كيف أصاحب أختي الصغيرة وأمنع عنها أي أذى نفسي قد تتعرض له في مدرستها؟

Question

السلام عليكم دلوقتى انا كنت فاكره انى اتخطيت فتره ابتدائى لكن الحقيقه أنه لا اكتر فتره مؤذيه بالنسبالى رغم إن اللي اذوني اطفال زيى لكن اذاهم منستوش وكرهونى في نفسي وحاجات كتير فيا حتى بعد ما كبرت اللي خلانى اعرف انى متعافتش هو إن اختى الصغيره داخله السنادي المدرسه ولقيت أن دماغى عماله تفكر كتير اوى واتخيل سيناريوهات زى أن حد ضربها أو شتمها وغيره ودى حاجه اكيد بسبب اللي انا مريت بيه من تنمر وصدمات ومواقف مؤذيه معتقدش حد كبير كان يتحمل كميه التريقه ما بالك طفله صغيره بس لما كبرت حاولت ولسه بحاول أتعافى عندى وسواس يحصل ده في اختى ازاى امنع ده وازاى صاحبها هى حاليا 6 سنين وحاولت ادور على مدرسه كويسه بس الاطفال المؤذيين ف كل مكان ف مش هتفرق محدش يقلل من مشكلتى انا فعلا اتمنى اختى متشوفش حاجه وحشه ابدا

Accepted Answer

السلام عليكم ورحمه الله وبركاته. خلينا نقول تجربتك هتكون مهمه جدا جدا في تجارب اختك اللي جايه ان شاء الله اولا احنا هنحتاج نرتب التجارب الخاصه بتاعتنا بشكل كويس وده عارفينه ايه اكثر المشاعر اللي كانت بتسيطر علينا في التجارب دي يعني مثلا حصل معايا تنمر سنه كانت ايه اكثر حاجه بحس فيها يعني وقتها وكنت بحس بالخوف ولا بالتوتر ولا بالقلق ولا بالخجل هافكر واسترجع مشاعري في المواقف دي وثاني حاجه اشوف كانت ايه اكثر مشكله بتواجهني ومخلياني مش قادره اتخلص من الموقف هل مثلا انا كنت شايفه ان انا اضعف وهم اقوى ولا انا كان بيبقى جوايا الرد بس حاسه اني مش قادره اقوله ولا انا كنت بحس ان اصلا ما عنديش الرد الا رده على الناس دي بعد ما تجمعي كل ده هتبدئي تنقليه لاختك ولكن بطريقه صح ايه هي الطريقه الصح خلينا نقولها مع بعض؟ ** الطريقه الصح اللي احنا بنقلها من تجربتنا اولا ان احنا ما نكلمهاش عن المشاعر السيئه خالص اللي هي هتعملها في الموقف ده العكس نبدا ننقلها المشاعر الصح اللي هي المفروض تحسها في الموقف ده يعني نقول لها هتعملي ايه لو في حد كده كان غلط شويه كانت بنوته غلسه وجاءت بتتريق على التوكة بتاعتك هتعملي ايه انا عايزاك في الموقف ده تشوفي نفسك احلى واحده في المدرسه وكلامها ده تعتبريه زيه زي الكلاكسات بتاعه العربيه اللي معديه هي كلاكس ومعدي ولا محتاجين نقف عنده ولا نركز معاه خالص ده مزعج وهنسد قدامنا عنه مش اكتر من كده وهنفضل دايما عارفين ان احنا التوكه بتاعتنا ديحلوه واحنا اللي اخترناها وبنحب لونها البنت دي الغلسه اللي جايه بتحاول تقنعنا ان التوكه بتاعتنا مش حلوه دي احنا مش هنسمع كلامها خالص وهنبص لها ونقول لها المهم ان انا شايفه توكتي حلوه وقيسي على ده كل المواقف التانيه ان انت حتحتاجي انك تدربيها على ان هي ازاي تتعامل معاها اتمنى اكون افدتك ولا في حاجه

Answer

لعل ما مريتى به يا اختى سيكون سبب فى نضجك وقوتك النفسية بعد ذلك ، فعلى قدر الالم على قدر الحكمة والعلم بعد التعافى .. عليكى بالتقرب لله بالطاعة ولا تستسلمى ابدا للوساوس فهذه الوساوس هى اوهام لأن تجاربنا تختلف من شخص لآخر .. اعتقد هذه التجربة ستجعل منك مربية عظيمة بعد ذلك ، فأكثر الناس شعوراً بالضعفاء من كان ضعيفا مثلهم يوما ما .. عساه خيراً .. فقط كونى مع الله وتسلحى بسلاح الايمان وتقوى الله والمحافظة على طاعته ولا تسمحى للوساوس أن تسيطر .. كلما جاءت افعلى عكسها فورا .. ستختفى بالتدريج إن شاء الله .

Answer

هدفك نبيل ونابع من نية سليمة ولاكن اختك يجب انها تعيش تجربتها وتأخذ خبرتها ان قعدنا نحميهم من كل شئ مش هيكونوا قوة مقاومة واحنا مش باقيين لهم فهيعيشوا بعدنا بدون قوة مقاومة وده اللي هيأذيهم ويأذي أطفالهم فالحل هو أن تتأقلم وليس تهرب من الألم والسر هو أن تفتحي مجال للكلام الصريح اليومي بينك وبينها ولا تحكمي أو تشمأزي أو تغضبي مهما كان كلامها مغضب لدرجة عالية تقبليها وناقشيها يوميا مثلا قالت وانا في الصف جا ولد وزقني وانا بكيت متقوليش لا لازم متبانيش ضعيفة قولي كان الأحسن انك بعد ما بكيتي تبلغي المدرسة يعني التقبل لان الشخص اللي يتم التنمر عليه هو اللي ثقته ضعيفة وماشي خجول فبيلاقوه صيدة سهلة وضعف الثقة والخجل بسبب عدم التقبل ...بالتوفيق

كيف أصاحب أختي الصغيرة وأمنع عنها أي أذى نفسي قد تتعرض له في مدرستها؟

نفسية

خوف

تربوية

سؤال من احد أعضاء فدني

تم النشر الثلاثاء، ١٨ مارس ٢٠٢٥

4 إجابة

4 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك