انا كنت مرتبطه بشخص خمس سنين وحصلت مشاكل كتير بينا بس كنا مع بعض وكان بيحبني لحد فجاه ظهرت وحده فحياته هو شاف قد اي بتحبه انا غيرها مبعرفش اعبر عن حبي بس هو كان بيحبني انا بس حاسس ان الحياه صعبه معايا وحب حياته معاها لاكن محبهاش هي ولم عرفت اختارني انا وانا مستحملتش اكمل معاه بعد اللي عرفته وسبته وهو كمل معاها وانا طلعت من حياتهم بعدها بسنه رجعلي وقالي عايزك وانا وهي سبنا بعض وانا بحبك انتي وفعلا صدقته لاني كنت لسا بحبه انا كمان وبعدها بكام شهر رجعت البنت دي وظهرت فحياته تاني وهو سمح انها تدخل حياته تاني وهي كانت بتحاول ترجعه وانا لم عرفت دا لتاني مره هو قالي عايزك انتي بس معرفتش اقولها فوشها اني مش عايزها ودا غلط مني ولم قولتله خلاص عرفها أن احنا مع بعض راح عرفها وهي عرفت يعني أنه عايزني انا دلوقت السؤال هل دا شخص بيحبني فعلا واقدر اكمل حياتي معاه ولا هو مش فارق معاه يكون مع اي وحده فينا وهو حاليا عايز يخطبني بس انا بقيت خايفه اتصدم فيه تاني وفنفس الوقت بحبه ومش عارفه ابعد
خلينا نضع على جنب مسألة إن العلاقات غير الرسمية والصحوبية شرعًا حرام ولا ترضي ربنا. هنتكلم عن المشكلة وقراراتك الغلط اللي أخدتيها ولسه بتسألي هل تكملي ولا لأ؟ المفروض من أول مرة تركك عشان واحدة ظهرت بحياته كنتِ قفلتِ الباب تمامًا ورميتِ الشخص ده من حياتكِ وتفكيركِ. خلينا نقول إنك رجعتِ في أول مرة بسبب إنك كنتِ لسه بتحبيه ومشاعرك خلتك تتعامي عن كرامتك وعن خيانته... ترجعي تاني مرة ليه بعد ما سمح لها عادي ترجع حياته؟ وتفكري تكملي حياتك معه كمان؟ مين قالك إنه مش بيتسلى بكم انتم الاتنين أصلا؟ ومين خلاكِ واثقة إنه بطّل يكلمها؟ ما يمكن كدب عليكِ عشان تبطلي تسألي؟ يمكن قالها فعلا وهي مش عندها مانع تكون في حياته وانتي موجودة؟ فرضًا وافقتِ يتقدم لكِ... متأكدة إنه مش هيرجع لها بعد أول أسبوع من زواجكم... ده إن مرجعش في خطوبتكم؟ متأكدة مش هيعرف واحدة تانية وهيكون مخلص لكِ؟ أسئلة كتيرة واحتمالات ملهاش حصر وهتفضلي عايشة حياتك في شك ناحيته. الثقة راحت مرة بيبقى مستحيل ترجع زي الأول... هيفضل فيه شك وهيقلب حياتك بعد كده لجحيم. نصيحة مني... عززي نفسك وحطي كرامتك في الدرجة الأولى... حب من غير كرامة وإخلاص وثقة يبقى أي كلام. إن شاء الله ربنا يكتب لك الخير.
تم النشر الخميس، ٨ أغسطس ٢٠٢٤
ولا بيحبك انت ولاهي بيلعب بيكوا فعلا وواضح انه عايز يكوش علي كله
تم النشر الخميس، ٨ أغسطس ٢٠٢٤
يا جميلة، أنا عارفة إنك في وضع صعب جداً، وده طبيعي إنك تحسي بالقلق والخوف. أول حاجة، لازم تفكرين في مشاعرك واحتياجاتك. هو صحيح إنه رجعلك بعد فترة، لكن ده مش معناه إنه فعلًا بيحبك بصدق، خصوصًا لما يكون فيه شخص تاني يدخل حياته. لو هو فعلاً بيحبك، المفروض يكون واضح معكِ وما يحطش نفسه في وضع يخليك تتألمي. حاولي تتكلمي معه بصراحة، قولي له إنك مش مرتاحة لما يحصل، واسأليه إزاي بيشوف المستقبل بينكم. كمان، حاولي تحطي حدود لنفسك. إذا حسيت إنه مش قادر ياخد قرار نهائي، أو إن علاقته مع البنت التانية بنتج عنها شكوك، يبقى ممكن يكون الأفضل لكِ إنك تعيدي النظر في قرار البقاء معاه. عززي ثقتك بنفسك وفكري في السعادة اللي تستحقيها. لازم تحبي نفسك أولاً وتعرفي إن انتِ تستحقي علاقة صحية ومستقرة. إذا حسيت إنه ممكن يسيبك تاني، مش تستاهلي تعيشي في خوف وعدم استقرار. خذي وقتك وفكري في اللي يريحك ويخليك سعيدة.
تم النشر الأربعاء، ٧ أغسطس ٢٠٢٤
للاسف هو مش بيحبكم انتي ولا هي هو بيلعب بمشاعركم و تلاعب عليكي و اقنعك انو مكنش بيحبها و بيحبك انتي بس لازم تتخطي حبك ليه خالص و تسبيه لان فعلا ده شخص مينفعش تثقي فيه انو يبقي جوزك الي يخون مره بيخون الف و كمان معترف و كرر الغلط مرتين ف معلش يا حبيبتي سبيه وادعي ربنا يعوضك عن كل حاجه عدتيها وحشه
تم النشر الخميس، ٨ أغسطس ٢٠٢٤
بصراحة دة مش واضح ومش مضمون
تم النشر الجمعة، ٩ أغسطس ٢٠٢٤
لعرض السؤال في فدني اضغط هنا