انتي عايزة ايه؟ كل اللى بيعمله دا كان بيعمله من قبل ما يعرفك وفي الخطوبة ، مظهروش في حياته فجأة بعد الجواز ربنا فضحه قصادك، واول حاجة لازم تقوليها لنفسك انها مش غلطتك ولا انتي مسؤولة عن سوء سلوكه و سوء ادبه مافيش راجل محترم هيبقى داخل الجواز جديد ، وواخد معاه كل العلاقات دي ، حتى لو كان له تجارب كتير قبل الجواز، بينوي يتوب ويبدا صفحة جديدة مع زوجته في حلال ربنا .. لكن انه بعد 15 يوم جواز رجع يكلمهم ، يبقى هو عنده خلل كبير في اخلاقه ودينه دي لو هنسميها خيانة ، هتبقى انه بيخون ثقتك فيه، بس قبلها هي ذنوب ومعاصي ، هو اللى بيعملها في حق نفسه .. ولو كان بيحب اي واحدة فيهم كان اتجوزهم ، متصدقيش كلامه معاهم ، كلها لعب بالمشاعر واستغلالهم مش اكتر من كدا المواجهة معاه دلوقتي مش هتفيدك بحاجة ، ممكن يبجح ويقولك انا راجل انا حر اعمل اللي انا عايزه فكري كويس انتي عايزة ايه؟ عايزة تكملي معاه؟ عايزاه يكون اب لولادك بعد كدا؟ لو ايوة ، يبقى هتعتبري كل اللي بيعمله دا في الزبالة ، غلطات وذنوب شايلها في رقبته ، ومتدوريش وراه تاني ، واتعاملي معاه بحسب طريقته في التعامل معاكي، اللى مفروض مبنية على الاحترام المتبادل ورعاية بعض ، اذا هو مسافر برة ، في الغالب هينزل شهر في الاجازة ، يعدي في هدوء ويمشي وانتي هتكوني المسؤولة عن حياتك كاملة وليكي عنده المصاريف، اذا موافقة على نظام العيشة دي خلاص كملي فيها. اما بالنسبة للعصبية والضرب فدي حاجة مينفعش خالص يتسكت عليها ، خدتي موقف واهلك وقفو وقالو طلاق ، وانتي قلتي لا عايزة تكملي ، لازم تعرفي ان اللى بيمد ايده مرة ممكن يمدها تاني وتالت وعاشر وكل مرة بتبقى اسوء من اللى قبلها .. فلو حصل واتكرر دا لازم تاخدي موقف جامد حماية لنفسك وحفاظ على كرامتك لسنين قدام. لو لا مش عايزة او مش هتقدري تكملي، يبقى هتعرفي اهلك باللي بيعمله وسيبي الموضوع يمشي زي ما يمشي، وخدي قبلها سكرين شوت من الشات والكلام اللى بينه وبينهم ووريهم الكلام دا عشان ميرجعش ينكر ويقول دي بتكدب وبتعمل مشكلة وانا معملتش حاجة ... استخيري ، واهتمي بنفسيتك تبقى احسن، واعملي اللى شايفاه الانسب ليكي ولحياتك ، انتي ادرى بظروف حياتك في المكان اللى انتي عايشة فيه ، واذا شايفة ان فيه صفات في شخصيته تخليكي تقدري تكملي حياتك معاه رغم اخطاءه وعيوبه .. يبقى القرار ليكي وانتي الوحيدة اللى هتتحملي نتيجته محدش هيعيش مكانك ولا هيحس باي ظروف هتعيشي فيها ..
تم النشر الخميس، ٨ أغسطس ٢٠٢٤
3 تعليق
نقطة المصروف دي قصة تانية ، مفروض دا حقك ، يعني حقك تطلبي مصروف لاحتياجاتك واكلك وشربك دا واجب عليه ومافيش اي احراج فيها متتكسفيش تطلبي مصروف لاكلك وشربك واحتياجاتك ، اذا مش عارفة تطلبي من حماتك ، دخلي باباكي او مامتك تتكلم معاها انك بتتحرجي ومحتاجة مبلغ كل شهر للحاجات اللي محتاجاها لنفسك او للتلاجة ... ويتكلمو بالهدوء ويتفاهمو معاها فيها اذا هو دا نظامه في بيتهم .. ان الفلوس تتحول لحماتك ، يا يحول جزء ليكي لوحدك منعا للاحراج ... اتعاملي مع كل مشكلة لوحدها عشان تقدري توزني امورك وتعرفي تتعاملي مع زوجك وحماتك .. الجواز مسؤولية ومليان تفاصيل ، فطولي بالك اذا عايزة تكملي معاه
تم النشر الخميس، ٨ أغسطس ٢٠٢٤
كان ردو لا ماترحيش عند مامتك
تم النشر الخميس، ٨ أغسطس ٢٠٢٤
كل إلى حضرتك قولتى صح هوا دلوقتي مش مبين اى حاجه قدمى وبيتكلم على ان مفيش حاجه انا من جويا مش قدره اكمل في كدا ومشكله حتى لو كملت هوا مش مهتم بموضوع انى محتاجه مصريف او لا ماشي بقالو تلات شهور انا مش معايا ولا جنيه اصرف اكل وشرب وسبنى مع مامتو على أساس اني معاها بس انا عندى احتياجات خاصه هوا مش مقدر كدا ونا قولت هقدر ظروفو انو مش معاه فلوس بس في مره ونا بكلمو عن الموضوع دا قالى انو هيبعت كل الفلوس لمامتو ولو انا عوزت حاجه ابقي خدى بس انا بتحرك من مامتو ومقدرشي اتكلم معها في حاجه ذي كدا حتى في الأكل والشرب هيا مش بتهتم بكدا ممكن تعمل اكل يوم وبقيت الاسبوع مفيش الا بقا لو سلفتى نزلت اكل عندها أو حاجه ولم جيت اقولو هروح عند ماما
تم النشر الخميس، ٨ أغسطس ٢٠٢٤
لعرض الإجابة في فدني اضغط هنا
عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك