مش عارف ابدأ ازاي.. بس انا كنت بعمل ذنب من فتره مش بعيده وعانيت جدا عشان اوقف الذنب دا وكان صعب جدا بس بدون اي سابق انذار وقفته وعملت كدا لله وبدات اقرب لربنا ومخلص ف كل حاجه بعملها لله ...
من ايام كنت بتفرج ع فيديو لحد توفي (استشهد) فكنت عمال افكر ي يا ترى هو فين دلوقتي وبيعمل ايه ؟ ويا بخته وكنت نفسي اكون معاه ف الوقت مرة واحده لاقيتني عمال اعيط جامد ومش عارف انا بعيط ليه ؟ وايه السبب ومش عارف اوقف نفسي ولقيت روحي بعدها بتطلع !! انا عارف ان في ناس كتير مش هتصدقني لو قلت كدا بس اقسم بالذي رفع السموات ان لمست الموت وحسيت احساس الموت وروحي اتسحبت مني جسمي كله تقل (ماكنتش لسه صليت الضهر) قلبي كان عمال يدعي ويقول يارب ما أموت غير لما اكون مصلي و روحي عماله تتسحب ( لحظات مليانه ندم ...وقد ايه الدنيا ماتسويش والدنيا ضئيله جدا وفي لحظه واحده كل حاجه ممكن تروح ) .... كنت لوحدي ف الشقه ومفيش حد معايا انا حسيت اول لما دعيت او قلبي دعي انه ربنا مايقبضش روحي غير وأنا مصلي الضهر وهو راضي عني وكأن روحي رجعت تاني فضلت نص ساعه جسمي تقيل وبحركه بصعوبه من التاثير اللي حصل . انا مش عارف ايه دا ولو حكيت لحد عمره ماهيصدقني .حد عنده تفسير ؟
فى ناس كتير حست باحساس انها قربت من الموت او كأنهم جربوه ورجعوا للحياه تانى فى حاجات كتير هتفضل بلا تفسير لانها من الغيبيات اللى هتعرفها بس لما الدنيا تنتهى اللى حصل معاك وارد يكون رسالة من ربنا ...عشان يقولك ما تتمناش الموت الا لو انت مستعد ليه ...لانك بالفعل لقيت نفسك محتاج لسه تعمل حاجة تطمن نفسك بيها ان حياتك بتنتهى كويس اتعامل مع اللى حصل ده انه من رسائل ربنا ليك واللى بتأكدلك انك ايمانك هيفكرك فى اصعب اللحظات بالاعمال الصالحه ان شاء الله ولو لسه الذنب القديم انت ندمان عليه فابشر لان باذن الله دى من علامات قبول التوبة عن هذا الذنب
تم النشر الأربعاء، ٢٥ سبتمبر ٢٠٢٤
ربنا يثبتك ويوفقك لما يحب ويرضى ويتوفاني وانت والمسلمين وهو راضٍ عنا. التفسير اللي عندي من الناحية العلمية... انت زعلت اوي فضغط الدم قل وضربات القلب قلت فحصل هبوط في الدورة الدموية والدم اللي رايح للأجهزة فحسيت بإحساس التقل والإغماء دا.
تم النشر الأربعاء، ٢٥ سبتمبر ٢٠٢٤
السلام عليكم ورحمة الله وبركاته احيانا بتكون حاجه زي كدا بتحصل للانسان عشان هوا متأثر خاصة انك زي ما بتقول بقالك فتره كويسه بطلت تعمل ذنب معين وربنا يثبتك علي الصح امين امين فالشعور اللي انت حسيته دا بيبقى زي صدمه من انك مثلا مكنتش متوقع ان حاجه زي دي تحصل مثلا مع الشخص ده كدا متخفش وخليك زي ما انت وربنا يحفظك ويبارك في عمرك امين
تم النشر الثلاثاء، ٢٤ سبتمبر ٢٠٢٤
أولًا ربنا يعينك ويثبتك على الهداية والطاعة. من الممكن الإحساس الذي مررت به ناتج من البكاء الشديد ودخولك في حالة من نوبات الهلع نتيجة شعورك الشديد بالقلق والخوف ومن أعراضها شعورك بالاختناق الشديد والدوار وكأن روحك تنسحب والشعور بالانفصال عن الواقع. اعتبر شعورك باقتراب الموت هذا إنذارًا ليعينك على الثبات في عدم العودة للذنب والمواظبة على الصلاة والاقتراب أكثر من الله. أعمارنا مقدرة وفي اللحظة المقدر لنا الموت لا نملك أن نمنعه وما دام في العمر بقية الحمد لله فاغتنمها في الأعمال الصالحة حتى تحين لحظة الرحيل. بالتوفيق.
تم النشر الثلاثاء، ٢٤ سبتمبر ٢٠٢٤
لعرض السؤال في فدني اضغط هنا