هل الطرف ده خطيبك ولا مجرد ارتباط أو صحوبية؟ إذا مكنش فيه علاقة رسمية بينكم فأنتِ مش محتاجة تسألي إزاي تنهي العلاقة، أنتِ المفروض تاخدي الخطوة وتقطعيها من نفسك. إذا وضعنا على جنب إن العلاقات دي حرام شرعًا في الأساس فخلينا كده نشوف الوضع اللي انتِ فيه ونحكم. شخص أنتِ شايفة إنه بيتجاهلك وشايفكِ تقيلة عليه ومجرد بيقول لك إنه بيحبك وخلاص لما بتسأليه، هل شايفة الشخص ده يستحق التوهان والحيرة اللي انتِ فيها؟ شايفة إنه يستحق لحظة إضافية في حياتك وأنتِ مترددة تاخدي الخطوة وتخرجي من علاقة حرام ومؤذية لك؟ بما إنك مش عارفة تاخدي الخطوة فأنتِ في حالة تعلق مرضي. أنا عارفة إن مشاعرك مش بضغطة زر هتتمسح لكن اللي بشوفه في حالات التعلق دي إن البتر أفضل علاج... مفيش تدرج، مفيش مسكنات، مفيش مبررات وتواصل عشان نلاقي حل يمكن يكون بيحبني بجد ويمكن ويمكن. لأ، بتر على طول. عززي نفسكِ وابعدي عن أي علاقة أو شخص يكون مؤذي أو مش عامل لك اعتبار أو شايفك تسلية لحد ما يمل وبعدين يقول لك مع السلامة، أنا لقيت إن مش هينفع نكمل سوا. خذي قرار واضح وقاطع مع نفسك. ومهما تعبتِ في البعد أو رجع الشخص ده يتحايل عليكِ عشان ترجعي له إياكِ... افتكري إنه حرام وافتكري إنك تستحقي شخص يقدركِ ويحافظ عليكِ.
تم النشر الاثنين، ١٨ نوفمبر ٢٠٢٤
0 تعليق
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك