعض الملحدين الفرافير الجهلة اللي بيرددوا شبهات عبيطة ملهاش لازمه ويفحموهم بالردود وهذا كل شئ أما هذا الرجل يتجنبه الجميع.
تم النشر الاثنين، ١٧ مارس ٢٠٢٥
لعرض الإجابة في فدني اضغط هنا