السلام عليكم
انا بدأت شغل و هو اني ببيع منتجات طبيعيه اذا كان لمنتجات البيت او للافراد نفسهم او العربيه كل حاجه حرفيا و انا صراحه شايفه ان المجال ده كويس جدا و علي الاقل مش هيضر صحه حد او اي حاجه اتحمل ذنبها بعدين
وزي اي شغل انا بعرض منتجاتي على كذا صفحه و خاصه الواتساب بس للأسف الناس مش متقبله الفكرة او مش عارفة الصراحة اي الي هما مش مقتنعين بيه بس بسبب ده في ناس كتير بتخرج من الجروب و انا بتأثر اكيد بسبب كده و بحاول ادخل ناس تاني و تقريبا بيقعدو فتره و يخرجوا فأنا عايزه اعرف ازاي ادخل ناس بشكل كبير و ليه اصلا الناس بتخرج و اي حاجه متعلقه بالشغل لاني حاسه اني واقفه مكاني م بتحرك و شكرا اوي لكل حد هيفيدني 💗🎀
السلام عليكم، أولًا، ربنا يوفقك في شغلك وإن شاء الله يرزقك من فضله وتقدري تنجحي فيه. بالنسبة للمشكلة اللي بتواجهيها فخليني أقول لك إن التسويق مش مجرد إنك فتحتِ صفحة أو جروب عشان تسوقي لشغلك أو منتجاتك. التسويق علم ومجال كبير وله أسس وخطوات مهمة لازم تعرفيها عشان تعرفي إزاي تجذبي عملائك ويتحولوا من مجرد زوار إلى عملاء محتملين وبعدين عملاء حقيقيين وتتدرجي معهم لمرحلة بناء الثقة والولاء. ممكن أنتِ دلوقتي مش فاهمة جمهورك المستهدف أو مش عارفة تحدديه فبتوجهي رسائل غلط في طريقة إعلانك والجمهور العام اللي بتستقطبيه للصفحة بيخرج لما يلاقي إن مش اهتمامه أو الحاجة اللي بيدور عليها. فأنتِ محتاجة الأول تعرفي هل زوار صفحتك دول هم أصلا جمهورك المستهدف، لو مش فاهمة جمهورك او مش محدداه أصلًا مش هتقدري تستهدفيه صح. مش هقول لك وقفي شغل لحد ما تتقني تسويق، خلي الصفحة شغالة عادي وابدأي من دلوقتي شوفي كورسات تسويق واتعلمي الأساسيات اللي تساعدك تمشي صح. إزاي تحددي جمهورك وفين توصلي له وإزاي تخاطبيه، إزاي تكتبي أصلًا البوستات اللي تجذب جمهورك لأن ده كمان بيفرق كتير. فيه كورسات كتير على يوتيوب، فيه كورسات مجانية تقدري تبدأي بها ولو عندك إمكانية مادية حاليًا تاخدي كورس مدفوع هيكون أفضل بس الأول تشوفي آراء الناس اللي اشتركت بالكورسات قبل ما تشتركي في واحد. شوفي السؤال ده فيه بعض الترشيحات لكورسات تسويق، إن شاء الله تفيدك. https://www.fedni.net/q/54635242/ما-هو-افضل-كورس-مجانى-على بالتوفيق إن شاء الله.
تم النشر الثلاثاء، ٢٢ أبريل ٢٠٢٥
أي حاجة في بدايتها بتكون صعبة خصوصا أما تكون حاجة مش مألوفة بس التجارب بتقول إن ع قد تمسكك بحلمك ومعافرتك ع قد ما هتلاقي النتيجة اللي تعوضك انت ممكن تعملي عينات مجانية مثلا ع سبيل التجربة ممكن تبدأي تروجي لمنتجاتك ف العيلة مثلا والجيران والأصحاب حاولي يكون عندك فكرة ع التسويق أو تعرضي ف الأماكن المتخصصة لمنتجاتك مقابل نسبة من البيع خديها خطوة خطوة ومتستعجليش إن شاء الله ربنا هيكرمك وهتبقي مش ملاحقة ع الأوردرات
تم النشر الثلاثاء، ٢٢ أبريل ٢٠٢٥
وعليكم السلام ورحمة الله وبركاته، أختي العزيزة، من الرائع أنك بدأتِ مشروعًا في مجال بيع المنتجات الطبيعية، وهذا يعني أنك تسعي لخلق قيمة حقيقية لصحتك وصحة الآخرين. سأقدم لكِ بعض النصائح التي قد تساعدك في تحسين تجربة التسويق وجذب المزيد من العملاء: فهم السوق المستهدف : حاولي دراسة وفهم عملائك المحتملين. ماذا يحتاجون؟ ما هي اهتماماتهم؟ هذه المعلومات ستساعدك في تحديد كيفية تقديم منتجاتك بشكل أكثر فعالية. تحسين الرسالة التسويقية : تأكدي من أن الرسالة التي تقدميها عن منتجاتك واضحة وجذابة. ضعي فوائد المنتجات وميزاتها بشكل مباشر، وركزي على كيفية تحسين حياة العملاء. التواصل الفعّال : تواصلي بشكل مستمر مع الأشخاص في الجروب وتفاعلي معهم. اطرحي أسئلة، وشاركي محتوى ملهم ومتعلق بالصحة والعناية الذاتية. تقديم تجارب مجانية : حاولي تقديم عينات مجانية أو تخفيضات لتشجيع الناس على تجربة منتجاتك. التقييم الإيجابي يمكن أن يجذب عملاء جدد. توسيع نطاق التسويق : بدلاً من الاعتماد فقط على الواتس اب، فكري في استخدام منصات اجتماعية أخرى مثل إنستجرام أو فيسبوك. هناك الكثير من المستخدمين الذين يبحثون عن منتجات طبيعية. التفاعل مع العملاء : قدمي خدمة عملاء ممتازة. استمعي لملاحظاتهم وكوني موجودة للإجابة عن استفساراتهم. هذا سيساعد في بناء الثقة والولاء للعلامة التجارية الخاصة بك. التعلم المستمر : ابحثي عن دورات تدريبية أو ورش عمل في مجالات التسويق والمبيعات. ذلك سيساعدك على تحسين مهاراتك وزيادة فرصك في النجاح. وأخيرًا، تذكري أن النجاح يتطلب الوقت والجهد والصبر. لا تستسلمي، وكوني مرنة في أسلوبك وكُنٍ قادرة على التكيف مع متطلبات السوق واحتياجات الزبائن. أتمنى لكِ كل التوفيق في مشروعك! 💗
تم النشر الثلاثاء، ٢٢ أبريل ٢٠٢٥
اعملي صفحه ع الفيس الانستجرام وتصوري منتجات بصور جذابه لو استعنتي بحد مصور يكون افضل . وحاولي تقللي السعر لأن المصريين بيدوروا ع الحاجه الرخيصه حتي لو كانت سيئه ، مش تقلليل لشغلك ، ولكن كبدايه خلي الاسعار رخيصه حتي لو بتمن جملتها، لما تتعرفي زودي السعر بس بردو مش كتير . وربنا يوفقك
تم النشر الثلاثاء، ٢٢ أبريل ٢٠٢٥
لعرض السؤال في فدني اضغط هنا